Mipui chu an innek a, an au hluah hluah reng bawk. Inhnek tura rawn chhuakte chuan WWE star-te ang maiin lawm an hlawh a, an rawn lan phat atangin mipui chu an lo au dur dur zel.
Contact Sports Centre chu hmun laili-a mi ni lo mah se a lun mep mep hle a, a chhunga leng ve lote pawh a bul velah an ri luih luih thin. Hetiang hi Mizoram boxing hian a tawng lo rei tawh viau awm e!
LPS Pro-Fight hian hlut a hlawh hle a, a huaihawttute pawh an phur hle. He TV Show hian Zofate zingah boxing a kaitho dawnin an hria a, an phur ngang mai.
Mission Vengthlang nu pakhat chuan a fate mizia sawiin, "An inhnek arh arh mai," a ti!
A fate chu hmeichhe pathum an ni a, a upa ber pawh sikul kai tir lek a ni. A naupang ber, kum 1 mi awrh pawhin a u-te a chum ve arh arh thin niin a sawi! Hetiang hi tunlai hian sawi tur a tam mai.
Pro-Fight hi a hmunah mi engemaw zatin an thlir a, chu aia tam fe te chuan TV atangin an lo thlir bawk. TV hit tak a ni a, infiamna lamah hetiang khawpa Zofate hlut hlawh hi a la awm lo mai thei. An hla - "Mipa leh mipa chu inngur chher chher mai tur... Mipa leh mipa chu innuai siah siah mai tur..." tih te chu mi tam takin an lo sa ve zut zut thei.
World Cup football leh Euro te'n Aizawl bazar a nghawng thin a, tualchhung infiamna erawhin a nghawng ngai lo tiin a sawi theih ang. CYMA-in football tournament an buatsaih chang hian football thawmhnaw hralh a kal thin a, mahse, a leitu chu a inkhel-a te an ni thin. Tun tumah erawh a tel ve miah lo, naupang te tein boxing thuam an lei tlat!
LPS Pro-Fight hian entu a ngah hle a, sawi zui lah a hlawh. Inchhung lum atangin a en theih a, naupangte'n boxing an tui phah hle nia ngaih a ni. Aizawla infiamna bungrua leh hmanraw zuarte chuan boxing thawmhnaw an hralh tha hle a, hralh tur an nei daih lo hial.
Sports goods dawr Lalhema & Sons te chuan boxing glove leh boxing hmanrua an neih ang ang an hralh zo ti tawh a, an chah belh mek. Skipper Sports Goods pawhin boxing glove lei tur an nei lo.
"Boxing hmanraw lam hi kan ngah lo hrim hrim a, boxing leh tennis hmanrua hi chu Aizawlah hralh a kal ngai loh avangin kan chah ngai vak lo. Mahse, tunlai chu an rawn zawt nasa khawp mai," tiin Skipper nghaktu chuan a sawi.
"Boxing glove leh boxing equipment hi naupangin an rawn zawng a, an nu leh pa te'n an rawn enpui nasa bawk. Kan neih ang ang chu kan hralh zo a, kan chah leh mek," Lalhema & Sons nghaktute pawhin an ti.
A zuarte sawi dan chuan boxing glove-in hralh a kal ber a, boxing kekawr leh gumshield hralh a kal bawk. Boxing tawnzau erawh naupangte'n an awt vak lo, Pro-Fight-ah an hak ngai loh vang a ni mahna.
Kum 5-13 inkara mite'n boxing thawmhnaw vel hi a zawrhnaah an en nasa a, sikul naupangte'n sikul banah an en thin bawk. Sikul naupang zingah pass lawm nana boxing glove lei an tam thu a zuarte chuan an sawi. Tunlai hi first term exam result chhuah hun a ni.
Y2Goal Agencies pawh boxing thawmhnaw zuar ngai lo ni mah se naupangte'n an zawt nasa hle a, a neitu Mamuana chuan: "Local event-ah chuan hetiang khawpa market nghawng hi a la awm lo mai thei," tiin a rinthu a sawi.
LPS Pro-Fight chief organiser Lalsawmliana Pachuau (LPS) chuan Pro-Fight chu boxing tihhmasawn nana buatsaih an nih thu sawiin, tuna an thlen chinah chuan mipuiin boxing an tui phah hle nia an hriat thu a sawi.
Keipawn ka en ve nasa hman khawp mai ka rawn haw zuai lai khan. Hmuhnawm ve tak chu a ni, thiante nena en ho leh phei phei chuan.
ReplyDelete"Dawngtea" kha a duh ber, boxer tla tawh zingah chuan. lolzzzz.
Chuanin, Pu Admin/Editor, zozam weekly hi Mumbai lamah agent in nei em? Hemi issue hi ka va duh ve e awww!"
Mumbai-ah agent kan nei lo tlat. Blog-ah hian kan thu leh hla kan dah kim thawkhat fu asin. A hard copy kher i duh a nih chuan 9436141409 ah emaw zozam@rediffmail.com ah emaw hian rawn zawt fiah mai ta che..
ReplyDeleteKa hre leh si. Ka thiante ka bia a nizan khan, Mumbai a rawn chhuk tur te. Min rawn lei sak dawn a nih chu. Ka lawm e.
ReplyDeleteNia hard copy kher kan duh deuh mawle... online a engkim tih hi chu a ninawm ve deuh a lawm :-) Bakah, daikal lai te, mut thatchhiat mai mai lai te a han chhiar te a nia ka duh... technology engmah hmang lovin. Stress-free ve deuh a lawm chuti chuan :-)
hmuhnawm biap biap khawp mai..... LPS lo pawh hian huaihawt se tha ngawt ang..hmuhnawm thei khawp... Cable TV Show neih ah chuan a Ropui ber awm e.. Final hmuhnawm biap biap leh dawn e
ReplyDeleteLPS in a hetiang an buatsaih hi an tan hma atang daih tawh khan tha hi ka ti lutuk a, dinchhuah phah hlawm se ka ti hle mai. Mimal tak pawhin ka lo lawm ru ve em em a, icon/ idol/ zostar tih vel ai khan lo tih daih tawh tur a nia.....mahse ka en ve hman ta lo hi ka ui takzet. mahse ka lawm tho tho.....lo record r'u, ka lo hawn velah k lo en ve ang.
ReplyDelete