HEALTHY EATING AND DIET-1

Thau hi chakawm viau
mahse nalh lo khawpa thau hi a hlauhawm a. Vawikhat thau vak tawh chuan intih cher leh tum hi thil hautak a ni. Thau inti cher leh te hi chuan theihpatawp an chhuah thin vang a ni a, a tlangpuiin mi cher hi chuan chaw an ei tlem a, an ei dan pawh a danglam bik a ni. Mi cher hi chu chaw ei laiin an titi a tui a, mi thau erawh hi chuan tawng miah lovin an ei char char thei thung a, thil dang an ngaihtuah hman thin lo.
Cher ria thlarh leh hrisel nih i duh chuan a hnuaia thil ei dan tur ang hian han ti chhin teh.
1. Thei ei tam rawh.
2. Chaw i ei apiangin thlai hring hel ei chi ei tel tum rawh.
3. Chawhmeh kan ro ei uar lutuk suh.
4. Nitin tui no riat in tum la, hei hian i kawchhung a tifai anga, i thisen a fai bawk ang. Tui tih hian thingpui, coffee, cold crinks etc. te a huam lo.
5. Chaw nghei mai mai suh. Chaw tak i ei peihlo anih pawhin thei leh taksa tana tha tur thil dang tlem tal ei thin ang che.
6. Chaw i ei hmain thingpui thlum te, chhang thlum te ei suh. I pumpui tan a tha lova, i chauh phah zawk daih thei bawk.
7. I chaw ei hmain aerated drinks - Pepsi, Coke etc. in lo la, a ti puar luah che anga, i taksa tana tha tur i ei na a dal thei a ni. Hengah hian chakna a awm loh avangin taksa tan thatna a nei hranpa lo.
8. I thil ei reng reng thial sawm tha la, i thial sawm that chuan tam lutuk i ei tur a ti ziaawm anga, i pumpuiin a pai tawih sam bawk ang.
9. Chaw i eiin hmanhmawh lutuk suh. I pumpuiin a puar tawh tih thluak hnena hrilh chhawn nan minute 20 chhung hun a duh a ni.
10. Thlai hring hel ei chi ei tam la, i thisen a chak ang.
11. Sangha tin, vawksa tin etc. te hi siam awlsamin tui viau mahse chakna an pai tlem avangin ei tam loh a tha zawk.
12. Masala leh chi ei tam loh a tha.
13. Sa ei tam lutuk suh. Sa i ei pawhin a ti ei tam zawk la, a thau ei nasa suh.
14. Artui hi siam a awlsamin a tui viau a, mahse ei tam lutuk erawh a tha lo tih hriat a tha.
Chaw ei kar lakah hian thil dang hmawmsawm ei hi a chakawm duh viau a, mahse hei hian mi a tih thau duh em avangin tih loh hram hram a tha a ni. Chaw i ei hma si a i ril a tam chuan thauna lampang ei mai lovin thlai a hela ei chi - carrot, fanghma etc. leh thei te ei zawk ang che. Inti cher duh i nih chuan nidanga i duh hun huna i thil ei ang kha i ei thei tawh lo tih hre reng la, tumruhna tak tak nen insum hram hram zawk ang che.
Zingkar chaw ei hmaa thingpui leh chhang ei hi tih than phei chuan a tui duh viau a, mahse chaw ei leh mai si chuan pumpuiin a zo duh lova, thau mi tan chuan thau lehzualna a ni ringawt mai a ni. Cher i duh chuan thingpui leh chhang ei lovin tui in la, hei hian thil dang i ei chakna a tibo anga, i taksa tan pawh a tha zawk dawn a ni.
Kan sawi tawh ang khan thau tawh hnu chuan intih cher leh hi thil awlai a ni lova, taima tak leh tumruh taka insum chunga inenkawl loh chuan a theih loh tluk hial a ni. Mahse duh tak tak tan chuan theih loh thu a awm lova, a chunga kan sawi tak te khi zawm la, cher nalh tak nih i duh chuan bei tak tak teh. Thil reng reng tum tak taka tih chu theih loh mang hi a awm lo ania. I lo cher chuan nangmah pawh i inthazo sawt anga, i nun pawh a hlim sawt ngei bawk ang.


Read more...

SKIN NOURISHMENT

¢ Debbie Chawngthu

Taksa tih nalhna tur lampang sawi reng reng hian kan thu hman hnem ber pawl chu nourishing tih hi a ni a. Kan taksa hriselna tura ei leh in kan duhtui ang bawk hian vun enkawl dawn chuan chawmtu tha kan mamawh a. Chuvangin, vun enkawlna lampang sawi dawn chuan nourishment tih hi sawi zin a ni reng a ni.

Nourishing han tih hian mi tam zawk chuan cream inhnawih ngun tihna ni deuh berin kan ngai a, a dikna lai chen pawh a awm. Nourishing cream hian vun a ti mawm a, a ti nem a, ama mawmna vawng turin a pui a ni. Vun ti mawm tur anih avangin moisturising cream aiin a mawm zawk a, a tlangpuiin vun ro leh kum upa lam tan a tha leh zual a. Nourishing cream i inhnawihin dim leh ngun takin inhnawih thin ang che. A tlangpuiin vuna hnawih chi reng reng hi minute 20-25 chhungin vuna a thawh dan tur angin a thawk a, rei tak chiah hian awmzia a nei em em hran lo.Vunin a hip tawh chuan lapuaa hrukfai leh mai tur a ni a, nourishing cream hi moisturiser anga zankhuaa hmai chiah nana hman chi a ni lo.

Vun enkawlna chi reng reng hi chemical pawlhna aiin hnimhnah atanga siam te hi an tha zawk a, vun huat pawh a awm lo zawk bawk. Vun chawmna atana zikhlum, carrot, wheat, khawizu, bawnghnute leh artui atanga siam te hi an tha em em bawk. Vun that lehzual nan mask hi karkhatah vawikhat tal ti thin la, kum upa leh vun ro nei i nih chuan egg mask hi a tha ber. Mahnia egg mask i siam duh anih chuan hetiang hian siam ang che~~ Artui chhung mu la la, chu chu bawnghnute fianhnih leh khawizu fiante chanve nen chawhpawlh la, i hmaiah minute 15 chhung chiah ang che. Chumi hnuah tui lum lep lepin i hmai chu phih la, moisturiser in dimtein nuai ang che. Vun ro hi vun mawm aiin enkawl ngun a ngai a, mawm a awm loh chuan vun pawh a hun hmain a chuar thin. Vun ro nei i nih chuan astringent hi hman loh tur a ni a, vun a tiro zual thei tih hriat tur. Hmai phih nan pawh sahbawn ai chuan cleanser diak chi hman tum ang che. I vun fai takin dah reng la, moisturiser hmang uar bawk ang che. Khawih danglam ngai miah lova moisturiser ni nghal chu khawizu kan tih fo tawh kha, khawizu hlanga hmai chiah pawh hi a tha khawp mai.

Mizo zingah hian a hmei a pain hmai duk kan tam ta hle a. Hei hi a chhan bera mithiam zawk ten an sawi danah chuan zuk leh hmuam lamah kan insum loh vang ani te pawh an ti thin. Sahdah/khaini te hian thisen an heh a, taksaa tui awm te pawh an ei ve thin. Chuvangin, zuk leh hmuam ti mi i nih chuan a tam thei ang ber tui in thin ang che. Tin, hmai hnawih kan hman reng reng te hi company tha leh lar siam an ni tur ani a, cosmetics te hi expire ve thei an nih avangin rei tak hman loh a tha bawk. Hmeichhe zinga hmai duk awm tamna chhana an sawi leh pakhat chu kan hormonal balance dik tawk loh vang an ti thin a. Regular leh a hun pangngaia monthly period i nei lo anih chuan doctor rawn ang che. Tin, hmai duk hi menopause (hmeichhe thi hul) dawnin a awm ve thei bawk a, hmai lo enkawl that mai bakah doctor rawn a tha ani.

Kan hmaiah hian a mawm lai leh a ro lai bik a awm ve thei a, enkawl pawh a buaithlak hle thin. A bikin kan T-Zone(chal,hnar,khabe bawr) hi a mawm duh hle a, a mawm lai te kha astringent in hru thin ang che. I vun a mawm hle anih chuan artui var lai chawk phuan la, minute 15 chhung i hmai chiah nan hmang ang thin che. Tomato a hmai hruk hi vun mawm tan chuan a tha a, vun a tih ngo bakah vun kua a sawr zim a ni. Vinegar/sertui leh tui inzat chiaha hmai hruk hi a tha bawk a, tonic tha tak a ni mai. Vun mawm tan chuan tui leh sahbawna hmai phih hi a tha ber a,medicated soap ni thei se a tha lehzual. Arngeng hawlphum i nei anih chuan i hmai tifai ngun la, bawnghnute lum pep pepin i hmai hru thin ang che. Khawizu tlem chhuang lum la, chu chu i arngengah emaw i hmai pumpuiah regular takin hnawih thin ang che. Vun tha leh mam i neih duh chuan i mamawh tawk mu la, tui in tam la, thei leh thlai ei tam ang che. I hriselna a that loh chuan inenkawl thuai la, pawnlamah inhnawihin bei vak mah la, i taksa a hrisel si loh chuan a sawt loh tih hre reng ang che.

Read more...

All About Hair

¢ Debbie Chawngthu

Sam a tlak kawlh hun lova tla kawlh hi lulei fai tawk loh vang a ni ve thei a, sam hrisel chu kum li emaw kum aia tlemah emaw a tla a, a tharin a rawn to leh thuai thin. Engemaw hrisel lohna avanga sam tla te pawh a awm ve thei a ,hei hi chu taksa lama harsatna engemaw a awmin a lo lan chhuah nan sam a lo tla ta thin a ni. Sam a tlaka a lo to leh mai na tur lulei balin a lo dan khan sam to thei lovin sam a tla kawlh thei a. Lulei fai tur chuan sam pawh a fai tel a ngai a, kan awmna leh hnathawhna hmun azirin sam suk hun hriatthiam tur a ni. I sam i sukfai a, ngun taka i enkawl anih ngat chuan luphut lakah i fihlim anga, i sam a nemin a tle bawk ang.

Luphut hi inkaichhawn theih a ni ve tlat a, a tihreh nan chuan sertui hi a tha ber a. Sam i suk hma darkar khat a la awm tihah i lulei kha sertuiin massage chhuak vek la, shampoo in su leh ang che. Sertui hi luphut tihreh nan a that mai bakah hmai mawm lutuk vanga hmai bawl nei tan te pawh a tha a. I hmaia i hmang duh anih chuan ser chu zai phel la, i hmaiah minute 5 chhung nawr kual la, tui vawtin phihfai leh ang che.

Sam hmawr kak nei chuan sam hi a nalh thei lo reng reng a. I sam hmawr a kak loh nan thla khatah vawikhat i sam hmawr tan ziah ang che. Sam hmawr kak hi thenkhat chan an dye hnan thin a, hei hian a kak a hliahkhuh lem lova, samin a haw zawk mah a ni. I sam hmawr a kak naih chuan a kak lai zawng kha paih tir vek la, a kakzel tur pawh i veng thei ang. I sam hmawr a kak anih chuan coconut oil emaw almond oil emawin i lulei nuai ziah la, na lutuk erawh chuan nuai suh ang che. I nuai rei deuhah a rawn lum veng veng ang a, chutah chuan samkhuihin minute 10 vel khuih leh ang che. Mahse i samkhuih danah fimkhur la, pawng khuih tawk tawk loh tur a ni.

Sam tlem hi tihngaihna a vangin chei ngaihna pawh a awm tam vak lo a, a lan tam nan chuan tihkir tir a ni deuh ber mai. I sam tlem ti lang tam tur chuan i sam leh luleiah bawnghnute chhuan so loh hi ren vak lovin thih thin la, darkar khat i chiah hnuah sufai ang che. Hetiang hian karkhatah vawihnih ti ziah la, i chiah chhungin massage ziah bawk ang che.

Sam tuak hi chhan tam tak a awm thei a. Mi thenkhat naupang te te sam tuak te hi chu an pi leh pu atanga tuak hma, inthlah chhawn vang te a ni thin a. A chang chuan rilru hah lutuk avang te, thyroid gland ah engemaw dik lo a awm avang pawhin a tuak mai thei bawk a, zu in nasat vangin sam a tuak thei bawk. Vitamin A leh D tlakchham avang hian sam a tuak hma ve thei bawk a, lu vuna natna hrik awm avangin a tuak hma thei bawk a ni.

Engpawhnise, sam tuak tawh tihreh theih loh mahse a tuak zel tur erawh a ven ve theih a. A hmasa berin i hriselna a tha tawk nge tawk lo hrechiang phawt la, taksa hriselna hian kawng ro a su em em a. Castor oil hi chhuang lum la, i luleiah tat chhuak vek ang che. Chumi hnuah i beng chung ve ve ah i kut dah la, i sam na vak lovin tham ang che. Chutah a lai taka i kut inhmu turin i lulei nuai chho la, hetiang hian minute 15 chung ti ang che. Su lovin mutpui mai la, a tuk zingah sufai ang che.

Shampoo hman zin dan hi a inang lova, sam awmdan azirin hman zin a pawiin a pawi lo ve thei a. Sam ro nei tan chuan karkhatah vawi li suk a pawi lova, sam mawm tan erawh chuan vawi nga tal suk tur a ni. Nipuiah chuan thlan te a chhuak hnem a, sam ro tan pawh suk zin a pawi lo. Tin, tunlaiah nitina hman theih tur shampoo chak lo chi te pawh a rawn chhuak ve zel a, nitin i su duh anih chuan heng shampoo chak lo chi hmang hian nitin su thin ang che. Amaherawhchu, nitina sam i su anih chuan oil massage lam i uar a ngai ve leh thung a, kartin vawihnih tal i sam oil thin la, zanah mutpuiin a tuk zingah sufai leh mai thin ang che. Sam kan sukin kan tleuhfai leh si loh chuan luphut leh thak te a awm awlsam bik a, fai taka tleuhfai thin tur a ni.

Read more...

FACE FACTS

¢ Debbie Chawngthu

Mi hmeltha tak mai hi chu vawikhat pian manah an vannei bik a, hmuh pawh an nuamin a hahdam thlak bawk thin. Hmeltha inenkawl peih tak chu hmuh an nawm viau laiin hmeltha inenkawl peih lem lo erawh hmuh an uihawm duh hle thung. Kan hmelin zir lo mahse kan inenkawl peih chuan a lang a, zahawmna a keng tel ve tlat bawk. Inenkawl ngun tih hian kawr man to tak tak inbel leh pheikhawk man to tak tak bun tihna a ni kher lova, taksa chhunglam leh pawnlam enkawl ngun kan sawina zawk a ni.

Vun enkawl ngun loh chu make-up hnawih teuh mah ila, kan enkawl ngun loh zia kha a lang thovin a thup tak tak theih loh a. I vun i enkawl ngun a, ei leh in i fimkhur chuan i nalh ang a, i tar har bawk ang. Hmai pakhat chauh nei i ni tih hria la, i damchhung daih tur anih vangin i enkawl ngun a phu hliah hliah a ni. I vun i enkawlna kawngah vawikhat tih duhtawk mai lo la, regular takin enkawl thin ang che. Make up hmang thin i nih a, i hah thin hle anih pawhin i mut dawnin i hmai chu fai taka phihin mu chauh thin ang che. Nisa, thli leh boruak vawt tak te hi vunin a huat avangin protective cream hman a tha hle bawk.

Vun enkawl nan hian thil chi hrang hrang a tam a, a pawimawh hmasa ber chu vun tihfaina hi a ni. Cleanser hi a tui emaw a diak pawh nise a tha vek a, i hmai leh nghawngah hnawih la massage thin ang che. Nghawng hi hmai ang chiaha enkawl ngun loh chuan a chuar hma ve tho a, min ti lang tar hma tu ber pakhat a ni thei bawk. Chuvangin i hmai i massage reng rengin i nghawng hmaih loh hram ang che. I massage zawhah lapua hmangin hrufai la, chutah toner inhnawih leh ang che. Toner hian vuna bal leh la fai tawk lo a tifai a, vun kua a tizim bawk a ni.

Moisturiser hi mi tupawhin kan mamawh ti ila kan tisual lo ang. Vun ro nei phei chuan hman ngei ngei tur a ni a. Vun mawm nei pawhin an mamawh ve tho a, mahse a mawm lutuk lo chi hman a tha. Night cream hmang hi kan tlem zawk maithei a, vun inrin leh chuar tawh mai bakah chuar tur a venga, kum upa tawh lam tan phei chuan a tha lehzual. Zing i thawhin tui vawtin i hmai theh thawt thawt la, hei hian i vun a ti nungin thisen kal pawh a ti tha ang. Cleanser hnawih la, lapaw huhin hru ang che. I hrukfai hnuah toner lapuaah tat la, i hmai a chho zawng leh chhuak zawngin hru ang che. I hmai a mawm hle anih loh chuan moisturiser pantein hnawih nghal ang che. Moisturiser i hnawih hian make up hnawih hnan nghal mai lovin reilote tal nghak phawt ang che.

Zan mut dawna hmai tihfai a tha tih kan tarlang tawh a. Vun ro nei i nih chuan cleanser in i hmai chu hru la, lapaw huhin hrufai leh ang che. Lapua i tih huh loh chuan i vuna mawm awmsa kha i hru ro lehzual ang a, a hma aiin i vun a ro zawk ang. I hrukin dimtein hru la, pawng nuai vak vak suh. I hrukfai zawhah moisturiser hnawih la, upa lam tawh i nih chuan night cream hnawih ang che. Night cream hi hnawih tam lutuk a tul lo. Tin, vun tha tur chuan mut tam leh rilru hahdam a pawimawh a, i taksa mamawh ang tawk mut tum hram hram ang che.

Read more...

WAYS TO AGE PROOF YOUR SKIN-2

¢ Debbie Chawngthu

Kar hmasa lam ami chhunzawmna a ni a, a hmasa ami lo chhiarlo tan pawh chhiar ngei ngei ngai turah kan han dah ve tawp a.

Nitin tui tam tawk in rawh, thlasik lai chuan nikhatah no sawm tal in la, khaw lum lai chuan nitin no sawmhnin in tum la, i taksa tan pawh a tha ang. Tui hian vun a ti hnawng a, a ti mawm bawk a ni.

Thingpui leh coffee in tam lutuk suh. caffeine hian vun a tiro a, ei in tam lutuk chuan vun a tiro thei a ni. i thil eiah fimkhur la, thil reng reng a lutukin ei suh. Iron, B12, folic acid leh copper te hian thisen kal a ti tha a, a ti chak bawk a. sIron hi sa thin, sangha, artui chhungmu, bean, thlai hring, thei leh thei pilsa atangtein a hmuh theih a. B12 hi sa, sa thin, bawnghnute leh bawnghnute atanga ei tur siamah te a hmuh theih a ni. Folic acid hi thlai hring, cereals, nuts, balhla, serthlum, sa, sa thau, artui leh bawnghnute atanga eitur siam atangatein a hmuh theih a. Copper hi cereals leh pulses, nuts leh thei, thlai sa leh sangha atangtein a hmuh theih a ni.

Vitamin zawng zawng hi taksa tan a tha vek a, mahsre vitamin C leh E vun tan a tha bik zual an ti. Hemi pahnih hi kan taksain a hmuh that chuan kan tar har an ti bawk. Mahse hei pawh hi a dik chiah leh dik chiah loh thuah cientist te an inhnial reng tho. A enga pawh chu nise, vitamins hi kan taksa chuan a mamawh reng reng a, hrisel leh tar har i duh chuan taksa mamawh tawk vitamin ei tum ang che. Damdawi an siam chawp aiin thali hring leh thei te hian vitamin chu an pai tam zawk a ni.

Hmai exercise thin hian vun chuar tur a veng a, mahse hetah pawh hian inhnialna a tam tho mai, A thenin vun chuar tur a veng an tih laiin a thenin a tizual zawk an ti a. I ti thin anih pawhin karkhatah vawihnih ti la, a pawi lo. Taksa sawizawi hi a hlawk hle a, karkhatah kawhnih jogging ti la, anih loh pawhin tuktin inhrui zuanin vawi 200 zuang thin ang che. Taksa che vel hi thisen kal ti tha tu a ni a, tihrawl a ti chak bawk a ni.

Thawk la vak vak rawh, tukverh bula thu/mu la, nasa tak takin thawk la rawh. Hna i thawh emaw i thu mai mai emaw pawh nise thawk la vak vak thin rawh. Thawk i lak nat hian chuap tan a tha a, i vunin a hrisel phah bawk ang. Thawk i lak natna hmun erawh fimkhur ang che. Motor tlan tamna laiah chuan thaw la vak vak suh. Motor khu i hip tam a, chu chu taksa tan a pawi a ni. Motor tlan lai bulah pawh i thaw ip deuh la, anih loh pawhin i hnar rawmawlin hup thin ang che.

Hlim tum rawh! Thil reng reng a hlimawm zawngin lak tum la, i ngaihtuahna ti naupang rawh. Upa deuh pawh ni la, thalaite bula awm tam tum la, an tih ang zawng i tih ve theih ti ve thin la, i naupang rei nge nge ang. I taksa i enkawl ngun peiha i rilru a hlim chuan i kum aiin i lang naupang anga, mi pawhin an awt zawk ang che. Kan rilru put zawng ang ang hian kan lang thin tih hriat reng tur a ni.

~~ Bawnghnute hi taksa tan mai nilo vun enkawl nan pawh a tha a. hna hah taka thawh hnua bawnghnutr hmaia hnawih hian min ti hahdam sawng sawng thei a ni. Vun a tingoin a tinem bawk a ni. Hnawih hnu minute 10 ah tuilum pip pepa tihfai tur a ni.

~~ Make-up englai pawha inbel hi a thalo a, hmai tha tur chuan facial thlakhata vawihnih tal tih thin tur a ni.

Read more...

Ways To Age Proof Your Skin-1

¢ Debbie Chawngthu

Vun hi enkawl ngun leh ngun loh kar a hla hle a. Kum inang rau rau pawh inenkawl ngun peih chu a mamin vun a chuar tlem a, a kum aiin a lang naupang nge nge thin. Mi thenkhat chuan upat tak tak hma atangin an inenkawl a, mahse upa deuh tawh tan pawh tlai lutuk a awmlo e.

A hnuaiah hian vunin a ngeih lohte leh enkawl dan tur te kan sawi dawn a, tih tur leh tih loh tur te hi taima taka i zawm peih chuan i tar harin i hrisel zawk ngei ang

Nisa hnuaiah awm rei lutuk suh. Ni hian kan vuna mawm hi a hip ve thei a, chu chu vunin a haw em em a ni. Hriselna atan tangkai hle mahse nisa tawrh nasat lutuk chu a thalo a ni. Ni atang hian vitamin D kan hmu thei a, UV rays an tih hian kan vun natna lak atangin a veng bawk a. Mahse kum a lo upat chuan vun a lo ro a, nisa hnuaia awm rei chuan a ro lehzual a. vun a chuar zual duh a ni. Nilum i ai duh anih pawhin hnungchhawn thin la, i hmai em rei tir lutuk suh. I hmai chhawn zawnga nilum i ai duh anih pawhin lukhum i hmai nisa hliah thei tur khum la, anih loh pawhin nihliap khum thin rawh. Sunscreen i neih chuan hmang ziah bawk la, chu chuan tam takin vun natna lak ata a chanhim thei ang che.

Meizuk hi vunin a haw em em a, meiziala tur awm hian vun a tichhe thin a ani.Meizu nasa chu an vun a nung lova, a mam lova, a chuar hmain a thim tlat thin. Chuvangin meizial zu mi i nih pawhin duhtawk chin nei la, a uchuak chuan ti lo hram ang che.

Chin atana tha miahlo chu vun nuai cak vak mai hi a ni a, i mit vun vel te i nuai vak vak mai chuan a chuar hma ngei ang. Foundation i hnawiha i nuai pawhin dimtein nuai thin ang che.Lehkha i chhiarin eng hnuai tak hnuaiah chhiar ang che, eng tha vaklo tak hnuaia chhiar hi mitin a huat mai bakah vun chuar hma na a ni.

I hmai phih nan leh inbual nan tuisa lutuk emaw tui vawt lutuk hmang suh. Tui vawt lutuk hian kan vun hnuaia thisen zam te tak te te a ti chat thei a, chumi a chah chuan oxygen kalna tur a dal a, vun a lo ro a, a chuar mai thin a ni. I inbualna tur tuiah olive oil far thin la, i vun a ti mam ang. I inhruk hul hmain olive oil-in i taksa bung hrang hrang nuai thin la, i vun a tha rei ang.

Vun ro i neih chuan kum 25 i pelh hnuah sahbawn hmai phih nan hmang suh. Kum 25-30 hnu hi chuan mawm siamtu hi a chak tawh lova, vun a ro a, sahbawn khan a ro a tichak zual a, vun chuar a nasa hma duh em em a ni. Sahbawn i hmang lo theilo anih pawhin Johnson's Baby soap hmang thin ang che. hmai tihfai nan sahbawn aiah cleansing milk hi a tha zawk a, mahse alcohol based nilo hmang ang che.

I hmai i khawih dawnin i kut silfai hmasa phawt la. Kut bala i khawih chuan i vunah natna hrik a kai ang a, i vunin a chhiat phah ang. Hmai hnawih hi fimkhur a ngai hle a, kan vun hian thawk a la ve reng a. Chu chu thil danga kan hnawh pin tlat chuan thawk a la thei thin lova, vun kua a tiping a, vun a thaw tha thei thin lo a ni. Bleaching hi tha viau mahse tih zin lutuk tur a ni lo. I bleach duh anih pawhin i hmai pum nilo, hmul to i ithreh duhna laiah te chauh ti thin ang che. I hmai tihngo i duh anih chuan fanghma tui te, bawnghnute khar emaw bawnghnute pangngai tawp pawh hmang thin ang che.

Steaming hi a khat tawka tih hian vunin a ngaih em em a, sahbawn emaw face wash hian kan hmai a tihfai zawh tak tak loh avangin a khat tawkin steaming hi tih a pawi lo. Mahse hei pawh hi tih zin lutuk chuan a tha lem lova, hmai mawm emaw ro dan a zir zelin a ni.

Chemicals tak tak, entirnan, shampoo, hair dyes, antibiotics, alcohol etc. te hi vun tichhe thei vek an ni a, hman pawhin vunin a huat loh nan hman fimkhur tur a ni. Zan i mut hmain i hmai tifai ziah ang che. Make-up i hman reng reng tifai vek zel la, i mitvun lai vel dim bawk ang che. Zan i mut hmain i vunah thil hnawm thin la, mahse a mawm lutuk chu hmang duh lem suh.

Read more...

NATURE CURE

¢ Debbie Chawngthu

Apple hi thei zawng zawnah chuan a tha ber pawl a ni hial awm a, hmanlai atanga an lo ngaihsan tawh a ni a, Eastern Europe leh Western Asia vela an ching hmasak a ni a, Bible ah pawh sawi lanna hmuh tur a awm nual tih kan hre tlang anga, Scandinavians ho phei chuan pathiante chaw an lo ti hial a ni.

Apple-ah hian taksa tana tha a tam em em a, minerals leh vitamins te a pai tam a. Mi tam tak chuan kan ei dawn hian a pil kan vel thin a, mahse a pilah hian taksa chakna a tam em em a ni. A tak leh a pil inkarah hian vitamin C a awm a, chu chu a pil kan paih hian kan paih tel ta thin a, a chakna a hloh ta mai thin. A chhungril takah zawk hi chuan chuti takin vitamin a tam tawh lova, a pil hian a let nga a tamin a tak aiin vitamin A pawh a pai tam a ni.

A tui chang nilovin, apple hi damdawi atan pawh a tha em em a. Lu na chi hran hran tan te hian damdawi tha tak a ni. Lu na nei thang tan chuan a chhung sak lai leh a kuang awmna lai paiha tukin chi nen pumruak laiin ei a tha a. Hetianga karkhat chhung ei chuan lu na a ti ziaawm thei a ni.

Apple-ah hian sodium a tlem a, potassium leh phosphorus a tam thung a, hei vang hian lung lam thalo tan pawh damdawiah a tha hle ani. Tunhma atangin apple leh khawizu ei pawlh hi lunglam natna nei te tan damdawi angin an lo hmang tawh a. Potassium tamna ei nasa chuan heart attack an nei tlem tih a ni a, apple ah hian potassium a tam avangin heart attack awm tur ven nan pawh a tha bawk a ni.

Thisen sang tan pawh apple hi damdawi tha tak a ni bawk a. Ei tam hian zun a ti tam a, hei hian thisen sang a ti hniam thei a. Gout an tih mai ruh khawimaw lai na em em thin nei tan te, ruhna hrm hrim nei tan te pawh damdawi tha tak a ni. Ruhna nei tan chuan apple hi chhum kawia ruhna lai nuai nan hman theih bawk a ni.

Khuh hul riau a awm thei a, hetah pawh hian apple hi damdawi atan a hman thei a. Nitin 250 grams karkhat chhung ei chuan khuh a tinep thei a ni. Apple hi kala lungte awm enkawl nan pawh a tha a, a hmin tharlam hi damdawi anga hman chuan a tha lehzual.

Apple ah hian iron a tam a, arsenic leh phosphorus te a awm bawk avang hian thisen nei tlem tan pawh damdawi tha tak a ni bawk a ni. Thisen nei tlem tan chuan apple tharlam tak tui in tam a tha a, a tak pawhin nitin 1 kg ei ziah theih chuan a tha em em a ni. A tui in dawn chuan chaw ei hma darkar chanve velah in thin a tha a, zan mut dawnah pawh in tur a ni. Mit lam thalo tan pawh apple hi a tangkai hle a, eye wash atan pawh a hman theih a ni. A hawng hi bel darah tui chim tawkin chhuang la, vawikhat so tir bawrh bawrh la, mei ti hniam leh la, chutah a tui chauh kha thlit chhuaha khawizu nena pawlh tur a ni. Apple hmin tawh tak hi mita hnawih atan a tha a. A tak hmin kha i mit khuh tawk velin zai lep la, chu chu i mitah belin tuam la, darkar khat vel tuam hnan ang che. Apple hi a chak avangin pum ruaka ei a tha vak lova, chuvnagin chaw eikham leh puar deuh laia ei thin tur a ni. Tin, bawlhhlawh a kai theih avangin silfai lo chuan ei miah loh tur a ni. upa tawh lam tan pawh a tha em em a, bawnghnute nena regular taka ei phei chuan hriselna a ti tha in vun tan pawh a tha bawk a ni.

Q. Ka sam hi a mawm reng mai a, engtinnge ka enkawl ang?
= Karkhatah vawi li tal shampoo hmangin su thin la, shampoo nem tak henna tel ang chi hi hmang la a tha ang. I sam suk nan tui sa hmang lo la, a chhan chu tui sa hian i lua mawm siamtu kha a ti chak a, sam a mawm zual duh a ni.
I sam suk hma darkar khat velah artui varlai chauh hi i luah tat la, hetia i tih chuan shampoo i hman tam leh tam loh khan kawngro a su hrangpa lova, i tleuhfai leh fai lohin kawngro a su zawk a ni. Fai taka tleuh ngei ngei tur a ni a, tin, thei tui, thlai hring leh tui i diet ah telh tam hram bawk ang che.

Read more...

BEAUTY TIPS

¢ Debbie Chawngthu

• Lipstick hman nasat lutuk leh man tlawm tak hman hian hmui a ti duk thei a. hmui sen tur chuan boruak thianghlim, vitamins leh iron te kan mamawh a. Thlai leh thei, a bikin, carrot leh serthlum te pawh a tha. Lipstick hi a tlem thei ang ber hman thin tur a ni a. Zan mut hmain glycerine, sertui leh khawizu chawhpawlh hnawiha zankhuaa chiah a tha.

• Arngeng hawlphum i tih chhuah dawn chuan a hmain minute 10 i hmai steam phawt ang che. I steam hnuah artui var lai hi chhuang la, a phuan berh berh ang a, chutah hcuan rosewater tlemte telh la, i hmaiah hnawih ang che. A ro vek hnuah i hmai phih chauh ang che.

• I lu a phut a, i lulei a ro anih chuan i lu suk hmain artui, sertui leh coconut oil chawhpawlh i luleiah tat chhuak vek la, darkar chanve chiah ang che. Artui hlang ringawt hi samin a ngeih bakah luphut tihreh nan pawh a tha.

• Khawizu, artui var lai zawng leh chhangphut fiankhat chawhpawlh la, chawk diak ang che. I hmaiah hnawih la, darkar chanve i chiah hnuah phihfai leh ang che. I phihfai hnuah moisturiser hnawih leh nghal la, hetianga karkhatah vawikhat tal i tih peih chuan i vun a chuar har ang.

• I sam a kak chuan thla khatah vawikhat tal a hmawr tan ang che. Nitin coconut oil emaw almond oil hangin massage ziah bawk la, brush tha takin minute 10 chhung brush bawk ang che.

• Luphut hian sam a tichhe duh hle a, sam suk hmaa sertui luleia tah chhuah veka, darkar chanve hnua sukfaiin luphut a ti ziaawm thei.

• Kiu leh khup dum hi a nalh lo hle a, a dum i tireh duh anih chuan chi leh sertuiin nuai thin la, a ziaawm mai ang.

• Tomato tui, sertui leh bawnghnute fiante khat theuh chawhpawlh la, i hmaiah hnawih la, minute 15 hnuah phihfai ang che. Hei hian vun a ti ngo duh.

• Olive oil vuna hnawih hian vun a ti mam a, a ti nem bawk.

• I thil ei zawhah kan thuah ziah ang che. Zing leh tlaiah i ha nawt ziah bawk la, ka tuilo tih i nei lo ang. I nawh zawhah i kutzungtang hmawrin i ha hni zut vek la, thisen kal a ti tha a, ha hni tan a tha bawk. Ha var tak neih i duh chuan karkhatah vawikhat chi leh sertui pawlhin nawt la, a var sar mai ang.

• Chawn mam nalh tak neih i duh chuan i inbual hma darkar chanve velah bawnghnute, sertui leh olivee oil fiante khat theuh chawhpawlh hnawih thin ang che. Zan i mut hmain glycerine hnawih ziah bawk la, i chawn chu a mam han mai ang.

• I vun i ti ngo duh anih chuan sertui, fanghma tui leh carrot tui fiante khat theuh chawhpawlh la, i hmaiah hnawih thin rawh. Minute 15 chiah hnuah phihfai tur a ni.

• I sam a nung lo riau anih chuan zanah olive oil/coconut oil chhuang lum la, i sam ah thih rawh. I sukfai hnuah conditioner hmang leh la, i sam a nung sarh mai ang.

• I sam a tla thin anih chuan iron, iodine leh vitamin B ei thin ang che.

• Sam mawm nei i nih chuan i sam tleuh faina tur tuiah khan sertui tlem far la, a tleuhfai nan hmang la, i sam mawm a ziaawm ang.

• Artui pakhat chawk phuan la, tui tlem i tleh hnuah i sam massge nan hmang la, minute khat hnuah sufai la, conditioner tha tak a ni mai. Sam tih that nan khawizu tlem telh a tha bawk.

Read more...

BEAUTY CARE- SLEEP

¢ Debbie Chawngthu

Chhunah hah tak maia hna han thawh a, zan lama tui taka han mut veng veng hi chuan ngaih hi a tha hluah hluah thin. Zan mut that chuan hnathawh pawh a nuam a, mut thatloh erawh chuan thinchhiatte a awlsam a, hnathawh a tui thei lova, thutlukna siam mai te a harsat thin avangin tawng pawh a buai phah ve thei a ni.

Mihring hi kan mut mamawh zat a inang lova. Thenkhat chu darkar reilote mu mahse an harh tho a, thenkhat erawh chu a ni lem lo. A tlangpui thuin puitling hi chuan darkar 7 atanga darkar 8 mut kan mamawh a. Thenkhat erawh chuan darkar 11 lai an mamawh thei a, darkar 4 chauh mu thin, insawisello te pawh an awm tho bawk. Research beitute sawi dan chuan mi hlawhtling leh thil ngiahtuah tam mi hi an mu tlem a, ngaihtuah nei lemlo leh lungkham nei lemlo hi an mu tam an ti.

Upat azirin mut hi kan mamawh tamin kan mamawh tam lova. Nau piang hlim chu darkar 20 atanga darkar 24 lai pawh a muhil thei a. Thla thum vel anih chuan darkar 16 atanga 20 te a mu leh a, a bawhvah theih hnu chuan darkar 12 te chauh a mu tawh thin. Tleirawl chhuah tirh lai hian mut kan duh bik thin a, nu leh pa thenkhat chuan an fate thatchhiat vangah an puh thin a, hei hi dikna chen awm mahse a dik vek lemlo tih hriat a tha. Mi thenkhat chu kan mutui lutuk a, mumang pawh kan nei lo kan ti thin a. Mithiamte chuan mumang hi kan nei ziah a, zing thawh ah kan theihnghilh mai zawk a ni an ti. Hnar (snoring) bula mut hi a hrehawm a. Hnar ring tak mai bulah chuan tui taka mut a harsa thin. tun hnai mai khan hnar ring tana hnar (nose) a vuah tur an siamchhuak a, a tihchi khawp mai.

Mut theih loh avangin sleeping pills te kan ei thin a, hei hi mamawh awm thin mahse ei loh chu a him ber bawk a. Miin a ei regular lutuk chuan a dawdawi in a hneh loh hun a thleng ve thei a, mut theih lohna te a siam daih thei zawk a ni. Hetiang hunah hian overdose a ei te pawh an awm a, thih phah hial te pawh sawi tur an awm ta nawk mai.

Chuvangin, mu thei lo mah la, sleeping pills hmawm mai lovin exercise la zawk la, tlem hahchawl la, tuilumin inbual leh la, tui takin i mu thei ang. Hemi hnua i mut a la chhuak thei lo anih chuan bawnghnute lum in la, music ri riai ria chi ngaithla la, i mut a chhuak mai ang. Mahse, music i play chu i duh em em, i ngaihthlak nin theih loh play lo la, chuti lo chu i ngaithla zui duhin i mutchhuak a pel ve thei a ni.

Q. Ka fragrance hman hi engtinnge reitak rimtui thei tura ka dah ang?
= Fragrance te hi an rimtuina kum khat hnu velah a reh thin a. A rawng pangngai aia a dum deuh emaw a rim a danglam anih chuan a chhe tan tihna a ni. A rimtui reina tur chuan a dahna fimkhur a ngai a. I hman zawhah nghet takin chhin la, hmun thim lai, vawt deuhah dah ang che. Dressing table chei nan dah chhuah te hi a tha ber lem lova, a ral duhin a rim a reh hma a ni.

Read more...

BEAUTY CARE-MAKE-UP

¢ Debbie Chawngthu

Tun tum chu khawvela kan mi ngaihsan tak tak te cheitu chanchin thenkhat leh engangin nge an chei thin tih tarlang ve thung teh ang...

Maudie James hi hi kan hre fur ang a, nula hmeltha tak anih mai bakah a pianin a zir bawk a, modelling te tiin khawvel hriat a rawn ni chho a. Mahse, kum 14 chhung zet modelling a han tih takah chuan a kham ta deuh a ni ang, makse-up artist nih a thlang ta zawk daih mai a, modelling a tih lai pawha amaha inchei mai thin anih avangin makse-up artist nih pawh a harsat lo hle a ni. A chei thin te zingah chuan Queen Mother, Princess Anne leh Princess Alexandra te an ni nawk hlawm.

Maudie James in hmai chei dawn a pawimawh a sawi thin te chu ~~

1. Foundation hi hman ngei ngei tur. Hei hian powder hnawih a tirualin a ti bet tha a, bawlhhlawh lakah vun a venghim bawk a ni.

2. Kum a la tlem chuan mit hi engang rawng pawhin chei ila mawipui a awl a. Kum 30 pelh tawh erawh chuan rawng dal lampang hi vun nen a lo inmil tawh a, a lang nalh zawk a ni.

3. Make-up hnawih nalh tur chuan eng tha tak hnuaiah tih ngei ngei tur a ni a. Zan lama inchei chuan electric eng tha tak hnuaiah inchei tur a ni.

Celia Hunter hi mi chei thiam tak mai a ni bawk a, inchei dan bu pawh bu li lai a siam a ni. A lehkhabu siam hnuhnung ber shades of Beauty ah chuan vun hang in make-up an hman dan tur pahnih hetiang hian a tarlang ~~

1. Vun hang hi an vun a sin (fine) a, nisa leh thli thaw te an haw bik a, chuvangin an vun enkawl ngun a ngai zual bikin moisturiser pawh vun ngo lam aiin an mamawh tam zawk a ni.

2. Vun hang hi an vanneihna chu lipstick sen lar tak pawh inhnawih se an inhmeh zel a, an mit chei pawh an inhmeh awlsam bik a, chuvangin uchuak lovin rawng lar lam inbel nasat a pawi lo.

John Fireda hi sam siam thiam deuh mai a ni thung a. Princess Diana, Jerry Hall, Raquel Welch te ho sam pawh a siam thin a. sam enkawl dan tha a sawi thenkhatte chu ~~

1. Khawi hmunah pawh awm la, sam tan thiam tak i sam tan tir thin ang che. A cut a nalh chuan engang pawhin pu la, nalhpui a awl a ni. A thiam awmna i hrelo anih chuan tuemaw sam cut nalh tak i hmuh kha a cut sak tu zawt chawt la, pan ve mai ang che.

2. I hairstyle chu i hmel leh taksa nena inmil tur a ni a. Nu te tak te i nih chuan sam buk tak i inhmeh lovang a, sang ria tak i nih chuan sam tawi lutuk i inhmeh thei lo ang.

3. Hairstyle enkawl harsa tak thlang suh. Minute 5 chhunga nalh taka khuih theih tur thlang la, i inchhir lo ang.

4. Sam i siamtir dawnin nangma duhdan ringawt ngaihtuah suh. I sam siamtu duhdan ngaithla thiam la, chutah chuan a tha ber tur sawi duh ang che u.

5. Sam i siamtir dawnin hmanhmawh lutuk suh. Sam siamtu i tur hmanhmawh chuan i duh anga nalhin a siam thei lo ang. Hun thawl i neih hunah pan thin ang che.

Barbara Daly hi Beauty book siam thin a ni a, inchei dan thenkhat a sawi te chu ~~

1. I mit i cheiin brush tha tak hmang thin ang che.

2. Eyeliner i lei hmain a brush en ngun la, zum tha tak hmang ang che. A zum that loh chuan i hnawih nalh thei lo ang.

3. Powder i hnawih zawhah brush-in i hmai a chhuk zawngin hru thin la, a rual duhin hmaia hmul awm a ti bet.

4. Blusher erawh chu zum lo, bial rual tak hmangin hnawih la. Brush a blusher i chiah hnuin thing la, inhnawih chauh ang che. I biangruh chunglamah hnawih la, a chhuak zawngin i bek lamah hnawih ang che.

5. Tlai lama i inchei anih chuan hetiang hian ti ang che ~~ moisturiser i inhnawih hnuah i biang ki lai takah nasa deuhin blusher hnawih la, brush fai tak hmangin hru la, foundation hnawih hnan rawh. Chumi zawhah tissue paper in nem la, powder hnawih ang che. Hetia i tih hian i pianpui tisen angin a lang ang a, i ti a ti lang nung sarh mai ang.

Read more...

BEAUTY CARE-HAIR

¢ Debbie Chawngthu

Sam enkawl hi thil namai a ni lova, engang sam nge kan neih tih te, enganga enkawlin nge a that theih ang tih hriat a pawimawh em em a ni.

Sam ro hi chu a tle lovin a nung lova, a hmawr pawh sam mawm ai chuan a kak nasa bik thin. Han khawih ila, a thap hrup mai a, duh ang pawhin a khuih nalh theih lova, a phirsi hma hle bawk. Sam mawm hi chu a tle a, mahse bal a bet hma thung a, huh reng ang maia langin khuih nalh a harin control a har bawk a, nitina suk a ngai thin. Sam pangngai erawh chu a tle hlarh a, a nung sarh a, a hmawr pawh a kak nasa lem lo. Khawihin a nem thep a, duh angin a khuih theih a, enkawl harsatna em em a awm hran lo.

A chunga kan sawi atang hian engang sam nge i neih tih i hre thei ang a. Sam hi a thi (dead) an ti a, a rawn to chhuak chin hi chu a thi ngei mai. Mahse a lo to na bul erawh chu a thi lova, enkawl ngun loh chuan a lo to na (root) thlengin a chhia a, sam tha a neih theih ngai loh. Sam tha tur chuan thlai leh thei tharlam ei tam a tha a, vitamin leh minerals kan mamawh bawk a ni.

Sam fai hi chu put pawh a nuam a, amaherawhchu, suk zin lutuk erawh a tha lem lo. Mawm awm kan tihfai zin lutuk khan sam a tiro a, amaha tletna rawn awm tur kha kan sukfai zel avangin a thi bul thei a, nikhat dana suk hi a pawi lo khawp mai. Kan su zing duh anih erawh chuan enkawl ngun a ngai a, sahriak thih zing tur a ni. Zanah sahriak ti lum la, i luleiah tat kual vekin massage ang che, zingah i suk hmain artui hmangin massage leh la, kar lovaha sam tha tak i nei thei ang. Oil hmangin karkhatah vawihnih massage la, artui hmangin vawikhat massage a tawk thung. Shampoo i lei hmain engang sam tana siam nge tih en phawt la, conditioner pawh i sam nena inmil tur zawng thiam la, conditioner hi karkhatah vawihnih hman a tawk em em a ni.

Sam tihkir/colour hian sam a tiro zual thei a, tih zin lutuk loh tur a ni. Hair dryer hi thil tangkai tak ni mahse hman zin lutuk emaw a hman dan emaw thiam loh chuan sam tihchhiatna awlsam tak a ni. Chhem ro ai chuan sam hi amaha a ro hian a tha zawk a, hmanhmawh lutuk i nih loh chuan dryer hmang nasa suh ang che. I hmang nitin anih pawhin sa lutukin chhem lo la, hmun khatah chhem reng lovin ti sawn zel ang che. Nisaa i kal dawnin nihliap khum thin la, i khum peih lo anih pawhin scarf hmangin tuam la, anih loh vek pawhin lukhum khum thin ang che.

Sam thang chak leh tha tur chuan protein hi a pawimawh a. Protein chu sangha, arsa, artui, beans leh bawnghnuteah te, thei tharlam takah te an hmuh theih a, theih anga ei tam hram hram a tha.

Sam hi suk zin dawn pawhin shampoo chak lo chi hman a tha a, a phawn nasatna tur te, sam tinem thei tur te leh kan samin a ngeih theih tur lemon, aloe, henna, hrebs etc. te an pawlh a. Engpawhnise, shampoo lei dawn chuan eng atanga siam nge tih en hmasak te a ngai a, thiante ngeih ang ngawt kan ngeih ve kher lo thei a, mahni mil tur thlan thiam a pawimawh hle a ni.

Q. Ka samkir lutuk hi engtinge ka control ang?
= A hmasain i sam chu i duh angin nalh takin han cut tir phawt la. I sam i suk apiangin conditioner tlem telna hmang bawk ang che. Tichuan, i sam i suka a la huh laiin gel tlemte hnawih la, khuih ang che. I duh anga i khuih hnuah bakilh hmangin kilh bet la, i kilh chhung chuan nghak ro ang che. Nghah ro chhung hunrei i nei lo anih chuan sa lutuk lovin chhem ro la, a ro that hnuah bakilh chu i phelh dawn nia.

Read more...

BEAUTY CARE-HANDS & FEET

¢ Debbie Chawngthu

Kan kut leh ke hi kan taksa zinga kan hman rim ber te zinga mi an ni a, enkawl ngun an phu hliah hliah a ni. Enkawl ngun chuan reiloteah a thatna a lang mai a, enkawl a manhla hle a ni.

Kut hi enkawl ngun loh chuan upat lan hma na lai pakhat a ni a. Kan hmang rim em em a, englai pawha che reng mai, tuia tih huh reng mai a ni a. Sahbawn kan khawih a, sahbawn hian vun a tiro chak a, chuvangin puansuk leh thleng sil nasat te hian vun a ro duh em em a ni. A ro tur ven nan chuan rubber gloves a tha a. Puansuk dawn leh rawngbawl dawn te, huan thlawh dawn te hian kutkawr bun hi a him ber a. Kan bun hian kut ro lutuk tur a veng a, intih pem palh a hlauhawm lo bawk a ni. amaherawhchu, rubber gloves hi rei lutuk bun a tha lova, reitak bun chuan kut a thlan a, vun a tiro letling thei zawk a ni. Tin, rubber gloves bun hian chet thiam loh a awm ve thei a, i che thiam lo anih chuan tui i khawih zawh apiangin cream/lotion/oil i inhnawih mai tur inchhawp thin ang che.

I kut a ro a, a thap hle anih chuan a hnuai ami ang hian ti ang che ~~
1. Zanah hand cream i kutah ren vak lovin hnawih la, kut kawr bun hnan ang che. Kut kawr hi cotton nise a tha.

2. Hand cream inhnawih la, cotton gloves bun la, a chungah rubber gloves bun leh la. Minute 30 hnuah phelh la, cream hmangin nuai leh ang che.

3. Tui lum ti phuan la, chutah chuan shampoo telhin han ti phuan bawrh bawrh la, i kut chu chiah pahin brush leh nawhfe hmangin han tifai pah la. Chumi hnuah minute 20 tal i kut chu oil hmangin massage la, hetiang hian kartin vawihnih i tih peih chuan i kut ro thap tur i veng thei ang.

Tin (nail) pawh hi enkawl ngun a ngai hle a. Tin rualrem lo leh bal tak mai hi chu a zahawm loh bik a ni. Mi thnekhat chu tin zuah sei si enkawl ngun peih lo an awm a. Tin sei bal taka zuah ai chuan tan tawi mai a mawi zawk a, a zahawm zawk bawk a ni. Nail polish hian kut tin a ti nalh a, a tliak tur a veng bawk a ni. Tin tliak har tur chuan sei lutuka zuah loh tur a ni a. Tin massage hian a ti thang chak a, a ti khauh bawk. Hand cream hnawih la, massage thin ang che. Massage hian tin a tle duh a, a hrisel bawk a ni. Manicure hi tih nachang hria kan la tam em em lova, kut leh tin timawitu ber anih avangin a tihdan i han tarlang teh ang ~~

Nail polish hnawih thin i nih chuan tifai vek phawt la, i tin chu nail file in nawt rual ang che. I nawh zawhah hand cream hnawih la, tuilum phuanah minute 5 atanga 10 chiah ang che. Tuia i chiah chhung hian i tin tifai la, brush bawk ang che. Tin sir a vun thi te tifai la, tuiluma chiah lai hian a tla awlsam bik a ni. I chiah zawh chuan fai takin tleuh la, hru hul ang che. hemi zawh hian nail polish i hnawih thei tawh ang.

Ke hi enkawl ngun a ngai hle bawk a. Fai takin sil phawt la, hru hul ang che. I hrukin i kezungtang kar te hru hul vek zel la, i hruk hul that loh chuan i ke kar a thak ang. Inbual zawh hian tin a nem a, tin hlehna hun tha tak a ni. Ke no nalh nei reng tur chuan tihfai that mai bakah foot cream hi regular taka hman a ngai a. foot cream a awm mai lo anih pawhin oil hmangin massage ziah thin tur a ni. I kal hah hle anih chuan mu zal la, i ke chu i lu aia sangah han dah vang vang la, i tihfai zawhah oil hmangin han massage leh bawk la, a kham chu a reh huai huai mai ang.

Q. Ke kham, na ut ut hi engtia enkawl tur nge?
= Chawhtawlhah tuilum dah la, chutah chuan minute rei vak lo chiah ang che. Tleuhfai la, powder hnawih la, i chiah lai khan nawhlungin nawt la, i ke tinte tifai nghal bawk ang che. Foot massage hetianga i tih chuan a na leh kham a reh huai mai ang. I kutin i ke bawr hum la, i kutzungpui i keartui zawnah dah la, i kutzungtang dang zawng i kephah chung lamah dah ang che. I kutzungpui khan i keartui bawr nem kual la, a hma ami ang opposite-in i kutzungtangin i keartui vuan la, i kutzungpui i ke chung lamah dah ang che. I kutzungpui bawkin i kephah chunglam nem kual leh la, hemi zawh hian i kezungtangte ti kawm vak vak la, a na ut ut chu a reh huai thei ang.

Read more...

BEAUTY CARE-EXERCISE

¢ Debbie Chawngthu

Exercise lak hi taksa tan chauha tangkai emaw kan ti a. Rilru hah lai taka a tangkai zia hi kan hre tam lo pawh a ni thei a, kan rilru hahna te kan control lova, kan tawrh ngawt ngawt chuan kan taksain a tuar a, nervous breakdown neih te pawh a awl thin a ni.

Rilru hah hian kan lungngai leh kan ngui chauh nilovin kan taksa leh lu te a na a, pum diklo te kan neih phah thei hial a. Inhauhte hian rilru a na duh a, hetiang hun hi chuan music kan duhzawng te han ngaithla ila, rilru na leh hah a ziaawm thei a, anih loh pawhin thian tha tuemaw kan rilru hahna hrilh ila, kan zang huai thei a ni.

Rilru hahna tih zangkhai dan tha ber chu regular taka exercise lak hi a ni an ti a, a dik fu thei ang. Engto riau nei chung pawhin exercise la ila, thui lote tlan emaw, badminton han khelh emaw te hi a tha a ni. Taksa massage hian thin tawt riau te hi a ti zangkhai thei an ti bawk a. Kan thin a rim hian kan nghawng leh kan dar hi a khawih bik a, lu na kan nei vat thin a. Chuvangin, thin a rim hle anih pawhin exercise la vat ila, kan taksa tan a tha em em a ni.

Exercise lakdan hi chi hrang a tam hle a. Tunlaia lar pawl pakhat chu aerobic hi a ni a. Nula tlangval ten a rualin music remin aerobic dance an ti thin a, taksa tan a that mai bakah he exercise hi lak nuam tak a ni. He taksa sawizawina hi lung tan leh chuap tan a tha a, tin, thisen kal a ti tha bawk. Heng tui hleuh, cycling, tlan, sakawr chung chuan, chak taka kal te leh jogging te hi aerobic exercise huangchhungah hian telh an ni.

Yoga exercise hi a lar hle bawk a, mahniin inah pawh a tih theih a, a tha khawp mai. Mahse chaw eikham darkar thum vel a ral hma chu tih loh tur a ni. Nikhata minute 20 tih a tawk hle a. Mahse engang exercise pawh lak dawnin kan taksa hrisel dan kan hre hre chiang hmasa tur a ni. Yoga exercise hi pum lam sawisel tan chuan tih chi vak a ni lo thung.

Kan taksaah hian tihrawl 60 a awm a, heng kan tihrawl te hi sawizawi loh chuan a zawi a, kan harhvang thei thin lo. Tunlai hmeichhia thau dulkiar tak tak hmuh tur an tam ta mai a, hengte pawh hi inthlahdah vang pakhat a ni a. Thenkhat chu nau an nei a, an inenkawl peih lova, nau pawm lai chuan thil reng reng ei a lo tui bawk nen, an lo thau in an dul a kiar ta thin a ni. A hnuah intih cher leh tumin an bei a, a harsa tawh thin a ni. Chuvangin, hetiang ang hun thlen hmaa inenkawl hi tum ngei ngei tur a ni.

Exercise hi lung tan a tha bawk a. Mahse, exercise hi hah lutuka tihtur a ni lo. Kan hrisel dan leh kan kumin a phu ang tawk kan lak thiam a ngai a. Kum upa tawh takin exercise hahthlak tak a lak chuan thatpui aiin a chhiatpui zawk ang.

Chupa pawh hi exercise a ngai ve a, saptawng takin 'deep breathing' hi lung chakna petu a ni. I thawkin zawi muangin boruak hio lut la, zawi muangin thaw chhuak leh ang che. Taksa fit zaih mai, hrisel hmel tak mai hi chu hmuh an nuam bik a, chuvangin exercise la ngun ila, i hriselin i vun a lo eng ang a, dam pawh nuam i ti sawt mai ang.

Read more...

BEAUTY CARE

¢ Debbie Chawngthu

A hmasain zawhna chhanna ni pah fawmin facial hair lampang in sawi phawt teh ang. Hmeichhia ni si, hmuihmul nei an awm thei a, mahse mipa ang em chuan a tamin a dum ve ngai lo. A lan nep theih nan chuan bleaching hi a tha ber mai a. A thahtna chu hmul rawng a ti var a, hnawih rei hnuah phei chuan hmul rawn to na lai tichhiain hmul rawn to leh thei tawh lo turin a siam thei a ni.

Bleaching cream hi leitur a awm a, vun lam enkawl thiamte pawh a tih tir theih a ni. In lama mahnia tih dawn chuan a chhunga inziak chhiar ngai a ngai hle a, huat theih thil anih avangin vunin a hua nge haw lo tih enchhin hmasak ngei ngei tur a ni.

Facial hair hi khawihnun (wax) pawhin a tih tlak theih a. Mahse hetiangatih hi chu a na duhin a hnuah vun a thakin a sen duh a, a nuam vak lo. Hmul ziahna hi hman tam loh a tha a, electric hmanga hmul tih tlakna hi a hman tlak hle a, vun no lutuk tan erawh hman tam loh a tha thung.

Thu dangah han kai leh ta lawk ila, facial tih hi vun tan a that bakah rilru a nuamin a hlimawm a, chin tam tlak tak a ni. Facial tih lai chuan min tibuaitu awm lovin a thiamten duat takin min enkawl a, a hmaa nguai deuh pawhin a harh sawng sawng theih a ni. Pawisa neiha regular taka tih theih chuan vun hi a nung sarh mai a, inchei pawh a nuam sawt thin.

Facial tih hi a titu azirin a dang thei hle a. Facial tih hian deep cleansing te, steaming te, arngeng lak chhuah leh facemask te a huam a. A tih chhung a rei a, hahdam taka awm thiam phei chuan vun mai tan bakah taksa tan pawh a tha a ni. Tih dawnin fimkhur a ngai hle a, a titu tur kha vun lam thiam tak a ni em tih te hriat hmasak tur a ni. A thiam i tih tir hnuah enganga enkawl zui tur nge tih zawh theihnghilh loh tur a ni.

Mi tumah hi hmel lungawipui tak tak kan awm lova. Chuvangin, inchei dan thiam hi a pawimawh hle a ni. Foundation hi chi hnih - a dal deuh leh a tak neih kawp a tul a. Moisturiser i hnawih hnuah foundation i hnawih ang a, rual takin chul ang che. Vun chuar deuh laiah a dal hnawih hnawih tur a ni a, a chuar lo laiah a tak zawk. hnawih chhin zin a ngai a, i mawipui tur tak anih hma chu zir ang che.

I hnar a hlai anih chuan foundation rawng tak zawk kha i hnar ngul sir tluan chhuakah hnawih la, i kut hmawrin nuai rual ang che. A lai takah chuan hnawih tel tur a ni lova, foundation rawng dal zawk kha hnawih tur a ni. I hnar hmawrah pawh a rawng dal bawk hnawih ang che. Mahse i hnawihin rual takin nuai ang che. Mit hnuai val hi mut tlem vang leh hrisel loh avangtein a awm thei a. A val nasa anih chuan doctor inentir tur a ni. Hrisel loh vanga awmte anih leh loh chuan concealer stick hmangin a thup theih a. Concealer stick neih loh chuan foundation rawng dal hnawih mai tur a ni.

Khabe ruh kual lian tan chuan foundation rawng tak khabe ruh kualah hnawih den den a, chul rual tur a ni a, khabe zum lai takah erawh hcuan hnawih loh tur. Rual taka nuai a, nghawng thelgna nuai tur a ni. Hnar ruh kawi deuh tan pawh a ruh kawi laiah foundation rawng dal hnawiha a dangah a tak deuh hnawihin a ti lang ngil thei a, mahse zir tam deuh erawh a ngai thung.

Read more...

BEAUTY- CLEANSING

¢ Debbie Chawngthu

Vun enkawl ngai lem lova tha leh mam chu an awm a, mahse hetiang enkawl mang lova vun tha tho hi chu tlemte an ni. Mi tam zawk chuan an vun an enkawl ngun vang chauhin vun tha an nei a ni. Nitina vun tihfai, tih mawm te hian hun a duh reilova, mahse a lo rei deuh hnu chuan a thatzia a lang thin. Vun tihfaina chi hrang hrang a siamna hmanrua hmuh mai theih leh awlsam tak tak te kan tarlang leh dawn a, nangmahin siam ve la, a thatdan i hmu thei ang.

1. CLEANSING MILK: Hemi siam tura i mamawh te chu buttermilk no khat leh rose par lai tlem a ni a. Buttermilk ah khan rose par telh la, darkar thum vel khawih lovin dah rawh. Chumi hnu chuan i hmai leh nghawng tihfai nan hmang ang che. Vun a tifai em em a, vun ro tan a tha lehzual.

2. LEMON CLEANSING MILK: I mamawh tur te chu yoghurt fiankhat, sertui fiankhat leh buh den sawm tha tak fian chanve a ni. A pathum hian i pawlh ang a, i chawh diak/pawlh that hle hnuah i hmai tihfai nan hmang ang che.

3. OATMEAL SCRUB: A siam nana i mamawh tur te chu oatmeal dip fiankhat, grape tui fiankhat leh cream (bawnghnute khar) fianhnih a ni a. A vai hian chawhpawlh la, i hmai phih phawt la, hnawih ang che. I hnawih pah hian nuai nghal la, minute 10 hnuah tuiin phihfai ang che. He scrub hi vun ro tan a tha lehzual a. Vun a tifai em em a, karkhatah vawihnih tih thin a pawi lo.

4. SKIN CONDITIONER: He conditioner siam nana i mamawh te chu artui hel a var lai fiankhat, cream fianhnih leh kawizu fiamthum a ni a. A vaia i chawhpawlh hnuah i hmaiah hnawih ang che. Darkar chanve i chiah hnuah tuiin phihfai ang che. He conditioner hi vun chuar tawh lam tan a tha em em a, a chuar zel tur a veng bawk a, a siam pawh a har lo a ni.

5. BANANA FACIAL: A siam nana i thil mamawh te chu balhla hmin pakhat, sertui fian chanve leh khawizu fiankhat a ni a. A hmasain balhla hi rawt diak phawt la, chumi hnuah a dang pahnih te khi telh ang che. I chawhpawlh that hnuah i hnawih ang a, minute 20 i chiah hnuah phihfai leh ang che. He facial hi vun pangngai nei tan a tha lehzual a. I tih zawh vek hnuah i hmaiah rose-water hnawih nghal ang che.

*** I hmai ngun takin en chet chet la, inrin leh chuar riau lai te a awm em? A awm anih pawhin thlahthlam mai lovin enkawl nghal la, zing leh zanah nourishing cream te hnawih la, mahse i nuaiin a chho leh chhuk zawng chauhin nuai thin ang che. Thinrim leh rilru kawi tak te hi vun leh taksain a haw em em a ni. I bula awm te tana hrehawm khawpin i phunchiarin an i cheh em? I ching thin anih chuan sim vat ang che. Nangmah i intih hrehawm mai bakah i bul ami te i ti hrehawm thei a, Mi huat leh hauh chin te hi kan huata te aiin keimahniin kan tuar daih zawk a ni. Mi i hauh leh i sawisel hmain nangmah kha inen ngun la, i dik vek em tih inenfiah ang che. Tumah hi tha famkim kan awl lo tih hriat tur a ni a, hetianga i ngaihtuah hmasak thin chuan i thinrim leh an chakna kha a reh thuai ang a, i thinrim loh chuan i taksa pawhin a thatpui daih zawk dawn a ni. Rilru hlimna hi hriselna a ni tih hriat reng a tha.

Read more...

10 POWER FOODS

¢ Debbie Chawngthu

Eitur thenkhatin chakna min pe a, thenkhat erawh chu vun tana tha te an awm a. A hnuaiah hian ei leh in lampanga mi thiamten a tha an tih te kan sawi dawn a, heng hi hmuh harsa lo leh to lutuk lo te an ni.

1. CARROT: Carrot hi mit tan a tha hle a, mitdel tur a veng thei tih pawh kan hre theuh awm e. Puitlingin carrot tlawn khat nitin pakhat ei ta sela, vitamin A a mamawh tawk a hmu thei a ni. Vun tan leh sam tan pawh a tha a, natna lakah min veng thei a, ha leh ruh tan pawh a tha bawk a ni. Carrot-ah hian vitamin C, B, potassium leh calcium a hmuh theih a, heng bakah hian carbohydrates leh fibre a pai tel bawk a ni.

2. BAWNGHNUTE: Bawnghnute hi sapin 'the perfect food' an ti a, a chhan chu kan taksa mamawh a pai kim vang a ni. Bawnghnuteah hian calcium a tel tam a, ha leh ruh tan te, thazam leh thisen kal ti tha tu atan te pawh a tha a ni. Bawnghnute nitin no 2 in ta la, protein i taksain a mamawh zaa sawmthum chu i hmu thei a ni. Bawnghnuteah hian vitamin B, B12, potassium leh iodine a tel a, mahse tun hnai te atang khan mitiam ten bawnghnute khar ei tam lutuk chuan lung lam thalo neih a awl an ti a, a chhan chu fats a tam vang a ni. I in thin a nih pawhin a khar tam lo thei ang ber chauh telh thin ang che.

3. WHOLE GRAINS: Grains kan tih zingah hian wheat hian chakna a pai tam ber a. Vitamin B, E, iron, potassium, magnesium leh zinc te hi a hmuh theih a ni.

4. BEANS: Bean ah hian protein a tam a, lung tan a tha bawk a ni. Bean tih ro tawhah hian vitamin B, clacium, iron, magnesium leh potassium te a hmuh theih a, a hringah hian vitamin A, C leh iron a hmuh theih bawk a ni. Bean a fibre hian cancer natna leh lung lam thalo a tidam thei bawk niin mi thiam zawkten an sawi a ni.

5. ORANGE-YELLOW FRUITS: Yellow fruits zingah chuan thingfanghma, theihai leh dawnfawh te hi thei hrisel an ni a. Theihaiah hian vitamin A a tam a, nipui laia ei thin hian kumkhat chhung vitamin A kan mamawh a phuhruk thei a ni an ti. Thingfanghma leh theihai ah hian vitamin C a tam a, thingfanghmaah hian phosphorus, magnesium, calcium leh potassium te a awm bawk a ni. A hel tui hi digestive aid atan a tha a, sa tih hmin hma nan pawh an hmang thin.

6. FISH: Sangha hian protein 20% a pai a, a ruhah hian phosphorus leh calcium a awm bawk a. A ruh i ei duh chuan i chhumin vinegar telh rawh. Shark, cod leh halibut te hi sanghaah chuan oil pai tam an ni a, vitamin A&D a hmuh theih bawk a ni.

7. PEANUT: Badam ah hian chakna a tam hle a, protein, carbohydrates, vitamin B leh A te hi a hmuh theih vek a, heng bakah hian iron leh calcium te pawh a tel a ni.

8. GUAVA: Kawlthei hian ngaihsan a hlawh lo hle a, mahse serthlum pumkhat aiin kawlthei pumkhat hian vitamin C a pai tam zawk daih a, iron hi serthlum aiin a let thumin a pai tam bawk a ni.

9. GREEN VEGETABLES: Thlai hnah hian vitamin leh mineral a tam em em a, Iron, calcium, magnesium, potassium, phosphorus leh carotene a hmuh theih a ni.

10. APRICOTS: Apricot hi Mizo chuan theite kan ti mai a, iron leh potassium a pai tam a, ei thang chuan fuat a ngah a, a chau ve mai mai lo. Apricot no chanve tih ro hian calories 150 a pai a, vitamin A pawh a pai tal bawk a ni.

Read more...

SKIN AND HAIR CARE

¢ Debbie Chawngthu

Sam leh vun enkawl thuah hian sawi dan chi hrang hrang a tam hle a. Tihtur leh tur loh tur sawi dan pawh a hrang nuai mai.

Mi tam zawk chuan engang vun pawh nei se moisturiser hi hnawih turin an inah a. Vun pangngai leh vun ro tan chuan nitin hman a pawimawh a, mahse vun mawm tak nei tan chuan hman tam loh a tha zawk a ni. Moisturiser mawm vak lo chi pawh hi mawm tlem a tel tho a, vun mawmin a hman tam chuan a hma aiin a mawm ang a, arngeng leh bawl a siam phah ve thei a ni.

Hmeichhe thenkhat chuan kartina face mask tih hian vun ti vuai turah an ngai a, hei pawh hi rin dan diklo a ni. Kartina face mask hman hian vun a tifai a, vun thi a tifai bawk a, vun chuar hma tur a veng bawk a ni. Mask hi vun chi hran hran tana siam bik a awm a. I hman hmain engang vun tana siam nge anih tih enchiang hmasa phawt thin ang che.

Sam suk zin lutuk hi tha lova ring an awm bawk a, hei pawh hi a dik lemlo. A tula i hriat chuan nitin pawh su la a pawilo, mahse i sukin shampoo vawikhat chauh hmang la, su nawn suh. I sam a ro anih chuan i sukfai hnuah conditioner hmang ang che. I sam a mawm a, a hmawr a ro anih chuan a hmawr ro laiah chauh conditioner hnawih la, minute reilote i chiah hnuah sufai ang che. Mi thenkhat chuan an sam ro avangin karkhatah vawihnih khat chauh te an su a, sam a lo balh khan sam a tih chhiat theih zawk avangin nikhat danah tal chuan suk thin zawk tur a ni.

Mi thenkhat chuan lu massage hian sam tla tur a veng an ti a, hei hi a dik ber lemlo. A chhan chu sam a tlak vak laia lulei nuai hian sam tla a tizual thei a ni. Sahriak thih chu a tha ngei a, mahse I sam a tla anih chuan nuai vak vak lovin i sam then hrang la, lapuain hnawih den den la, i hnawih zawhah samkhuihin khuih ang che. I suk hmain towel pahnih tuisaah chiah la, i sawr fu ang a, i lu tuam nan hmang ang che. Pakhat a daih hnuah a pakhat zawk hmang leh la, vawi 4-5 vel thlak ang che. Hetiang hian minute 10-15 tihtur a ni. Sahriak thih hian mutpui a pawilo a, anih loh pawhin suk hma darkar hnih vel chiah tur a ni.

Exercise hian mi a ti hrisel a, mahse ei leh in lama kan fimkhur si loh chuan a tha tak tak thei chuang lo. Mi thau thenkhat chuan cher nan tiin taksa tana chakna carbohydrates an ei turah an telh miah lova, hei hi a tha ber lemlo. Ei miahlo nilovin ei tlem chauh tur a ni. Crash diet hi a hlauhawm em em a, hrisel lohna a thlen thei a ni. Cher thut chuan vun a vuai duh a, cher duh pawhin zawi muanga intih cher tum tur a ni.

Kum 20 nih atanga vun hi enkawl ve tak tak a ngai tawh a, arngeng nei chi i nih phei chuan a hma aia inenkawl that tur a ni. Kan upat hian kan vun a danglam ve zel a, a enkawl dan azirin a danglam ve thei bawk a ni. Heng vun leh sam enkawlna kawngah hian a hmasain engang vun leh sam nge kan neih tih hriat hmasak erawh a tha.

Read more...

BEAUTIFUL YOU

¢ Debbie Chawngthu

Tomato tui fiante thum leh sertui far tlem chawhpawlh la, i hmaiah hnawih rawh. Minute 10 i chiah hnuah phihfai leh ang che. Hei hi vun vunkaw zau tawh tan a tha bik a ni.Fanghma tui fiante thum leh bawnghnute chawhpawlh la, chutah chuan rosewater tlem far tel bawk la, i hmai leh nghawngah hnawih rawh. Minute 10 i chiah hnuah tifai ang che. Hei hi vun delicate/sensitive tan a tha bik a ni.

Coconut tui hi in atan a that viau laiin vuna hnawih atan pawh a tha tho a. I vun chiah nan hmang thin ang che. Coconut tui hian vun a tingo thei a, a tifai bawk. Vun tihfaina tha tak pakhat chu bawnghnute far 60, fanghma tui far 60 chawhpawlh la, chutah chuan sertui far 15 telh leh la, i hmai leh nghawngah hnawihin minute 15 hnuah i phihfai leh dawn nia.

Skin tonic tha leh tlawm chu tui hi a ni a, i hmai phih nan khan tuiin i hmai kha han theh thawt thawt la, mahse i tui hman hi tuivawt tak ni thei se a tha. Kum zabi sawm lai vel atang khan Arabian dermatologist te chuan rosewater hi skin tonic tha tak a ni tih an hhmuchhuak tawh a. Fridge-ah dah vawh a, hmai hruk nana hman mai tur a ni. Complexion tha i neih duh chuan fanghma tui far 15, sertui far 15 leh rosewater tlem hawhpawlh a tha a, minute 15 vel chiah hnuah hmai phihfai leh mai tur a ni. Hei hi vun mawm tan a tha lehzual.

Vun mawm tak nei i nih chuan apple tui fiante 3 leh sertui 15 chawhpawlh la, i hmaiah hnawih rawh. Minute 15-20 i chiah hnuah phihfai ang che. Vun mawm a ti nep a, a mawm zual tur a veng bawk a ni. I vun a thak thin anih chuan vinegar no khat i inbualna tur tuiah telh rawh. Vun mam duh tan inbualna tur tuiah khaizu fiankhat telh a tha. Tin, inbualna tur tuia thlai hriak engpawh telh a pawilo. Mit hmang hah tan chuan mit hi a thalo hma viau va, i mit tihhahdamna hun neih tum thin rawh. I hna i thawh zawh vekah room thim deuhah mu la, i ke tlema sangin dah rawh. Hetih chhung hian i mit kha lapua, sertui leh vur tui chawhpawlha tihuhin khuh la, hahdam takin mut tum rawh. Hlimna lampang ngaihtuah tum tlat la, i mit a hahdam ang a, i taksa rim pawh a zia sawt ang. Pudina hi rawt sawm la, i mit vun dum val lai velah dah teh, i tih ngun peih chun i mit val a nep sawt ang.

Hair conditioner pawh hi mahniin a siamchawp theih a. Artui pakhat chawk phuan la, chutah chuan khawizu far 60 leh coconut oil fiante hnih telh la, a chawhpawlh that hnuah i luleiah ngun takin tatchhuak vek rawh. Hemi hnu hian towel tuisa takah i chiah ang a, i lu tuam nan hmang ang che. Vaithum vel i tih zawah sufai ang che. Thingpuife thing pawh hi paih mai lovin belah dah la, tui dang dahin chhuang leh rawh. A daih hunah i sam tleuhfai nan hmang la, i sam a tle sar mai ang. Ser i neih chuan thingpuife tuiah hian sertui tlem far la, hei hiam i sam a title zual ang a, sam tla tur a veng bawk ang.

Sam tla hi a buaipuiawm duh viau mai bawk a. A enkawl nan chuan coconut tui nokhat hmun lia thena hmun khat leh ser thur pakhat tui sawrchhuak la, chawhpawlh rawh. Hei hi i luleiah tat la, darkar khat chiah ang che. Karkhatah vawikhat i tih ziah peih chuan i sam tla a nep sawt thei ang.

Mithmul sei tak neih i duh chuan castor oil hi i mithmulah hnawih thin rawh. Ke tlang hi hi a nalh duh lo hla a, zan i mut hmain i ke fai takin tui nen sil la, i ke tlang nawhlungin nawt rawh. I tleuhfai vek hnuah hru hul la, a la hnawm laiin castor oil ngun takin hnawih ang che. Neem hnah hi khawihli fahrah, vun that te enkawl nan a tha em em a. Neem hnah engemaw zat la la, chhum rawh. I chhum hnuah a tui chauh thli chhhuak la,a daih hunah inbual nan hmang ang che.

Read more...

COMMON BEAUTY PROBLEMS

¢ Debbie Chawngthu

Vun natna hi chi hrang hrang a awm a, thenkhatin arngeng an buaipui laiin thnekhatin hmai thak te an buaipui a, chi hran hran a tam em em a ni.

Whiteheads an tih mai, arngeng a hmur var chi hi hawlphum ang thovin a buaipuiawm thei a. Whiteheads hi chu a rawn landan chu a hmaa a awmna ngi lovah a rawn var thek a, deh awlsam takin a awm thin. Hmaih pawh vun nem laiah an awm duh bik a ni. A tihreh nan chuan 'beauty grains' an tih hi an hmang thin a,hmuh a harsa deuh maithei a, mahse mahni pawhin a siam ve tehih tho a ni. Chini dip tak i neih chuan i hmang nghal mai thei a, mahse a hra chi anih chuan han rawt dip hmase phawt la, i hmang thei nghal chu a ni mai. Bawnghnute nen tihnawmin i hmai massage nan hmang la, karkhatah vawithum tih a tawk a, minute 5-8 chhung hmai massage nan hman thin tur a ni. Tin, buhkem hi chiah hnip ila, hmai nuai nan a hman theih bawk a, vun a tifai tha em em a ni. Mahse, hmai massage reng reng hian pawng nuai ngawt tur a ni lova, vun a chhiat belh theih avangin dim theih ang berin nuai thin tur a ni.

Arngeng hi pawng deh tur a ni lova, vun a tichhiain a ti hmelhem thei a, ser a siam thei bawk. Arngeng nei tan chuan tui leh theitui in tam a pawimawh a, nitin thei leh thlai hnah hring ei a tha em em a, thisen tifai theitu tur kan taksa mamawh ang kan hriat a pawimawh bawk a ni.

Mitvun val hi mi tam tak chuan kan buaipui em em a. A lo awmna chhan chu mut tlem lutuk vangte, hah lutuk vangte, rilru hah vangte leh ei leh in dik loh vangte a ni thei a. Mi han ena mitvun val kuau mai hi chu mut theih loh nei nasa mi ti ia kan sawi sual tam lovang. Mut tam hi taksahriselna atan a pawimawh em em a, i mu theilo thin anih chuan a chhan hre turin doctor rawn nachang hria ang che. Mitvun lai bawr hi amaha mawmna neilo a ni a, a chuar hmain a ro hma em em a, enkawl ngun a ngai bik em em a ni. Zantin i mut hmain i mit chu thil mawm hnawih ziah la, minute20 hnu velah lapua hnawmin hrufai leh la, chumi hnuah under-eye cream hnawih ang che. Under-eye cream hi lanolin leh almond inpawlh chi hi a tha hle a, vun rawng a ti eng thei a, vun chawmtu tha tak a ni bawk. Cream hi minute 10 hnu velah lapua hnawm bawkin hrufai leh ang che. Cream reng reng mitvun bawrah reitak chiah loh tur a ni, chiah rei chuan reiloteah mit a bui duh hle tih hriat a tha.

Mawm kan vun atanga lo chhuah tum hi kan vuna kaw chek chekah hian chhuak mai lovin a tang tang ta thin a, hei hian vun kua tizau zual thei a, hei vang hian vun tihfai ngun a tul a ni. Vun mawmah hei hi a zual a, chuvangin, vun pawnlang tihfai nan pawh medicated cleanser hman a tha. Cleanser-a 'ginseng' tel hi a tha lehzual a, vun a tifai mai nilovin kaw zau tawhte a tiziam thei a ni. Vunkaw zua tan chuan skin tonic nitina hman a tha a, tonic ah hian rose atanga siam an tha lehzual. I skin tonic chu fridge-ah dah la, i vun i tihfai zawhah lapua va chiah la, chu chuan i hmai i hru thin rawh. Nikhatah vawi tam tak hru thin la, i vun mawm lutuk tur a ziaawm thei ang.

Vun rang hi a nalh lo hle a,a awmna chhan chu mi a thau thuta a cher lehin a vun mar thin kha a mar ta lova, a rang ta thin a ni. Hei vang hian naupai te an nau neih hnua an dul a lo rang thin. Dul vel chauh a rang lova, hnute, mal vel leh ban bul lai te pawh hi a rang thei a ni. Vun rang tur venna tha ber chu a ran hmaa ngu taka nitin dul leh hnute velah mawm ngun taka hnawih thin tur ani. Tin, stretch marks remover te pawh a awm tawh a, regular taka inhnawih chuan vun rang a ziaawm thei khawp mai.

Read more...

BEAUTY- SPOTS

¢ Debbie Chawngthu

Beauty business-ah hi chuan miin a kut leh ke te, a ha te, a taksa reng reng a vawnfai a tul a. Mahse mi intifai theihtawp pawh hian vunah harsatna a tawk thei thova. Mi tam zawk chuan a chuar har nan tiin vun tihhnawm te kan uar a, theihtawpin vun thahtnan kan inenkawl thin. Kan inenkawl fai emaw tih pawh hian duh loh hunah hian hmaiah bawl te a lo awm a, hmai bawl ngai vaklo tan phei chuan buaipui tham a tling hial a ni. Mi thnekhatin enga tan mah an ngaih loh laiin thenkhat chuan rilru tih hrehawm nan hial te an hmang thei a, hmai bawl hi a inang lova, thenkhat i l thlir tlang teh ang.

Bawl hi vun natna ah chuan a lar pawl leh kan buaipui deuh ber a ni awm e. Arngeng ang chi hi chu dan naranin tleirawl chhuah tan lai hian a awm nasa a, thenkhat a reh mai laiin thenkhat chu an upat hnu thleng pawhin a awm zui thei a ni. Tleirawl chhuah arngeng lo awm te hi dan naranin hmai, hnungzang leh awmah te a awm duh bik a, heng laiah te hian 'sebaceous glands' an tih mai a awm tam vang a ni. Kan vun square-inch khatah hian oil gland 2000 aia tam a awm a. Kan taksa atanga mawm lo chhuak tur kha vun pawnlang chinah khan thur nen a intawng a, chu chu a lo sen ten thin a, a na ve thei em em a ni. Arngeng rawn awm te hi a deh hnu lohah chuan khawih miah loh a tha a, chutilo chu a darh thei a, vunin a chhiat phah thei a ni.

Tleirawl chhuah arngeng lo awm hi mahnia khawih mai lovin vun lam doctor entir a tha a. Annin damdawi hnawih tur leh eitur te an lo sawi ang a, hetianga tih peih chuan vun chhe tur a ven theih em em a ni. Tunhma chuan mahniin duh dan dain kan lo khawih mai mai a, vun tha tur pawhin a chhiat phah mai thin a ni. Tunah chuan vun lam doctor te an awm tawh a, vun lam natna reng rengah chuan pan thuai thuai mai tur a ni. Arngeng hawlphum hi vun mawm leh combination skin nei ten an nei duh bik a. Tih chhuah dawn chuan a hmasain hmai tui hua ur phawt tur a ni. Tichuan vun a lo nem a, arngeng lakchhuah a awlsam bik a ni. Arngeng lakchhuah dawn hian fimkhur a tul em em a, pawng sawr vak vak tur a ni lo. Sawr vak hian vun a tichhia a, a dam lehin a ser a, tihreh a har tawh em em a ni.

Khuavang chhinchhiah hi a awmna azirin mi a ti hmeltha thei a. A awmna in a zir lehloh chuan hnawksak a ni daih thei thung. Khauvang lian takah sam a to ve thei a, hei hi a mawi lemlo tih lovah chuan hlauhawmna em em a nei hran lo. Sam lo to hi tweezer a pawh tum suh, i pawh chuan a ti lian zual thei a ni. Thisen zam te tak te te a chat thei a, a bikin mit hnuai, biang ki bul vel vunah pawh a awm duh bik a ni. Vun nuai vak vak vang te, thil tthak sa tak ei nasat vang te, meizuk nasat vangtein broken veins a lo awm thei a, chung chuang khauvang thar a siam thei bawk.

Singsihlip hi natna hrik chi khat avangin a awm thei a. Kutah hian a awm duh bik em em a, thenkhat chu an hmaiah te pawh a awm bawk. Amaha dam leh mai te a awm laiin thenkhat erawh chu tihreh chawp ngai te an ni thei a, a darh ve theih avangin tihreh dan ngaihtuah vat thin tur a ni. Vun natna chi hrang hrang a tam a, heng lakah hian inveng tur chuan mahni kan inenkawl ngun a tul a, vun inhnawih chi reng reng mahni ngeih zawng chauh inhnawih a, midang ngeih zawng pawng inhnawih ngawt loh hi a tha ber a ni. Pawn chhuah dawn apianga sunblock inhnawih ziah a pawimawh em em a, hei hian vun natna tam tak lakah min veng thei a ni.

Q&A

Q. Ka taksa dang zawng a ngo pangngai anih laiin ka khup hi a dum tlat mai a, engtia enkawl chi nge?
= Cotaryl H Cream hi vun lam thiam doctor tam tak te chuan khup leh kiu dum tihreh nan an lo chawh tawh thin a, a tha turah ngai ila. Ser phel la, chumi hmang chuan minute 10 chhung nitin i khup chu nawt la, chumi hnuah moisturiser hnawih leh nghal ang che. Nawt tawk tawk lovin a thurin a zuk chiah tawk turin nawt thiam ang che. Hei hi karhnih chhung lo ti la, zialam i pan lo anih chuan vun lam thiam doctor te rawn zawk ang che.

Read more...