Monday, February 22, 2010

Hmarchhak hian electric eng a tlachham tak zet em?

¢ Lalhruaitluanga Chawngte

"A va han ninawm zozai tak!" tih tawngkam hi Mizoramah chuan 'current' thim thu nen a inhmeh bikin a lang!

Hman atanga vawiin thlengin electric current chungchang chu politician-te inbeihna ber pakhat a ni a, 'Bairabi' tih te phei chu khaw hming a ni tih hre lova electric power lam thil emaw ti tawk te pawh awm se thil mak a ni lo ang.

Mizoramah hian electric power kan hnianghnar tak tak ngai lo tiin a sawi theih ang. Tlema a ziaawm lai te chu a awm, mahse, a tlangpuia lak chuan 'thim fate' tia sawi tlak kan ni deuh reng. Tun hnaiah kan thim nasa zual; chu chu sorkar thar kan neih tirh lam nen a innang a, sorkar thar tihdik loh a nih leh nih loh chu thuhran ni se, sorkar thar neih leh current chhiat zual a innan miau avangin sorkar thar chuan beih pawh a tawh phah hle a nih hi. Eptu party pakhat thalaite phei chuan mombati an sem hial.

Chutianga kan buai laia kan thu hriat fo chu "hmarchhak pumin electric power kan hmu chhe hrim hrim... kan vaiin kan hnianghnar lo hrim hrim... thenawm state te pawh an thim nasa..." tihte a ni thin. Tunlaia hetia harsatna kan han tawh pawh hian hotute chuan chutiang tho bawk chu an rawn chhakchhuak leh ta.

Zoram politics titi tui a ni a, mipui lam pawh electric power hnianghnar taka neih hmaa hmasawn thei lo turah an inngai ta emaw tih tur khawp a ni. Zoramah chauh a ni lo, hmarchhak pum puiah chutiang chu a ni ti ila kan sawi sual tam pui lo ang. Hmarchhak naupangte hian mombati-in rannung engemaw zat an farhlum tawh ti ila, chu chuan electric power lama hmarchhak dinhmun a hril mai awm e! Chuvangin, hotute hian dawt an sawi lo. Mahse, hetiang thu a dik thei hi a lungchhiat thlak thung!

Hmarchhakin electric eng a tlachham maw? A va mak ve! A va mak lo ve!

Hmarchhakin hetia electric eng kan tlachham hi a mak asin!

March ni 14, 2002-ah khan, khatih laia union minister for power chuan Rajya Sabha-ah hmarchhak hian 58,971 KW a nei niin a sawi a, hei hi India ram pum hydro-power neih theih zat zaa 38 a ni (The Assam Tribune, March 15, 2002). March ni 24, 2003-ah khan chutih laia prime minister AB Vajpayee chuan hmarchhakah hydro-power 50,000 MW siamchhuak thei tur project ruahmanna a hawng bawk (The Telegraph 25th May 2003).

Hmarchhak hi hydro-power siam nana hmun tha a ni; Arunachal Pradesh ringawt pawh hi power 40,000 MW vel siam chhuak theia chhut a ni a, Siang Basin ringawt pawh hi power 6,000 MW pechhuak thei tura ngaih a ni (Source: Department of hydropower, Government of Arunachal Pradesh).

DoNER-in an chhut dan chuan, hmarchhak hi hydroelectric power 63,257 zet siakchhuak theih khawp a ni a, chutiang khawpa heti lama ram tha ni mah se, 1,011MW vel chauh la siakchhuah a ni.

Amaherawhchu, siakchhuah tawh zat hi tam lo mah se hmarchhakin electric power a mamawh zat atanga teh chuan a tlem tia sawi tur a ni lo. Parliamentary standing committee on energy-in 2001-a an chhut dan chuan, hmarchhak hian a mamawh hnem ber laiin electric eng 926MW a mamawh a, chu chu kum 8 vel kal taa mi ni mah se a la dik thui viau ang. Duh leh belh hluai ila, hmarchhak hian electric power 1000MW a mamawh pawh ti ila, hmarchhak hian chu aia tam chu a nei tho.

Mamawh hnem ber laia electric eng 926MW mamawhtu hmarchhakin, chu aia tam a siakchhuak chunga electric power a tlachham a nih chuan, thil mak tak a ni! Mahse, a tlachham miau si!

A awmzia chu tiang hi a ni- kan thenawm state hrang hrangah hian hydel project a awm teh meuh mai, mahse, an ta a ni lo. Phur takin tui an khuap a, an han khuap zo a, a electric power siakchhuah tam zawk fe chu mi ta a ni daih zel. Current an thim reng tho! Chu chu a ni hmarchhakah mipui hman khawp aia tam electric power siakchhuah a ni chunga hmarchhakin electric power a tlakchham chhan chu!

Mizoramah pawh chutiang tho chu kan hmabak chu a ni. Kan sawi lar em em, Tuirial Hydel Project ngei pawh hi peih fel ni ta se NEEPCO ta tur a ni a, kan ram a tihchhiat manah zangnadawm nan a power siakchhuah za zela 12 emaw chauh kan chang ve ang! Tuivai pawh chuti tho. Chutiang chu kan thenawmte'n an lo ti tawh a, tih ve talh kan tum a ni ber. Mizoram politician te'n a hmalatu leh bultantu nih inchuh hial khawpa an tuipui, tuikhuah hrang hrangte hi peihfel ta ila, mipui kan lawm ang a, sorkar hruaitute an intithei bawk ang. Mahse, kan chhawr chuang lo ang. Hydel project awmna state, kan thenawma mite'n electric power an tlachham ang tho hi kan ni ang. 105MW pechhuak thei, Loktak tuikhuah awmna state Manipur khian electric power an indaih loh khawp khi maw!

Chutiang chu thil awm dan a ni a, hmarchhakin electric power a tlachham hi a mak asin!

India hian hydel project buaipuitu tur a nei nual a, hmarchhakah chuan National Hydro Power Corporation (NHPC) leh North Eastern Electric Power Corporation (NEEPCO) hmangin tui an rawn tlangpui. NHPC leh NEEPCO te'n tui an rawn khuap a nih chuan tuikhuah chu central ta (central sector) a ni tihna a ni a, central sector a nih chuan a power siakchhuah pawh central ta tur a ni. Zaa 12 chu a awmna state-in a chang ve ang. Ramngaw a tichhia chiam ang a, ram engemaw zat a chimpil dawn bawk nen, a awmna state hian zangnadawmna atan 12% chu chang ve rawh se tihna a ni. Chutiang tur chuan hmarchhak state-te hian India sorkar hi kan ngen ngawih ngawih zawk zu nia!

Chu mai a la ni lo, tuikhuah chuan ram engemaw zat a chim pil dawn a, chu'ng hmuna chengte chuan pi leh pu atanga an lo inrochun tawh ram, ruah leh thlipui laka an himna ni kumkhua thin, an nu leh pate ruang an zalhna hmun an chan ang. A chim chin mai a ni lo, electric power semdarhna atana NHPC/NEEPCO ram mamawh zawng zawng chu state-in a chan bawk. Tuirial Hydel Project-ah pawh a awmna Mizoram chuan 12% chauh a chang ang a, a chim pil chin leh electric power semdarh nana (Mizoram pawna an lakchhuahna turte) an ram mamawhte chu NEEPCO-in a chang ang.

Hmarchhak state-te hi rethei te te vek kan ni a, hetiang hydel project lian tham mahnia sualchhuak thei tur khawp kan ni lo. Hmarchhaka tuikhuah, state ta ngeite chu te tak te te a ni hlawm. Tuikhuah chu 'development project' a ni tih kan hre ve si a, tu ta nge a nih anga tuin nge hlawkpui ang tih ngaihtuah lovin, neih tumin kan bei ta thin a ni. Thahnemngai inti fein, kan theihna hmanga sumdawng turin midang kan ngen thin a ni ti ila a dik mai awm e.

Thenawmpain, "I huanah hian tuikhuah tha deuh ka rawn siam teh ang. Mi pawhin ropui an ti ang a, i huan chu tha an ti ngawt ang. A ram neitu nih manah sangha tharchhuah 12% chu i chang ve dawn nia," min ti ta se kan remti ang em? Hmarchhak chuan kan remti chu a nih hi!

Tuikhuah chungchangah chauh a ni lo, thil dangah pawh chu tho chu kan rilru puthmang a ni. Development hming pu tawh phawt chu kan bawh huam huam a, 'He development project hi tuin nge hlawkpui ang? Ka hlawkpui ang em?' tih te, 'A man atana kan sen tur nen a intu em?' tih te ngaihtuah lovin, inti 'modernisation' awmze hre takin kan chuh ta thin a ni. Chu chuan ei leh bar mai a nghawng lo a, sumdawnnaah a hlawk lo zawkah kan tang tih ringawt hi a tawpna a ni hek lo. Khawtlang nun a khawih a, hnam nun thlengin a nghawng ta a ni. Hmarchhaka hel pawl hrang hrang hringtu pawh hi chutiang chu a ni tlangpui tih chu tunlaia sociologist-te ngaihdan a ni.

Tripura khu kum 30 chuang zet chu hetiang buaina hian a lo chiah tawh. 1960 chhovah khan Bangladesh atangin raltlan an lut teuh mai a, tribal-ho ram zaa 60 vel zet an luah nguk mai. Hei hi 'Gumti dam' siam lai a ni. He tuikhuah hian ram 46.34 sq. km vel zet a chim a, a nghawng phak mipuite duh lo chung chunga sak a ni. A chhehvel mipui chu hmun him lamah an insawn a, mahni khua atangin an inthiarchhuak reng bawk.

Gumti tuikhuah awmna hi ram tha tak, loneihna hmun tha a ni a, mahse, tuikhuah chuan chu hmuna khawsa, loneitu tribal chhungkaw engemaw zat chu a umchhuak ta a ni. Eizawnna thar an sual a ngai ta a, chu chu an harsatna tam tak zinga a pakhat ve chauh a ni zawk. Chutiang chu 'land alienation' an ti a, identity tibuai vek thei khawp thil a ni. Hmarchhak mipuite hi ke lawnga lei rap thin kan ni a, kan chenna ram (land) nen hian kan inzawm thuk hle. Chu ram atanga umchhuah kan nih chuan chhiatna hrang hrang, rilru leh thinlung lama him lova inhriatna te'n min lo hmuak nghal thin. Gumti tuikhuahina a umchhuahte pawhin chu harsatna chu an tawk ta a, ramngaw hlu tak a tihchhiat zozai te kha chu thuhran ni se, umchhuah hnute harsatna chu Tripura tihrehawmtu a lo ni ta. He state-a thisen luantirtu, hel pawl hlauhawm tak tak piantirtu chu Gumti tuikhuah leh development hming chhala hmalakna hrang hrang hrinchhuah, land alienation chu a lo ni ta a ni. State dang pawh chutiang tho chu an nia, silai tel lova him lova inhria leh silai lek duh khawpa thinrim hringchhuaktu chu land alienation hi a ni tlangpui, development kan tih chu! Mahse, development hmingchhala hmalaknaa a meizang hlaptute chu a tuartu an ni ve lo, mirethei zelin an tuar tiin a sawi theih ang.

Chu chu tehkhawnga hmangin Mizorama development project kan tihte hi han chhut teh; tuikhuah te, rel kawng te, tuialhthei laichhuahna te leh thil dang dangte hi. Hmansawnna chu thil tha hlang a ni lo a, thil chhia pawh a keng tel alawm. Mahse, chutah chuan thil tha a thlen tur leh thil chhia a thlen tur kha buk tur a ni a, chu chu 'cost-benefit analysis' an tih chu a ni. Hmarchhak hian chutianga tehna chang chu kan hre lo a, 'development alawm' tia kan lo bawh ruak ruak thin avangin hmarchhak hi thisen chhuahna hmunah a chang ta, chu chu kan thenawmte ral chhan ber pakhat pawh a ni. Hydel project tha tak tak kan nei emaw inti tlat chungin electric current kan indaih lo kumtluan te hi chu a ve lek a ni!

Hmarchhak state dangte ngaihtuah chuan Mizoram dinhmun chu a la tha khawp mai. Development infrastructure tha tak tak awmna state chu hel pawl hlauhawm tak tak awmna state an ni zel. Chutiang chu nih ve talh kan tum tur em ni ang?

Heti zawng hian i'n ngaihtuah teh ang; thingtlang khuate hian ram an nei lo tial tial a, chu chu Aizawl pahovin ram an va neihsak thin vang a ni. 2008-ah phei kha chuan khaw pakhat chu ram an neih loh avangin an buai hle, buhfai kudam sakna tur hmun an nei lo, an khaw ram chu Aizawl pa, ram neihna chang hre tak takte'n an lo nei vek tawh a nih kha. Chutiang chu tuna kan dinhmun chu a ni a, Mizorama ram hi mihausa mi tlemtein an insem zo vek tawh tiin a sawi theih hial ang. Chu chu a ni mithahnemngaite'n "land reforms kan mamawh" an tih thin chhan chu. Mahse, kan thenawm state-te ngaihtuah chuan kan la vannei hle; ram zau tak neitu mi tlemtete hi pawn lammi ni lovin kan zinga mi ngei, Mizo ngei an la ni. Rapthlak viau mah se a la ziaawm alawm ti mai ang. Kan thenawmah chuan chutiang a ni ve lo, ram neitu mi tlemtete chu pawn lammi an ni. Development hming chhalin, eng nge a nghawng tur ngaihtuah lovin ram an chan duai duai thin. Tuirial hydel project hi peifel ni ta se kan ram engemaw zat chu NEEPCO kutah kan hlan ang tih kan sawi tawh kha. Chutiang chuan kan thenawmte hian an lo ti thin a, chuvangin an rama ram neitute chu an hnampui ni lovin pawn lammi an ni ta thin a ni. Mizo pa tlemtein Mizoramah ram zau tak an nei a, miretheite an chep hle. Chumi pawh siamthat a tul em em laia pawn lammi chahluh ve kher hi tul kan ti em?

Development hming chhala hnathawh kan tumnaah chu tehna hmang chuan i teh thin teh ang u. Sairang thlenga India rel thlentir kan duh a nih pawhin land alienation a thlen tur hi ngaihtuah phawt teh ang u. A bikin miretheite'n chu chu kan ngaih pawimawh lehzual a tul, a tuartu tur kan ni. Mihausate chuan an tuar kher lo ang, vai rama mahni fate lehkha zirtir thei chinte hi chu a hlawkna tel thei tur khawpa fing leh neinung an ni, compensation te an dawng ang a, company-ah an fate'n hna an thawk bawk ang, hnamin a tawrh theih dan chu thuhran ni se.

Hmarchhaka development infrastructure kan hriat lar ber tia sawi theih, hydel project pawh a ram neitute'n kan hlawkpui lo a ni a, kan hlawkpui lo mai ni lovin kan tuar zawk a nih hi. Development infrastructure dang kan la duh belh maw?

India hian hmarchhaka hydel project siam belh zel a tum a, a duhthawh hle nghe nghe. Chu mai a ni lo, ramhmul damdawi (medicinal plants) lamah kan hausa tih a hria a, tuialhthei lam pawh rawn zawnchhuah a tum. Khawchhak lam nena insumdawn tawnna kawngkaah min hman a tum bawk. Chu'ng chu 'development alawm' tiin kan lo bawh leh huam huam dawn nge a tih dan dang kan ngaihtuah ve tawh dawn? Development project hi thil chhia a ni tihna a ni lo, thil tha a ni tih te chu tlang hriat a ni. Mahse, miin electric power siakchhuah hna an rawn thawh nana mahni ram pe thei kan ni tih hi i theihnghilh lo ang u.

Hmarchhakin kan hman khawp aia tam electric power kan siakchhuak chunga kan thim reng si hi a mak a, a mak lo bawk. Tihluihna tute emawina min barh a ni lo, kan hruaitute'n lungsi thlapin chutiang tur chuan India sorkar hi inremna an ziahpui thin! A mipui nawlpui leh kan lehkhathiamte pawhin chutiang chu kan ngaisang a, a hmalatute pawh mipuite thlantlin sorkar hruaitute leh lehkhathiamte an ni. Chuvangin a mak lem lo. Mahse, a pawi!

Related Posts :



No comments:

Post a Comment