Sumdawnna Hmunpui Bairabi

- Sangzuala Hmar

Chawhma dar 10 a ri a, Bairabi Zohmun venga khawsa JH Lalliansawta, kum 42 mi chuan ngaihtuahna dang teh vak seng lovin nilenga a hna tur chu chumi ni ni chhuak chuan a rawn her chhuahpui ve hrim hrim, cheng 200 atanga cheng 500 a thawkchhuak dawn tih a chiang reng. A tih fuh ni phei chuan cheng 600 thleng pawh a hlawh thei!


Mizoram thingtlang khua leh khaw lian deuhva khawsa pa pangngai kuthnathawh ngai chu nise a rilru a hah ngei ang, nupui fanau chawmlai a nei a, nitin chaw vawi hnih tal ei a ngai, mahse JH Lalliansawta hian chhuan chhama awm a hlau lo. Hna nghet a neih vang lam a ni hauh lo, a lo lamah buh leh bal a thar tha em a tih turin thlawhhma pawh a nei lo.

2006 kum atanga Bairabi khuaa rel lo lutin mumal zawka bungrua leh teak a phurh theih tak avangin JH Lalliansawta hian eizawnna lam kawngah harsatna a nei lo, Bairabi khua a ni a, puak phurin leh a tul ang ang thawh huamin rel station-ah a kal a, rel station hian a chhungkaw chawmna tur tawk eizawnna a lo pe mai thin.

JH Lalliansawta ang bawk hi Bairabi rel station a eizawng mi engemawzah an awm a, hna sang tak thawk an ni lem lo, mahse he rel station hian mi hnuaihnung zawk tan eizawnna a pe a, chu chu he in 1000 khua hian a nitin hringnun kal zel innghahnan ber an hmang a ni.

India ram chu sawi loh khawvela zin veivahna hmanraw tangkai ber chu rel kan tih hi a ni. India ramah chuan rel hi kum 1851 khan Roorkie-ah a tlan hmasaber a, hei hi bungraw phur a ni. 1853 khan Bori Bunder, Bombay leh Thane inkarah mihring chuan theihna rel chu tlantir tan a ni a, hei hi India rama mihring phur rel tlan hmasaber a ni. Tunah chuan Indian Railways hi khawvela ropui ber a ni tawh a, kilometre 108,805 zeta sei a ni a, rel kawng lian zawk broad gauge kan tih ang hi kilometre 89,771 zeta sei a ni a, tlangrama hman lar tak metre gauge hi kilometre 3350 vel bawr a ni. Kum khat chhungin Indian Railways hian khualzin maktaduai 6,000 zet a phur nia chhut niin bungrua pawh tonne maktaduai 350 vel a phur hman a ni.

Mizoram hi India ram pum zau zawk ngaihtuah chuan rel kawng lamah zawng kan hnufum kher mai, kan nei ve tawk tawk lek fang a ni, metre gauge an ti a, India rama rel kawng kan neih pahnih zinga a te zawk, tlangram leh hmun harsa zawka kal thei tura an duan chi a ni.

Bairabi khua hi Mizoram Hmar tawp Assam ramri dep maia awm a ni a, sumdawnga eizawng khua ti ila a sual lo hle ang, Nilaini ah bazar ni an nei a, Mizoram ramri chhunga bungrua awmte leh Assam lam atanga bungrua awmte insumdawn tawnna nasa tak kalpui a ni thin. Sumdawnna lian fal lutuk sawi mai tur a awm lo nain he in sang khua Bairabi mipuite chawm tawk sumdawnna zawng a awm chiang khawp mai.

He rel hi nitin a rawn thleng a, cargo wagon nena a rawn kal phei chuan he rel hi Mizorama buhfai kan ei tur phai lam atanga lokal zawng zawng deuhthaw phurtu a ni a, hei vang hian helaiah hian sumdawnna lian tak nitin mai a kal mup mup reng a ni.

Bairabi khaw tan chuan he rel hi Pheichham tluk zet a ni, tlangram lo neih hahthlak em em leh phai ni sen sa hnuaia leilet neih a ngai lova, heng aia hlawk zawk sumdawnna leh hna dang tam tak he rel lo lut hian a siam sak a ni.

Bairabi khaw Village Council President J Lalchhuanawma chuan he rel kawng lut avanga eizawnna awlsam zia leh Bairabi khuain innghahna ber atana an hman thu a sawi. "Khaw vannei tak nihna kan chang a, mi hausa lian le lu kan awm lo naa eizawnna a awlsam a, mi a thawh that peih chuan awlsam tea chak han lakna hnai nei kan nih avang hian, helaiah relkawng nena han inlamburha eizawnna mai hi chu awlsam tak a ni. Nitin bazar kan nei ta a, rel station ah sawn miin dawr an va siam a, hawkers kan han tih ang chi te, chawhmeh te, buhfai kan han tih ang chi te an va zuar a, chu chuan nunphung engemawchen kha min chhawk zangkhai a, hetiang kawngah chuan rel lo lut hi kan hamthat phah viau," tiin VCP J Lalchhuanawma hian a sawi a ni.

Nitin rel lo lut hian Assam lam atangin Mizoram mamawh chi hrang hrang a rawn phur lut a, chu'ng bungruate chu a neitu tel lovin rel station atanga put chhuah an ni a, a neitute erawh hi chu inner line permit nei lo chuan rel station huang pawnlam kaltir phal an ni lo, Mizoram lam sumdawng thenkhatte phei chuan telephone te'n an mamawh an order a, a bungrua an rawn thawn mai thin. Sumdawnna a len ngaihtuah hian chuti teh chiamin Vai leh Mizo inchawhpawlhna lian tham a awm lem lo. Rel station chhung a ni ber.

Sumdawnna lian atanga a te ber thleng Bairabi khua hian a nei a tih ngam, maktaduai tel sumdawnna - teak sumdawnna a awm a, chutih rualin vawk chaw tur dawl thlengin Assam lam atang hian a rawn lut a ni.

Teak sumdawnna hi he station atanga sumdawnna awm zingah chuan a lian ber leh sum hrawm na ber a ni, Supreme Court Special Investigation Team (SIT) in teak kih phalna a pek hmangin Bairabi station-ah hian teak phur thei cargo a lo thleng a, tum khatah ngawt pawh maktaduai chuang man thawnchhuah thin a ni. Supreme Court-in thing kih a khap bur avangin he sumdawnna hi duh angin a kal thei lo zawk a, chumi piah lamah rel cargo duh ang hmuh theih a ni thin lo, chuti chu nilo se, Bairabi teak sumdawnna hi Mizoram sumdawnna lian leh Mizoram hnuk tling thei hial tur a ni.

"2006 vel atang khan teak hi kan thawnchhuak tan a, harsatna nasa tak tak kan tawk thin a, harsatnate hi tawk lo phei ila chuan Mizoram tan hian he sumdawnna hi a tha nasa lutuk dawn a ni," tiin J Lianchungnunga, Asst. Secretary, Mizoram Teak Transporters' Association chuan a sawi.

He teak sumdawnna hi a lian hle a, Mizoram pum atanga teak tharchhuah, hralh mai theiha kih tawh leh ruahman tawhte chu Bairabi lamah hian phurhluh an ni a, heta tang hian a hlawmin vairam lamah a kal thla ta thin a ni.

"Kuthnathawktute'n hah takin teak an phun a, Pu Hawla hun hmasa lama NLUP atanga teak ching an ni deuh fur a, an puitling deuh vek tawh a, phalna kan neih chin chiah zel teak hi kih theih a ni a, nikum October thla khan a tam tham deuh kan thawn chhuak a, mahse wagon kan duh anga tam kan hmuh loh mai bakah kan duh anga tam kan hmu leh thei lova, a then a lo ro hman a, nuai tam tak Mizoram chuan kan chan phah a ni, teak thing kih hi Supreme Court lam thu a nih tlat avangin official work a tam zawk mah a tih theih, phalna hmu thei tur hian kan sawrkar hian hma la se, chak takin la se tih hi kan duhthusam leh kan ngenna a ni," tiin J Lianchungnunga hian a sawi.

Tunah tak hian Bairabi rel station-ah hian phurh chhuah mai theih teak cubic 94500 zet a intiang diam tawh a, SIT lamah phalna hmuhfel a nih veleh rel wagon dil a ni ang a, Delhi lama thawnthlak mai theih a ni dawn a ni. Bairabi khuaah hian teak hi cubic 1 cheng 250-300 vela hralh a ni tlangpui.

"Wagon lak phalna SIT atang hian duh ang zan hmu thei ila chuan tuna kan chhekkhawm let tam tak hi kan chhek khawm thei reng a, wagon kan hmuh tur zat a chian hma chu kan chhek ngam lo thin zawk a ni, a chhan chu teak hi a lo ro ve thuai thuai a, hei hian sumdawnna a ti chhe thin a ni," tiin Samuel Thangtea, Mizoram Teak Transporters' Association chuan a sawi.

Hausate sumdawnna mai mai tiin thenkhat chuan he sumdawnna hi an sawi hnawm a, mahse heti chung hian Bairabi-a rel lo lut hian sumdawnna dang pawh a kalpui tam kher mai. Kum 39 a upa Lallianpuii hian nitin thlai thar rel station kiang bazar-ah hian a zuar a, chhungkua a chawm thei a ni.

"Rel hi lo lut lo sela chuan kan sumdawnna hi a hlawhchham tluk a ni'ang, hetia rel lo kalah hian phai lam atangin thlai thar a rawn thleng a, Mizoram lam atanga kan thar kan zuar bawk a, a bik takin Mizoram thar bahla, thingfanghma leh mai kan hralh thei hle, a hel leh hel lo an pawisa lova, an duh em em mai a ni, mai thar lai phei chuan kan sumdawnna hi a tha ve thin khawp mai," tiin Lallianpuii chuan a sawi.

Nitin rel hi chawhnu herah a rawn thleng tlangpui a, rel lo thlen hma chu sumdawnna a intan tak tak thei lo, rel lo thlen hma zawng hi chu inbuatsaihna hun a ni deuh ber, a inbuatsaih zo hma deuhte chuan chhun khawlumah mutthlu chungin rel hi an lo nghak tawh mai thin. Rel station chhuahsan thui lovin vai lo lutte chuan an bungraw rawn ken an hralh a, chutiang bawkin Mizoram lam atanga an mamawhte an leikhawm a, chutiang chuan darkar khat dawn te sumdawn tawnna a thleng hman a, nitin hetiang hian cheng nuai chuang a vir kual reng a, chu chuan Bairabi khuaa mi rethei berh zawkte pawh eizawnna a siam ta a ni.

"Rel lo lut lo sela chuan keini tan chuan eizawnna a awm lovang a, tlangram lo neih a ni mai, rel atangin bungrua kan unload a, Aizawl, Kolasib, Kawnpui atanga kharchhawng lokalte'n motor an rawn leng a, an motor-ah kan load leh a, chutiang chuan cheng 10 - 20 kan hlawh zel a, hetianga chhungkaw chawm hi mi 100 chuang zet kan awm ka ring," tiin JH Lalliansawta chuan a sawi.

Kum 23 a upa Lalchharliana leh a thiante pawhin tlangram lo neih emaw, mi hnuaia inhlawh ngai miah lovin rel station-ah hian eizawnna pangngai tak an hmu. "Teak kan load a, a chang leh kan teh a, a chang leh kan sizing a, hei ringawt pawh hi kan tan chuan eizawnna tling a ni, ka thiante ho nen kan thawk a, chhungkaw chawm em chu kan la ni lo nain chhungkaw tan sum leh pai kan thawkchhuak thei a ni, tin, tlangram lo neih ai chuan a let tamin a hlawk a ni," a ti.

Bairabi khaw mipuite hian rel hi Sairang thleng a tl;ang ang tih an hlau hle, chimral hlauhna avang erawh a ni lo, Bairabi khua hi sumdawnna hmunpui a ni tawh lovang tih an hlauh vang a ni daih thung.

"Sawrkarin Sairang thlenga rel kaltir a tum hi kan duh lo, a tlang vaih chuan Bairabi hi kan ro char reng mai ang, kan khua hian hma a sawn chak em em a, Hortoki khua te nen khian kan inzah reng thin, tunah chuan keini chu in 1000 khua kan ni tawh a, sumdawng leh dawrkai pawh thahnem tak he khuaah hian kan awm ve tawh a ni, hei hi rel vang ka ti lo thei lo, mahse hetian sawrkar ruahman anga rel hi a tlang chuan kan chhe vek ang," tiin JH Lalliansawta chuan a sawi.

Hei zawk hi Bairabi khua chuan an hlauh zawk chu a ni, an sumdawnna hlawk tak leh thang chho mek chu Sairanga rel a luh chuan a tawp ang tih an hlau a ni.

"Sairanga rel a tlang chuan keini khuaah chuan minute 5 emaw lek a ding ang a, kan sumdawnna leh kan eizawnna te a tawp ang tih a hlauhawm," tiin Rinthanga, val upa, VC member chuan a sawi.

Sairanga rel luh an hlauhna hi hriatloh vangte pawh a ni thei, tunah hian Indian Railways chuan Bairabi thleng hian Broad gauge (Rel kawng lian) luh tir tumin hma a la mek a, an tihtur ruahman saah pawh a tel diam tawh. Heti a nih chuan Bairabi hi engtikah mah a te ngai dawn lova, sumdawnna hmunpui lian tak a ni chho thuai thei zawk ang.

Chimral Hlau Lo Bairabi
MNF sawrkar lai atang tawhin sawrkar atanga hamthatna awm a beisei ve thin a, mahse a beisei ang engmah a hmu ngai lo, sawrkar thar a ding a, chu beiseina chu ala ti beidawng chiah chuang lo, mahse he a beiseina hi a hlawhtlin loh chuan a beidawng ngawt tawh ang. Nitin mutia hna a thawk a, chumi pahin a sumdawng a, pa awmthei pangngai tak a ni, vai a hlau lova, tin, an khuaa vai sumdawng awm a phal hauh lo bawk. Hei hi kum 39 a upa Lalthanpuia khawvel a ni.

A hmel en chuan Mizo tawnga biak tur nge Vai tawnga biak zawk tur hriat harsa tak a ni, a Mizo hmel dik tak mai chu hmuihmul ki deuhva a chei avangin hnam dang te pawh a ang hle, mahse Mizoram hmangaih em emtu a ni.

Bairabi khaw mipuite hian an khuaa nitin vai za tel lo lut thinte chu thiam takin an enkawl a, a rikrap zawng emaw, a kutthlak zawnga che hauh si lovin thiam takin an sumdawnna kalpui danah ramri an kham a, ramri hnawksak tak ni si lovin venghimtu tha tak a ni lawi si.

Bairabi khuaah hian vai sumdawng inbengbel pakhat pawh an la awm lova, awmhmun nghet khuar pakhat pawh an la awm lo. Hei hi an chhuang hle, Bairabi khaw VCP J Lalchhuanawma chuan rel lo luh avanga inchimral emaw, Bairabi khuaa vai pung ta hluai an awm loh thu a sawi. "Kum 20 zet a ni ve tawh, vawiinni thlengin kan khuaah hian vai in leh lo nei emaw, dawrkai an la awm lo," tiin chhuan takin an khuain thiam taka an inhum dan J Lalchhuanawma hian a sawi.

"Bairabi khua hian assimilation hi kan hlau lo, kan khua ang vek hian inlungrual ila, khawi Mizoram khua mah hian assimilation hi an buaipui ka ring ngai lova, a sawi pawh an saiw peih bawk hek lovang," tiin J Lianchungnunga, VC Secretary chuan a sawi ve bawk.

Rel lo luh ruala vai sumdawng lo lutte reng reng hian an bungrua an hralh thuai thuai a, rel haw leh rualin Assam lamah an lut phei leh mai thin.

"A tak tak ram pawh sawi thlen ve a ngai a, tlemlai deuh khan ILP chungchangah kan buai a, MZP leh YMA te'n beihpui kan thlak a, mahse rel hi a lo sawrkar laipui deuh ruih mai si, rela an chuanlai chuan ILP check ngawt theih a lo ni hauh lova, chutiang boruak a awm takah chuan an chhuk kan phal lova, hun engemawchen chu thenawm state nen pawh tlemin kan inhmuh thiamloh phah lek lek a ni," tiin an khaw senior politician, tuna VC member ni mek Rinthanga chuan a sawi.

"Assimilation hi kan hlau eih lo, engtikawng mahin Bairabi khua hi vai hian min chimral lovang, kei chu mi mawl mai ka ni a, mithiam zawkte chuan ngaihdan hran deuh te pawh an nei mai thei, mahse tun dinhmunah chuan vai sumdawnga lokalte hi thiam takin kan lo mikhual a, kan bazar chhunga an inzawrh kan remti lova, an pekchhawnna tur Mizote kaltlang chauhvin an bungrua pawh an zuar, tin, helaiah an thawh ang ang kan thawk a, an thawhna rate angin kan thawk a, rate inang rau rauah chuan mi chhawrtute'n Mizo an duhzawk zel a, hetiang kan tan tlat avang hian vai tan chance kan pe lo hrim hirm," tiin rel station-a tharum mamawh awm apiang thawk thin leh he pawl hruaitu Lalthanpuia chuan a sawi.

Bairabi khua hi ramri dep seta awm a ni a, heti chung hian khawchhungah vai hmuh tur an tam lo hle a, rel a lo thlen laiin vai chu an awm, an awm nameuh mai, mahse zan riaka rela lo lut an awm ngai lo. Hei vang hian Bairabi khua pawh hi an inchhuang hle.

"Kan khuain kan tih ang hian Mizoram khawdang zawng zawng hian ti ve ta se, assimilation hi kan buaipui hauh lovang," tia sawitu VCP J Lalchhuanawma hian a sawi sual lova, Mizoram hmun danga chimral hlauva awmte hi he ramri khua vairam nen inhne reng khua hian thil tam tak min zirtir thei a ni.

Related Posts :