RTI Act Awmze Nei Lo

¢ HC Vanlalruata

Hmanni khan ka mi hriat chian tak pakhat chuan department pakhatah RTI Act hmangin zawhna a zawt a. April thla bul lama a thehluh kha lipui-a hrei-ha thlak ang vang vang a ni. Tun thlengin a chhanna a la hmu lova, an pek theih loh chhan pawh engmah an hriattir lo. Min rawn rawn a, kei chuan reminder thehlut emaw a nih loh leh Appellate Authority hnena thlen leh turin ka lo rawn a. Mahse, tunhnaia thil awm dan ka’n chik hian Appellate Authority (an department hotu ber) hnenah pawh thlen raw sek sek, vut laka vawihah pawh an ngai dawnlo a nih ka ring ta.

Hetiang harsatna nei hi an awm nual tih ka hriat phah a. RTI Act chelek tak PRISM pawhin thuchhuah an lo siam tawh a. Chanchinbu pakhat pawhin an zawhna chhanna an hmuh theih loh chu sawiloh an zawhna thehluhna tur department SPIO chuan an zawhna pawh a dawng duhlo tih an chhuah a ni.. Mimal, RTI Act hmanga zawhna dawnglo, sawi chhuak lem lo an tam viau pawh ka rin phah ta a ni.

Hetianga kan sorkar hnathawk, RTI Act hmanga zawhna lo dawngsawng a, a chhanna lam khawm hnu-a min pe chhuak leh thin tura sorkarin a ruat bik, State Public Information Officer (SPIO) tia an nihna pawh a vuah sakte hi an awm ta lo a ni lo. An la awm reng. An pute’n RTI Act hmanga zawhna an dawnte chhang tawhlo turin an hrilh a nih leh nih loh chu ka hre lova. Mahse, zawhna chhang tawhlo turin he dan hi siamthat a awm thawm kan hre si lo.

SPIO te an sual ta thut em ni ti dawn i la, a ruala suahsual han thawh a, a pawng a pui-a luhlul chhuah rual ta thup chu an nih a rin awm bawk si lo. Mahse, department engemawzata SPIO te chuan tunhnaiah RTI Act-a zawhna lutte chhanna an pelo tih hriat a ni bawk si a. Chuvangin a kaikuang ber chu he dan tha tak hmanga mipui lungawilo kan zualko theihna ber thuneihna sang chelhtu State Chief Information Commissioner (SCIC) nihna chelhtu an awm rih loh vang a ni chiang mai.

He thil hi a tenawm a, traffic police awm loh laia traffic dan bawhchhiat ching nen an danglamna ka hre lo. Dan kengkawhtu an awm tak loh veleh a Phungpuinu ang maia duh duha tal theia inhriatna hi democracy innghahna lungpui dan rorelna (rule of law) palzutna chiang tak a ni. Driver thenkhat dan bawhchhiat hreh lova, traffic police duty awm lohna lai apianga ‘Chhura awm ta lo ve,’ tih chingte kan ngaihsan loh ang chiahin he thil hi kan ngaisanglo tih mipuiin kan lan tir hi a hun ta hle mai.

Tunah hian Information Commissioner chu kan nei reng a, SCIC awm hma atan SCIC mawhphurhna a la mek a. Mahse, RTI Act duhdanah tak chuan a hranpaa SCIC hi ruat tur a nih avang leh he dan kenkawh kawnga thuneihna tawp nei a nih avangin ‘charge la’ mai chu kan SPIO rual hian an hlau i-khaw lova, thuneihna tawp neitu awm ta lova hria-in mipui dikna leh chanvo ram dan ngeiin a pek chu mipui rawngbawltu tura hlawh neia rawihte hian an palzut ta mek a nih hi. Mipui thlante’n ram puma hman tura an dan siam chu Mizoramah chuan pawngsual mek a ni.

Kan SCIC kal chhuak ta Pu Robert Hrangdawla a awm loh hnu, kumin February ni 1 atang khan he thil hi a inmun’ tan niin a lang a. RTI Act chuan SCIC emaw SIC emaw te hi a ruattu committee a siam vek a. Chuta a ruattu committee chairman chu Chief Minister a ni ang a, member-te chu eptu party lian ber hruaitu leh minister pakhat CM-in a ruat tur an ni a. A tlangpuiin RTI Act chungchanga nodal department information and public relations changtu minister an ni thin a ni awm e.

Mahse, thla li leh a chanve ral hnu-ah pawh SCIC ruat a la ni lova, a ruattu tur committee an thutkhawm thawm pawh mipuiin kan la hre hek lo. Engemaw chenah chuan sorkarna chelhtu tan chuan RTI Act hi pheikhawk chhunga lungte lut tluka ninawm a ni ve a, chuvang chu em ni he dan hi hmang hleithei lova kan awm tak tih mipui ngaihdan a piang ang tih a hlauhawm khawp mai. Zep ruk tur kan ngah lua em ni tih zawhna a awm thei ta bawk.

Prime Minister Dr Manmohan Singh chuan RTI Act chungchanga ram pum huap khawmpui-ah he dan chungchang hi a sawi a. Mipuiin zawhna an zawh buai pawh ngai tawhlo khawpa sorkar lang tlang a awm hun a nghahhlelh thu leh chu ngei chu he dan siam chhan bulpui a nih thu a sawi a ni. Kan ram hruaitu lu ber thusawi leh duhaisam tihlawhtlinglo zawnga puanhnuai thil kan ngah avanga mipui chanvo kan rahbeh reng chu a thiang hauh lovang le.

Related Posts :