Zofate dikna chanvo hum turin Zo Inpui

¢ Vanlalremruata Tonson

German mithiamte chuan Himalaya tlang bulthut leh Arakan bawr velahte hian hnam lianpui mai, mahse, anmahni pawh hnam khat an nih la inhre lo an awm niin an hria a, research pawh an bei nia a hriat thin thu Mizoram Assembly speaker R Romawia chuan August 9, International Day of the World's Indigegnous Peoples-a Zo Inpui hawnnaah Zo Inpui Inkaihhruaina tlangzarhin a sawi a; research-ah hian eng nge an hmuhchhuah tak erawh a sawi lo.

August ni 9, 2010-ah Vanapa Hall-ah ZORO huaihawtin International Day of the World's Indigenous hman a ni a, he hunah hian khuallian- Mizoram larsap-in Zo Inpui a hawng a ni. Speaker R Romawia chu khualzahawm a ni.

Mizoram Assembly speaker-in a sawi huamchhunga cheng Zofate hi khawvel ram pathumah then darh an ni a, chu ram pathum chhungah pawh chuan thendarh leh chhawn niin, hnam hming hrang hrang vuah an ni a, mahse, khawvel politics an dai ve chinah chuan inpumkhatna thu hi an tlangaupui ber pakhat a ni thin.

Khawvel ngaihtuah chuan hnam hnufual tih tur an ni a, an tlangaupui thin chu a taka thleng zo an la awm lo reng a ni. Mahse, an vanneiha siamin khawvel ram hrang hrang inzawmkhawmna- UNO chuan a ram leilung neitute humhim an nih a, hnam an nih anga an dikna chanvo an chan theihna turin thupuan a siam ta hlauh a, chu chu UNDRIP (UN Declaration on the Rights of Indigenous Peoples) hi a ni.

Mi tam takin hnam an nihnaa an duhthusamte chu a tak ram chang tur awm lo leh beisei tur pawh lova an ngaih hnuah leh hnam lian leh changkang, chak zawk bawkte kara inzepa khawsak zai an rel hnuah UN thupuan chuan beidawng ve phal lo mi tlemte te chu beiseina pe tharin Zo Inpui din zai an rel ta a ni.

Chu Zo Inpui chu hnam awmzia pawh an hriat hma leh mawlmang taka an awm laia thendarh an lo nih tawhna thiata khawvel hnam dangte anga hnama dingchhuak tura an dikna chanvo (rights) a taka an chan ve theih nana kawng sialtu ni turin an beisei a ni.

Khawvel hnam tin hi an hun kal tawh han thlir chuan mawlmang tak vek leh hnam an nih pawh inhre lo an ni ve vek a, hun a lo kal zel a, hnam khat an nihte an inhria a, ram te a lo piang a, a zirmite chuan 'state formation' te an ti a, an ngai pawimawh hle.

Zo hnam thendarha a awm ngawt mai tur ngaingam lotu, Zo Inpui din nana sulsutu Zo Re-unification Organisation (ZORO) president R Thangmawia chuan Zofate hi British-hoin an awp hma kha chuan tu hnuaiah mah an awm lo tih Zo Inpui hawnnaah hian a sawi a; British pawhin an awp hnam lian zawkte chhungah khung ve mai lovin foreign department hnuaiah a dah kher niin a sawi. Mahse, heng a ram awpte inrelbawlnaah pawh foreign department hnuaiah a dah na a, Zofate dikna chanvo chu British-in an awp atang khan tihchhiat a ni ta a ni, a ti.

Hemi chungchang a sawifiahnaah R Thangmawia chuan Zofate luah ram hi British chuan 'Chin-Lushai Country' ti tein an sawi thin a, anni (ZORO) erawh chuan Zoram an ti. Mahse, chu chu Bangladesh, Burma leh India-ahte thendarh a ni ta a ni, a ti.

Zoram chu thendarh ni mah se British-ho an haw dawn laia ram a insingsak khan Zofate zinga political party hmasa ber chuan Zoram vawnhim a tul thu leh an duh thu an lo auchhuahpui tawh a; MNF-in indepedence puang hiala movement an neih pawh khan chu thu tho chu aupuiin Greater Mizoram tite pawhin an sawi thin a, Mizorama political party zawng zawng pawhin duhthusam leh au hlaah an lo nei tawh niin a sawi.

R Thangmawia chuan Mizoram Pradesh Congress Committee (MPCC) pawhin Zofate insuihkhawm chungchang hi campaign hlaa an neih Indian National Congress hian a lo phal tawh niin a sawi: 1972 khan Indian National Congress chuan Calcutta (Kolkata)-ah plenary session an nei a, chutah chuan J Lalsangzuala leh Hrangchhuana nen, ani (R Thangmawia), khatih laia Congress secretary pakhat chu an tel ve a, Indian National Congress president Indira Gandhi hnenah Zofate insuihkhawm chungchang an sawi a, ani chuan campaign auhlaah pawh an neih a lo remti niin a sawi a ni.

Political party dang Peoples Conference (PC) pawhin 1988 khan Zofate insuihkhawm chu aupuiin Champhaiah khawvel ram hrang hranga awm Zofate huapin khawmpui an buatsaih a, hma la zui turin ZORO chu din a ni ta a; chak zawk leh mumal zawka an kal theihna turin political party - PC atangin an inla hrang zui ta niin R Thangmawia chuan a sawi bawk.

ZORO president chuan Zoram tana beiseina thar an neih takna ber UNDRIP lo chhuah dan leh a thil tumte a sawifiah a; hemi a sawifiahnaah hian khawvel a awm zel theihna turin indigenous peoples (tualchhuak hnamte) hi humhalh an ngai tih UNO-in a hriat avanga UNDRIP hi lo chhuak a nih tak dante a sawi a ni.

Hnam lian leh changkang zawkten tualchhuak hnamte awp a, duh duha an ram neka an tihchhiatsak hian ecology a tibuai a, boruak chhia lo hip tur thing leh mau pawh an tlem telh telh a, carbondioxide a pun avangin khawvel chu kum 100 chung lek pawha inup hlum thei mai tur dinhmunah a ding a; chuvangin UNO chuan tualchhuak hnamte chu, an ram leh a leilung hausaknate humhalha an remtihna leh mamawh ang chauha lakchhuah theiha siam tul a ti ta niin Thangmawia chuan a sawi.

Zo Inpui hawngtu, Mizoram governor Lt Gen MM Lakhera chuan a thusawinaah politics-a inphuarkhawmna aiin hnam nihna leh nunzia lam atanga inphuarkhawmna chu a nghetin a rin tlak zawk tih a sawi. Zo Inpui hi a sawifiahnaah chuan- socio-culture centre and traditional institution tih a ni a, hei hi Zofate phuarkhawmtu leh an nihna vawnghimtu a nih ngei a beisei thu governor chuan a sawi.

Tualchhuak hnamte hian khawvel hmasawnna kawng an zawh rualin anmahni hnam nun leh rohlu vawnhim chungchangah harsatna an tawk tih governor chuan a sawi a, damkhawchhuak tura an lo beihnaah hian finna leh hriatna thuk tak tualchhuak hnamte hian an lo chharchhuak a, chung chuan khawvel pawh a hip hle niin a sawi. Ramhmul damdawi leh thil dang danga tualchhuak hnamte'n finna leh hriatna an lo chharchhuah tawhte chu vawnhim leh tihhmasawn tul a tih thu a sawi bawk. An hriatna leh finna inhlanchhawn leh inkhawlkhawm avang hian thil hriat theihna ril tak (natural instinct) an nei tih Governor chuan a sawi a, "Damkhawchhuah tuma an beihnaah tribal-ho hian finna tam tak an chhar. Nature nen nghet taka an inkungkaih avangin nature thuruk an hre thei a, chu chuan tunlai khawvel a hip hle a ni," a ti nghe nghe.

Hemi chungchanga a sawinaah Governor chuan tsunami rapthlak takin a nuai zinga tel Andaman-a tualchhuak hnam pakhat Onge chu an him pial a; chu chu he thliarkar (Andaman and Nicobar Islands) Governor mawhphurhna pek tel a nih lai khan a mit ngeiin a hmu nghe nghe niin a sawi. Onge hnam hian tuifinriat che vel atangin thil rapthlak tak lo thleng tur hi an lo hre lawk thei niin a sawi.

"A pawimawh hmasa chu he hriatna buhzem ngaihlut leh chumi atana indigenous people-te tana policy leh programme duan a ni," larsap chuan a ti.

Governor chuan UNDRIP chungchang a sawi bawk. Khawvel ram hrang hrangah tualchhuak hnam zawkte hi hmuhsit leh endawng (second rate citizen) an lo ni thin a, chutiangah hnamte chu zahawm pangngai taka an lo awm ve theih nan UN chuan thupuan a nei ta a nih thu a sawi a; chu thupuanah chuan a pawimawh zual leh thil dang zawng zawng innghahna – tualchhuak hnamte hian mahni ro inrela inawm turin leh chumi atana an mamawh sum leh pai pawh inngaihtuaha zawng turin dikna chanvo an nei a; thendarha awmte hian hnam thil leh politics thilah intlawhpawh thil tiho turin dikna chanvo an nei a; mahse, UNDRIP-a thu awmte hi independent leh thuneihna tawp neia awm ramte thendarhna turin tanchhanah hman theih a ni lo, tihte a awm thu a sawi.

Zo Inpui hi a tak takin hlawhtling ngei se a duh thu Governor chuan a sawi a; hemi chungchang a sawinaah hian India-in tribal-te tana dan tha tak a neih Sixth Schedule chu a hlawhchham thu leh India ram dintute tum leh lo thlir lawk ang a nih loh thu a sawi. Tribal-te tana dan tha tak duan hlawhchham ta chungchangah hian Governor chuan tumah puh leh dem tur bik an awm lo, a ti a, "Kan zavaiin kan dik lo a ni," a ti.

Zo Inpuiah hian bial hrang hrang pasarih: Zoram Lai, Zopram Khawchhak, Zoram Khawthlang, Zoram Chhim, Zoram Chhimchhak, Zoram Hmar leh Zoram Hmarchhak te atangin palai awm tura ruahman a ni a; a hawnnaah hian heng bial hrang hrang aiawhte pawhin thu an sawi a, rokhawlhna awm thut avanga kal thei ta lo Zoram Hmar pawhin Zo Inpui hawn lawmna thuchah an thawn a, chhiar chhuah a ni a, political party leh NGO hrang hrang aiawhten an sawi bawk.

Thusawitute hian Zo hnahthlak insuihkhawm a tul thu leh chumiin Zofate lung a len thu an sawi ber a; Zoram Khawchhak aiawha thusawitu pakhat Rozathang chuan mi thenkhatin – Burma rambuai avanga Mizorama tla thlate sualna leh dan bawhchhiatna chi hrang hranga an inhnamhnawih tam lutuk vanga insuihkhawma rorelna pakhat hnuaia Zofate awm pawh an phur loh phah nia sawi thin chungchang a chhanna chuan mipui lawm a hlawh hle.

"Khawchhak aiawha sual an ni lo a, anmahni suahsual vang a ni," tiin hrem mai tur nia an ngaih thu leh an tan loh thu Rozathang chuan a sawi a, insuihkhawm lehna kawng daltu ni thamah a ngaih loh thu a sawi bawk.

Political party aiawha thusawitu K Liantlinga chuan Zo Inpui lo dingah hian beiseina sang tak a neih thu leh political party tumah Zofate rorelna pakhat hnuaia an awmna tura ralbang tur bik an awm loh thu a sawi a; Mizo hnam bil political party ni ve lo Indian National Congress leh BJP te pawhin an theihna mualah chuan tan lo la ve ngei tura a ngaih thu a sawi.

MNF leh India sorkarin inremna an ziak khan Zofate ai a awh zo lo, a ti a; Mizoram pelah hian Zofate tam zawk an awm a, tunah phei chuan mihring maktaduai 7 vel an nih tawh thu Liantlinga chuan a sawi.

Zofate insuihkhawmna leh mahni ro inrel chungchangah K Liantlinga chuan MNF leh India ten inremna thuthlung an sign tuk July 1, 1986 khan MNF-a hruaitu pawimawh tak ni thin C Vanlalliana hnenah a leng a, MNF lo haw tur chungchanga a ngaihdan a zawt tih sawiin, "A, Pu Denga chuan chawlhhahdam a duh tawh a nih chu," tiin kum 40 chhunga thalaiten hma an lak ngei a rin thuin a lo chhang a ni, a ti.

Insuihkhawm chu Zofate right tumah tihbuai theih loh a ni, a ti bawk. Hemi chungchangah hian Australia library pakhata a thil hmuh sawin Liantlinga chuan bang lehlamah Australia mingo ten indepedent kum 200 tlinna hlim taka lawm lai thlalak an lo tar a, a lehlamah a tualchhuak hnam ten kum 200 awp beha an awm duh lohna an lantir lai thlalak an lo tar bawk a; thil awmzia a zawhchian chuan an right a nih ve ve thuin library thuneitute chuan an lo chhang tih a sawi a; Zofate chu sal tang mek nia a ngaih thu a sawi bawk.

MPC aiawha thusawi Dr Kenneth Chawngliana chuan Zofate insuihkhawm lehna chu Mizoram political party ding tawh zawng zawngin an duh leh tlangaupui vek a nih thu a sawi a; "Duhthlan theihna kan neih hi kan lo excercise reng reng a ni," tiin Zofate chu an awmna ramah theuh hian, "Mikhual ni hian kan inhre tlat," a ti.

MNF leh India sorkarin 1986-a inremna an siam dawn pawh khan India sorkar hian nekchepa a nawrbeh tlat avangin Zofate chu India ram chhunga awmte pawh thendarhin an la awm ta reng niin a sawi bawk.

"Mizo aspiration hi hlawhtlintir a ni ngai lo," a ti.

Mizo duhthusam hre rengin PC chuan hma an la a, ZORO te pawh a lo ding ta tih Dr Kenneth Chawngliana chuan a sawi a; Zo Re-unification Volunteer director Lalsanga Sailo leh Roenga te hian Zofate rorelna pakhat hnuaia awm duhna avangin nunna an lo chan phah niin a sawi.

Zofate insuihkhawm lehna tura hma la a, Champhaia Zo hnahthlak hnam hrang hrang, ram hrang hranga awmte intawhkhawmna an buatsaih tum khan "We are waves of one sea, leaves of one tree, flowers of one garden," an lo ti tih sawiin Kenneth chuan insuihkhawm lehna hi Zofate hian "never die policy"-a kan neih a ngai a ti a; tuna ZoRO-a hmalatu te hian thalaite ppawh chho phur se a duh thu a sawi.

Thusawitu dang Mizo Students Union (MSU) president C Lalrosanga chuan Zofate insuihkhawm leh hi an ngaih pawimawh thu sawiin hemi kawngah a thalaite zawkten upa lamte an um pha lo lutuk chu pawi a tih thu a sawi a, Mizo Zirlai Pawl (MZP) aiawha thusawitu James Thanghmingmawia pawhin Zofate insuihkhawm lehna chu an danah pawh chuang leh chumi atana hma an lo lak dan te a sawi a; insuihkhawm lehna tur chuan tu sorkar mitmei mah an ven loh tur thu a sawi.

Zo Inpui din tura hmalatu ZORO hi Peoples Conference leh Zomi National Congress te bultuma First World Zomi Convention neih bawhzuinaa lo piang a ni a; khawmpui hmasa ber chu March ni 5, 1988 khan Chawnchhim-Champhaiah neih a ni.

A tirah chuan PC party behchhanin a kal a, mahse, chak zawka hma an lak theihna tur leh Mizoram politics-a inhnamhnawih loha an kal theihna turin a hnu lamah an kal hrang hrang a; UNO-a tualchhuak hnam buaipuitute zuk dawr pawpin hetiang ho inkhawmpuiah pawh vawi 17 zu kalin Zofate dinhmun hi an lo sawi thin a ni.

UNO-in August 9, 2007-a UNDRIP a pawm hnuah hian he thupuan chhawr theih nana thil pawimawh tak socio-cultural centre and traditional institution din turin hma an la zui a, August 9, 2010-ah an hawng ta a ni.

Zo Inpui hi Zofa zawng zawng, India, Burma leh Bangladesh-a thendarhte aiawha rorelna inpui tur a ni a, a hmun tur hi ngaihtuah mek a ni. Chu rorelna hmunah chuan Hnam Inkhawmpui (National Assembly) chu rorelna sang ber a ni ang a, a hnuaiah Tlangbawih In leh Zawlbuk a awm ang. Tlangbawih In chu Rajya Sabha ang hi a ni ang a, Zawlbuk chu Lok Sabha ang a ni ang.

India, Bangladesh leh Burma hnuaiahtea thendarh tak Zofate chenna ram zawng zawng hi hmun 7-ah then a ni a, chung bial hrang hrangte chuan Zo Inpui-ah hian aiawh tirin, an aiawhte'n ro an rel dawn a ni. Bial sarihte hian an duh chuan mahni bial bik rorelna, Zo In tia vuah an nei thei bawk ang.

Tripura atangin he hun hmang tur hian BK Hrangkhawl a rawn kal vang vang a, ani hi Indigenous Nationalist Party of Tripura mi leh sa, Tripura MLA a ni. Zofate insuihkhawmna tuipuitu a ni.

He hunah hian Mizoram bakah Tripura, Manipur, Bangladesh, Burma leh India ram hmun hrang hrang atangin an kalkhawm a ni.

Minister S Hiato a tel bakah Mizoram sorkar hruaitu hlui- K Thangzuala, Lalthankunga, Hrangthanga Colney, Rualchhina, K Lianchia, Dr Kenneth Chawngliana, C Lalrinsanga, Col Lalchungnunga Sailo, H Thangkima, C Vulluaia leh MP hlui Vanlalzawma te pawh an tel. Thingtlang atanga mahni sum senga he hun hmang tura kal tang tang, pitar leh putarte pawh an awm nual. Aizawl bishop Rev Stephen Rotluanga'n hunserh hmangin inkhawm a tan a, ZORO hruaitu L Malsawma Colney-in lawmthu a sawi zawhah Rev Lalramliana'n malsawm tawngtaiin inkhawm a tin a ni.

"Kan tum ber chu kan hnam nun ze mawi leh chanvo te, kum 2007-a UNO thupuan dungzuia chawisan leh neih zui zel a ni," tiin ZORO general secretary K Hawla Sailo chuan a sawi a, "Rorelna pakhat hnuaia awm hi kan hnam dikna leh chanvo a ni tiin kan sawi thin," tiin ZORO president R Thangmawia chuan a sawi.

Inkhawm kaihruaitu Dr H Lallungmuana, Lok Sabha MP hlui chuan, "Kan inpui, Zofate kan inhnangfakna tur..." tiin a sawi a, MLA K Liantlinga chuan, "Hei hian kan ram leh hnam kal zel dan tur thui tak a hril ka ring a ni," a ti.

Related Posts :