Mipa leh mipa chu innuai siah siah mai tur...

Mipui chu an innek a, an au hluah hluah reng bawk. Inhnek tura rawn chhuakte chuan WWE star-te ang maiin lawm an hlawh a, an rawn lan phat atangin mipui chu an lo au dur dur zel.

Contact Sports Centre chu hmun laili-a mi ni lo mah se a lun mep mep hle a, a chhunga leng ve lote pawh a bul velah an ri luih luih thin. Hetiang hi Mizoram boxing hian a tawng lo rei tawh viau awm e!

LPS Pro-Fight hian hlut a hlawh hle a, a huaihawttute pawh an phur hle. He TV Show hian Zofate zingah boxing a kaitho dawnin an hria a, an phur ngang mai.

Mission Vengthlang nu pakhat chuan a fate mizia sawiin, "An inhnek arh arh mai," a ti!

A fate chu hmeichhe pathum an ni a, a upa ber pawh sikul kai tir lek a ni. A naupang ber, kum 1 mi awrh pawhin a u-te a chum ve arh arh thin niin a sawi! Hetiang hi tunlai hian sawi tur a tam mai.

Pro-Fight hi a hmunah mi engemaw zatin an thlir a, chu aia tam fe te chuan TV atangin an lo thlir bawk. TV hit tak a ni a, infiamna lamah hetiang khawpa Zofate hlut hlawh hi a la awm lo mai thei. An hla - "Mipa leh mipa chu inngur chher chher mai tur... Mipa leh mipa chu innuai siah siah mai tur..." tih te chu mi tam takin an lo sa ve zut zut thei.

World Cup football leh Euro te'n Aizawl bazar a nghawng thin a, tualchhung infiamna erawhin a nghawng ngai lo tiin a sawi theih ang. CYMA-in football tournament an buatsaih chang hian football thawmhnaw hralh a kal thin a, mahse, a leitu chu a inkhel-a te an ni thin. Tun tumah erawh a tel ve miah lo, naupang te tein boxing thuam an lei tlat!

LPS Pro-Fight hian entu a ngah hle a, sawi zui lah a hlawh. Inchhung lum atangin a en theih a, naupangte'n boxing an tui phah hle nia ngaih a ni. Aizawla infiamna bungrua leh hmanraw zuarte chuan boxing thawmhnaw an hralh tha hle a, hralh tur an nei daih lo hial.

Sports goods dawr Lalhema & Sons te chuan boxing glove leh boxing hmanrua an neih ang ang an hralh zo ti tawh a, an chah belh mek. Skipper Sports Goods pawhin boxing glove lei tur an nei lo.

"Boxing hmanraw lam hi kan ngah lo hrim hrim a, boxing leh tennis hmanrua hi chu Aizawlah hralh a kal ngai loh avangin kan chah ngai vak lo. Mahse, tunlai chu an rawn zawt nasa khawp mai," tiin Skipper nghaktu chuan a sawi.

"Boxing glove leh boxing equipment hi naupangin an rawn zawng a, an nu leh pa te'n an rawn enpui nasa bawk. Kan neih ang ang chu kan hralh zo a, kan chah leh mek," Lalhema & Sons nghaktute pawhin an ti.

A zuarte sawi dan chuan boxing glove-in hralh a kal ber a, boxing kekawr leh gumshield hralh a kal bawk. Boxing tawnzau erawh naupangte'n an awt vak lo, Pro-Fight-ah an hak ngai loh vang a ni mahna.

Kum 5-13 inkara mite'n boxing thawmhnaw vel hi a zawrhnaah an en nasa a, sikul naupangte'n sikul banah an en thin bawk. Sikul naupang zingah pass lawm nana boxing glove lei an tam thu a zuarte chuan an sawi. Tunlai hi first term exam result chhuah hun a ni.

Y2Goal Agencies pawh boxing thawmhnaw zuar ngai lo ni mah se naupangte'n an zawt nasa hle a, a neitu Mamuana chuan: "Local event-ah chuan hetiang khawpa market nghawng hi a la awm lo mai thei," tiin a rinthu a sawi.

LPS Pro-Fight chief organiser Lalsawmliana Pachuau (LPS) chuan Pro-Fight chu boxing tihhmasawn nana buatsaih an nih thu sawiin, tuna an thlen chinah chuan mipuiin boxing an tui phah hle nia an hriat thu a sawi.

Read more...

Hei hian boxing a chawi nung ang: Boxing coach

Mizo zinga boxing coach (zirchhuak) hmasa ber R Biakliana, Zoramthanga te, Jenny R Lalremliani te leh Mizo boxer engemaw zat lo chherchhuak tawhtu R Biakliana, Mizoram Amateur Boxing Association (MABA) secretary general chuan tiang hian Zozam Weekly a hrilh:

LPS Pro-Fight hian Mizoramah boxing a chawinung ang em?
Chawinung ang. Hei a chawinung mekin kan hria. Mipui hian Pro-Fight vang hian boxing an tuipui phah a, hei hi lawmawm kan ti khawp mai a, tin, Mizo naupangte'n boxing khelh an chak phah te pawh kan ring.

Mizoramah boxing hian hun engemaw chen chu mipui a kokhawm zo tawh lo niin a lang a, hei hi eng nge a awmzia?
Nia, hei hi sawi thiam a har khawp mai a... state dang an rawn kal te a nih loh chuan local-ah ringawt hi chuan mipui hi kan kokhawm zo lo chu a tih theih a, tin, football-ah pawh tun hma deuh kha chu an pha tawh chuang lo a, tualchhungah ringawt hi chuan mipui kohkhawm chu a har khawp mai. TV te kan lo nei fer fur tawh a, thil hmuhnawm tak tak, en tur hi a tam lutuk a, he'ng te hi a chhan a ni thei ang em?

Kum 10 vel kal ta thleng kha chuan Mizo boxer te'n hriat an hlawh a, mipui pawhin an hlut a, tunah chutiang a ni ta lo a nih chuan Mizoram boxing hi a tlahniam tihna a ni thei em?
Nia, boxing zir chak hi kan ngah lo. Amaherawhchu, kan tlahniam em tih hi chu chhut tham chu a awm. National level-ah hian state dang an thang nasa em em a, min rawn tlanpel a. Keini kan tlahniam ni lovin midang an than avangin kan dinhmun a lo inthlak ta te pawh niin a lang. Tun hma ang chu kan ni tawh lo ngei alawm.

Amaherawhchu, kan boxer-te an tlahniam tihna chu a ni lo, boxer tha tak tak chu kan nei. Mi state-in an neih ang infrastructure te hi nei ve ta ila, mi state-in an tih theih ang hi ti ve thei ta ila chu kan sang ngawt ang. Tuna kan kal danah chuan national-ah te kan han intir dawn a, kan inkokhawm a, rei lo te training kan inpe chuk chuk a, kan intir liam ringawt a. Hetiang ringawt hi chuan thlen san a har a ni.

Tin, sawi tawh angin, mipui min phurpuina hi kan mamawh a, chu chu tunah hian kan hmu mekin ka hria a, kan lawm khawp mai.

Sum lama harsatna vang a ni bawk em?
Sum hi hi Mizoram State Sports Council atanga budget kan hmuh hi a ni mai a, chu chu training inpekna leh zinna ngawr ngawr bakah championship huaihawtna daih ngawr ngawr hi a ni mai.

Sponsor te hi kan zawng ve thin a, mahse, kan hmu zo lo tiin a sawi theih. Aizawla sumdawng hausa tak te pawh hian Rs 2000 vel bakin min sponsor ngam lo.

Kan hriat tur chu - boxing hi kan milian fate hian an khel lo a, kan tawng lo haw lo se, kan naute hi chhungkaw harsa tak taka mite an ni hlawm a, ei han titha thei pawh an ni lo. Training han pek dawn pawhin bus fare takngialah pawh harsatna an tawk thin. Amaherawhchu, hei hian tumruhna a pe ve thung.

Boxing hi Mizote khelh chi a ni tak zet em?
Ni e, Mizo naupang hian boxing hi an thiam, ti ngai lo rau rau-ah pawh Mizo hi chu kan tha hrim hrim. Pro-Fight-ah pawh hian training tha dawng se thleng sang thei tur an awm nawk mai.

Read more...

A ruh no no chhuakah

1991-ah khan Mizoram chuan NE Sports Festival a thleng a, boxing chu Mission Vengthlanga Contact Sports Centre-ah khelh a ni. Khami tum khan boxing-ah en man an khawn ngam daih tawh. Vawiin thlengin Mizo zingah hian infiamna lamah football, boxing leh Mizo inchai (palian) te bak en man lak ngamna a awm lo. Mahse, a ruh no no an chhuah thinna game - boxing chu a ruh a no deuh nge, mipui a kokhawm zo ta tlat lo. Hun engemaw chen a ni ta.

1990 November-ah Mizo tlangval Zoramthanga chu MRF World Cup-ah pathumna a ni a, chu'ng lai chuan Zofate zingah boxing thawm a ring thei hle.

Zoramthanga bakah boxer dang - Ngaihawma Ngente, Ramhluna Ngente, Ngurvunga, Lianthuama, Lawmkima, Chawimawia, Vanlalsawma leh midangte chu mipa naupangte 'star' an ni a, media lamin tualchhung infiamna lam an puanzar chuai chuai hma ni mah se, Mizo boxer-te hming a thang thin a nih kha.

1985-ah khan India sorkar chuan SAI (Sports Authority of India) hnuaiah Special Area Games Scheme a kalpui tan a, chu scheme hnuaiah chuan Dr Sarangapani, sports scientist leh a nupui anthropologist te chu Mizoramah an rawn tir a nih kha. Anni nupa hian contact sports (taksa innawkna lam) chu Mizote tih chi-ah ngaiin rawtna an thlen a, 1989-ah SAI contact sports lamah Aizawlah bul an rawn tan ta a ni. Boxing leh judo-ah an tan a, 1990 atangin boxing coach tha tak MK Rai chuan Aizawl a thutchilh ta.

MK Rai-a hnuaiah Mizo naupangte'n boxing an zir ta a, 1990-ah Russian coach Anatoli Volkov-a'n rawn hrualin, 1991-ah Cuban coach IB Fernandez a'n a rawn hrual bawk.

1981-ah khan Senior National Boxing Championship-ah Mizo boxer te an kal ve a, chu chu Mizoram aiawha Miz boxer-te an fehchhuah hmasak tum a ni. Chumi tuma boxer R Biakliana chuan NIS (Patial) hnuaiah boxing coach a zir zui a, ani lo chhuah hnuah Mizo naupangte'n coach pangngai hnuaiah boxing an zir ta.

1985-ah khan R Biakliana hian Sub-Junior National Boxing Championship-ah Mizo naupang a hruai a, hei hi India Amateur Boxing Federation hnuaia MABA an inziahluh (affialiate) hnua Mizo boxer te fehchhuah hmasak tum a ni. Kha kha Mizo boxer te'n mumal taka coaching an dawn hmasak tum a ni bawk awm e.

Chumi tum chuan Lalchawimawia leh Lalsiamliana te'n gold an la a, chu'ng laia R Biakliana hrualte chu boxer lar an ni zui deuh vek tiin a sawi theih ang. Boxing lama 'generation' hmasa ti te pawhin an sawi theih ang.

Anniho hnu-ah hian SAI naupangho, MK Rai-a hrualte an rawn chhuak a, Rosema Colney, Zothanmawia, Lalnuntluanga, Lalthangliana, Robert, Lalneihtluanga, Jonathan, J Lalrammawia leh midangte chu sub junior level atanga India ram hriat hlawh an ni.

Mahse, anniho hnu-ah hian Mizo boxer-te thawm a ring ta vak lo, Jenny thawm tih loh chu.

MABA chuan inelna hrang hrang an han huaihawt thin a, mahse, an thawm a ring tak tak thei tawh lo. Generation hmasa leh a dawttute hun lai kha chuan Lammual chu sawi loh, Mission Vengthlanga Contact Sports Centre-ah pawh mipui an innek luih luih thin. Tunah erawh thil a dang ta.

Boxing coach, MABA secretary general ni bawk R Biakliana chuan India ram state dangin hma an sawn chak lutuk vangin Mizoram dinhmun a hniam ta niin a hria a, Mizoram boxing chu hun laklawhah a ngai.

1985-a Sub Junior National Championship-ah Mizo naupang an fehchhuah dawn khan ani hnuaiah hian mumal takin an inzir a, chu chu naupang level-ah chuan India ramah a hmasa pawl an ni. Chu'ng mite chu an lo thanglian a, national level-ah pawha boxer hriat hlawh tak tak an ni zui a, Mizoram dinhmun chu a sang hle. State dangin hma an rawn sawn a, chutih laiin Mizoram boxing chuan mipui a lo huikhawm zo ta si lo, chu hun laklawhah chuan Zoram boxing hi a ding rih tih chu a ngaihdan a ni.

Tunah chuan LPS Pro-Fight zarah Mizoram boxing chuan mipui a hip leh ta a, R Biakliana chu a ngaih a tha rih.

Boxer hmingthang thin Ngaihawma Ngente chuan: "A pawimawh chu mipuiin boxing an tuipui em tih hi a ni a, hei, kan hriat angin Pro-Fight vangin mipuiin boxing an tuipui mek a, hetiang an ngaihtuah chhuak hi LPS ka fak a, an chungah ka lawm bawk. Mipuiin an tuipui phawt chuan hma kan sawn ang tih ka ring," tiin a ngaihdan Zozam Weekly a hrilh.

"Mipui hi kan boxing hian a kokhawm zo tawh lo tih hi zep tur pawh a awm lo, football hian min luahlan deuh bawk niin ka hria. Engpawhnise, a chhan han sawi fak tur chu ka hre lo a, mahse, boxing boruak hi chu a dai khawp mai. Tin, kan tlahniam ve hrim hrim pawh a tih theih ang. Tunah chuan LPS Pro-Fight hian entu a ngah a, mipuiin hman ang khan boxing an tuipui leh ngei ang tih a rinawm," a ti bawk.

"Boxer tha tak tak kan nei a, taima taka bei tang tang peih te pawh kan nei. Mahse, boxing hi mipui rilru-ah a tla na tawh tlat lo. Hei tak hi tuna kan harsatna chu a ni. Boxer ringawtin amahin a bei thei lo a, MABA ringawtin amahin a kalpui thei bawk lo a, eng game-ah pawh mipui an pawimawh. Kan boxing hian mipui a chan a, tunah a hmu let leh dawn niin ka hria," tiin national champion te pawh lo ni tawh thin Ngaihawma Ngente chuan a sawi.

LPS Pro-Fight-ah hian boxer tha tak tak, an tam tia sawiin, boxing la khel ngai lo zingah pawh tha tak tak an tam niin a sawi a, "Han inzir deuh se boxer tha ni thei tur an awm nualin ka hria. Boxing-ah hian talent kan nei a, tun tumah hian talent inphum kan haichhuak niin ka hria," a ti bawk.

Ngaihawma Ngente te 'generation'-a mi T Lalthlengliana pawhin mipuiin boxing an tuipui leh dawn nia a hriat thu leh Mizoramin boxing-ah hma a sawn phah ngei a beisei thu a sawi.

"Mipuiin an hlut hi a hlu a, Mizoram boxing tan hei hi a pawimawh. Chu aia pawha ropui ka tih chu naupangin boxing an lo en ve hi a ni. Hetia boxing an en hian an tui ang a, boxer nih chak te an pung ang tih ka ring," tiin Zozam Weekly a hrilh.

"MABA chu a kal ngaiin a kal reng a, boxer te paw'n theihtawp an chhuah reng a, mahse, mipui kan nei lo hi kan tuar a ni. Tunah chuan mipuiin boxing an tui leh dawn niin a lang," a ti bawk.

MABA hruaitu pakhat Suakchhinga chuan: "Mizo boxer-te dinhmun hi ngaihtuah a ngai. LPS Pro-Fight-ah engatinge miin champion nih an chak? Pawisa fai an inchuh a, hmingthan an hmabak bawk a, theihtawp chhuaha beih tur a awm a ni. Kan boxer te hi boxing-in eng nge a pek tih hi chhut tham a awm asin," tiin a ngaihdan a sawi.

"Mizo boxer te hi chhungkaw harsa tak atanga lo kalte an ni fur a, an tan tih tak zeta boxing khelh te hi a har lutuk. Police-ah te hian lo la ve se chu tun aiin hma kan sawn ang. MR-in peon-ah te tal hian kan boxer te hi kan sorkar hian la ve se chu, sum tlem a zawng tal an nei ve chuan mahni induatna tur te, bus fare te an nei ve ang a, hma kan sawn ang. India ram state dangin chak takin hma an sawn a, an boxer te dinhmun en chuan hma hi sawn lo ziazang an ni lo a nia," a ti bawk.

Read more...

Mizo boxer hmasa

Mizoram Amateur Boxing Association (MABA) te huaihawt boxing inelna en thinte chuan putar pakhat, lu tuak var vo mai, la chak tha tak si an hmu thin ang. He mi hi Sub Thanmawia (MM) a ni a, Zofate zinga boxer hmasa ber nia hriat a ni.

Mizo pa lar Rumliana farnu-a fapa a ni a, a vanglai chuan sipai-ah a tang. Sipai a nih lai hian boxing a khel thin a, 1950-1062 chhung khan boxing hi tih tak zetin a khel a ni.

Boxing hi mahni awmhmunah mahni khelh khelhin a khel a ni lo, proper training a dawng a, mumal taka khelin, sipai inelnaah te a tel thin. Assam Regiment-ah division (regiment 5) champion te a ni thin. Zofate zinga boxing glove bun hmasa ber, proper training dawng hmasa ber tiin MABA hruaitute chuan an sawi.

Sipai atanga a chawlh hnuah pawh boxing erawh a chawlhsan ve lo. MABA-ah executive member kumhlun a ni a, kum 88 mi zet ni mah se boxing hi tih tak zetin a la tuipui a ni.

"Kan pianphung atangin beiseina sang tak ka nei a, tih tak taka bei - Zoramthanga te, Jenny te ang chu an hlawhtling zel a nih hi. Zofate hian tih tak takin he game hi khel ila, khawvel hmuhah kan duai lohzia lantir ila ka duh a ni," Sub Thanmawia chuan a ti.

"Ka chak ber chu, kum 15/16 mi vel nih leha tih tak taka boxing khelh a ni. Tunlai hun ang te hi tawng ve ila, coach tha hnuaiah han inzir ve ila chu thui tak ka thleng ang. World champion ka nih loh paw'n ka thleng sang viau ang," a ti vawng vawng mai.

Boxing a khelh tirhah chuan coach emaw kawng kawhhmuhtu emaw tumah a nei lo; cinema a en a, chuta boxer te tih dan chu chhinchhiahin a zir ve leh thin.

"Zirtirtu ka nei lo, cinema atangin ka inzir thin. Mahni sum sengin ka bei a, chuta tang chuan kan hotute hriat ka lo hlawh ve ta a ni," tiin a boxing khawvel intan dan a sawi.

Tunlai Mizo boxer-te a hmuh dan sawiin, "Hma chu kan sawn a, mahse, kan thlen tur ang kan thleng zo lo," a ti.

"Tunlaiah chuan coach tha tak takin an zirtir a, sang tak thleng tur an ni," a ti bawk.

Sub Thanmawia (MM) hian Mizo thalaite hi thatchhe hlein a hria a, engmah ti tha peih lo ni hiala hriat chang te pawh a nei.

"Kan thatchhe tawh. |hangtharte hi an thatchhia a ni. An thil tih ve pawh hi 'enjoyment' atan mai mai a ni an tih ni," tiin hemi chungchang hi a sawi.

Boxing-a hlawhtlinna atan mipui an pawimawh a ti a, ani ngaihdanah chuan Mizo mipuite hian boxing-ah hian an tih tur an ti tawk lo.

Read more...

Interview : Muanpuii Saiawi

Zai leh rimawi hmanga Pathian rawngbawlin Celebrant Singers-ah a tel a, khawvel hmun hrang hrangah rawngbawlin an fehchhuak thin.

A visa neih hun chhung a tawp a, rawngbawl leh a chak hle. A naupan laia a chak thin IFS tih chu a thinglungah a rawn ri thar leh. Pathian rawngbawlna tur remchang a nih ringin theihtawpin IFS nih tumin a bei ta. A vawi khatnaah Indian Account & Audit Services-ah a tling a, chu hnathawk chung chuan a exam zel tho. A vawi hnihnaah pawh IRS ni thei a ni tawh. Mahse IFS ngei nih tum a nih vangin bei nge sei run dung ti chungin a vawi thumna atan a bei leh a, chutah chuan a duhthusam ngei - IFS ni thei turin a tling ta.

IFS hna a thawh hmaa training an neih lai pawhin a thiante hnenah Bible a sem vek. Hunawl remchang an neih apiangin Pathian thu hmanga inpawl khawmna hun an hmang thin. IFS-ah Best Probationer Award ‘Ambassador Bimal Sanyal Memorial Gold Medal’ a dawng. A thesis ziah ‘The re-emergence of the left in Latin America and its implication in India’ chu thesis tha bera thlan a ni bawk.

South Korea-a a awm hnuah pawh Pathian fak leh chawimawi chu a nuam tih ber a ni. Ram palai hna thawk tura inchher hriamna kawngah Korean tawng zirtu diplomats 30 rual zingah pawh Korea tawng an zirnaah thiam ber nihna a hauh leh.

Muanpuii chuan: “Korean Specialist nih ka duh a Pathian ropuina turin theitawpin ka bei a, Pathian hruainain pakhatna ka ni thei a. ka lawm khawp mai," a ti.

Korean tawngin duh tawkin a tawng thei tawh na a, chapo lo takin, “Tihsual leh sawi sual te chu ka nei ve ang, chanchin thar te pawh ka chhiar ve thei tawh,” a ti.

Nula hmeltha chungchuang a ni lo a, nula ngainatawm tak, Mizoin hang ngaihnobei kan tih ang hi a ni. Vai ramah a seilian a, IFS hna thawkin South Korea-ah India palai hna thawkin a awm mek.

Ram dangah khawsa mah se a ngaihtuahna chu a Mizo hle. Korea-a a a awm chhung hian tunlaia infiamna thangduang ber te zinga mi, Korea atanga chin chhuah Taekwando-ah pawh Black Belt nei thei khawpin a lo han inzir a ni.

Korea-a a awm tan tirh phat atangin thian tha tak tak a nei nghal. Korea ram chhung hmun hrang hrangah a zinkual nual tawh. Tunah hian S Korea khawpui Seoul-a Indian embassy-ah 3rd Secretary hna a chelh mek.

Tunhnai khan Mizoram ah chawlh hmangin a lo haw zawk a. A hun chep tak karah Hmingsanga hnenah tihian a sawi....

Korean-ho hnen atangin Mizo thalai te’n engnge zir tur kan neih nia i hriat?
Zir tur kan ngah lutuk ringawt. Aia upa an zah thiam em em a, an chapo lo a, an inphahhniam thei lutuk te hi an fakawm ka ti a. Zir tlak niin ka hria.

Zirna lam hi ?
Korean ho hi zirna ngaisang hnam an ni a. An lehkha zir man pawh a to reng bawk a. Chuvang chuan lehkha an zir taima em em a. University-a kal chinte hi chuan lehkha zir chung hian hna an thawk deuh vek. Anmahni inchawm chungin lehkha an zir te pawh ti ila a dik awm e.

Hnam taima an ni em ?
Korea ram hi hman lai chuan ram rethei tak ni thin a ni a. Mahse ram hruaitute an thang harh a. Leilung hausakna lam leh thil dangah hausakna an nei tam thei dawn lo tih an hriat avangin human resouces lam an bei nasa a. An thawk rim em em a. An thawhrim zar an zo a, tunah chuan khawvela ram hausa te zingah chhiar tel an ni tawh hial a ni.

An taimak ang hian Mizote pawh hi taima ila chuan kan ram dinhmun hi a tha ngawtin ka ring a. An taimakna hi entawna zir tlak a ni chiang hlein ka hria.

Vantlang nun a ralmuang em?
Him tha tawk viau chuan ka hria. Ruk ruk te pawh hi chuti lutuk chuan a hluar lem lo niin a lang. Kawngpui dungah pawh zanlai velah hmeichhia mahnia tei nawlh nawlh hmuh tur an awm a, a ralmuang thawkhat viau niin a lang.

India leh S Korea inzawmna hi a tha thawkhat em ?
Tha teh reng mai. India leh Korea insumdawn tawnna kawngah tunah pawh hian kum khat chhunga sum vir vel hi $ 15 billion vel a ni hial tawh.

Tunah hian India leh S Korea te hian inremna thuthlung ziah mai tur kan nei a. A hmingah pawh Comprehensive Economic Partnership Agreement (CEPA) kan ti a. He inremna thuthlung ziah tur hi India ramah leh S Korea-ah pawh sawihona hun hman a ni ve ve tawh a. Mahse India rama inthlanpui neih a nih avangin thuthlung hi sign a la nilo mai chauh a ni.

Ruahmanna pawimawh zawng zawng chu peih a ni thawkhat tawh a. Inthlan te kan zo tawh bawk a, sorkar thar din a nih hnuah inremna thuthlung hi ziah theih mai a nih ka ring.

Inremna thuthlung chu ziah ni se India tan eng nge hlawkna awm ang ?
Insumdawn tawnna kawngah India ram tan hlawkna tam tak a awm thei ang a. Chu bakah he inremna thuthlungin a ken tel ti mai ila, India mite’n Korea ramah hna an thawh theihna tur kawng zawnsak tih te pawh a keng tel bawk.

Sap tawng an hmang uar em?
Sap tawng hi hman deuh kha chuan an ngaisang em em lo a. Anmahni tawng an ngaisang a.. Mahse tunhnai deuh atang khan English pawimawh zia an hre thar.. Hei vang hian English zirtir thei tur native speaker an tih mai UK, USA, Canadian, Australian, S. Africa leh New Zealand atanga lo kal English zirtirtu an awm tam. English pawimawh zia an hriat thar hnu phei chuan heng zirtirtute hlawh hi a pung chak khawp mai.

Corruption hi ?
Ka hriat dan chuan corruption-ah chuan an fihlim bik lem lo niin a lang. An ram hruaitu thenkhat eiruk thubuai neih vanga mualpho pawh an awm ve nual tawh.

Entertainment Industry lam te hi ?
Mizo te’n kan lo ralkhat hriat ang hian lemchan, zai leh rimawi lam hian an nun a hmun pawimawh tak a chang a. Korean hnam nun zemawi leh tha hi khawvel hriatah a theih dan dan a pho chhuah an duh a ni.

Khawvel hmun dangah pawh Korean an nihna hi a zau thei anga pho chhuah an duh a, Korean Wave an ti mai a, an ram thenawm Malaysia, Indonesia tih velah pawh Korean mi larte hian hriat an hlawh ve hle. An rimawi leh lemchan te hi Asia khawmualpui bakah South America leh Eastern Europe-ah te pawh an thehdarh nasa.

North Korea nena an inkar hi eng nge i hmuh dan ?
Hetia keini hriat ve theih maiah pawh North Korea nen an inkar boruak hi chu a tha lem lo khawp mai. North Korea leh South Korea inzawmkhawm leh tihte pawh hi kum upa lam deuh te chuan an duh viau laiin, S. Korea lam thalaite hi chuan an duh vak hmel lem loh niin a lang.

Hmana S Korea ram rethei thin kha, a ram mipuite taimakna a zarah a dingchhuak mek a, chutia an ramin lei rem a rah tan mek laia ram rethei zawk leh puih nasat ngai tur North Korea te nena inzawmkhawm chu an duh bik lo a ni ngei ang.

Nula tlangval nun ?
Sapho ang deuh bawkin nula leh tlangval nun hi a zalen khawp mai. Sapho tih dan ang deuhin nula leh tlangval te an in-date a, nupui pasal neih kawngah nu leh pa te sawirema innei sawi tur an awm laiin love marriage hi a tam zawk chu a ni mai thei.

Inngaihzawnna kawngah thian te intihpui kan tih ang deuh hi a tam a. Nula emaw tlangval emaw nupui pasal neih hun tawh tak te nia an hriat te phei chu an thian te’n an ngaihzawng tur an zawn sak thin.

Zu, zuk leh hmuam hi?
Zu hi chu an hnam nunah a bet tel tlat. Kristian zingah pawh zu hi chu sualah an ngai ve lem lo a ni awm e.

Zu a zalen hle a, hnathawhna hmun leh puipunna hmunah hmun pawimawh a chang.

Zu an in nasa a, mahse, rui buai leh sual tih phah nana hmang erawh an tam lo.

Inkawm hlimna leh duhsakna lantirna hmanraw pakhat atan an hmang a ni ber zawk.

Meizial zu hi thalai zingah an tam vak lo a ni mai thei. Mahse kum upa lam deuhte meizial zu lai hi chu ka hmu ve teuh mai. Bazar leh kawngpui dungah nu tling, pa tling meizial zu hmuh tur an awm nual mai.

An Kristian nun eng nge i hmuh dan?
Korea ramah Kristian hi 30 % vel chauh an awm a, an tak em em thung. Yoido Full Gospel Church, Paul Youngi Cho din Thlarau Thianghliam Kohhran an tih mai hote inkhawmnaah pawh khan ka inkhawm ve tawh a, a pui khawp mai.

He kohhran innghahna ber leh an uar ber chu tawngtai a ni a,. Tawngtaina Tlang te an nei a. Pathian khawngaihna zarah kei pawh chu’ng hmunah te chuan ka kal ve tawh.

Vawi khat inkhawmah te hian mi sing chuan kan inkhawm a, hetiang deuh bawk hi thalai pual deuh pawl pakhat a awm bawk. Anni inkhawmnaah pawh ka inkhawm ve tawh a, Thlarau Thianghliam a zalen khawp mai. Nuam tak a ni.

Sports ngaisang tak hnam niin kan lo hria a ?
Ngaisang teh reng mai. Martial art chi khat taekwondo te hi Korean-ho hmuhchhuah a ni.

Baseball an ngaisang hle a, football khel pawh an tam. Mipui vantlang hian taksa hriselna atana insawizawi pawh an ngai pawimawh khawp mai. Nutling patling pui puite hi zing leh tlaiah park-ah exersice la hmuh tur an tam thin lutuk. Adventure sports te pawh an uar khawp mai.

Read more...

YMA chu tanpui ngaite tanpuitu a ni

May ni 15, 2009 khan YMA Mission Vengthlang Branch te chu hmeithai Pi Lalbiakkimi in tur sain an hnatlang a, member 100 chuang zet an thawkchhuak.

He in sakna atan hian YMA Branch leh Section (pathum) te'n theihtawp chhuahin hma an la a, veng chhung mi inphal te hnenah tanpuina an khawn a ni.

Hmeithai in sakna atana an thawhlawm khawn zat chu hetiang hi a ni:

(1) Sum Fai : Rs 73,060/-
(2) Char Char : 3
(3) Char Tin: 7
(4) Banril : 8
(5) Tukverh Frame : 4
(6) Kawngkhar : 2
(7) Tuidawn: 6
(8) Rizing : 12

In hi feet 18 leh feet 12-a zau, a bang tile, a chung rangva hman tura ruahmanin, rel a ni. Heta tana chak lakkhawm, ban zawm leh chokut siam hnatlang chu May ni 9 khan A Section-ten an lo nei tawh bawk. Hnatlang-ah hian VC member-te an tel a, Presbyterian Mission Vengtlang Pastor Bial bialtu Pastor C Lalsangliana a thawkchhuak bawk.

In sakna hmun hi PL Siamliana ram, phal taka a hmanhawh tir a ni.

May ni 16 khan YMA te hi an hnatlang leh a ni.

Biate Branch YMA te pawh tun hnaiah hmeithai in saksakin an hnatlang ve bawk.

Biate YMA te hian Pi Thanchhingi chu Assam Type-in in an saksak a, he in hi a dung ft 24, a vang ft 12-a zau a ni. A chhuat-ah cement an chhung a ni.

Ni 2 an hnatlang a, mi 486 an thawkchhuak.

Read more...

Lungleiah Thianghlimna Zungbun

¢ K Lalrochana

May ni 8 zan a ni a, Lunglei thalai rualte chu Saikuti Hall-ah an fuankhawm a, heng thalai, hall khat tlata fuankhawm zinga mi 540 te chuan nupui pasal an neih hma chu sex hmang lo turin Pathian hmaah an intiam.


Zotlang Pastor Bial TKP huaihawtin, May ni 8 zan khan Saikuti Hall-ah hian Mizoram Praise Gathering 2009 neih a ni a, he hunah hian Mizoram Gospel artist lar tak takte an zai bakah BCM Gen Secy Rev Dr K Thanzauva'n thuchah a sawi.

Rev Dr K Thanzauva chuan, tunlai thiamna hmasawn zel chuan thalai nun nasa takin a tichhe mek niin a sawi a, "Technology lo chhuak thar zel hi Pathian malsawmna a nih rualin, kan hman thiam loh chuan min tichhetu a ni thei a ni," a ti.

"Hmasawnna chhawr tangkai tur chuan a tha zawnga kan hman thiam a tul a ni," a ti bawk.

He hunah hian zaithiamte an zai bakah 'Nupui pasal ka neih hma chuan sex ka hmang lo ang' tia intiam ngamte tan sawmna siam a ni a, thalai 540 zetin sawmna hi an chhang.

Heng sawmna chhangte hi a tuk, May ni 9 khan BCM enkawl Higher & Technical Institutes, Mizoram (HATIM) building-ah counselling class neihpui an ni a, thianghlim turin an intiam tih entirnan Silver ring buntir an ni bawk.

Zotlang Pastor bial TKP president F Lalromawia chuan counselling class-ah hian an kal vek lo tih a sawi a, "A hmunhmain a zir loh avangin kan leng ta chiah bik lo a ni," a ti.

Counselling class kal hman ve lote tan hian kar hmasa Inrinni khan HATIM leh BCM Centenary Building-ah class hawn leh a ni a, class-a kalte hi thianghlimna zungbun hi buntir leh vek an ni.

F.Lalromawia chuan, Zungbun an buntir zawng zawng hi mi 308 niin a sawi a, "Damlohna avanga kal hman lo te pawh an awm," tia sawiin, Zungbunah hian 'Rom 13:14' tih an chhu kai tih a sawi bawk.

"Kan beisei aiin kan hlawhtling," a ti a, "A tirah tak chuan zungbun bun tur hi mi 50 aiin an tam kan ring lo a, mahse kan rin aiin an lo tam ta si a, kan order belh leh ringawt mai a ni" a ti.

"Counselling class-ah hian intiam leh ngam lo te chu huaisen taka inpuang mai tur te pawhin kan ti a, mahse an ti tak tak hlawm niin kan hria. Kan sawi ngun a, Zungbun hi Pathian hnena kan hlan thianghlim vek a nih tawh thu te pawh kan sawi a, mahse, kan thalai puite hi an ti mai mai lo niin ka hria, Counselling class-ah hian thutiam te pawh kan sawi rual leh vek a ni" a ti bawk.

Thianghlim tura intiam zingah hian zaithiam lar tak tak te pawh an tel a, Rosy K Remsangpuii, Maggie, Linda Fanai leh Bethsy Lalrinsangi te pawh zungbun bun zingah hian an tel.

Rosy K Remsangpuii chuan: "Khatia, thalai rual thahnem tak maiin Pathian sawmna an chhang kha ropui ka ti lutuk a, ka hnuk te pawh a ulh hial" tiin Zozam Weekly a hrilh.

"Kei pawhin zungbun hi ka bun a" a ti a, "Kan zungbun bun hi man to tak pawh a ni lem lo, mahse, he zungbun hian Pathian hnena kan intiamna kha min hriattir reng dawn a ni," a ti bawk.

Linda Fanai pawhin Zungbun hi a bun ve tih Zozam Weekly a hrilh a, "Zungbun hi chu a entirna mai a ni a, a pawimawh zawk chu Pathian nena kan inkar a ni a, Pathian hmaa kan intiam tawh chu kan tihlawhtling ngei tur a ni a, kan intiamna hriatreng nan he zungbun hi chu bun mai kan ni," a ti.

Read more...

Home-a Mizo naupangte dinhmun lungchhiatthlak

Mama chu kum 7 mi a ni a, pawl 4 zirlai a ni. A nu chu Mama a hrinna lamah a thi a, a pa erawh hriat a ni lo hrim hrim.

Nu leh pa nei lo a ni bawk a, a pian hlimah hunchham enkawlna hmunah an dahlut nghal a, vawiin thlengin chu hmunah chuan a la awm. Chhungkaw nun a la tem ngai lo!

A awmna 'home' atang chuan sikul a kai ve a, lehkha a thiamthei fu mai. Computer phei chu a man hle a, kum 7 mi lek mah ni se a kum phu lohvin computer a thiam, mi pawhin mak an ti thin. Computer engineer nih a tum a, nih pawh a ni thei tak tak mai ang! Mahse, he khawvelah hian 'kan chhungte' tia sawi tur a nei lo!

Sanga hi chuan 'kan chhungte' tia sawi tur a nei a, Mama ai chuan a chang sang deuh. Mahse, 'kan chhungte' tia sawi tur nei mah se 'an chhungte' chuan 'kan chhungte' an ti ve lem lo.

Sanga hi kum 12 mi a ni a, nu leh pa inthen kara mi a ni. A nu leh pa te chuan an inthen hnuah midang an nei leh ve ve a, rei lo teah "mi chuang ui chuang" a lo ni ta. A nu leh pa kalsanin home-ah a insuan ta ringawt mai, duhthlan tur dang a nei lo. An sikul headmaster-in a khawngaih a, home-ah hian a dah a ni.

Sanga hian an in a ngai thei em em a, a thlakhlelh ber pawh mahni in-a awm a ni. Mahse, mahni inah pawh a leng ve si lo. Home-ah chuan khawhar takin a awm a, a zakzum hle, 'inferiority complex' a ngah a ni ngei ang.

Vanneih thlak takin he nau hian lehkha a zir thei phian mai a, a tum pawh a sang viau, IFS officer nih a tum. Pathian zarah a dam ang a, a tumah a la hlawhtling ngei ang.

Hmeichhe naupang hmeltha tak, mahse, a dang a awk avanga tawng hlei thei si lo kha! Muani a nia, kum 7 mi a ni. A nu leh pa an la dam a, mahse, hnuchham enkawlna inah a awm!

A nu leh pa te hi an inthen a, a nu hnenah a khawsa thin. Mahse, a nuin pasal dang a nei a, chuta tang chuan a dinhmun a buai ta. A nu pasal chuan a pawm thei lo a, chu hmeichhe naupang chuan harsatna nasa tak a hmachhawn ta a ni. A harsatna chu thenawmte pawhina an hriat khawpa nasa a ni a, a tawpah phei chuan thenawmte tih ngaihna hre lo chuan home-a a awm theih nan hma an la ta tawp mai. An khawngaih a, mahse, home-a dah mai loh chu tih ngaihna an hre lo.

A pa (a pa tak) khan a ngaihsak ngai lo a, a pa tharin a duh si lo. Nu leh pa nei mah se hnuchham enkawlna inah a tlulut ta tawp mai a ni!

Kima - a nuhrawnin a tihduhdah thin kha!

Kum 16 mi a ni a, tleirawl a hre ve tawh. A naupan laiin a nu leh pa an inthen a, a hnu lawkah a nu chu a thi. A pa chu zungawlvei a ni a, nupui dang a nei a, a nu thar chu Kima chungah chuan a tha lo hle; a vua a, kut a thlak fo.

Kima chuan naupang tein meizuk a ching ta mai a, ganja te pawh a zu ta hial. Ruih theih hrim hrim a duh a ni ang, dendrite te pawh a hnim thin.

A hrisel lo hle a, a khua a sik hluah hluah fo. Lu nain a tibuai deuh reng bawk. Lehkha lah a thiam thei lo nasa mai.

Khawvelah hian a khua a har a, a zak ngawih ngawih reng bawk. A dinhmun chu chhia a ti a, vanduai riau te'n a inhre thin. Khaw eng hi a hmu ngam meuh lo.

Home-ah an dah ta a, a tirah chuan a pa pawhin a tlawh ve thin. Mahse, tunah chuan tlawhtu a nei ngai tawh lo.

Mahni inchawm thei khawp a nih hma chu home atanga chhuah a tum lo. Sipai lal nih a tum a, mahse, a hrisel lo em a, ni thei tak maw!?

Puia hi home-a awm mah ni se naupang erawh a ni tawh lo, kum 20 a tling ve tawh tlat. Home-ah kum 20 a awm tawh; chuti a nih chuan a sen laiin home-ah an dahlut tih a chiang mai awm e.

A nuin a thihsan a, a pa erawh a hre lo hrim hrim. A nu chauh khan Puia pa hi a hria ang, mahse, a hre tura ber a thi daih sia, vawiin thlengin Puia pa chu tuman an hre ta lo!

Puia hian chhungkaw khawsak pangngaia khawsak ve a chak thin a, a puitlin hnuah pawh home chhuahsanin chhungkaw pakhat a fin ve tawh. Chu mite chhungkua chu Puia enkawl duhtu an ni. Mahse, a;n ti ve lauh lauh tak na a, a thla a ngam thei lo, home-ah a let leh ringawt!

Kum 20 mi Puia hi home-ah a la awm a, kum 20 a awm tawhna home chu a tan chuan 'in' dik tak a ni mai awm e. Thelogian nih tumin lehkha a zir a, mahse, rilru lama a harsatna hrang hrang, khawharna leh mahni inhmuhhniamna tih vel hian a tibuai ang tih chu a hlauhawm khawp mai.

Mizorama hnuchhamte enkawlna tura din home hrang hrangah hian mak tak maiin nu leh pa nei naupang engemaw zat an awm a, nu emaw pa emaw nei engemaw zat an awm bawk! Nu leh pa nei lo aiin chutiang chu an tam zawk!

January ni 16, 2008 atanga March ni 3, 2008 thleng khan Human Rights and Law Network: Mizoram te chuan Mizoram home hrang hranga naupangte dinhmun an zirchiang a, home- naupang zingah nu leh pa nei lo aiin nu leh pa nei leh nu emaw pa emaw nei an tam zawk tih an hmuchhuak a ni. Mizoramah hian mamawh loh naupang an tam tihna a ni thei ang a, seilenna tlak loh chhungkua a tam tihna a ni thei bawk ang.

Human Rights and Law Network: Mizoram te hian an thil hmuhchhuahte hi a bu-in an khawrpum a, chu lehkhabu - "Home Truths (Children in Residential Institutions in Mizoram)" tiha a lan dan chuan Mizoram home hrang hranga naupang 47.2% chu nu leh pa la nei an ni a, 42.6% chu nu emaw pa emaw la nei an ni. Nu leh pa nei tawh lo chu 10.1% an ni a, an tlem zawk daih a nih chu.

Human Rights and Law Network: Mizoram te hian social welfare deptt. hnuaia inziaklut home 27-a naupangte dinhmun an zir a, naupangte dinhmun zirtute chuan: "Mizoram naupangte dinhmun hi a tha lo a, an him lo. Nu leh pate pawhin an duh loh, an ngaihsak miah loh te an tam a, home-ah hnuchham aia nu leh pa nei an tam zawk hian naupang tam tak chu an chhungte'n an duh lo tih a lantir a ni," tiin an sawi.

Home 27-a naupang 47.08% chu nu leh pa inthen kara mi an ni a, 15.65% chu nu leh pate'n an hnawlte an ni. Hetiang mite hi nu leh pate'n an ngaihsak loh, an awm awma awm tura an kalsante an ni. Home pakhatah phei chuan tu chhungte nge tih pawh hriat loh naupang 15 an awm!

"Home hi a lun em em a, naupang lak sen loh an hmu vek ti ila kan sawi sual lo ang. Child Welfare Committee phalna lovin home te hian naupang an la thei lo a, chuvang chuan Child Welfare Committee-ah hian home-a naupang dahluh dilna a lut nasa em em a ni. Nu leh pa nei reng, mahse, an chhungte'n home-a dahbo daih an duh an tam a, naupangte hian chhungkaw neih hi an chanvo a ni a, mahse, chhungkaw tam takin chu chanvo chu an chhuhsak a ni," tiin Human Rights and Law Network: Mizoram director Vanramchhuangi (Ruatfela Nu) chuan a sawi.

"Naupangte hi mihring chanve ang lekah kan ngai a, nupa inthen vang emaw, chhungkaw harsat vang emawa home-a naupang dah kan tum zel hi ransa ang lekah naupang te kan ngai tihna a ni," tia sawiin, "Naupangte chu mihring famkim an ni a, chhungkaw neih pawh an right a ni a, chhungkua an nei tur a ni," a ti a, ran ang maia home-a daha, duh hun huna lakchhuah tur an nih loh thu a sawi bawk.

Home hrang hrang 27-a naupangte dinhmun lungchhiatthlak tak pakhat chu tlawhtu leh ngaihsaktu pawh nei lo an tam viau mai hi a ni awm e. Naupang zinga za zela 11.80% te chu an chhungte'n an tlawh reng reng a, za zela 43.22% te chu an chhungte'n an tlawh zeuh zeuh chauh. Za zela 38.13 te phei chu an chhungte'n an tlawh ngai lo hrim hrim.

Home-a naupang za zela 47.8% te chu nu leh pa inthen kara mi an ni a, an nu leh pa te inthen chhan lian tak pahnih chu - an nu te uire vang leh an pa te'n zungawl an vei vang a ni.

Read more...

Sumdawnna Hmunpui Bairabi

- Sangzuala Hmar

Chawhma dar 10 a ri a, Bairabi Zohmun venga khawsa JH Lalliansawta, kum 42 mi chuan ngaihtuahna dang teh vak seng lovin nilenga a hna tur chu chumi ni ni chhuak chuan a rawn her chhuahpui ve hrim hrim, cheng 200 atanga cheng 500 a thawkchhuak dawn tih a chiang reng. A tih fuh ni phei chuan cheng 600 thleng pawh a hlawh thei!


Mizoram thingtlang khua leh khaw lian deuhva khawsa pa pangngai kuthnathawh ngai chu nise a rilru a hah ngei ang, nupui fanau chawmlai a nei a, nitin chaw vawi hnih tal ei a ngai, mahse JH Lalliansawta hian chhuan chhama awm a hlau lo. Hna nghet a neih vang lam a ni hauh lo, a lo lamah buh leh bal a thar tha em a tih turin thlawhhma pawh a nei lo.

2006 kum atanga Bairabi khuaa rel lo lutin mumal zawka bungrua leh teak a phurh theih tak avangin JH Lalliansawta hian eizawnna lam kawngah harsatna a nei lo, Bairabi khua a ni a, puak phurin leh a tul ang ang thawh huamin rel station-ah a kal a, rel station hian a chhungkaw chawmna tur tawk eizawnna a lo pe mai thin.

JH Lalliansawta ang bawk hi Bairabi rel station a eizawng mi engemawzah an awm a, hna sang tak thawk an ni lem lo, mahse he rel station hian mi hnuaihnung zawk tan eizawnna a pe a, chu chu he in 1000 khua hian a nitin hringnun kal zel innghahnan ber an hmang a ni.

India ram chu sawi loh khawvela zin veivahna hmanraw tangkai ber chu rel kan tih hi a ni. India ramah chuan rel hi kum 1851 khan Roorkie-ah a tlan hmasaber a, hei hi bungraw phur a ni. 1853 khan Bori Bunder, Bombay leh Thane inkarah mihring chuan theihna rel chu tlantir tan a ni a, hei hi India rama mihring phur rel tlan hmasaber a ni. Tunah chuan Indian Railways hi khawvela ropui ber a ni tawh a, kilometre 108,805 zeta sei a ni a, rel kawng lian zawk broad gauge kan tih ang hi kilometre 89,771 zeta sei a ni a, tlangrama hman lar tak metre gauge hi kilometre 3350 vel bawr a ni. Kum khat chhungin Indian Railways hian khualzin maktaduai 6,000 zet a phur nia chhut niin bungrua pawh tonne maktaduai 350 vel a phur hman a ni.

Mizoram hi India ram pum zau zawk ngaihtuah chuan rel kawng lamah zawng kan hnufum kher mai, kan nei ve tawk tawk lek fang a ni, metre gauge an ti a, India rama rel kawng kan neih pahnih zinga a te zawk, tlangram leh hmun harsa zawka kal thei tura an duan chi a ni.

Bairabi khua hi Mizoram Hmar tawp Assam ramri dep maia awm a ni a, sumdawnga eizawng khua ti ila a sual lo hle ang, Nilaini ah bazar ni an nei a, Mizoram ramri chhunga bungrua awmte leh Assam lam atanga bungrua awmte insumdawn tawnna nasa tak kalpui a ni thin. Sumdawnna lian fal lutuk sawi mai tur a awm lo nain he in sang khua Bairabi mipuite chawm tawk sumdawnna zawng a awm chiang khawp mai.

He rel hi nitin a rawn thleng a, cargo wagon nena a rawn kal phei chuan he rel hi Mizorama buhfai kan ei tur phai lam atanga lokal zawng zawng deuhthaw phurtu a ni a, hei vang hian helaiah hian sumdawnna lian tak nitin mai a kal mup mup reng a ni.

Bairabi khaw tan chuan he rel hi Pheichham tluk zet a ni, tlangram lo neih hahthlak em em leh phai ni sen sa hnuaia leilet neih a ngai lova, heng aia hlawk zawk sumdawnna leh hna dang tam tak he rel lo lut hian a siam sak a ni.

Bairabi khaw Village Council President J Lalchhuanawma chuan he rel kawng lut avanga eizawnna awlsam zia leh Bairabi khuain innghahna ber atana an hman thu a sawi. "Khaw vannei tak nihna kan chang a, mi hausa lian le lu kan awm lo naa eizawnna a awlsam a, mi a thawh that peih chuan awlsam tea chak han lakna hnai nei kan nih avang hian, helaiah relkawng nena han inlamburha eizawnna mai hi chu awlsam tak a ni. Nitin bazar kan nei ta a, rel station ah sawn miin dawr an va siam a, hawkers kan han tih ang chi te, chawhmeh te, buhfai kan han tih ang chi te an va zuar a, chu chuan nunphung engemawchen kha min chhawk zangkhai a, hetiang kawngah chuan rel lo lut hi kan hamthat phah viau," tiin VCP J Lalchhuanawma hian a sawi a ni.

Nitin rel lo lut hian Assam lam atangin Mizoram mamawh chi hrang hrang a rawn phur lut a, chu'ng bungruate chu a neitu tel lovin rel station atanga put chhuah an ni a, a neitute erawh hi chu inner line permit nei lo chuan rel station huang pawnlam kaltir phal an ni lo, Mizoram lam sumdawng thenkhatte phei chuan telephone te'n an mamawh an order a, a bungrua an rawn thawn mai thin. Sumdawnna a len ngaihtuah hian chuti teh chiamin Vai leh Mizo inchawhpawlhna lian tham a awm lem lo. Rel station chhung a ni ber.

Sumdawnna lian atanga a te ber thleng Bairabi khua hian a nei a tih ngam, maktaduai tel sumdawnna - teak sumdawnna a awm a, chutih rualin vawk chaw tur dawl thlengin Assam lam atang hian a rawn lut a ni.

Teak sumdawnna hi he station atanga sumdawnna awm zingah chuan a lian ber leh sum hrawm na ber a ni, Supreme Court Special Investigation Team (SIT) in teak kih phalna a pek hmangin Bairabi station-ah hian teak phur thei cargo a lo thleng a, tum khatah ngawt pawh maktaduai chuang man thawnchhuah thin a ni. Supreme Court-in thing kih a khap bur avangin he sumdawnna hi duh angin a kal thei lo zawk a, chumi piah lamah rel cargo duh ang hmuh theih a ni thin lo, chuti chu nilo se, Bairabi teak sumdawnna hi Mizoram sumdawnna lian leh Mizoram hnuk tling thei hial tur a ni.

"2006 vel atang khan teak hi kan thawnchhuak tan a, harsatna nasa tak tak kan tawk thin a, harsatnate hi tawk lo phei ila chuan Mizoram tan hian he sumdawnna hi a tha nasa lutuk dawn a ni," tiin J Lianchungnunga, Asst. Secretary, Mizoram Teak Transporters' Association chuan a sawi.

He teak sumdawnna hi a lian hle a, Mizoram pum atanga teak tharchhuah, hralh mai theiha kih tawh leh ruahman tawhte chu Bairabi lamah hian phurhluh an ni a, heta tang hian a hlawmin vairam lamah a kal thla ta thin a ni.

"Kuthnathawktute'n hah takin teak an phun a, Pu Hawla hun hmasa lama NLUP atanga teak ching an ni deuh fur a, an puitling deuh vek tawh a, phalna kan neih chin chiah zel teak hi kih theih a ni a, nikum October thla khan a tam tham deuh kan thawn chhuak a, mahse wagon kan duh anga tam kan hmuh loh mai bakah kan duh anga tam kan hmu leh thei lova, a then a lo ro hman a, nuai tam tak Mizoram chuan kan chan phah a ni, teak thing kih hi Supreme Court lam thu a nih tlat avangin official work a tam zawk mah a tih theih, phalna hmu thei tur hian kan sawrkar hian hma la se, chak takin la se tih hi kan duhthusam leh kan ngenna a ni," tiin J Lianchungnunga hian a sawi.

Tunah tak hian Bairabi rel station-ah hian phurh chhuah mai theih teak cubic 94500 zet a intiang diam tawh a, SIT lamah phalna hmuhfel a nih veleh rel wagon dil a ni ang a, Delhi lama thawnthlak mai theih a ni dawn a ni. Bairabi khuaah hian teak hi cubic 1 cheng 250-300 vela hralh a ni tlangpui.

"Wagon lak phalna SIT atang hian duh ang zan hmu thei ila chuan tuna kan chhekkhawm let tam tak hi kan chhek khawm thei reng a, wagon kan hmuh tur zat a chian hma chu kan chhek ngam lo thin zawk a ni, a chhan chu teak hi a lo ro ve thuai thuai a, hei hian sumdawnna a ti chhe thin a ni," tiin Samuel Thangtea, Mizoram Teak Transporters' Association chuan a sawi.

Hausate sumdawnna mai mai tiin thenkhat chuan he sumdawnna hi an sawi hnawm a, mahse heti chung hian Bairabi-a rel lo lut hian sumdawnna dang pawh a kalpui tam kher mai. Kum 39 a upa Lallianpuii hian nitin thlai thar rel station kiang bazar-ah hian a zuar a, chhungkua a chawm thei a ni.

"Rel hi lo lut lo sela chuan kan sumdawnna hi a hlawhchham tluk a ni'ang, hetia rel lo kalah hian phai lam atangin thlai thar a rawn thleng a, Mizoram lam atanga kan thar kan zuar bawk a, a bik takin Mizoram thar bahla, thingfanghma leh mai kan hralh thei hle, a hel leh hel lo an pawisa lova, an duh em em mai a ni, mai thar lai phei chuan kan sumdawnna hi a tha ve thin khawp mai," tiin Lallianpuii chuan a sawi.

Nitin rel hi chawhnu herah a rawn thleng tlangpui a, rel lo thlen hma chu sumdawnna a intan tak tak thei lo, rel lo thlen hma zawng hi chu inbuatsaihna hun a ni deuh ber, a inbuatsaih zo hma deuhte chuan chhun khawlumah mutthlu chungin rel hi an lo nghak tawh mai thin. Rel station chhuahsan thui lovin vai lo lutte chuan an bungraw rawn ken an hralh a, chutiang bawkin Mizoram lam atanga an mamawhte an leikhawm a, chutiang chuan darkar khat dawn te sumdawn tawnna a thleng hman a, nitin hetiang hian cheng nuai chuang a vir kual reng a, chu chuan Bairabi khuaa mi rethei berh zawkte pawh eizawnna a siam ta a ni.

"Rel lo lut lo sela chuan keini tan chuan eizawnna a awm lovang a, tlangram lo neih a ni mai, rel atangin bungrua kan unload a, Aizawl, Kolasib, Kawnpui atanga kharchhawng lokalte'n motor an rawn leng a, an motor-ah kan load leh a, chutiang chuan cheng 10 - 20 kan hlawh zel a, hetianga chhungkaw chawm hi mi 100 chuang zet kan awm ka ring," tiin JH Lalliansawta chuan a sawi.

Kum 23 a upa Lalchharliana leh a thiante pawhin tlangram lo neih emaw, mi hnuaia inhlawh ngai miah lovin rel station-ah hian eizawnna pangngai tak an hmu. "Teak kan load a, a chang leh kan teh a, a chang leh kan sizing a, hei ringawt pawh hi kan tan chuan eizawnna tling a ni, ka thiante ho nen kan thawk a, chhungkaw chawm em chu kan la ni lo nain chhungkaw tan sum leh pai kan thawkchhuak thei a ni, tin, tlangram lo neih ai chuan a let tamin a hlawk a ni," a ti.

Bairabi khaw mipuite hian rel hi Sairang thleng a tl;ang ang tih an hlau hle, chimral hlauhna avang erawh a ni lo, Bairabi khua hi sumdawnna hmunpui a ni tawh lovang tih an hlauh vang a ni daih thung.

"Sawrkarin Sairang thlenga rel kaltir a tum hi kan duh lo, a tlang vaih chuan Bairabi hi kan ro char reng mai ang, kan khua hian hma a sawn chak em em a, Hortoki khua te nen khian kan inzah reng thin, tunah chuan keini chu in 1000 khua kan ni tawh a, sumdawng leh dawrkai pawh thahnem tak he khuaah hian kan awm ve tawh a ni, hei hi rel vang ka ti lo thei lo, mahse hetian sawrkar ruahman anga rel hi a tlang chuan kan chhe vek ang," tiin JH Lalliansawta chuan a sawi.

Hei zawk hi Bairabi khua chuan an hlauh zawk chu a ni, an sumdawnna hlawk tak leh thang chho mek chu Sairanga rel a luh chuan a tawp ang tih an hlau a ni.

"Sairanga rel a tlang chuan keini khuaah chuan minute 5 emaw lek a ding ang a, kan sumdawnna leh kan eizawnna te a tawp ang tih a hlauhawm," tiin Rinthanga, val upa, VC member chuan a sawi.

Sairanga rel luh an hlauhna hi hriatloh vangte pawh a ni thei, tunah hian Indian Railways chuan Bairabi thleng hian Broad gauge (Rel kawng lian) luh tir tumin hma a la mek a, an tihtur ruahman saah pawh a tel diam tawh. Heti a nih chuan Bairabi hi engtikah mah a te ngai dawn lova, sumdawnna hmunpui lian tak a ni chho thuai thei zawk ang.

Chimral Hlau Lo Bairabi
MNF sawrkar lai atang tawhin sawrkar atanga hamthatna awm a beisei ve thin a, mahse a beisei ang engmah a hmu ngai lo, sawrkar thar a ding a, chu beiseina chu ala ti beidawng chiah chuang lo, mahse he a beiseina hi a hlawhtlin loh chuan a beidawng ngawt tawh ang. Nitin mutia hna a thawk a, chumi pahin a sumdawng a, pa awmthei pangngai tak a ni, vai a hlau lova, tin, an khuaa vai sumdawng awm a phal hauh lo bawk. Hei hi kum 39 a upa Lalthanpuia khawvel a ni.

A hmel en chuan Mizo tawnga biak tur nge Vai tawnga biak zawk tur hriat harsa tak a ni, a Mizo hmel dik tak mai chu hmuihmul ki deuhva a chei avangin hnam dang te pawh a ang hle, mahse Mizoram hmangaih em emtu a ni.

Bairabi khaw mipuite hian an khuaa nitin vai za tel lo lut thinte chu thiam takin an enkawl a, a rikrap zawng emaw, a kutthlak zawnga che hauh si lovin thiam takin an sumdawnna kalpui danah ramri an kham a, ramri hnawksak tak ni si lovin venghimtu tha tak a ni lawi si.

Bairabi khuaah hian vai sumdawng inbengbel pakhat pawh an la awm lova, awmhmun nghet khuar pakhat pawh an la awm lo. Hei hi an chhuang hle, Bairabi khaw VCP J Lalchhuanawma chuan rel lo luh avanga inchimral emaw, Bairabi khuaa vai pung ta hluai an awm loh thu a sawi. "Kum 20 zet a ni ve tawh, vawiinni thlengin kan khuaah hian vai in leh lo nei emaw, dawrkai an la awm lo," tiin chhuan takin an khuain thiam taka an inhum dan J Lalchhuanawma hian a sawi.

"Bairabi khua hian assimilation hi kan hlau lo, kan khua ang vek hian inlungrual ila, khawi Mizoram khua mah hian assimilation hi an buaipui ka ring ngai lova, a sawi pawh an saiw peih bawk hek lovang," tiin J Lianchungnunga, VC Secretary chuan a sawi ve bawk.

Rel lo luh ruala vai sumdawng lo lutte reng reng hian an bungrua an hralh thuai thuai a, rel haw leh rualin Assam lamah an lut phei leh mai thin.

"A tak tak ram pawh sawi thlen ve a ngai a, tlemlai deuh khan ILP chungchangah kan buai a, MZP leh YMA te'n beihpui kan thlak a, mahse rel hi a lo sawrkar laipui deuh ruih mai si, rela an chuanlai chuan ILP check ngawt theih a lo ni hauh lova, chutiang boruak a awm takah chuan an chhuk kan phal lova, hun engemawchen chu thenawm state nen pawh tlemin kan inhmuh thiamloh phah lek lek a ni," tiin an khaw senior politician, tuna VC member ni mek Rinthanga chuan a sawi.

"Assimilation hi kan hlau eih lo, engtikawng mahin Bairabi khua hi vai hian min chimral lovang, kei chu mi mawl mai ka ni a, mithiam zawkte chuan ngaihdan hran deuh te pawh an nei mai thei, mahse tun dinhmunah chuan vai sumdawnga lokalte hi thiam takin kan lo mikhual a, kan bazar chhunga an inzawrh kan remti lova, an pekchhawnna tur Mizote kaltlang chauhvin an bungrua pawh an zuar, tin, helaiah an thawh ang ang kan thawk a, an thawhna rate angin kan thawk a, rate inang rau rauah chuan mi chhawrtute'n Mizo an duhzawk zel a, hetiang kan tan tlat avang hian vai tan chance kan pe lo hrim hirm," tiin rel station-a tharum mamawh awm apiang thawk thin leh he pawl hruaitu Lalthanpuia chuan a sawi.

Bairabi khua hi ramri dep seta awm a ni a, heti chung hian khawchhungah vai hmuh tur an tam lo hle a, rel a lo thlen laiin vai chu an awm, an awm nameuh mai, mahse zan riaka rela lo lut an awm ngai lo. Hei vang hian Bairabi khua pawh hi an inchhuang hle.

"Kan khuain kan tih ang hian Mizoram khawdang zawng zawng hian ti ve ta se, assimilation hi kan buaipui hauh lovang," tia sawitu VCP J Lalchhuanawma hian a sawi sual lova, Mizoram hmun danga chimral hlauva awmte hi he ramri khua vairam nen inhne reng khua hian thil tam tak min zirtir thei a ni.

Read more...

Nauban humhalh turin hmalak tum

¢ Vanlalremruata Tonson

Zoramin neitu nihna a hauh tlat theih, a duh apiangin sorkar hriatpui lohva sumdawn nana hmanga an lak rem theih Nauban chu humhalh tura hmalak tum a nih thu Mizoram forest department-asenior official pakhat chuan a sawi.

Intellecual Property Rights chungchanga National Research Development Corporation (NRC), Mizoram Council of Science, Technology andEnvironment (MCSTE) leh Zoram Research Foundation (ZoRF) ten seminar anbuatsaiha tel Mizoram Forest department-a senior official pakhat chuannauban humhalh chungchang hi nasa zawka thawh an tum thu a sawi a ni.

Hemi chungchangah hian ZoRF hruaitute nen pawh project neih zui an inhuam thu a sawi a, ZoRF general secretary Rochamliana pawhin bawhzui an tum niin a sawi ve bawk. Seminar-ah hian Mizoramin a neitu nih a hauh theih thil chi hrang hrang sawiho niin, Nauban chu sawi hlawh berte zinga mi a ni.

Mizo hnam thil dang - puan, zu leh hmanraw chi hrang hrangte pawh humhalh theih a nih thu te pawh seminar-ah hian sawi a ni. Mahse, hetianga humhalh a nih dawn chuan a humhalhtute hmuhchhuah a ni ngei tih finfiahna tha tak a awm a ngai thung.

Hemi chungchangah hian humhalh diltute dilnachu uluk taka lo endiktu (examiner) an awm a, a endiktuten humhalh theih a ni tia an puan hnuah chauh humhalh a, a neitu nihna hauh theih a ni. Mizo hnamlam lar tak Cheraw te hi khawchhak lamah pawh an lo uar ve avangin Mizote tan humhalh bik theih a ni lo mai thei.

Intellectual property danah hian thil, a neitu nihna hauha humhalh theih dan chi thum - copyright, geograpgical indication, patent leh registry-te a awm a, Mizo hnam ro hlu Nauban, zu, puan, hmanrua, damdawi etc te chu geographical indication (GI) hmangin humhalh theih a ni.

NRDC hi India sorkarin intellectual property chungchang buaipui tura a din a ni a, a hnuaiah IP Consultancy and Management Division a awm. Chu chuan intellectual property rights hmanga thil humhalh tur nei leh humhalh duhte an pui thin a ni.

Mizo tualchhuak thiamthil, P&B Machineries leh Hnam Chhantu te khawl hmuhchhuahte pawh humhalh a nih theih nana theihtawp chhuahpui an inhuam thu seminar-a resource person-te chuan an sawi a, anmahni sum senga hmalakpui an inhuam thu thlengin an sawi.

Patent hi intellectual property rights hmanga thil humhalh dan lar pakhat a ni a, miin a thil ngaihtuah chhuahte a humhalhna a ni, tiin a sawi theih ang. Mi tuin emaw thil thar a hmuchhuak a, chu chu midangin an chuh buai theih lohna turin sorkarin a lo humhalh sak thin a ni. Mahse, patent hian hun tiam chin a nei a, chumi chhung chuan a thil hmuhchhuah chu sum leh paia hlawkna atan a hmang thei a, a lo tibuai leh chuhpuitute hrem an nih theihna turin hma a la thei bawk. Tin, thil hmuhchuah hi patent a nih dawn chuan a hmuchhuaktu hian a thil hmuhchhuah a nihna engkim a puangzar tur a ni. Patent hi kum 20 chhung a nung thin.

Design Office an ti a, design registry ti te pawhin a sawifiah theih tho ang, hetiang hi design humhalhna tur a ni a, industry atanga siamchhuah leh chhawn theih design hmuhchhuahte hi register a, humhalh tur a ni. Hei hian lemziak (painting), milim ker (sculpture), art lam chi leh copyrights act huang chhunga mite chu industry atanga siamchhuah theih ni lovin a tira siamchhuaktu kut themthiamna avang liau liauva hlu nia ngaih a nih avangin design office kaltlanga humhalh theih a ni lo thung.

Design hi register a nih chuan a humhalhtu hian sumdawn nan awlsam takin a hmang thei a, a hralh chhawng theiin miin an lo hmang ve a nih chuan dan hmanga hrem a nih theihna turin hma a la thei bawk.

Trademark hi sumdawnnaah chuan thil pawimawh tak a ni a, lo inhmansak ve ngawt vangin buaina pawh a chhuak fo. Hemi humhalhna tur hian Trade Mark Registry a awm a, chutah chuan register tur a ni.

Patent, design leh trademark te hi a buaipui turin Controller of Patents, Designs & Trademarks a awm a ni. Pawl chhinchhiahna logo leh trademark te hi chu patent hmanga humhalh tur a ni thung.

GI hi intellectual property hmanga thil humhalh dan chi khat a ni.Thil engemaw, thlai chin, khuarel vanga lo awm (natural) leh siamchhuah, mahse, a lo chhuahna hmun nena inzawmna nei bik riaute humhalhna a ni, ti pawhin a sawi theih ang.

India rama GI lar zualte chu Basmati rice, Darjeeling Tea, Kanchipuram Silk Saree, Alphonso Mango, Nagpur Orange, Kolhapuri chapal, Bikaner Bhujia etc te a ni. Basmati rice phei hi chu India hian ram dang nen an lo inchuh viau tawh a ni. Hemi atan hian GI Registry, Chennai-ah a awm a, Registrar of Geographical Indication-in a awp a ni.

Copyright hi Mizoramah chuan intellectual property rights chungchanga sawi hlawh leh hriat hlawh ber a ni awm e. New Delhi-ah National Copyright Office siam a ni a, Registrar of Copyrights-in a awp a ni.

India hian Copyright Act, 1957 a siam a, thuziak, drama, music, artistic work, cinematograph film leh sound recording te thlengin humhalh theih a ni. He dan hmanga copyright humhalh a nih thin loh avangin buaina a chhuah phah fo.

Seminar hi American Embassy-in Workshop on Building Partnership between US & India Higher Education Institution, Delhi-a a buatsaih tuma ZoRF general secretary a zuk tel atanga lo chhuak niin, khami tum khan ZoRF general secretary Rochamliana chu NRDC hotu pakhat nen an inhmu fuh a, NRDC hian hmun hrang hranga state Council of Science, Technology and Environment te nena tangkawpin intellectual property right chungchang zirhona an buatsaih thin tih a lo hrilh a ni.

NRDC hotute chuan intellectual property chungchang hi ukil-te hian ngaihven se an duh thu an sawi a, sminar-a ukil an kal tha lo chu mak an tih thu an sawi uar hle niin seminar huaihawttute zinga mi ZoRF general secretary Rochamliana chuan a sawi.

ZoRF general secretary chuan ukil-te hi an sawm tho na a, an kal hlawm ta lo niin a sawi a, hetih lai hian an beisei aiin seminar chuan ngaihven a hlawh thung niin a sawi.

Read more...

THI BEH!

¢ HC Vanlalruata

Vawikhat chu thingtlang khaw chengker leh tereuhte kan tlan pel a, in pakhat kawngka luchungah chuan ‘Chairman’ tih hi nalh ang reng fe hian a lo inziak a. Kei ka thinlunga dilchhutna a lo lut pek a, kan kir leh lamah chu khuaah chuan motor din tirin kawng kama lo ding pa pakhat chu chu in kawngka luchunga in tar chu tunge a nih leh eng vanga ‘chairman’ tih tar nge tih ka’n zawt hram a. He khua hi thlawhbawk a lo ni a, VC puitling nei lovin thlawhbawk VC kan tih thin ang kha an nei a, chuta an hotupa in chu a lo ni reng a lo ni.

Chu ka thil hmuh hnu daihah chuan L.Keivom lehkhabu ziah pakhat ka chhiarah Churachanpur khawpui chu President tamna khawpui a ni tih ka’n hre leh zel a. Mizote hian nihna neih, thibeh nih hi kan lo va chak em tih ka ngaihtuah zui fo thin. Kohhrana pawl chhuak kan tih leh kohhran danga pem tam ber hi an awmna hmasa kohhrana chanvo an neih loh vang a nih ka ring a. Tantu nihna dinhmun, Nilai zan thupui hawngtu, Sunday Sikul zirtirtu, Beihrual thupui hawngtu leh pulpit-a thuhriltu chanvo thleng hian chilthli tla duah duahin kan it hlawm a. Chutiang kan duhna chhan chu engmah dang ni lovin keimahni kha engahmah kan inngai lova, (saptawng takin ‘self-respect’ kan nei lova) mihring awmkhawmnaa nihna leh chanvo kan neih khan ropui anga lang taah kan inngai tihna a ni a. Hetiang rilru hi saptawng chuan ‘Vanity’ an ti.

Politics-ah pawh kan zuan lawr chhan ber chu thuthlung kan vawn ngheh vang ni lovin nihna leh chanvo, candidate nih kan duh vang a ni ber fo. Pawl hrang hrang phel chhan pawh chu tho chu a ni. Chu chu kan dinhmun a ni a. He kan kalphung hi chu ze nghet neih loh vang leh a lema kan kal tam vang a ni ber a, nihna leh chanvo atchilh kan tam luat vang a ni. Chanchinbumi ni lo, chanchinbu-a ziahna pawh nei lova an note bu baka engmah ziaklo thenkhat chanchinbumite intelkhawmna MJA-a tel avanga inti chanchinbumi zui ta reng ang vel hi kan hi.

Chu aia lang mualpho leh pawi zawk chu pawisa khawn tur ringawt pawl a ding tam ta lutuk hi a ni awm e. Tunhnaiah kan Governor Lt. General Madan Mohan Lakhera chuan MPF hruaitute hnenah Mizorama pawl ding tam lutuk tha a tih loh thu a sawi chhuah khan mipui kan harh zawk em tih erawh chu ka hre lo. Pawl a tam lutuk a, president leh general secretary an tam lutuk a, Treasurer leh Financial Secretary awm zel a lo ngai a. Chutah chuan pawisa kawl tur a awm siloh avang leh pawl tana a pawimawhna chhuanlam tur a awm that hle bawk si avangin vai sumdawng leh midang hnena pawisa khawn a lo ngai ta thin a ni. Tam tak chuan an din chhan kha mipui laka inthiam chawp (justify) a lo ngai a, lawmman leh chawimawina ilo an lo sem duh a, anmahni’n sum nei ta lo chu tuteemaw rim taka hnathawka sumdawngte’n an tuar leh fo mai.

Tlem lai deuh khan an pawl hming (saptawng a nia) han chhiara sumdawng intelkhawm niawm tak invuah hi an awm a. Kan han chhui chiang a, an office bearers ho kha sumdawng an lo ni lova. Kan rinhlelh ang ngeiin pawisa an neih theihna’n Minister pakhat ‘blackmail’ an tum ta reng a ni. Hetiang teh nuaih chenna ram hi kan lo ni taa kan governor-in Manipur dinhmun min sawithaih kha sawithaih satliah ni lovin thil thleng reng leh thleng mek a ni a, Manipur anga hnam hrang hrang inchiahpiah velo kan nih avanga tharum thawhna lian tham kan rama la thleng velo mai chauh niin a lang.

Thenkhat chuan ‘donation’ hming pu-a mi pawisa chhuhluih ‘extortion’ an ching a, chuta an pawisa hmuh chuan nupui fanau an chawm thin tih thawm kan hre fo. Ka thianpa, vai chanchinbumi un tawh tak chuan India hmarchhak hel pawlte hi tunhma chuan India lak atanga inlakhran duhna thuthlung dik tak nena kal thin an ni a’ mahse a rei hnu chuan pawisa khawn luih hi hna berah an nei ta fo niin a sawi a. An beidawn vang a ni thei a, mahse, a tak niin ka hria. Chutiang chiah chuan thunun lohva Mizorama duh ang anga pawl kan din hi chu ngaihven deuh chu a ngai a ni.

Democracy rama awm kan ni a, pawl kan din thiang a. Sorkarah emaw lungawilohna pawh kan lan tir thiang teh meuh mai. Mahse, pawl kan nih avang ngawtin India ram danin a khap, tihluihna hmanga sum khawn (extortion) hi chu kan zalenna piah lam a ni. Hnathawh inang, an hmakhua tur ngaihtuaha bawhzui tura an inhlawmkhawma pawl an din hi khap ngawt theih a ni lova, phal tur pawh a ni. Mahse an mihring puite phur tirit zawnga sum khawn luih chingte chu kan sorkar hian a chhui zui a, dan bawhchhiate chu a hrem a, an pawl pawh a thiat sak hi a dik ang.

Chutih rual chuan mi thenkhat, engmah sorkar atanga beiseina nei tawhlo intelkhawm an awm chuan sorkarin ngaihven sela, thil thalo zawk a thlen hma-in thil diklo hi siam dikin chanvo nei lova inhriate hi chanvo siam dan tur ngaihtuah vat teh se. Kan governor sawi anga Manipur ang maia kan awm hma ngei hian...

Read more...

Engati Nge C.L. Ruala?

INC candidate CL Ruala chu Mizoram MP (Lok Sabha) atana hneh taka thlantlin a ni. He inthlanah hian vote50.93% a tla a ni.

EVM-a vote tla bikah Indian National Congress candicate CL Ruala chuan vote 209055 hmuin amah hnaihbertu Dr H Lallungmuana independent candidate chuan vote 103907 a hmu a, vote nuai 105148-in a hneh.

Rualpawla, independent candidate-in vote 4032 a hmu a, Lalawmpui Chhangte, NCP candidate chuan vote 3252 a hmu.

Bru Postal Ballot/Service-ah vote 7428 tlain heng zingah hian 433 chu vote thia puan a ni a, vote 6995 a nung.

Postal/Service vote-ah CL.Ruala chuan vote 6622 hmuin a sang ber a, Dr. H. Lallungmuana chuan vote 259 a hmu. NCP candidate Lalawmpuia Chhangte chuan vote 689 hmuin independent candidate Rualpawla chuan vote 46 a hmu.

Tihian avaiin C.L.Ruala chuan vote 215677 a hmu a, Dr. H. Lallungmuana chuan vote 104166 hmunin Rualpawla chuan vote 4078 a hmu a, Lalawmpuia Chhangte chuan vote 3320 a hmu thung.

INC candidate C.L. Ruala’n Independent candidate Dr. H. Lallungmuana a hnehna hi vote 111511 niin, Mizorama Lok Sabha inthlana inhnehna sang ber a ni.

Mizoram University-a Political Science lecturer C Lallianchhunga chuan chhan pahnih vangin CL. Ruala hi a chak niah a ngai.

“Pakhatnaah chuan tun thleng hian mipui mimir rilruah MNF hnawlna hi lian takin a la kal mek a, chu chuan MNF emaw MNF party-in a puih candidate tan chance a tichhia. Pahnihnaah chuan tun thleng hian Mizorama ruling party sawiselna tur thu lian tham (major issue) la awm lo hian ruling party candidate tan chance a ti tha hle bawk,” a ti.

“Mizo mipui tam berte hian Lok Sabha inthlannaa vote kan thlak hian tunge India Prime Minister tur kan eng to lo, chu ai chuan eng party-in nge Mizoramah rorel tih hi kan la ngai pawimawh zawk. Heng thil pahnih inlakhawm hian C.L. Ruala tan hnehna sang tak chan theihna a siam ta niin April 16-16 May inkara post-poll survey kan neih chuan a tilang,” tia sawiin, “He post-poll survey kan neih hian CNN-IBN khan pawl hrang hrangte seat hmuh zat tur pawh kha midangte aia rintlak leh dikin a siam nghe nghe a nih kha,” a ti bawk.

CL Ruala chuan Pathian leh mipuite puihna vangin a tling niin a sawi.

Vote chhiar ni-a Congress Bhavan-a inkhawm an buatsaihah he thu hi sawiin CL Ruala chuan, inthlana hnehna a chang chu Pathian leh mipuite puihna vang a ni, tiin a sawi. Tun tum inthlan tlukin mipuite tawngtaisakna a la dawng lo niin a sawi a, Congress kaihhruai UPA chet that chhan pawh "Kristiante tawngtaina vang a ni" a ti.

Ram pumah Kristiante an tawngtai a, hei hi Pathianin a chhang niin a sawi a, Pathian leh mipuite zarah a tling nia sawiin, a thil tumte hlawhtling taka a tih theih nan mipuite tawngtaipuina a dil bawk.

CL Ruala hian a tling tih a chian hnu-ah LPS studio atanga amah kawmtu media mite zawhna chhangin, mi tam takin an tawngtaisak a, chawngheia tawngtaisaktu pawh a ngah niin a sawi bawk.

Chanchinbumi pakhat chuan Dr H Lallungmuana thlawptu MNF leh MPC te chu inthlanah khan an phur tawk lo niin a ngai.

“MNF hi sorkarna hloh hlim an ni a, an la phur tak tak lo. Chutiang bawkin MPC pawh inthlana tla hlim ve tho an ni a, an phur bik lo. Theihtawp chhuahin MP inthlanah khan an campaign ngei a, mahse, phurna an nei lo, chu chu Dr H Lallungmuana tlak chhan a ni,” a ti.

Lungmuana hian Aizawl khawpuiah ngei pawh polling station engemaw zatah polling agent te a nei lo a, chu chuan amah candidate-tute phur lohzia a lantir awm e. Party pahnih mi leh sa te hian vote pawh an thlak tha lo tin a lantir bawk awm e.

Tun tum inthlanah khan vote a tla chhe hle a, vote thlak zingah Congress-in MNF leh MPC mi leh sa te aiin vote an thlak tha zawk tiin a ngaih theih.
Congress candidate CL Ruala ngei pawhin MNF leh MPC mi leh sa te aiin Congress mi leh sa te an phur zawk tih hi a sawi a ni.

Mi thenkhat chuan Dr H Lallungmuana hian ama mimal chaknain vote a hmu teuh zawkah an ngai a ni.

Read more...

Engati Nge UPA?

India chu Indian te bawkin an barakhaih a tih theih ang. 2003 Inthlanpuiah khan tute mahin Congress kaihhruai UPA khan sorkarna an siam theih an ring lo. Mahse, an siam ta si. Tunah pawh Congress mi leh sate chuan Lok Sabha inthlana hnehna an chan chu an lawm leh mek a nih hi.

2009 Inthlanpui-ah hian Congress kaihhruai UPA bawk chuan seat an chan tam ber chu tlang rin dan a ni a, mahse, Congress-in seat 201 zet lain sorkarna an siam ang tih chu mi rinphak bak a ni. Kum 25 chhunga India ram inthlanpuia party malin seat an lak tam ber tum a ni hial a, UPA lak zawng zawng phei chu chu ai chuan a tam.

Kumin inthlanpuiah hian national issue tling thil lian tham a awm lo. Mahse, India rama vote nei mi maktaduai chuangte chuan sorkar ngelnghet an duh hle tih a langah ngaih a ni. Manmohan Singh chu prime minsiter a ni leh dawn a, kum 1961-a Jawaharlal Nehru-a’n term khat a hman tluan hnua prime minister chelh nawn leh hmasa ber tur a ni. A danglam lehna chu UPA-in Left party te tel lova sorkarna a siam thei dawn a ni.

Maharashtra, West Bengal, Tamil Nadu state tea Lok Sabha bial tina Congress party chet that dan em em hi a mak hle. UP leh Bihar-ah pawh rin phak bakin an che tha. Bihar-a Muslim- ho vote an la teuh thei chuan mak tih a hlawh hle bawk.

Manmohan Singh tan ngat phei chuan prime minister tha tak a ni tih lantirna ang a nih avangin a ropui zual. Sonia Gandhi tan pawh ropui taka a sorkar pui leh theih avangin thil ropui a ni.

Mithiamte chuan kumin Lok Sabha inthlan hi national party te tan hun tha an ti. Congress leh BJP te Uttar Pradesh-a an chet that danah ringawt pawh chu chu thudik a nih zia a lang a ni. UP-ah hian regional party tam tak an awm a, chu’ng te chuan seat tam tak an la thin. Mahse, tun tum inthlanpuiah erawh BSP chu party lian ber la ni mah se mipuiin national party lam an bawh tih a lang. Kum 2004 inthlanah khan Congress, BJP leh Left te seat chan belhkhawm zat chu 345 a ni a, kuminah erawh 344 a ni.

Engvangin nge Congress an chet that em em? Eng nge an tih? An tumpuite aiin voter ten an ngai thutak a ni thei. Manmohan Singh-a belhchiandawlna leh eiruk kawnga a fihlim vang a ni thei. Sonia Gandhi vang a ni thei a, Congress party bultum ‘‘aam admi'', te National Rural Employment Guarantee scheme te, loneitute tana loan rulhsak scheme vang tein retheite party anga ngaih a nih vang a ni thei.

A bul berah chuan a hun takah Congres party chu mipui duh angin a kal a tih theih ang. Manmohan Singh-a’n Nuclear Deal a hlawhtlin theihnana huaisen taka hma a lakna te chu ram leh hnam tana tha turah chuan ke a pen ngam zia a lantir tihna a ni thei a, khawpuia cheng ten policitician upa aia naupang lam, chutah pawh Rahul Gandhi te ang chu BJP next-generation-ho aia an thlan vang a ni thei bawk.

BJP tan chuan hun thim a ni thung. Gujarat chief minister Narendra Modi chu LK Advani thlak thei tura vawrhlar a nih lai a ni a, chutih laiin Varun Gandhi chu UP-ah Modi ang mai nih tuma hma a lak lai a ni bawk a, BJP campaign dan fuh loh vang nge heti taka an chan nasat?

LK Advani chuan an party chak lohna nasa tak chu a thiam lohah ngaiin banna a thehlut a, mahse, hei hi BJP chuan an pawm lo.

Thuneihna a piang a, thuneitute atangin mipui te’n beisei an nei thin. India mipuite chuan Congress party-ah rinna an nghat a, ‘Gandhis’ leh Manmohan Singh-a te chungah rinna an nghat a ti theih ang.

India-in Manmohan Singh
Jawaharlal Nehru-a hnua a zawna prime minister ni thei Manmohan Singh chu India politics-ah a hming a dai ngai tawh lo ang. Engtiang takin nge Manmohan Singh hian India politics-ah pawimawhna a neih le?

Mi duham ni lova lar a ni a, eirukna lama fihlim nia hriat lar a nih vangin media lam chuan ‘Mr Clean’ ti hialin hming lem an vuahsak. Kum 2004-a Sonia Gandhi-i’n prime minister ni tura a ruat khan MP zinga thawm nei lo ber leh prime minister nih tuma khel ngai lo a ni. Mahse, kum 5 a ral a, India leh khawvel chuan Manmohan Singh chu an ngai ropui tak zet mai.

Principle nei tia hriat lar a ni a, a rin dan leh ngaihdan, tha leh dik nia a hriat tawhah chuan hnungtawlh ngai lo mi a ni. Chu chu nuclear deal chungchangah khan a lang a, prime minister bansan hial pawh pawiti lo khawpin a tang na ngam a, chu tak chu Left leh BJP te’n an ngam lohna chhan tiin a sawi theih.

Nuclear Deal chu economist ropui Manmohan Singh-a hmingchherna a ni reng tawh dawn a, Nuclear Deal vek chuan Manmohan Singh chu vision nei hruaitu a nihzia a lantir bawkah mi thenkhat chuan an ngai.

Lok Sabha inthlanah Manmohan Singh chu nasa taka beih a ni a, BJP president LK Advani phei chuan a bei na hle. Mahse, politics lama mithiamte chuan chu tak chu BJP tlakchhiatna a nih phah zawk tiin an sawi.

Inthlan hma khan Manmohan Singh chuan India chuan sorkar ngelnghet a neih a ngaihthu a lo sawi tawh. A sawi chhan ber pawh khawvelin economic crisis a tawng mek a, chutih laiin India thenawm ramte chu buaina nasa takin a khuh vel mek lai a ni.

Tunah chuan thlantlin a ni ta. India economy chuan siamthat lehzual a mamawh dawn. India thenawm rama buaina nasa tak awm vel te chuan India a tihbuai lohnana hmalak ngei pawh a tul ang. Manmohan Singh chuan India ram energy leh education system chu siamthar ngai a tih thu a lo sawi tawh a. A sawi ang ngeiin 123 agreement hmangin energy chungchangah chuan hma a la tawh a tih theih ang a. Tunah chuan a thil tum lian ber tur anga ngaih chu zirna siamthat a ni ta thung.

Lar tum ve hluai chi a ni lo a, a tih tur tha taka tia, a hmaa tih tur awm hlen mi tia hriat lar a ni. India rama politician lar ber berte ang a ni ve lo a, thusawi thiam lo chungchuang a ni a, mahse, a thusawi chhun erawh thil pawimawh a ni ziah thung.

Politician Hmelthar
Lok Sabha 2009 danglamna lian tak pakhat chu MP thlan thar zingah naupang tak tak an tam vang a ni. Hei vang hian Lok Sabha 15 na hi experience nei leh thalai te inchawhpawlh berna a ni ngei ang.

Kum 40 hnuailam MP 79 lai an awm a, chutih rualin kum 70 chunglam MP pawh 36 lai an awm bawk.

Lok Sabha inthlan dang zawng aiin thalai politician tling thar an tam. Tihian Lok Sabha-a MP te kum chawhrual chu kum 50.03 vela chhut a ni.

13th Lok Sabha kha House Member te kum chawhruala an upat ber tum a ni a, kum 55.5 ang vela chhut a ni. Lok Sabha hnuhnung ber kha 52.7 vel a ngaih a ni a, Lok Sabha hmasa ber kha House Member te naupan ber tum a ni a, mahse, a hnuah a upa lamin a thangta char char thung.. 12th Lok Sabha ah khan house member te an naupang ber a, kum chawhrualin 46.42 ang vela ngaih a ni.

Member of Parliament-a thlantlin meuhte erawh politics khawvela la zunglut ngai hauh lo te an ni lo thung.

Tun tum inthlana thlantlinte pawh hi MP lo ni tawh te, Rajya Sabha MP emaw tal a nih loh pawhin State Assembly-a thlantlin lo ni tawhte an ni tlangpui.

Tihian India ram chu khawvel pum anga chhut pawhin Parliament-ah kum upa te rorelna a ni bik lo. Tun dinhmunah UK-a House of Commons a MP te kum zat chawhrual chu 50.6 a ni a, Japanese-ah pawh 52.3 a ni.

Tun tum Lok Sabhaah hian Ram Vilas Paswan, Hajipur biala hnehtu JD(U) MP Ram Sundar Das chu kum 88 mi niin a upa ber a. Kum 26 mi Lakshadweep atanga Congress MP Muahmmed Hamdulla Sayeed chu a naupang ber.

Hmeichhia te’n Lok Sabha-a 33% seat an chan theihnana tura ruahmanna - women's reservation bill chu House-ah pass ni lo mah se kumin Lok Sabha hian hmeichhia, MP-a thlantlin a nnih tam ber tum a hmu. 13th Lok Sabha- a hmeichhe MP 49 chu khumin kumin hian hmeichhe MP 50 thlantlin anni ta a ni.

Tihian Indian history-ah thil thar awmin hmeichhia te’n Lok Sabha-a 10% an khum hmasak ber tum a ni. Mahse, industralize ram te nena tehkhin chuan la beitham tak niin UK, USA, Italy, Ireland leh France te chuan 19.3%, 16.3%, 16.1%, 14.2% leh 13.9% lai hmeichhe MP an nei thng a. Sweden parliament chuan 47% hmeichhe MP neiin khawvelah hmeichhe MP ngah ber ram an ni.

Politician Misual
Politician zinga dan phal loha khawsa thanga lar Vijay Shukla, D P Yadav leh Mukhtar Ansari te leh politician lar inthlanna a ding thei lo an aiawha an nupuite dintir te ho chu tling lo mah se dan phal loha khawsa tawh thin tam takte chuan 15th Lok Sabha-ah hian hlawhtlinna an chang tho.

Chu mai a ni lo, kum 2004-a Lok Sabha inthlanna aiin kumin hian sualna neiho an tling tam zawk a, 22% laiin an tling tam a ni.

MP-a thlan thar zinga 150 lai chu criminal case awrh thei dinhmunah an ding mek. Chu’ng zinga 73 laite phei chu dinhmun hlauhthawnawm taka ding an ni bawk.

National Election Watch ho hmuh dan chuan BJP party-in chutiang mi chu an ngah ber a, MP 42 lai an nei. Congress party-in 41 neiin, SP-in 8 an nei. BSP pawhin 6 an nei.

Kumin Lok Sabha-a criminal case nei lar deuh deuh tling zo ta lo langsar zual zingah Atiq Ahmad of Apna Dal, UP; Vijay Shukla of JD(U), Bihar; Mitrasen of SP, UP leh Akhilesh Singh, Nawada atanga independent a dingte an tel.

Crorepati MP
15th Lok Sabha-a member-te chuan hlawhsan lam an buaipui hmel loh mai thei. MP zinga 300 zette chu crorepatis chin an ni tlat. Lok Sabha hnuhnungah khan crorepati MP 154 an awm a, tihian a punna chu 95% lawih a ni.

Election Commission-a thil neih leh rohlu an tarlanah chuan MP zinga hausa ber chu Khammam, Andra Paradesh atanga thla tlin TDP MP Namma Nageswara Rao niin Rs 173 crore lai a nei. Amah hnaih bertu Kurukshetra atanga thlantlin Congress MP Naveen Jinal chuan Rs 131 crore a nei bawk.

Crorepati club-ah hian L Rajagopal (Congress), Praful Patel (NCP), Supriya Sule (NCP), Rajkumari Ratna Singh of Pratapgarh (Congress) leh Andhra CM Y S R Reddy's fapa Y S Rajamohan Reddy te pawh an tel.

He crorepati chin MP te hi National Election Watch (NEW) India ram puma inzarpharha NGO 1,200 lai inzawmkhawm pawlte chuan an tarlang a ni.

Congress party-in crorepati MP hi an ngah ber a, MP 137 lai neiin BJP in MP 58 an nei a, SP in MP 14 leh BSP in MP 13 an nei bawk a. DMK leh Shiv Sena ten an nei nual bawk.

JD(U) chu House-a party zinga crorepati tam party zingah pasarihna an hauhpha a a, anni aia party anga hausa zawk NCP, BJD leh TDP te chu an khum a ni.

State zingah Uttar Pradesh chuan crorepati MP 52 neiin an ngah ber a, Maharashtra state chuan 37 an nei a, Karnataka-in 25 neiin Bihar-in 17, Tamil Nadu-in 17 leh Madya Pradesh in 15 an nei bawk. Gujarat chuan 10 na hauhin Lok Sabha-ah MP crorepati 12 an nei. Punjab leh Rajasthan atangin an tlem hle thung.

Hetih lai hian NEW coordinator Anil Bairwal chuan, “Vote leinana pawisa emaw therhlo diklo taka hmanchu inthlan hmasak aiin a nasa zawk hle a, hei hi democracy tithuanawp theitu a ni,” tiin a sawi.

Bairwal chuan MP thar crorepati chinte chuan an pawisa hloh tawh neih let leh chu an tum ber a ni dawn nia tarlangin, “Inthlanna a an senso hliahkhuh leh chu an tum ber tur a ni dawn a, chumai bakah anmahni puitute chu an duhsak bik dawn tih a chiang a ni,” a ti.

A hlui an til, Rahul Gandhi lar zual
Inthlan result chhiar hma ni-a Exit Poll tihchhuahah UPA chu NDA aia sorkarna siam thei tura tarlan a ni. BJP chuan an ngai thei lo hle a, Exit Poll chu rintlak loh leh hmantlak loh angin an chhuah a, mahse, a tuk May ni 16-ah chuan Exit Poll chu a dik zawk tih a lang a, BJP chuan UDA chakna chu an phak lo hle.

UPA chuan sorkarna an siam leh dawn ta a, thil danglam tak awm chu Left party-ho che thei lo lutuk kha a ni. An ropuina Kerela-ah leh West Bengal-ah an che thei leh lo a, national politics-a pawimawh an nihna chu nasa taka tihhniamsak an ni.

Kumin Lok Sabha -a hloh nasa ber nia an ngaih chu LK Advani a ni. Tennis khel thiam Wimbledon champion ni thei hauh lo, a dang zawnga turu em em Ivan Lendl nen hial an tehkhin phah. Politics lama mithiamte chuan Lok Sabha inthlan awm leh turah LK Advani chuan BJP chu hma a hruaipui theiin an ring tawh lo a, Gen Next ten an kaihhruai tawh ringin Narendra Modi chu BJP hruaitu la ni thei tura ngaih a ni.

Hetihlai hian BJP chuan hlimna tur an nei tho. Sorkarna an channa hmun Gujarat, Madhya Pradesh leh Chhattisgarh-ah te chuan an che tha a. Mahse, State thenkhatah erawh BJP chu an pawm thei lo bur tih erawh inthlan result atangin a lang chiang em em thung a, Delhi khawpuia vawk lallen an chakna leh an tumna berah pawh engmah anni leh thei lo bawk.

Uttar Pradesh-ah pawh BSP chu an che tha lo. Chief minister Mayawati-i’n prime minister nih a tumna thawm pawh a daih nghal. Chutih laiin Bihar-ah erawh Nitish Kumar rorel thatna chuan awmzia a nei tih a lang. Hindi heartland tihiala an koh state-ah hian chi inthliarna leh identity politics lam a lang vak dawn tawh lo niin a lang a, chu chu good governance-in a ken tel a ni a tih loh theih loh ang. Chu chu a dik a nih ngat chuan India ram pum tan chanchinthar lawmawm em em a ni.

Uttar Pradesh-a thawhpui nei hauh lova Congress an maldin ngamna chhan chu Rahul Gandhi vang tih a ni. Congress tan star campaigner a ni a, hmun tin hmun tangah kalin rally tinah thu a sawi a. Chu chu Congress party chuan hlawkna tel phahin an chet ropui phah hle. Andra Pradesh-ah pawh Congress an che tha. Delhi-ah pawh Sheila Dixit chu a ropui tial tial a, national level-ah pawh Congress leader chhuanawm leh zahkai a ni ta zel.

Sawiseltute chuan dynastic politics chuan India ram a la tuam an ti thei ang. Congress chuan Nehru-Gandhi family chu an that phah em em a, an vote hmuhna hnar ber a ni tih an hai lo. Rahul Gandhi mai a ni lo, Uttar Pradesh-a Congress chetthat chhan ber pakhat chu thawkrim em em Priyanka Gandhi vang nia ngaih a ni.

Inthlan hma khan Congress chuan huaisen takin thutlukna an siam a, Left party-te nena an thawhhona an chhu chhia a, Uttar Pradesh-ah anmahniin an ding a nih kha. Congress hi hlawhtling lo se Uttar Pradesh-ah hian nasa taka chau thei an ni. Mahse, inthlan hmasa aia nasa zawkin an chak a, chu mai a ni lo, India ram politics-a pawimawh em em reng mi pahnih Laloo Prasad Yadav leh Ram Vilas Paswan te chu inngaitlawm takin an awm tir theih phah bawk.

UPA chuan kum 5 chhung sorkarna an chang leh dawn a ni.. Manmohan Singh chuan naupan lam a pan hauh tawh lo. A hma emaw a tlai emaw Rahul Gandhi prime minsiter a nih hun a thleng hnai hle tih a lang tawh.

India politics zirmi te chuan tun atanga rei lo teah Rahul vrs Modi tih chu sawi ber tur niah an ngai.

BJP-in Modi an vawrh an ring a, chutih laiin Congress hruaitu tur chu Rahul a ni dawnah an ngai a ni.

Read more...

Hmasawnna Him Leh Him Lo

¢ Lalthlamuana Ralte

Tun hnai lawkah chief minister-in Sairang thlenga rel thlentir chungchang a sawi a, hemi chungchang veitute zingah inhnialna a chawkchhuak nghal a nih hi. Tunhma pawhin Mizoram chhung ril zawka rel kawng siam chungchang hi sawilan a ni fo tawh a, railway budget-ah pawh tarlan a lo ni tawh. Mahse, a taka hmalakna mumal hmuh tur a la awm meuh loh avangin mipui titi a tling lo mai zawk niin a lang.

Rel kawng siam chungchang chik zawka ngaihtuahtute kara inhnialna a awm mek lai hian zau zawka ngaihtuahna kan sen a pawimawh khawp mai. Hmasawnna thlen thei tur thil lo dodal thin hi a fuh em? Hnam himna hi thupui berah kan neih ziah a, chu chuan min titim mah mah lo maw? A lehlamah chuan hmasawnna thlen thei tur thil chi hrang hrang dawngsawng tur hian kan hnam hi a inpeih tawh chiah em? He'ng zawhnate hi ngaihtuahna fim tak nena chhan chi a ni.

Hmasawnna man hi a sang a, awlsam taka lo thleng mai thei a ni lo. Thuneitute kutah thui tak a awm laiin mipui pawhin tih tur an nei. Mipui mil tur tawka kal thiam a pawimawh a, ram hruaituten ngaihtuahna thui tak an neih ngei a tul bawk. Ram hmasawnna hian mipui nawlpui a hrut tel tur a ni a, chutih rualin hnam a him tur a ni bawk.

Indopui Pahnihna zawh hnu khan Asia khawmualpui leh Africa khawmualpuiah khawthlang ramte'n an awpbehna lak atanga talchhuak, sorkar thar a lo piang sup sup a. Hun rei tak chhung mingohoin an awp tawh leh Indopuiin a chhut zawi vekte an nih hlawm avangin he'ng ramte hian a tir te atangin harsatna lian tak tak an hmachhawn nghal a ni.
Chutihlai chuan khawthlang lama mithiam (development economist) thenkhatin mahnia inrelbawl thar ram rethei tak takte tan hian ngaihtuahna an seng nasa hle a. Ram retheite dinchhuahna tur chungchang sawina atan 'Development' tih hi an hmang lar a, ruahmanna (development model/theory) chi hrang hrang pawh an siam tam viau a ni.

Hun a lo kal zel a, rei lo teah chu'ng ram hrang hrangte dinhmun chu a inthlau ta hle mai a. Policy nei tha leh hruaitu nei tha apiang an dingchhuak a, khawthlang ramte el pha khawpin an thang chak a. Chutihlaiin, hruaitu nei tha lo, sorkar inrelbawlna fuh si lo leh policy mumal nei bawk si lote than erawh a thu a, an tlachhe tial tial mai a ni.

Tunlai huna ram hmasawnna (economic development) chungchanga mithiamte inlungrualna ber pakhat chu a bulthutah sorkar inrelbawlna tha (good governance) a awm tur a ni tih hi a ni. Ram hausa zawkten tanpuina an pek dawn pawhin Good governance hi an ngai pawimawh hmasa thin. Sorkar tha loah chuan sum leh paiin mi retheite hnen a thleng pha lo a, corruption a hluar a, dan bawhchhiatna pung a, ram hmasawnnain mipui a thlawhkhum thin.

Ram hmasawnna chungchangah hian kan hruaitute pawh hi an inbihchian a ngai hle a, mipui sukthlek zawng te, kan hnam dinhmun te leh a hlawkna kan tel ruala a man kan pek turte thlengin ngaihtuah lawk a ngai. Chumi a zira dim tea kal thiam a pawimawh a, kawng thenkhatah chuan chak taka kal pawh a tul tho bawk ang.

Kum 1987 khan Brundtland Commission (World Commission on Environment and Development) chuan ram hmasawnna chungchangah ngaihdan thar a puangchhuak a. Chu chu 'Sustainable development' tih a ni a, Mizo tawng chuan 'Hmasawnna tlo' tiin a sawi theih awm e.

Sustainable development tih hian a kawh ber chu, tuna kan mamawh thil kan buaipui hian nakin thangthar zelte harsatna a thlen tur a ni lo, tih hi a ni. Hmalam hun thlir tel miah lo, tuna hmasawnna min thlen thei tur apiang 'a tha alawm' tia kalpui ngawt zel chi a ni lo tih chu mithiamte thurolum a ni ta.

Sustainable development thlirna hian a tum ber chu environment humhalhna rilru pu chunga hmasawnna hnathawh a ni. Mahse, chu bakah chuan nakin thlenga mipui nawlpui him theihna tur hmasawnna tlo siam hi a tum bulpui zawk chu a ni. Chutiang zawnga thlirna chang chu keini pawh hian kan hriat a hun hle a, rei lo tea kan hnam tana pawi thei tur leh vaihoin min chimral theihna tur zawng hian hma kan lo la palh ang tih a hlauhawm hle a ni.

Mi thenkhat chuan 'Mizote hi kan dawihzep lutuk a, chimral te hi kan hlau leh lutuk a. Hlauh kan ngah chhung chuan hnam dangte rualin hma kan sawn ve thei lo ang,' an ti thin. Mahse, hlauh nei nazawng hi mi dawihzep an ni vek lo. Fimkhur vanga tim thin te, mahni inhriat chian vanga hlauh neih thinte hian leilunga Mizo hnam a din reng theihna tur an ngaihtuah chiang zawk mai thei.

Ram hmasawnna chungchangah hian tuna kan hnam dinhmun tak hi nakin hun hril thei a nih avangin a pawimawh khawp mai. |hangtharte zingah ram vei tam tak an awm a, mahse hnama chiang tak tak an ni vek kher lo. Mi tam tak chuan tunlai taka kan ram dinhmun hi an vei tawk a, a chhe lai siamthata, chak taka hmasawn hi an ngaihtuah ber a ni. Hnam chungchanga an ngaihdan pawh a zau huau a, hnam dang nena inchenpawlh huphurh miah lo leh inneih pawlh thleng pawha pawiti lem lo an awm bawk. Mahse, tuna hmasawnna hian nakinah tahna leh rumna min thlen thei tih ngaihtuah thin eng zat tak awm ang maw?

Kum 1993-a 'State of the World' report-in a tarlan dan chuan khawvel pumah hian hnam tenau (indigenous cultures) 4000 atanga 5000 inkar an awm a, chu'ngte chu a lu nungin maktaduai 300 chuang zet an tling. He'ng hnamte hi nunphung leh ze hran nei, pi leh pu atanga hnamzia tam tak la vawngnungte an ni a, hnam lian zawkte kara khawsa an nih bakah anmahni aia chak leh ropui zawkte'n an awp mek avangin ral thei dinhmunah an ding mek a, nekchep an hlawh a, humhim an ngai a ni tih hriain UN chuan kum 1993 atang khan 'The International Year for the World Indigenous Peoples' a puang nghe nghe a ni.

India ramah pawh hian chutiang hnam tenau chu mi maktaduai 50 chuang awmin chu'ng zingah chuan Mizote pawh hi kan tel a ni. Hnam lian zawkte kara awm kan nih avang hian kan inhung thiam a ngai hle a, dan hmanga kan inhumhalh thiam a pawimawh rualin kan hnam himna atan hian keimahni hian mawh kan phur lian hle tih pawh hriat a tha awm e.

Hmasawnna hnathawh (development project) chi hrang hrang avangin khawvel hmun hrang hranga khawsa hnam tenauten an tuar nasa hle a. Anmahni awptu sorkarin tim miah lova hma a lak thin avangin chhantu nei loin mangang takin an tiavai a, chimral hlauhthawnawmin an ding thin. Chutiang chu kan la tawng ve lo ang tih sawi thiam a har khawp mai.

Ram hmasawnna tih hming hrim hrim hi kan tuipui hle a, a hming a rik tawh chuan kan lo 'Amen' dual zel ni pawhin a lang. Mahse, hmasawnna hmingpu nazawng hian kan beisei ram min hruai thleng dawn lo a, hmasawnna tluantling a ni vek lo. Kan sawilar em em Look East Policy pawh hi India ram tana policy tha tak ni mah se tuna kan ram dinhmun atanga thlir chuan (Mizoten) kan lo hlawkpuina tur a van hmel khawp mai. A awm a nih pawhin a beitham viau mai thei a ni. Hetia a lan danah hi chuan a hlawkna awm tura an sawite hian min thlawh khum ang a, Mizoram leh hmarchhak biala mite hi chu an sumdawnna kalkawng (corridor) chauh kan nih hmel riau a ni. A policy hi a hlawhtlin viau phei chuan hnam dang nen kan inpawlhsawp viau thei lehnghal a, chu chuan harsatna min thlen zawk mai thei.

History-a kan hmuh dan chuan a tlangpuiin ram hmasawnna hi a tahtawla lo thleng a ni. Ei leh bara intodelh hi a hmasa fo thin a, chumi hnuah industry leh sumdawnna lama hmasawnnain a zui thin. Chutiang diak diak chuan ram hrang hrangah a thleng dik vek kher lo na a, a tlangpuia hmasawnna thlen dan erawh a ni. Heti zawng hian sawi ta ila, ei leh bara phang lo khawpa (food security) kan awm phawt loh chuan a ropui theih tak tak loh. Hmasawnna hmingpu thil tam tak pawh han ti mah ila kan dinhmun chu a derthawng reng tho ang.

Economics subject peng pakhat - welfare economics-ah chuan mipui intluktlanna lam ngaih pawimawh a ni. Hmasawnna te, changkanna te hian mi zawng zawng a huap tur a ni a, mi thenkhat an hausak thur thur laia thenkhat an rethei tial tial a nih chuan harsatna namen lo a thleng thei a ni. India chhulchhuaka economist ropui ber, kum 1998-a Nobel Prize (in Economics Science) dawngtu Bengali pachal Amartya Sen kha welfare economist a ni. Hman atanga vawiin thlenga a ngaih pawimawh chu retheite dinhmun chawikan leh mihring intluktlanna hi a ni.

Mi rethei leh hnuaihnung zawkte'n an chanvo an chang lo thin a, an chanai chhuhsak an ni zawk thin hi a vei hle. Dinhmun derthawng taka ding mekten an chanai tur dik tak an chan theih nan sorkar pawh hi a inrawlh tur a ni, tiin a sawi thin. Mipui nawlpui thleng phak lo tur hmasawnna hmingpu sorkar project lian tak takte avang hian tute emaw chuan an chanai an hloh thei a, chu chuan rethei sate tan retheih lehzualna a thlen thei a ni. Kan ngaihtuah ngun a ngai khawp mai.

Ram hmasawnna atana pawimawh ber pakhat chu hmasawnna thil eng pawh dawngsawng zo tura hnam pum lo inbuatsaih lawk phawt hi a ni. Kan hnam zia han thlir vang vang hian siamthat ngai te, chin thar ngai te, inzirtir ngai te, hriat belh tur te a la tam khawp mai. Chutiang thoin kan ram hruaitute pawhin zir tur te, sim tur te, hriat belh tur te an la ngah khawp mai.

Pawnlam lang thei thila ropuina te, hmuh theih thil langsar tak takte hi hmasawnna a ni tak tak lo a. Ram hmasawnna chuan mipui nawlpui dinhmun a chawikang ngei ngei tur a ni zawk.

Thil hlauhawm ta chu hmasawnna kan buaipui mah mah ang a, kan hmanhmawh lutukna lamah hian kalsan kan nei thluah ang a, hmasawnna kebai, mi thiamten 'crippled development' an tih ang lek hi kan nei mai ang tih a hlauhawm. Chuvangin, uluk taka ngaihtuah a, kan hnam himna tur ngei, mipui dinhmun chawikang thei tur chi hmasawnna chauh hi kan thlan tur chu ni thei hram teh se.

Read more...

Hman Lo

¢ Lalhruaitluanga Chawngte

Thingkittu chak zet mai hi a awm a, an khua leh a chhehvelah chuan a hmingthang hle.

Vawi khat chu, mihausa deuh pakhat hian chu thingkittu chu a ruai a, hlawh pawh a tha ngang mai. Hlawh a tha bawk a, thingkittu chu a phur em em mai a, theihtawp chhuaha thawh a tum a ni.

Amah ruaitu chuan hreipui a pe a, tin, a thing kih tur chin a hrilh a, thingkittu chuan a hna a tan ta.

A ni khatnaah chuan thingkung 18 zet a kit hman. Pa pakhat kihah chuan a tam tham a nia!

A ruaitupa chu tlaiah a rawn kal a, thingkung 18 zet a kit hman tih a'n hria chu a lawm hle. Lawmthu a hrilh mawlh mawlh a, tin, chak a tihzia leh a ngaihsanzia te a hrilh mawlh mawlh bawk.

Thingkittupa chu a phur telh telh mai; chutia amah ruaituin a'n fak te chu a lawm a, a inhumruh sauh sauh mai.

Thingkung 18 a duhtawk ta lo; a aia tam kih a tum a, a tang hle.

Mahse, a ni hnihnaah chuan thingkung 15 chauh a kit hman!

A ni thumnaah chuan a'n inhumruh a, a tang ngang mai. Mahse, thingkung 10 chauh a kit hman.

A rei telh telh a, tang viau mah se a kit tlem ta tial tial mai.

"Thahrui ka nei ta lo a ni ang e, engatinge maw'n dawn le," tiin thingkittu chu a inngaihtuah a, mak a ti mai a ni lo, a mangang a ni.

A mangang chuan amah ruaitu chu panin thil awmzia chu a hrilh ta ngawt mai.

"Engtik nge i hreipui i tahhriam hnuhnun ber?" tiin a ruaitu chuan a lo zawt a, thil dang engmah a sawi lo.

"Ka hreipui hi maw? Hreipui tahna hun ka nei hlei nem, ka buai lutuk a..."

('Busy' tih, Stephen Covey ziak, "7 Habits of Highly Effective People" tiha mi lehlin a ni.)

Read more...