Mizoram-ah Naupangte an him em?

Hmeichhe naupang pakhat chu kum 6 mi a nih lai atangin ama pa ngeiin a pawngsual thin a, kum 15-mi a nihin hriatchhuah a ni!

He naupang hi nu leh pa inthen kara mi a ni a, thingtlang khaw pakhatah a pa bulah khawsain, a pi leh pute nen an chengho thin. A pi leh pu thih hnuah Aizawlah an pem a, Aizawlah an awm hnuah chuan a chunga thil thleng thin chu hriatchhuah a ni ta a ni.

A pa hi ruihhlo ngai a ni a, naupang te a nih lai atanga hetiang thil a tawn avangin ngaiah a lo neih tawh tih a case IO chuan a sawi.

"A thil tawn hi thil dik lo a ni tih pawh a hre lo, ngaiah a neih ve tawp. A pa chu chik takin ka zawt a, 'ka sual vang a ni, thlarau sualin min pawl a ni ang' tih bak sawi tur a hre lo. An khawngaihthlak khawp mai," a ti.

He naupang hian a nu a la hmu lo; thlalakah chuan a hmu tawh a, chu thlalak lah chu hun rei tawh taka mi a nih avangin a nu hmel tur a mitthla thiam lo. A la hmu lo bawk a, a nu hi a ngaih pawh a ngai lem lo!

Thingtlang khaw pakhat, Aizawl bul lawkah pawh hmeichhe naupang pakhat chu a pain a pawngsual thin tih tihpalh thil thuin hriatchhuah a ni.

He naupang hi kum 3-mi a nih laiin a nu leh pa an inthen a, a pain a enkawl a ni. An thenawm pain a duat hle a, kawr te, chithlum te a leisak thin. Mahse, thil a leisak mai ni lovin a lo khuaikhem thin hi a lo ni a, kum 6-mi a nih lai atangin chutiang chuan a lo khawsak pui thin!

An inmanchhuak ta; an khaw MHIP hruaitute hmalaknain he thil hi hriatchhuah a ni. MHIP hruaitute chuan "nangmah khawih tawhtu zawng zawng sawi rawh" an ti a, a'n sawi ta a, a pa pawh a lo tel! A pa chuan a ruih chang leh ruih loh chang te'n a lo mutpui thin a ni! An khawmite chu a pa thikthu a chhiat em avangin an ngaih a lo tha lo sa reng a ni.

Social Welfare deptt. hnuaiah Child Welfare Committee din a ni a, naupangte humhim tura din a ni.

Child Welfare Committee hian 2005 September atanga kumin October thlengin mipat hmeichhiatna lama naupang khuaikhem case 127 report an dawng tawh.

Case 127 zinga 107 chu puitlingin naupang a khuaikhem (sexually abuse) thu a ni a, naupang leh naupang inkara mi case 18 awmin, 'same sex' kara mi case 2 a awm. Physical abuse case 22 an dawng tawh a, child labour case 9 an dawng tawh bawk.

Child Welfare Committee hruaitute hnen atanga thu dawn dan chuan, sexually abuse-ah hian a tam zawk fe chu chhungkaw kara mi, an lamhnaite'na naupang an khuaikhemna a ni.

"Pain a fa a khawih te, pahrawn te, pate leh putea te, chhungkuaa an chenpuite'na an khawih te a tam ber. Thenawm hnaia mite'n an khuaikhem pawh a awm a, hmelhriat lohte'n an khawih hi chu a tam lutuk lo," Child Welfare Committee hruaitu pakhat chuan a ti.

"Naupangte chunga hleilenna hi kan society-ah a nasa ta khawp mai. Keini'na kan dawn chin hi chu a sawichhuak ngam leh sawichhuak lo thei lote an ni mai a, sawichhuak ngam lo, inthup a tam ang tih a rinawm," a ti bawk.

Pawisawi lote tuarna chu
Mama chu kum 7 mi a ni a, pawl 4 zirlai a ni. A nu chu Mama a hrinna lamah a thi a, a pa erawh hriat a ni lo hrim hrim.

Nu leh pa nei lo a ni bawk a, a pian hlimah hunchham enkawlna hmunah an dahlut nghal a, vawiin thlengin chu hmunah chuan a la awm. Chhungkaw nun a la tem ngai lo!

A awmna 'home' atang chuan sikul a kai ve a, lehkha a thiamthei fu mai. Computer phei chu a man hle a, kum 7 mi lek mah ni se a kum phu lohvin computer a thiam, mi pawhin mak an ti thin. Computer engineer nih a tum a, nih pawh a ni thei tak tak mai ang! Mahse, he khawvelah hian 'kan chhungte' tia sawi tur a nei lo!

Sanga hi chuan 'kan chhungte' tia sawi tur a nei a, Mama ai chuan a chang sang deuh. Mahse, 'kan chhungte' tia sawi tur nei mah se 'an chhungte' chuan 'kan chhungte' an ti ve lem lo.

Sanga hi kum 12 mi a ni a, nu leh pa inthen kara mi a ni. A nu leh pa te chuan an inthen hnuah midang an nei leh ve ve a, rei lo teah "mi chuang ui chuang" a lo ni ta. A nu leh pa kalsanin home-ah a insuan ta ringawt mai, duhthlan tur dang a nei lo. An sikul headmaster-in a khawngaih a, home-ah hian a dah a ni.

Sanga hian an in a ngai thei em em a, a thlakhlelh ber pawh mahni in-a awm a ni. Mahse, mahni inah pawh a leng ve si lo. Home-ah chuan khawhar takin a awm a, a zakzum hle, 'inferiority complex' a ngah a ni ngei ang.

Vanneih thlak takin he nau hian lehkha a zir thei phian mai a, a tum pawh a sang viau, IFS officer nih a tum. Pathian zarah a dam ang a, a tumah a la hlawhtling ngei ang.

Hmeichhe naupang hmeltha tak, mahse, a dang a awk avanga tawng hlei thei si lo kha! Muani a nia, kum 7 mi a ni. A nu leh pa an la dam a, mahse, hnuchham enkawlna inah a awm!

A nu leh pa te hi an inthen a, a nu hnenah a khawsa thin. Mahse, a nuin pasal dang a nei a, chuta tang chuan a dinhmun a buai ta. A nu pasal chuan a pawm thei lo a, chu hmeichhe naupang chuan harsatna nasa tak a hmachhawn ta a ni. A harsatna chu thenawmte pawhina an hriat khawpa nasa a ni a, a tawpah phei chuan thenawmte tih ngaihna hre lo chuan home-a a awm theih nan hma an la ta tawp mai. An khawngaih a, mahse, home-a dah mai loh chu tih ngaihna an hre lo.

A pa (a pa tak) khan a ngaihsak ngai lo a, a pa tharin a duh si lo. Nu leh pa nei mah se hnuchham enkawlna inah a tlulut ta tawp mai a ni!

Mizorama hnuchhamte enkawlna tura din home hrang hrangah hian mak tak maiin nu leh pa nei naupang engemaw zat an awm a, nu emaw pa emaw nei engemaw zat an awm bawk! Nu leh pa nei lo aiin chutiang chu an tam zawk!

January ni 16, 2008 atanga March ni 3, 2008 thleng khan Human Rights and Law Network: Mizoram te chuan Mizoram home hrang hranga naupangte dinhmun an zirchiang a, home- naupang zingah nu leh pa nei lo aiin nu leh pa nei leh nu emaw pa emaw nei an tam zawk tih an hmuchhuak a ni. Mizoramah hian mamawh loh naupang an tam tihna a ni thei ang a, seilenna tlak loh chhungkua a tam tihna a ni thei bawk ang.

Human Rights and Law Network: Mizoram te hian an thil hmuhchhuahte hi a bu-in an khawrpum a, rei lo teah tlangzarh a ni ang. He lehkhabu hi social welfare deptt. lamin an 'publish' dawn a ni.

Chu lehkhabu - "Home Truths (Children in Residential Institutions in Mizoram)" tiha a lan dan chuan Mizoram home hrang hranga naupang 47.2% chu nu leh pa la nei an ni a, 42.6% chu nu emaw pa emaw la nei an ni. Nu leh pa nei tawh lo chu 10.1% an ni a, an tlem zawk daih a nih chu.

Human Rights and Law Network: Mizoram te hian social welfare deptt. hnuaia inziaklut home 27-a naupangte dinhmun an zir a, naupangte dinhmun zirtute chuan: "Mizoram naupangte dinhmun hi a tha lo a, an him lo. Nu leh pate pawhin an duh loh, an ngaihsak miah loh te an tam a, home-ah hnuchham aia nu leh pa nei an tam zawk hian naupang tam tak chu an chhungte'n an duh lo tih a lantir a ni," tiin an sawi.

Home 27-a naupang 47.08% chu nu leh pa inthen kara mi an ni a, 15.65% chu nu leh pate'n an hnawlte an ni. Hetiang mite hi nu leh pate'n an ngaihsak loh, an awm awma awm tura an kalsante an ni. Home pakhatah phei chuan tu chhungte nge tih pawh hriat loh naupang 15 an awm!

"Home hi a lun em em a, naupang lak sen loh an hmu vek ti ila kan sawi sual lo ang. Child Welfare Committee phalna lovin home te hian naupang an la thei lo a, chuvang chuan Child Welfare Committee-ah hian home-a naupang dahluh dilna a lut nasa em em a ni. Nu leh pa nei reng, mahse, an chhungte'n home-a dahbo daih an duh an tam a, naupangte hian chhungkaw neih hi an chanvo a ni a, mahse, chhungkaw tam takin chu chanvo chu an chhuhsak a ni," tiin Human Rights and Law Network: Mizoram director Vanramchhuangi (Ruatfela Nu) chuan a sawi.

"Naupangte hi mihring chanve ang lekah kan ngai a, nupa inthen vang emaw, chhungkaw harsat vang emawa home-a naupang dah kan tum zel hi ransa ang lekah naupang te kan ngai tihna a ni," tia sawiin, "Naupangte chu mihring famkim an ni a, chhungkaw neih pawh an right a ni a, chhungkua an nei tur a ni," a ti a, ran ang maia home-a daha, duh hun huna lakchhuah tur an nih loh thu a sawi bawk.

Naupang chunga hleilenna leh Mizoram
India ram naupangte chu an rethei hle a, tihduhdahna an tawk fo thin. India ram state hrang hrang zingah Mizoram naupangte chu chutiang tihduhdahna (abuse) tuar nasa berte zinga mi niin, a sang ber Assam dawttu a ni.

Mizoram naupang 84.64% vel chu kut tuar (physically abuse) tawh an ni a, a sang ber chu Assam niin, naupang 84.65%-in physically abuse an tuar tawh a ni.

Physical abuse-ah hian kum 15-18 Mizoram chu a sang ber a, hetiang rual 35.43% vel hian physical abuse lo tawk tawhin Assam-in a dawt. Kum 13-14-ah hian Uttar Pradesh chu a sang ber a 37.42% velin physical abuse an tawk a, Mizoramah chuan 30.74% velin an tawk.

Mipa naupangin physical abuse hi hmeichhe naupang aiin an tawk nasa zawk a, mahse, a inthlau lo. Mipa naupang 86.14% velin an tawk a, hmeichhe naupangah chuan 83.01% vel an ni.

Mizorama mipa naupang te'n physical abuse an tawh tam ber chu an chhungte atangin a ni a; 61.97% velin an chhungte atangin physical abuse hi an tawk a ni. Chhungte atanga physical abuse tawk mipa naupang hi Goa-ah an tam ber a, 80% vel niin Andhra Pradesh (72.73%), Delhi (64.29%), Mizoram (61.97%) leh Madhya Pradesh (61.54%) te'n an dawt a ni.

Hmeichhe naupangah chuan chhungte atanga physical abuse tawk hi 38.03% vel an ni.

Chhungte atanga physical abuse tawkah hian naupang deuh tak tak kum 5-12 an tam ber a, 46.48% vel an ni a, kum 13-14-ah 11.27% vel niin kum 15-18-ah 42.25% vel an ni.

Naupang hian anmahni enkawltute atangin abuse an tawk nasa hle bawk. Naupang dan kalha khawsate enkawltu police te leh naupang khawngaihthlakte awmna – home etc enkawltute atanga physical abuse tawk naupang chu 70% vel an ni a. Uttar Pradesh (92.04%) leh Assam-ah (90.20%) te chu a sang zual an ni.

Hmeichhiate hian naupang enkawltute atangin duat an hlawh deuh ni ngei tur a ni. Naupang enkawltute atanga physical abuse an tawh 85.71% vel chu mipa naupang a nih laiin hmeichhe naupang tawh chu 14.29% vel chauh a ni thung. Mipa naupang hetianga physical abuse tawk hi India ram pumah an tam ber nghe nghe a ni.

Enkawltu mumal nei lo street children tia an sawite hian physical abuse an tawk nasa a, Mizoramah hian hetiang naupang kum 5-12 zinga 91.67% vel chuan physical abuse an tawk a ni. Goa (79.41%), Assam (78.77%), Uttar Pradesh (78.13%), Bihar (77.85%) leh Gujarat (70.80%) te hi a sanna dang an ni a. Mahse, Mizoram bik zirchianna chu innghahna tlak lutuka ngaih a ni chiah lo.

Naupang khuaikhem chungchangah hian hmeichhia aiin mipain khuaikhem an tawk nasa zawk. Naupang khuaikhen sexual abuse hian mipathmeichhiatna thila naupang khawih (sexual assault), zahmawh naupang khal tir, naupang zahmawhen sak emaw naupang zahmawh en tir emaw leh saruaka an thlalakte a huam a ni. Mipa naupang 59.96% velin an tawh laiin hmeichhe naupangah chuan 40.04% vel an ni.

Khuaikhem chungchangah hian a nasa bika ngaih – severe forms of sexual abuse tia sawi zirchiangtute hian an nei a. Hetiangah hian Mizoram chu nasa lutuk lo tia ngaih theih a ni ang, 16.20% velin servere forms of sexual abuse hi an lo tawk tawh a ni. Assam-ah chuan hei 57.27% vel niin a sang ber a, Delhi (41%), Andhra Pradesh (33.87%) leh Bihar (33.27%) te chu a sang dang an ni. Goa a hniam ber a, 2.38% vel niin Uttar Pradesh (5.98%) leh Gujarat (7.34%) te'n an dawt.

Mizoram mipa naupangah hian severe forms of sexual abuse tawk chu 20.28% vel an ni a, hmeichhe naupangah chuan 11.76% vel an ni.

Andhra Pradesh-ah hian mipa naupang aiin hmeichhe naupang ten severe forms of sexual abuse an tawk nasa zawk a, hmeichhe naupang hetiang tawk nasa zawkah chuan hmeichhia te'n an tawh nasat berna niin hmeichhe naupang te nawhchi zawrh luih tir vang niin zirchiangtute chuan an ngai. Severe forms of sexual abuse tawk hrim hrimah chuan Assam-ah hian hmeichhe naupang 51.19% velin an tawk a, mahse, mipa naupang bikah pawh 62.55% vel a la ni tho a ni.

Zirchiangtute hian other forms of sexual abuse tih an nei bawk a. Hetiang hi Mizoram naupang 54.75% velin an lo tawk tawh a ni. Severe forms of sexual abuse tia a sawite nen hian a danglam hran lova, a nasa lo deuh zawk chauh a ni.

Mizoramah hian hetiang lo tawk tawh 63.45% vel mipa naupang an awm a, hmeichhe naupang 45.32% vel an awm bawk.

Assam bawk chu hetiangah hian a sang ber an ni a, 86.26%% vel niin Andhra Pradesh (72.83%), Delhi (72.26%) leh Bihar (67.64%) te chu a sang dang an ni. A hniam ber Rajasthan 29.36% vel a ni thung.

Sexual assault hian mipathmeichhiatna hmanpui emaw oral sex emawa kawk a, Mizoram chu a zia pawl tak a ni; 1.37% velin hetiang hi an tawk chauh. Delhi (14.77%), Andhra Pradesh (13.67 %), Assam (11.78%) leh Bihar (10.34%) te an sang thung. Mizoramah chuan sexual assault tawk zingah hian kum 13-14 an tam ber a 69.23% vel an ni a, 30.77% kum 5-12 an ni.

Naupang zahmawh leh zahmawh rawngkai taksa (private part) khawih tir hi Mizoramah 10% chuang hret an awm a. Assam (43%), Delhi (26.61%) leh Bihar (23.74%) te hi a sanna an ni. Goa (1.61%), Uttar Pradesh (2.53%) leh Gujarat (3.95%) ahte an hniam thung.

Saruaka thlalak sakah hian Mizoram naupangte chu an him angreng hle a, 1.28% vel chauhin hetiang hi an tawk a ni. Andhra Pradesh, Assam, Bihar leh Delhi te a sanna an ni.

Heng kan sawi taka tel lo sexual abuse-a ngaih theih dang a la awm a. Fawhluih (forceful kissing), zinna mipathmeichhiatna thila inkhawih (sexual advances during travel situation), puipunna hmuna mipathmeichhiatna thila inkhawih (exual advances during marriage situation), naupang private part enluih tir leh naupang zahmawh milem (pornograpy) entir te pawh zirchiangtute chuan an zir a ni.

Naupang an rilru tihnual thei tur zawnga tih – emotional abuse-ah hian Mizoram naupangte chu a zia awm pawl tak an ni a; 33.23% velin emotional abuse hi an tawk a ni. Rajasthan (32.36%) zia awm berin Mizoram leh Goa (33.66%) te'n an dawt a ni.

Zirchianna hi Ministry of Women and Child Development Government of India bultuma Study onChild Abuse: India 2007-in a hmuhchhuah dan a ni. Prayas, Save the Child leh Unicef te tangkawpin an zirchianna hi an nei a ni.

Home 27-a naupangte dinhmun
Nu leh pa nei 47.2%
Nu emaw pa emaw nei 42.6%
Nu leh pa nei lo 10.1%
Nu leh pa inthen kara mi 47.8%
Nu leh pa te hnawl hnu 15.65%
Zu ngawlvei nu leh pa nei 33.91%

Related Posts :