Wednesday, August 4, 2010

Chhuan Thar Run-ah Ziona leh a tu leh fate

Baktawng Tlangnuam-a in pakhat, ral khat atang pawha lang paw vo mai, RCC building lian zet mai hian mi hrang hrang a hip tawh thin a, sap ram atang te meuh pawhin a en turin an lo kal vang vang tawh thin.

Chu in hma lamah chuan CTR tih a inziak a, Chhuan Thar Run tihna a ni. Chu in danglamna chu a lenzia leh ropuizia te ni lovin a chhunga cheng an thahnem hi a ni.

Mi 158 an cheng a, puitling pawh 100 vel zet an ni. Chu'ng mite chu hmun hrang hrang atanga kalkhawm ni lovin, chhungkaw khata mi an ni a, chu chu a ni mi hrang hrang hip thintu chu.

Chu in-a pa ber chu Ziona a ni a, 'Lalpa Kohhran Thar, Lalram kawngpui zawhtute' kohhran hotupa a ni.
Ziona Nupui Hmasa Ber

Ziona hian nupui 38 a nei a, fa pawh 98 a nei. Hman ni lawk thleng khan an chhungkaw member hi 162 a ni thin a, mahse, in hrang chang ta te an awm avangin tunah chuan member 158 an ni.

2010 hi a nupui hmasa ber nena an inneih kum 50-na a ni a, ropui taka lawm an tum. Thuchiang erawh a la awm lo. A nupui hnuhnung ber chu 1998-a a neih a ni. A nupuite zinga fa nei hnem ber chuan fa 8 a nei a, pakhat nei te pawh an awm.

A nupuite hi pindan hrang hrangah an riak a, pindan pakhatah 4/5 zelin, a remchan dan danin an riak mai. Amah Ziona chuan pindan hran a nei a, chu pindanah chuan a riak thin. A riak mai a ni lo a, ina a awm chuan a pindanah hian a inkhung deuh chawt a ni ber. A piancham lawm ni-ah pawh, lawmna inkhawm vel a zawh chuan a pindanah hian a lut mai a, amah hmu duh chuan an pan mai.

A fate zinga nupui neite pawh pindan hranah an riak a, naupang chu a remchan dan ang angin an riakkhawm thin. A tute zingah nupui nei an awm nual a, anni pawh pindan hranah an riak thin.

He in hi a len bakah chhawng 5 emaw zet a ni a, chhawng khat an sa leh mek.

Choka leh sitting room inzawm, lian pem pawm zet mai an nei a, chu chu an awmkhawmna ber leh an kohhran zaikhawmna ber a ni.

An choka thuk te chu a lian hle a, an bungbel leh thleng vel pawh a tam tham hle; YMA bungrua emaw tih hial tham a ni.

An chaw vawi khat ei pawh a tam tham hle; vawi khatah buhfai Kg 30 vel an ei tlangpui a, Kg 35 ei chang te pawh an nei.

Chaw hi puitlingin dawhkanah an kil a, naupang chuan chhuatah an ei thin. Zing lamah chuan sikul naupangin tukthuan an ei hmasa thin. Naupang hi 60 vel an awm.

"Kan room-ah chuan khum 6 a awm a, unau vek kan nih avangin nuam kan ti," tiin Ziona tunu pakhat chuan Zozam Weekly a hrilh.

An inngeih lo lo niin Zozam Weekly-in a biakte chuan an sawi vek; "Naupang na na na chu han inhauh chang te chu an nei a, chutiang chu naupang dan ve reng a nia. Chutiang bak inhauh leh inngeih loh kan nei lo, kan hlim lutuk," tleirawl pakhat chuan a ti.

"Inngeih lo kan awm lo reng reng; eng nge inngeih taka kan awm chhan ka hre bik lo, Pathian vang a ni mai ang chu," a ti bawk.

Ziona tunu pakhat, pawl 11 zirlai chuan mi chhungkua a awt lo tih a sawi a, "Hetia kan awm duah duah hi a nuam ka ti, mi chhungkua hi ka awt lo," a ti.

"Pasal te pawh kan la nei ve ang a, pasal neih hunah pawh chhungkaw rual deuh nih ka chak," a ti bawk.

Ngaihzawng te an nei a, nulate pawhin inleng te an nei ve thin. Nulate chuan heti khawpa chhungkaw rual zinga inlengte nena inrim hi hrehawm an ti lo niin an sawi a, a buaithlakna pawh an hre lo niin an sawi hlawm.

Mizote chuan sorkar hna hi hna tha berah kan ngai a, eizawnna ngelnghet berah kan ngai. Ziona te chhungkua atanga teh chuan he ngaihdan hi a dik lo tiin a sawi theih ang. Mi 158 zingah hian sorkar hnathawk chu mi pali chiah! An kohhran sikul-ah chu'ng mi pahnihte chu zirtirtu an ni.

Sorkar hnathawk pahnih chauh awm mah se he in hmutute chuan an rethei lo tih an hre thei ang. He inah hian TV 13 zet a awm a, mobile phone phei chu eng zat nge awm tih sawi mai theih a ni lo!

Nula leh tlangval hi chuan kan nei deuh vek a, a-pu pawhin a nei a," tiin nula pakhat chuan a sawi a, a patehovin an nei tih pawh a sawi. Mahse, Ziona nupuite erawhin an nei lo.

Bual in leh inthiarna pindan te pawh a faiin a changtlung hle a, glaze tile nalh tak tak nena chei hnum hlarh a ni hlawm. An washing machine neih zat pawh han sawi mai harsa khawp a ni!

He mite chhungkua hian kuthnathawhin ei an zawng ber; loneih leh huan siam, furniture workshop leh ranvulh te chu an hnapui a ni a, furniture workshop ringawt pawh 4 an nei.

Pa berin a nupui fanaute thawh turin zing lamah a sawi a, "Nang i feh ang a, nangni'n hnathawkho in tur thingpui in lum ang a, nangni'n eirawng in bawl ang a..." tiin an hna tur a hrilh thin. Tin, a tu leh fate hian zing lamah an thawh tur an zawt thin bawk. An pawisa thawhchhuahte pawh pa ber hnenah hian an chhunglut a, ani'n a tul dan ang zelin a lo semchhuak leh thin.

Mi tam takin an hriat chak fo chu a nupuite inthik leh inthik loh chungchang hi a ni awm e. Zozam Weekly chuan a nupui zinga mi 10 vel a kawm a, an inthik lo mai ni lovin an inngeihin an inngaina em em zawk niin an sawi vek.

"Kan inthik lo a, kan inngaina em em zawk. Kan awm dan hi a nuam khawp mai," tiin a nupui pakhat- Tlangi, kum 56 mi chuan a sawi a, chutiang chu midangina an sawi dan pawh a ni.

Pa ber nupui hmasa ber, Zathiangi chu nu ber enin an en a, ani pawhin nu chan a chang thiam hle.

Zathiangi hi kum 70 mi a ni a, a pasal aiin kum 4-in a upa a ni.

"Kan karah inthikna a awm lo. Kan pa hi kohhran hruaitu a ni mai lo a, ni tin nun atana Pathian mi-ruat a ni. Tihian inhmangaih tlang takin kan khawsa," tiin Zathiangi chuan Zozam Weekly a hrilh.

'Thuthlung' an buaipui tirh, Hmawngkawn-a an awm laia Zathiangi leh Ziona te hi innei an ni a, "Inngaizawnga innei kan ni," Zathiangi chuan a ti.

Amaherawhchu, a tirah chuan hetia a pasalin nupui dang a nei hi a hrethiam lo niin a sawi. A tirah chuan a rilru a na a, mahse, a na rei lo niin a sawi a ni.

"Hetiangin nupui pakhat aia tam a nei dawn tih hi ka hre lawk lo a, a tirah chuan ka rilru pawh a na a, mahse, a na rei lo a," a ti.

A nupui pahnihna chu kum 7 vel an inneih hnu-ah a thi a, chumi nena chhiar chuan Ziona hian nupui 39 a nei tawh tihna a ni.

Zathiangi chuan a pasalin a nupui pahnihna a neihin a rilru a na hle a, a pathumna a neih erawhin a na vak tawh lo niin a sawi. A palina a neih phei chuan a na tawh miah lo niin a sawi a, "Midang an rawn awm zel a, a ziaawm telh telh a. Pathian lam atangin, ka duh angin midang pawhin an duh ve a ni tih ka hrethiam ta a..." a ti.
Ziona nupui 38 zinga mi pali

"Pathian ruat a ni a, Pathian thuthlunna a ni," tiin a pasalin nupui a ngah chhan a sawi.

"Lerh vang leh duh vang hrim hrim a ni lo. Amah beltute a nei a, a khawngaih vanga a neihte an ni," tiin an pawl hruaitu pakhat chuan hemi chungchang hi a sawi a, "Miharsa tak takte kan ni a, amah hi kan bel a, min lo nei ta a," tiin nupui 38 zinga pakhat chuan a lo sawi ve bawk.

He pawl hi a tirah chuan 'Khuangtuaha pawl' tia sawi an ni a, Khuangtuaha thih hnu-ah a nau Chana'n a kaihruai a, Chana thih hnu-ah Ziona hian a kaihruai leh a a ni.

Chana hian nupui 7 a nei a, 1997-ah a thi. Khuangtuaha kha chuan nupui pakhat a nei. Tuna Ziona pawlte zingah an puithiam Engthangpuia leh Ziona fapa upa ber Parliana te'n nupui pahnih an nei a, nupui pakhat aia tam nei midang an awm lo.

Kum sang lalram nghaktute an ni a, an ngaihdan chuan tun hun hi khawngaihna hun a ni a, khawngaihna hun a liam hnu-ah kum sang lalram a intan ang. Chu hunah chuan Lal Isua'n ro a rel ang a, Mizote chu a hnam thlan an nih avangin kum sang lamram-ah chuan an dinhmun a tha hle ang.

Chu kum sang lalram-ah chuan thih leh nat te a awm tawh dawn lo a, chu chuan an lung a tileng em em. Pathian hnam thlan Mizote chu dinhmun sang takah an awm dawn a, "Kum sang lalram-ah chuan khawvela kan hrehawmnate hi a awm tawh dawn lo a, Lal Isua hovin ro kan rel tawh dawn a ni," an ti. Mahse, chuta tan chuan intukluh ve a ngai tih chu an ngaihdan a ni.

'Mizo' an tih hian Mizoram Mizote chauh an sawina a ni lo, Burma leh Bangladesh leh India ram hmun danga Mizo zawng zawng an huam.

'Zo' hi an thupui a ni a, an ni tin nunah pawh Zo an uarzia hi hmuh tur a tam hle.

Trinity an ring a, Bible chu an kohhran dang ang bawkin an innghahna a ni. Hla erawh an nei hrang a, Mizo Kristian hla lar thluk ringin a thu dang an sa thin.

Baktawng Tlangnuam-ah hian in 350 vel an awm a, a lu nunga chhiarin mi 3000 vel an ni. He hmunah hian awmkhawm mah se hmun dangah pawh an awm thei tho a, tihluihna a awm lo. Aizawl leh hmun dangah pawh an an member an awm.

Kuthna an thawk nasa a, furniture leh bel lamah phei chuan an hmingthang hle. Hna an thawk nasa a, an khawchhung a fai hle bawk.

Politics lamah pawh tihluihna a awm lo, Mizorama political party hrang hrangte hian Baktawng Tlangnuam-ah hian unit an nei deuh vek.

'Zo' taka Pathian be chungin, rim taka hna thawk chungin kum sang lalram an nghak a, inngeih tak leh lungrual taka an khawsaho dial dial lai chu, rinna lama an kal dan pawm lo tan pawh, thil hmuhnawm a tling ngei ang.

Related Posts :



No comments:

Post a Comment