Kan Ram Hruaitute Leh World Cup

Mizoram chief minister Lal Thanhawla hi a vanglaia football khel thin a ni a, Mizoram Football Association hruaitu hlui a ni bawk. A minister-te pawh football tui tak an ni deuh vek a, Mizo MLA-te hi football tui tak, World Cup ngaihlutu an ni vek ti hialin a sawi theih ang.

Identity, culture leh thil hrang hrangah hmarchhak hi a dang a, infiamna ngaihsan zawngah pawh a dang hle tih chu tlang hriat a ni. India ram chu cricket ngaihsanna ram a ni a, hmarchhakah erawh cricket aiin football a lar fe zawk. Hmarchhak state hrang hrang hruaitute hi football ngaisang, World Cup football ngaisangtu deuh vek an ni a, chu'ng state hrang hrang zingah chuan Mizoram hruaitute hi a tuipui bertu an ni hial mai thei.

The Telegraph June ni 10 chhuakah hmarchhak mipui leh an hruaitute'n World Cup an nghahhlelh thu an ziak a, Mizoram chief minister Lal Thanhawla chu 'diehard soccer-fan' ti hialin an sawi.

Parliamentary secretary pakhat chuan chief minister hian a hman phawt chuan kumin World Cup inkhel hi hmaih a tum lo niin Zozam Weekly a hrilh.

"Kan puin hmaih a tum lo a, kei pawhin a rem phawt chuan en ka tum. Zanlai inkhel pawh keimahin ka en ngar ngar," chu parliamentary secretary chuan a ti.

"Mahse, zanlai inkhel hi en tawh loh tur em ni ang ka tia... zing thawh a har tlat. Hman tuk pawh dar 8 dawnah ka tho chheh mai a!" a ti bawk.

Home minister R Lalzirliana pawhin a hman phawt chuan World Cup inkhel a en ziah a, zanlai inkhel pawh a en thin. "Awmhmunah ka lo te that that thin," tiin Zozam Weekly a hrilh.

A tlangval laia football khel thin R Lalzirliana chuan, "|an bik ka nei lo a, a goal apiang hian ka lawm a, a chak lo lam ka khawngaih thin bawk," a ti a, "An han inkhelh dawn te hian awmhmunah ka lo phur thei khawp mai a," a ti bawk.

Health minister Lalrinliana Sailo chuan Argentina leh Brazil a tan a, England, France leh Mexico a tan bawk. Japan leh South Korea phei chu- "kan team ang maiin ka tan," a ti.

1983-ah khan Mizoram health minister Lalrinliana Sailo hi Hrangbana College football team captain a lo ni tawh a, "Ka thiam lo na a, ka inkhel nasa thin," tia sawiin, tun thlengin football a la tuipui tih a sawi.

Inkhel mai ni lovin TV-a a sawihona thlengin a en a, 'coach ni ta ila' tih rilru te hial puin a lo chhut ve thin.

"England hi tan an hahthlak thin a... England coach chu ni ila tuna an player-te hi tumah ka thlang lo ang. An lar hlawm lutuk a, an indipin ka hria, star player hlang hi an tha lo a ni mai thei," tiin Zozam Weekly a hrilh.

Parliamentary secretary Lalrinmawia Ralte pawhin a rem phawt chuan World Cup inkhel hi a en ziah a, zanlai inkhel pawh, enpui tur nei lo mah se amahin a en tho!

"Hmuhnawm ka ti a ni football hi chu," tiin a en chhan a sawi a, zing thawh tlai a hlauh avangin zanlai inkhel erawh a insum deuh mai thei. Ani hi Manchester United Supporters Association, Mizoram dinnaa a sulsutu a ni a, 2008-a he pawl din tuma mi pali an inhmuhkhawm tumah pawh a tel ngat.

"World cup chu en hmaih mai chi a ni lo. Ka en zel. German fan ka ni," tiin parliamentary secretary Lal Thanzara chuan Zozam Weekly a hrilh.

“Anni hi kan ram min rawn hre vetu an ni a. Kristianna lamah hian an chechhuak nasain midangte tana an inpeknate hi a ropui ka ti a. Kan Durtlang damdawi in an rawn chhawmdawlna ringawt pawh hi lo support vena tham a ni tawh alawm le,” tiin Germany a tan chhan a sawi.

"World cup hi chu ka en ve nasa khawp mai, tunhma atangin. Kei chu football atchilh thin kha ka ni a. Ka la buaipui reng mai," tiin parliamentary secretary KS Thanga pawhin a sawi.

"England hi ka tan a. Mahse, hei kan intan chak hlei thei lo a nih hi maw! Eng dang vang maha England hi tan ka ni lo. Kum 100 kal tawh lama an pi leh pute Kristianna kha ka tan chhan chu a ni. Kan ram min rawn zawngchhuaktute an nihna kha ka hre reng a ni ve mai. Tunah phei chuan an Kristian tha vak peih tawh lo lehnghal nen. In tan chak ni hmel hi kan hmu dawn lo a ang rum rum mai," tiin England a tan chhan a sawi.

“Ka hman phawt chuan ka en,” tiin Chawngtinthanga, parliamentary secretary pawhin a sawi a, “World Cup nge nge hi chuan boruak hran hi a nei ve a ni,” tiin World Cup a ngaihhlut thu a sawi.

ZNP president, Aizawl West I bialtu Lalduhoma pawhin, "Ka hman phawt chuan ka en. |an bik ka nei lo a, amaherawhchu, a chak ngai hlir hi chak bik lo se ka ti," tiin Zozam Weekly a hrilh.

Football khelhnaa keruh titliak tawh, Lalduhoma chuan a tlangval laia football a khelh nasat thu a sawi a, "Kan inkhawm kawngah hian field kan kaltlang a. Tleirawl rual an lo inkhel ka hmuh te hian ka rilru hi a za leh tlat thin. Ka lama ball a rawn lirh phei te hian inkhawm thawmhnaw haa inchei ka nih theihnghilhin ka lo pet ve leh thin," a ti.

Aizawl South I bialtu K Liantlinga pawhin a hman phawt chuan World Cup inkhel a en ziah a, England a tan ber. Brazil leh Germany a tan hle bawk.

Sports minister Zodintluanga pawhin a hman phawt chuan World Cup hi a en ziah a, Brazil leh Argentina a tan ber. "An pahnihah hi chuan tan zawk ka nei lo, ka tan dan a inang chiah," a ti.

Mizoram hruaituteah khawchhak lam unaute an tla na khawp mai. Tunlaiin tleirawl leh nula leh tlangvalte Korean 'chhass'-ho lakah an luangliam a, anni chang an lo ni lo, ram hruaitute hlei hlei an lo luangliam nasa mai! Health minister Lalrinliana Sailo phei chuan, "Japan leh South Korea te phei hi chu kan team ang maiin ka tan. India nen inkhel ta se India aiin ka tan zawk ang," a ti hial.

"Kan khawchhak unaute hi ka tan a, amaherawhchu, North Korea chu ka tan lo. Tun tum World Cup-ah chauh lo pawh South Korea te, Japan te hi ka tan thin," tiin Lalduhoma chuan a sawi a, "Kan hmel inanna hi ka tan chhan chu a ni ang," a ti bawk.

World Cup-ah khawchhak unaute a hmuhin Mizo tlangvalin World Cup an khelh ve theih a rin phah thin a, "Kan kal fuh chuan kan tlangvalte'n World Cup an khelh ve hun hi a hla vak tawhin ka ring lo," a ti nghe nghe.

"Kan tiatpui, kan hmel anpui Korean leh Japanese te'n World Cup an khel ka hmuh hian kan tlangvalte tih ve atan ka lo awt thin," a ti a, a bial chhunga mi Luangmual FC chungchang sawiin, I-Leaque khelh ve tuma an inbuatsaih thu leh a phurpui thu a sawi nghe nghe.

"Kan sports minister hian thahnem a ngaiin ka hria a, ani kaihhruainain infiamna lamah hma kan sawn zel ka ring. Kan tlangvalte'n World Cup an khelh ve hun hi a nghahhlelhawm khawp mai," Duhoma chuan a ti.

Aizawl South I bialtu K Liantling pawhin khawchhak lam unaute a tan a, a tan mai ni lovin a rilru an tithar thin.

"Japan te, North Korea leh South Korea te kan hmu a, kan tiatpui leh kan anpuite'n World Cup an khelh theih chuan kan khel ve thei a ni tih a chiang. Chu chu mi zawng zawng hian hria se ka duh," a ti.

World Cup inkhel a en laiin Mizo tlangvalin an khelh ve hun tur a suangtuah rilru thin.

"Tha taka kan inenkawl chuan, kan tum tak tak chuan World Cup hi kan khel ngei ang. India team-ah pawh zaa 50 chu kan hauh thei em em ang. Football hi khawvelin min hriatna tur a ni a, football kan thiamzia khawvelin a hriat hunah chuan Mizo nih te hi kan chhuang ang a, kan ropui ang," a ti.

Home minister R Lalzirliana pawhin: "Korean te, Japanese te'n World Cup an khel thei a nih chuan keini pawhin kan khel thei ang. Amaherawhchu, insum te, thawhrim te a ngai a, kan tan tlan hle a ngai ang a," a ti.

“Kan tiatpui, kan anpuite pawh heti khawpa an chet theih chuan khawvelah Mizote kan lang ve thei a ni tih a chiang a ni,” tiin parliamentary secretary Lal Thanzara pawhin a sawi a, Korea leh Japan te world cup khel hian Mizo thalaiteah football tuina leh hmasawnna a thlen ngei a beisei thu a sawi bawk.

KS Thanga, parliamentary secretary chuan, "Kan khawchhak lam unaute hmel ka hmuh khan ka tan bon tawp! Kan team ang tluk hialah ka ngai," a ti. "Korean leh Japanese-ho khel ka hmuh khan kan thalaite min hriatchhuahtir a, ka phur lutuk. Physical-a kan tiatpui ve bawkte chet dan hian kan tan beiseina a tisang zual," a ti bawk.

"Football hi thluak game a ni a. Keini phei chu Pathian ringtu kan ni a. Pathianin thluak tha min pe a, khawvelah kan chuangchhuak thei ngei ang tih hi ka beiasei tlat a ni. Mizo tlangvalte World Cup-a hmuh hun hi ka nghakhlel a, ka mitthla nghal uai uai mai," a ti bawk.

“England ka tan viau mai a, khawchhak unaute ka tan em em bawk. An khel a hmuhnawm a, an huaisen a, an game khel kha en ila an ti tak em em a ni. An fitness a tha a, anmahni aia lian te khel tur an ni tih an hria a ni ang fitness-ah an khum a ni,” tiin Japan leh South Korea tantu Chawngtinthanga, parliamentary secretary chuan a sawi.

Chawngtinthanga chuan, “Sports hi a tawpah chuan character a ni. Skill te, talent te chu a ropui. Mahse a tawpah chuan character bawk a pawimawh thin. World Cup-ah pawh hian character nei tha an champion mai ang,” a ti.

Related Posts :