Mizoram chu zu awm lohna, zu in khapna leh a in leh zuar chu hrem theihna hmun a ni.
February ni 20, 1997 khan Mizoram Liquor Total Prohibition (MLTP) Act chu hman tan a ni a, kum 10 chuang a ni ta, tichung chuan zu a rem chuang lo a, a to lek fang a ni.
A thenin “kan hlawhchham” an ti a, a then “kan hlawhchham lo” an ti thung.
Inhnialna tam tak a awm a, hnialfung atana hman ber chu “Kristian ram kan ni a, zu khap hi kan inhmeh a ni” tih hi a ni awm e. Chu chu Kohhran ngaihdan a ni a, Mizoram-ah chuan Kohhran leh tlawmngai pawlte an pawimawh reng a ni.
Mipui mimir chuan zu khap hi a hlawhchham tih an pawm niin a lang. Mahse, Kohhran hlauhna avang tal pawhin tlangaupui ngam an awm lo. Sorkar pawhin a hlawhchham tih a pawm a, mahse, Kohhran hlauhna vang thovin an hlip ngam lo niin a lang.
Politician an ni emaw, ram hruaitu atanga sorkar hnathawk lian leh te thlengin zu in an kat nuk. Zu in tur a awm a, a vang lo, a to mai chauh a ni.
Mahse, zu in chu dan in a phal lo. Chuti chung chuan ram hruaitu te pawhin an in a, dan an bawhchhia tihna a ni.
Sorkar thar a lo piang a, sorkar thar hi an sorkar laia zu khap burna dan siamtu te an ni.
Chief Minister Lal Thanhawla’n chanchinbumite a kawmnaah zu khap chungchang sawiin ennawn pawh a ngai dawn ni awmin a sawi.
Tun dinhmunah chuan hnam dangte eizawnna siamsak ang hiala ngaih theih angin a sawi a ni.
Kum 10 chuang khap a ni ta a, chuti chungin a in mi ten an nghei lova, a rem hek lo. Zawm siloh dan siama lehkawh chu enge a hlawkna ni chuang ang le?
USA Hlawhchham
Khawvel ram ropui ber United States of America khuan zu khap burna danhi a lo kalpui tawh. Mahse, a hlawhchham chian em avangin an hlip leh.
Kum 1820 leh 1830 chho velah khan America-ah khuan sakhuana an la run hle a, sal chhuah zalen boruak vel nen nun famkim Kristian nun dan dik taka nun theihna tura sual lam reng reng laka fihlim tumna boruak a inmung nasa hle.
Chu ngaihdan atang chuan zu pawh sual a ni tiin an inzirtir a,. Kum 1920 chhoah chuan chu mei chu a alh nasa hle. Hetih hun lai hian America ramah chuan zu khap a ni a, mahse, America rama dan siam tawh zawng zawng zinga hlawhchham lailet ber anga ngaih a ni zui ta reng a ni.
Zu khpa bur hi thil thar a ni lo a, ram changkang zawk leh hmun dangah pawh an lo khap tawh thin. Mahse, tumah an hlawhtling ngai lo.
Hmanlaiin Aztec society an tih te, China-ah te leh Japan hun hmasa lamah te pawh khap a lo ni tawh. Ram hrang hrang zingah Iceland, Finland, Norway, Sweden, Russia, Canada te bakh Muslim ram hrang hrangah te pawh khap a lo ni tawh.
Kum 1919 khan Findland leh USA chuan ram pum huapin zu an khap. Mahse, kum 1933-ah an hlip leh ve ve.
Ram hrang hrangah tih dan hrang hrang an nei. Finland ramah chuan mipui mimirin beer an in tam theihnan inzirtirna lam an uar. Sweden ramah chuan mi pakhatin zu a in theih tur chin bituksak an ni tawh thin a, khawtlangah buaina leh harsatna siam lova fing taka zu an intheihnana inzirtirna lam an uar hle a ni.
Japan ramah chuan zu chu a duh tawkin a in tuin a duh chuan a rui thei ang. Mahse, midang laka harsatna a siam a nih chuan hremna namen lo a tuar thung.
United States-a zu khap burna dan an hman chhan Kohhran nawrna vang a ni pakhat. A bikin America-a Prostenat Kohhran leh Roman Catholic te chuan khatih hunlai khan na takin sokar an nawr a ni.
Kum 1893 khan Anti-Saloon League an din a, mahse, kum 1906-13 khan Indopui Pakhatna vangin War Time Prohibition Act an pass a, zu siamna atana buh an hman thinte chu khawlkhawm an duh vang a ni.
January 1920-ah chuan zu khap burna dan chu state 33-in anhmang a, chu chuan America ram pum pui mipui 67% a huap a ni. Kum 1917 khan Senate-ah zu khap burna dan chu pass a ni a, January 29, 1919 ah President-in a pawmpui hnuah January 20, 1920-ah hman tan a ni a, he dan hi Congressman Andrew J. Volstead hming chawiin Volstead Act tia vuah a ni.
America chuan theihtawp chhuahin zu tihrem tumin hma a la nghal a, mahse, a hlawhchham chiang hleah a ngaih theih. Dan lovin zu chu United States-ah phurhluh a ni a, zu man a to a, in duh an tam tho si.
Zu khap burna vang chuan sualna a pung a, khatih hun laia America-a milar berte zinga mi chu Al Capone a ni a, zu chawluttu ber niin chu chuan gang hrang hrang a hringchhuak a ni. Tualthah a hluar a, America khawtlang nun chu a hma aiin a him lo ta zawk.
Kum 1933-ah chuan American Congress chuan zu khap burna dan chu a hlip ta. Utah state chuan an hlip hmasa ber a, kum 1966 khan America state zawng zawngin an hlip ta a ni.
Mizoram-ah Phalrai Deuh
Kum 2007 khan Mizoram sorkar chuan zu khap burna dan a siamtha a, chutah chuan grape wine leh kawlthei atanga siam juice te chu khap a ni lo.
Hetih laia horticulture minister H Rammawi chuan: “He dan siamthat hian zu khap burna kan phalrai tihna a ni lo. Grape leh kawlthei atanga siam te chu kan telh ve lo mai zawk a ni. Wine siamna din kan duh a, loneitu te’n hamthatna an neih theihnan wine siam atanga zu awm zat tur kan bithliah ang,” tia sawiin, “Mithiamte chuan grape atanga wine siam chu khawvel puma thawndarh theih a nih an ring a ni,” a ti.
“A sum let leh tur hisapin grape leh kawlthei chingtute tan an dinhmun a siamtha hle turah kan ngai” a ti bawk.
Zu khap burna dan siam a nih hnuah kawlthei zu a lar hle a nih kha. A tirah phei chuan kawlthei zu chu ‘KTP zu’ ti hiala hriat lar a ni.
Kawlthei an um a, chu chu mi thenkhatin ruihnan an lo hmang thin. Chumi hnuah Grape zu a lar leh a nih kha.
Grape zu chu Mizorama grape tharchhuahna hmun lian pahnih Champhai leh Hnahlanah te siamchhuah a ni ber. Thawk khat lai phei kha chuan grape zu a lar tak zet a nih kha.
Chu chu Burma hovin hriain |iau lam atangin Grape chhe chi hmanga siam an rawn tawlh thla leh dul dul a, chu chu thawk khat laia Mizo thalai te’n ruihnan bera an hman chu a ni.
Mizoram-a grape chinna hi 2,500 acres vela zau nia chhut a ni. Loneitu mi 1,500 velin hei hi buaipuiin kum khat chhungin grape 1,500 quintal vel tharchhuak anga chhut an ni.
Central Jail-a tang, nuthlawi pakhat chuan, "Aizawlah hian lu nghahna ka nei lo," a ti tawl mai. "Min hnawtchhuak zel a, veng hrang hrangah ka kual a, khawi veng nge ka nih han sawi mai tur pawh ka hre tawh bar lo," a ti.
Zuzuar a ni a, a in pawh a in thin. "Zawrh tawh bera in loh te chu a!" a ti sam et mai.
Hnawhchhuah a tawh ngun tawhzia chu a titi tui ber a ni; "Min hnawtchhuak deuh reng. Kan sim thei bik si lova, jail atangin kan han chhuak a, kan zuar leh a..." a ti.
Mahse, amah hnawtchhuak thintute chu a ngaisang lo kher mai; "An thu zawm pawh hi ka duh ve viau thin na a, dik taka sawi chuan ka zawm chak lo. 'Eng nge an nih bik?' ka ti tlat," a ti tawn tawn mai. Chu thu a sawi lai chuan a tanpuite chuan phur fahranin an rawn zawm nghal tliar tliar bawk.
Zawhna zawh an ngai lo a, sawi tura ngen an ngai hek lo. A buak hian an baw hawk hawk a ni ber...
Zozam Weekly chuan May ni 5-ah khan Central Jail-a hmeichhe tangte a tlawh a, sawi tur an ngah barh barh hle.
"Vanram an kai a nih chuan kan chhuk leh duh ang!"
"He'ngho hian Vanram an kai a nih chuan kan chhuk leh duh ang!" jail tang pakhat chuan a ti bawih mai!
He nu hi pasal then, fa pakhat nei a ni a, Central Jail-ah hian vawi 7 vel a tang tawh. Amah pawhin vawi eng zat nge a tan tawh tih a sawi thei lo!
Zuzawrh vang zela tang a ni a, zuzawrh chu hrehawm ti hle mah se a sim thei lo niin a sawi.
"Hrehawm chu ka ti ve. Mahse, kan thisen hian a thanhnan tawh a, eizawnna a lo harsa bawk nen, kan chhuak a, kan zuar leh mai thin," tiin a dinhmun a sawi.
"Rin loh tak tak hian ka zu zawrh hi an in tih ka hrechiang ve em!" a ti a, entawn tlak a hmu lo niin a sawi a ni.
"Ka zu rawn in hi chu an tam mai; officer te, mi chi hrang hrang an ni. Kohhran-a inhmang te pawh an awm ve nawk. Entawn tlak ka hmu lo, khawtlang leh Kohhran-a inhmang, zu in ru an tam," chu nu chuan a ti. A hnena zu in thin zingah uniform ha an tam ber niin a sawi nghe nghe!
"Kohhran, YMA, VDP... mi-a kan ni bik hlei nem, chance kan nei ve lo a, kan sawichhuak lo mai mai alawm," a ti a, amah man thintute hian ngaihdam bik an nei thin niin a sawi bawk.
Pa pakhat hming sawilangin, "Amah vang hian vawi 4 ka tang tawh. A then chu a ngaidam. Mi tenawm tak tak an ni, min man dawn paw'n a then chu an hrilh ru a, an lo insaseng hman thin," a ti a, a dim lo hle.
Chutiang thu a sawi lai chuan a piaha thu pakhat chuan tlawmngai pawl pakhat hming a rawn sawi ri a, "Kei chu YMA hi ka hlau ber," a ti.
"Kut min thlak a, a nu duh lutuk," a ti a, "Bakah, YMA man hi chu bail an phal ve lo a, a hlauhawm," a ti bawk.
"Kan nun hi a chep lutuk," tia sawiin chu nu chuan, "Hlau reng renga awm hi a hrehawm," a ti a, "Kan chep tak zet, tuma'n min vei tak tak lo," a ti bawk. Chu thu a sawi lai chuan a ni, a hmaa tarlan tawh nuthlawi pakhatin, "He'ngho hian Vanram an kai chuan kan chhuk leh duh ang," tia Kohhran leh khawtlang hruaitute chungchang a rawn sawi ni.
He nu, "Kan nun hi a chep lutuk," titu hian nuthlawi thusawi chu chhuzawm ve nghalin, "Kohhran-a inhmangte pawhin kan inah zu an thukru duh tho a, zu-ah hian keini aiin a hlawkna an tel tam zawk," a ti hial!
"An nunah hian hmuh tur a awm lo," a'n ti te te a, "Biak in-ah an inti-Kris leh em em a. Hrilhrutu nei lo ti hian kan tang a ni mai a, zuzuarah pawh thlei bik an nei," a tih zawm leh ngat bawk.
Chutih lai chuan a piaha thu pakhat chuan, "Mihausa leh rethei inkar hi a hla em a ni," a lo ti boh a!
Rangvamuala nu, he ward-a tang ve pakhat chuan a hnena zu lam/in thinte chu hriat hlawh tak tak an ni nawk niin a sawi.
"Mi hriat hlawh an tam. Police an tam a, zaimi pawh an tam. Lengzem sa thin an tam a, Gospel hla sa pawh ka hria," a ti.
"Hmeichhia an tam, tleirawlho hi mipa leh hmeichhia an rawn inphur thin. Tleirawl an tam khawp mai," a ti bawk.
"Kan chep lutuk, khawiah pawh kan chep. Zu a nih tawh dek dek hi chuan tu pawh mai hian an hua a, min entleu nghal zel," nu pakhat chuan a lo ti a, chutih lai chuan a sir bera thu, zahzum hmel deuh mai chu kawkin a chanchin an sawi ta tliar tlair a.
Aizawl veng pakhata mi a ni a, zu vangin an nupain an tang mek. A pasal chu mipa ward lamah a awm.
Mi in hnuai luah an ni a, an in hnuaia miin "bag min lo hawnsak teh u" tiin bazar-ah bag a hlanchhawng a, chu bag-ah chuan zu a lo awm a, an nupa chuan excise-in an man ta niin an sawi.
"Kan in hnuai pain bag min hawntir a, Vanapa Hall hnuaiah excise pakhat hian min lo ko a, bag an han check chuan zu a lo awm a, min man ta a ni. Zu a awm tih ka hre lo reng reng," chu nu chuan a ti.
Chu aia na tih an nei a, a tanpuite'na na an tihpui ber lai pawh chu chu a ni; an in luahna te'n an hnawtchhuak.
Jail-ah an tang daih a, an rawn chhuah hun tur pawh hriat a ni si lo. Chu rilru pu chuan an in luahna pa chuan an thawmhnaw a lo dahchhuak niin an sawi a, jail-ah hian an zu hrilh vang vang niin an sawi bawk.
"Bail-a chhuak thei kan nia, mahse, bail-tu kan nei lo a," tiin chu nu chuan a sawi.
Zuzawrh vanga tangte chuan zuzuarah pawh a lian chin leh a senchi zuarte chu an tang ve ngai lo niin an sawi. An tang a nih paw'n zan hnih khat hnuah an chhuak leh mai thin niin an sawi bawk.
Zozam Weekly-in Central Jail a tlawh lai hian zuzawrh vanga tang hmeichhiate hi 'local' zuar vek an ni. A senchi vanga tang pakhat a awm a, chu pawh chuan a zuar ngai lo niin a sawi.
Nuthlawi a ni a, a hmel han en mai paw'n mi pangngai tak a ni. Thawmhnaw lain a sumdawng thin a, kar hmasa mai khan bungraw laa a haw lamin Lailapur-ah a thiante ta tur zu a lei a, chu chu SRS te'n an lo man ta si a ni, a sawi dan chuan.
"Ka zin fo a, zu hi ka hawn ngai lo. |hiante hovin min chah thin a, mahse, ka ngam lo a, ka hawn ngai lo reng reng. Tun hi ka vawi khat tihna a ni," a ti.
Case 1- Bagpiper leh Contessa a hawn a, Aizawl an rawn thlenin SRS-in an lo check ta si, tichuan an man a, jail a luh phah ta niin a sawi. SRS te hian mi 5 an man a, amah leh a thiannu chauh chu police hnenah an hlan niin a sawi bawk.
Zu chahtute chu a thiante, mi pangngai tak tak nia sawiin, Kohhran leh khawtlangah pawh inhmang tak takte an ni nawk niin a sawi a, officer te pawh an awm niin a sawi nghe nghe.
"Hrehawm ka ti lutuk. Ka zak. Jail te hi ka la hmu ve ngai lova, ka tang ang tih hi ka ngaihtuah ngai lo," tiin chu nu chuan Zozam Weekly a hrilh a ni.
Zuzawrh vanga tang pakhat chuan, "Kei chu, ka hriat ve chinah chuan zu in ve duh rengte hi zu khap phur phur an ni," a ti.
"Khawtlang duty te'n min han man a, excise hnena min hlan loh paw'n pawisa kan chawi a, an insem leh a, ka hre ve reng. Keini zu man mai mai te an insem duh hi mak ka ti," a ti bawk.
"Kohhran chu ka ngaisang, mifel an awm ve tho. Duty-ah hian veng chhung tana ti te, Kohhran rawngbawltu tha tak tak an awm ve tho," a ti thung.
Nu pakhat ve thung chu a beidawng deuh a ni mai thei, jail bangah hian "He khawvel hmangaihna te'n chatuan an tling zo lo. Isua hmangaihna chauh lo chu," tih a tar. A tartu hi nuthlawi a ni a, a pasal nena an inkar boruak vel vanga he thu hi tar a ni mai thei. Kohhran leh khawtlang laka a lungawi loh vang pawh a ni thei ve tho.
Chu'ng thu an sawina pindan bangah chuan "Isu, i ram i thlen hunah min hre reng ang che," tih hi a intar a.
Ngaihdan A Thuhmun Fo Thei Lo
Ziakmi PL Liandinga chuan MLTP Act hi kenkawh kumhlun atan tha i ti em? tia zawhna chu, “Ti lo” tiin Zozam Weekly a chhang.
Mizote hian zu culture mawi tak kan nei tawh a, traditional liquor te chu boral mek a ni a, he Mizo culture hloh kumkhua tawh tur anga lang chungchangah P.L. Liandinga chuan, “Kei chuan ka ui” a ti a, “Kan culture a bo chuan a tha lo. Hemi kan sawi avang hian zu in tur kan ti a ni lo, kan culture hi chu theihtawpin vawnnun kan tum tur a ni,” a ti.
‘MLTP Act-in Mizo khawtlang nun, hnam nunphung a chawisang i ti em?’ tia zawhna chu, “Ti lo” tiin a chhang a, “Chawisan ai chuan thil tha lo a awm zawk. A ruk culture a siam zawk a ni,” a ti.
“Zu tlema a vang hi chu rin ai takin a tha ve tho. Hetia zu a tlem hian tam takah kan that phah a ni,” a ti a, “Mahse, a pawi ta ber chu mirethei te bawkin an tuar zel mai a. Zu chhia a tam phah a, zu chhe in vangin kan thi a. Miin zu a inin sualah a inngaih phah a, kan ngaihhlut phah lutuk a ni,” a ti.
“Rilru lama inzirtir a ngai. Zu hi thil a nia. Zu hi material a ni. Zu hi khawvelin a pawm a, drugs erawh a pawm lo, hei vang hian zu lawng ringawt khap tum tlat mai hi chu a sawt thei lo,” a ti bawk.
Zu hi khap lova a zirtirna lam ngaih pawimawh chu ani hian a duh a, “A tha zawk emaw tha zawk lo emaw kan tih tur a nia. Zu in nasat luat te, a hun leh hmun pawh hre lova in a that lohzia kan inhrilhhriat a ngai a. Zu ruih phal loh tur a nia, a in duh chuan an in mai ang, mahse, a hun leh hmun a awm mai tur a ni,” a ti.
Rev. Chuauthuama chuan” “A dan kan hman chhung chuan a tha a ni mai alawm,” tiin MLTP Act chungchang a sawi ve thung.
Mizo te’n zu culture kan neih t chungchangah Rev. Chuauthuama chuan, “Culture te chu a constant reng thei lo a, dynamic a nia, a inthlakthleng reng zawk a ni,” a ti.
MLTP Act-in Mizo khawtlang nun a siamtha em tia zawhna chu, “A siamthat ai mahin MLTP Act hi chu duhthusamin kan kengkawh lo zawk a ni,” tiin a chhang.
MLTP Act tuartu mirethei an nih chungchanga zawhna chhangin, “Hei hi chu kan kenkawh zawh loh vang. Sorkar chak tawk loh vang a ni mai,” a ti.
Rev. Chuauthuama chuan zu khap chu a sawt nia hriaiin, “A sawtin ka hria. Inzirtir reng erawh kan ngai ang,” a ti bawk.
“Zu hi mihring nuna bet tlat anga ngai tan chuan a bet a ni mai a. Culture-a bet tel tlat anga ngaitu tan pawh a bet tel tlat tho ang. Zu hi Mizo culture-ah thuk lutuka ngaihna hi chu kei chuan ka ngai ve vak lo,” a ti.
MLTP Act hman mek chungchanga Zozam Weekly zawhna chhangin ZNP president Lalduhoma chuan , “He Act hi Mizorama dan hmanah a hlawhtling lo ber number 1 a ni,” a ti.
“Kalna lam a piangah zu funna, zu bur ruak, zurui hmuh tur an awm a. Public meeting-ah pawh zuruiin min la tibuai reng a. He dan hi a hminga hmang ve siin awm lo ang a ni. Office bul hnai tak takah pawh zu zuar leh zurui hmuh tur an awm reng tho,” a ti.
“A pum puiah a hlawhtling lo hulhual a ni mai. Thil tha aiin thil chhia kan society-ah a thlen tam zawk,” a ti bawk.
Zozam Weekly zawhna chhangin, “MLTP Act hian a dik lova sum siamna a hringchhuak a. Kan duty te pawh pocket money inpek te, zu zuarin duty thamna a pek te a awm zel a. Sum siamna dik lo hringchhuaktu a ni,” tia sawiin, “A ti theiin an nghei chuang lo a. Mirethei zu zuar te’n an tuar a ni mai a. Corruption hringtu pakhat chu he dan hi a ni. Chuvangin, he thil hi kan society hian kan maimichhinsan thei tawh lo. Eng emaw chu kan tih a ngai, a nihna kan hriat ngam a ngai,” a ti.
Engtia hmalak tur nge tih chungchangah, “Khap bur zel hi kan duh a nih pawhin a dan hi tih khirh zuala, NGO te leh tutu te emaw hi a enforce-na kawngah thuneihna kan pek a, an kutke kan ti chak law law a nih loh chuan kan sorkar force te ringawt hmang chuan kan tirem thei chuang lo ang,” a ti bawk.
“Khap bur hi kan tlin si loh chuan khawvel ram dangte angin zu in dan tur chin tawk inkawhhmuh a, inzirtir a, thlahzal chung sia dan bawhchhiaa zurui chu na taka hrem mai hi a tha” tiin Zozam Weekly zawhna a chhang a ni.
No comments:
Post a Comment