MEDIA!

¢ HC Vanlalruata

Tunhma chuan ti ve khanglang i la, chanchinbu lama kan luh tan tirh ve lai chuan thuthar lakna hi a tam lo hle a. Television a la awm lova, internet phei chu a awm ang tih kan mang pha lo. Transistor radio nen kan inchhawp a, All India Radio-a thuthar puan kan la ber a, ramdang chanchin kan lakna pawh BBC leh VOA (Voice of America) radio atanga kan ngaihthlak kha a ni. Tape recorder-ah kan lo record a, chu chu kan ngaithla a mi hming leh ram hmingte pawh kha tihsual a tam ta ve ang. Rambuai kan nih avangin sorkar thikthu a chhia a, engemaw hlekah Magistrate koh kan tawng zing khawp bawk.

Kum 1998 hma kha chuan computer hmang kan la awmlo hrim hrim a ni awm e, a hmang pawhin stencil-a chhu-in cyclostyle-ah an her leh thin a, keini phei chuan 1998 thleng khan typewriter leh cyclostyle kan la hmang a ni. A hma chuan khawl ha rema printing press buk tluk tluk theiha chhut kha a changkang ber a ni mai a, milem kan chhut kai duh chuan thlalak kha ‘block’ an tih maiah hian kan siam tir a chhah bel bul rit fu te hi a ni a; a chhut chhuah erawh chu a fiah lem lo. Computer awm hlima thlalak kan ‘scanned’ a stencil paper-a kan chhut kai tir kan her chhuah ve te pawh kha fiah lemlo tak chu a ni.

Tunah hian thil a lo danglamin a changkang ta thut a. Thlalakte pawh a thar ber ber internet kaltlanga la-in colour thlapin fiah em emin kan chhu thei tawh a. Chanchinbu ‘layout’ pawh a fiah tawhin kan chanchinbute pawh a hmel lan dan chu a mawi ta ngawt mai. Chumi piahah chuan Television-in min run a, local channel-ah chanchinthar ngaihnawm mai nilo hmuhnawm kan en thei tawh a. Kan changkan’ dan hi 1998 leh a hmalama thi ta te kha lo tho lehin rawn en sela chuan mak tiin an thi nawn leh hial awm mang e.

Chutianga printing technology lama kan changkan’ thut hnu-ah leh electronic media lamah phei chuan rin phak bak leh zuala hma kan sawn hnu hian changkan’ lohna riau kan la neiin ka hre fo thin. Chu chu hmasawnna kal chak lutuk kan hak vang a ni thei a, chanchinthar lakhawmtu leh thehdarhtute kan la ‘professional’ tawkloh vang a ni thei a. Chutih rualin a chhiartu leh entu mipui phak tawk leh a nih vang a ni thei bawk.

Ka ngaimawh em em thin chu pawikhawihna engemaw a awm a. Media lama thawkte’n kan han la vung a, a ngaihnawm thei ang ber turin kan han bawl phuan (sensationalise) a. Police emaw khawtlangin emaw a titu nia an puha an man chungchangah tu tute emaw kan han interview-a a entu mipui tana a hmuhnawm em em rualin Police lamin amah an puhna thu (charge sheet) an theh luh hma leh Court-in a chungthu an ngaihtuah hma hauhvin media lam hian thiam loh kan chantir (convict) der mai thin hi ni hian ka hre fo thin.

Kan changkang tawh e kan tih rualin kan thu chhuah dan leh puan dan phungah erawh chuan kan changkang lo leh zauh thin a. Police-in thiltisualtu-a an puhte hi dan tawngkamah chuan ‘accused’ emaw ‘suspect’ emaw an ti thin a. Media changkangah pawh tualthattu-a puh chu ‘alleged murderer’ emaw an ti thin, chu pawh chu tualthattu-a puh tihna mai tho a ni. Keini erawh chuan ‘rukru an man’ ‘Thangi thattu an man’ ‘Sumo suamtu an man’ kan ti tawp tawp mai a. Dan mitah chuan hei hi thil dik hauhlo a ni. Court-in thiltisuala puh a nihnaah khan thiam loh a chantir hnu-ah chauh hetiang tawngkam hi chu kan hmang thei ang. Chutilo chu engamah hma-in thiamloh kan lo chan tir ve ngawt tihna a ni a, mipui lah chuan kan lo lem duak duak mai bawk si. A hnu-ah court-in a tisuallo tih hmuchhuakin emaw a chhuitu lam pawhin a titu dik tak zawk nia an hriat midang man lehin chhuah ta pawh nise mi thinhrik, misual anga en zui turin kan chhuah ta thin tih hi hriat a tul ta khawp mai.

Media chauh pawh kan nilo, khawtlang pawh hian kan thiam chuang lo. Dan-ah chuan hmeichhe pawngsual tawk emaw khuaikhem tawk emaw te hi an hming tarlan loh tur mai ni lovin a tuartu kha miin an hriat theihna tur hawi zawnga puan zar a phallo reng reng a. Kum tlinglo ngat phei chu a phallovin ‘Juvenile Justice Act’ chuan thikthu chhe takin khawtlang thinhrik leh mite hriat zui an nih lohna turin an chanvo hi khauh takin a humhalh a ni. Chutiang chu a nih laiin media lamin an chenna veng leh khua pawh an tarlang lo chungin khawtlangin kawng zawh tak maite, dawr khartirte kan ching a. Bui chhe laihlohva inpuangin kha naupang vanduaina tawk kha midang hriat loh theih lohvin kan pholang ta thin. Hei hi kan sim a ngai a. Dan hmang ngeia thiltisualtu hrem kan duh chuan a bawhzui dan dik a awm a. A chhuitute hnena thil awm dan diktak hriate’n an hrilh a, a chungthu ngaihtuahnaah pawh taima taka court-a an kal kha a dik a. Haw haw-a thil kan tih apiangin a hrelo lo turin kha naupang khawngaihthlak kha an hre ta thin tih hi i hre reng teh ang u.

Related Posts :