Zofate zinga Olympics-a tel hmasa ber

1972 Summer Olympics, Munich 1972 tia sawi, August 26 - September 11, 1972 chhunga Munich (Germany) khawpuia neih khan vawiin thlengin sawi a la hlawh a, hriatreng a hlawhna ber pakhat chu khami tuma Israel aiawha telte Palestinian terrorist te'n an bei kha a ni.


Kha Games kha Zofate tan pawh hriatreng tlak a lo ni reng mai; khami tum khan Vanlaldawla a tel ve tlat.

Vanlaldawla hi boxer a ni a, Burma rama boxer hmingthang ber pakhat a ni. 1972 hi Olympics-a Burma boxer an tel hmasak ber tum a ni a, chumi tum chuan Dawla hian Burma ram aiawhin a khel a ni.

Vanlaldawla hi November ni 10, 1947-ah Chawngtui khuaah a piang a, Tawkhrang leh Chawngmawii te fapa a ni. Chawngtui khua hi Champhai bul lawka mi a ni a, |hasiam Seno Neihna hmun bul lawk, Mizoram chhunga mi a ni.

Kum 3-mi a nih laiin a nu leh pa an inthen a, a pa chuan Falam (Chin Hills) lamah a pempui ta a, Dawla pawh Burma ramah a seilian ta a ni. Dawla pa hi Burma-ah hian Union Millitary Police-ah a tang zui a, a pa hnathawhna hmun Kalemyo velah Dawla pawh chu a awm ve a, Kalemyo leh Falam hi a khua tiin a sawi theih awm e.

Dawla hi boxing-ah hian tih phalh thil leh vanneih thil thuin a lut a tih theih ang. |um khat chu Sports Authority of Burma-in Falam-ah boxing camp an huaihawt a, Dawla pawhin boxing an zir lai hi a en ve thin. Camper zingah chuan champion an zawng a, an instructor chuan champion chu kawkin, mipui lam chu 'bei ngam in awm em?' a'n ti a, Dawla chu a rawn penchhuak ta nalh mai.

Hetih lai hian Dawla hi tlangval inti street boy ve tak, rorum leh huaisen deuh mai a ni a, chutia champion bei tura a rawn penchhuak ta mai a hmuh chuan instructor chuan, "Tu ber hi nge i beih duh?" tiin a lo zawt nawn leh kher a ni awm e. Dawla chuan champion chu a kawk va mai. Tichuan, an inbei ta a ni.

Champion chu, boxing thiam tih takah, a zei harh harh hle. Dawla chu a'n veh vel harh harh a, chutia a veh harh harh lai chuan vawi khat mah boxing la zir ngai lo Vanlaldawla, Mizo tlangval chuan a hnaih thut a, hnar thi zawih zawih khawpin a hnek ta chawrh mai. Champion val chu a thal ta huah mai a, chu chu Dawla boxing khawvel intanna a lo ni ta.

Instructor chuan Dawla hi a duh hle a, a chezia te a hmuhin boxing zir tlakah ngaiin boxing luhchilh turin a sawm ta a ni.

1965-ah Chin State (chu'ng lai chuan Chin Special Division tih a ni) aiawhin a khel tan a, Burma Navy-ah lut zuiin, Rangoon-ah a cheng ta a ni.

1967 leh 1968-ah Burma ram champion a ni a, 1969-ah erawh silver medal a la. 1971-ah a champion leh a, 1972-ah pawh a champion leh.

Burma ramah hian inelna hrang hranga medal a la nual a, mahse, ram pawn lama a dinhmun lo thlir zui ila:

1. IVth South East Asia Peninsular Games, Bangkok-a 1967-a neihah Burma ram aiawhin a khel a, bronze medal a la.

2. 1967-ah Kuala Lumpur-ah III Asian Boxing Championship-ah a tel a, third round-ah Japan boxer a hneh lo.

3. Vth South East Asia Peninsular Games, 1969-ah final-ah Thailand boxer Chawallit Orm Chim hnehin gold medal a la.

4. IVth Asian Boxing Championship, 1970-a Manila-a neihah silver medal a dawng.

5. VIth Asian Games, Bangkok-ah quarter final-ah a thlengtu Thai boxer a hneh lo.

6. VIth South East Asia Peninsular Games, 1971-a Kuala Lumpur-ah silver medal a dawng.

7. Summer Olimpics, 1972-ah a tel.

8. VIIth South East Asia Peninsular Games, 1973-a Singapore-a neihah silver medal a dawng.

Vanlaldawla hian light fly weight-ah a khel thin a, Olympics-ah hi chuan fly weight-ah a khel.

Olympics-ah hian first round-ah a 'bye' a, second round-ah Russia boxer Boris Zoriktuyev lakah a tlawm. Russian boxer nena an inhnek tum hian Burma ambassador nupuiin a en ve a, Dawla tanin a au nasa hle. Dawla chuan Russian boxer nena an inbeih dan chungchang hi tiang hian a chhungte hnenah a sawi:

"Round khatna leh round hnihnaah ka che tha zawk a, round dangah chuan kan inchet that chhawk a. Final round minite 2-naah a kuttum chu chiang takin ka dawng siah mai a. Ka kaihza a dul hnawk a. Ambassador nupui chuan 'Dawla tang rawh' tiin tah-aw tiauvin min rawn au a. Ka insiamrem vat na a, referee chuan min rawn pawm bet a, khelh zawm a phal ta lo a, 'min khelh zawm tir rawh' ka tih pawhin a phal tawh lo. Ambassador nupui pawh 'khelh zawmtir hram rawh, hnehna a chang ngei dawn a ni' tiin a rawn au ve hial a ni," tiin.

1965 atanga 1972 thleng hian kum tawpah kum khat chhunga boxing a khelh zat, a hneh zat leh hneh loh zat te a chhinchhiah thlap thin. A inhnek zawh apiangin a tihthatna leh tihsualna te thlirletin ziakin a dah thlap thin bawk.

Kum 8 chhung hian vawi 90 boxing a khel a, vawi 70 chakin, vawi 20 a chak lo. Vawi 24 a khingpuite a knock out a, a khingpuite'n vawi 3 an knock out ve thung.

Ram pawnah Burma ram aiawhin vawi 10 a fehchhuak a, gold medal 3, silver medal 3 leh bronze medal 1 a la.

1975-ah khan South East Asia Peninsular Games atan selection an neih tumin a kal-ah (kidney) lung a awm avangin final a khel thei ta lo a, hei bak hi 1972 hnu lama a boxing record hi hriat chian a ni ta lo.

Burma Navy atanga a ban hnu-ah sumdawng lawngah a thawk leh khawvel khawmualpui hi a tlawh kim deuh vek.

Dawla hi Mizo zinga cheng ngai lo tih takah, Mizo Kristian te inneih dan pawh hmu ve ngai lo a ni a, chu chu a nupui neih niin a chetchhiatpui ta nghe nghe.

A nupui neih hma hian a chhungte'n sipai pakhat chetchhiatna an hrilh a, chu sipai chuan a nupui neih ni-ah tawt em emin zungbun a lo bun a ni awm e. Zungbun an inbuntir dawn chuan a nupui a buntir tur zungbun chu sipai chuan a phawi thei ta hlek lo mai. Chu'ng vel chu hrilhin a chhungte chuan Dawla chu fimkhur turin an hrilh a, a fimkhur ta mah mah pek a!

June ni 13, 1970, Inrinni chawhma dar 11-ah Tahan Venglai Presbyterian biak in-ah Kawlveli nen an innei a, mi pawh an thahnem hle. Dawla chuan a chhungte thil hrilh kha a hre reng a, a chechhia ang tih mawlh chu a lo hlau a ni awm e. Pastor-in a inkutsuihtir tan tirhah chuan Dawla chet buai hlau chuan Pastor chu sipai tih danin salute a'n pe a, "Ka pu, zungbun ka buntir tawh ang em?" a'n ti zui bawk a!

Pastor chuan, "A la hun lo," a lo ti a, tichuan, Dawla chu khawng fahranin a'n 'about-turn' a, hnung lamah chuan a let ve leh ta a ni. Mipui an nui nasa ngei mai.

Kawlveli nen hian fa pathum - Ramthangpuia, Hmingthanmawii leh Lalthangkimi te an nei a, Rangoon-ah an cheng thin.

Dawla hi zu bawihah te a'n tang ve ren rawn a, mahse, Pathian-ah inhmuchhuakin zu bawih atang pawh chuan a talchhuak leh hlauh. A pianthar hnu hian footballer K Kawla pa - Rev Lalthanliana hnungzuiin Kohhran-ah a theih ang tawkin a inhmang thin.

A hun laia Burma ram milar tling pha Vanlaldawla hi 2001 khan a thi a, mahse, Zofate zingah thang leh tharte chuan an hre lar dawn chauh ni awm tak a ni. A thih hnu-ah, ZOFEST 2009-ah Mizo Zirlai Pawl chuan chawimawina an hlan nghe nghe. Hetah hian a putea'n chawimawina hi a dawnsak a ni.

Summer Olympics 1972 boxing result kimchang, fly weight category second round-ah chuan tiang hian Dawla hming a lang:
Second Round
Leszek Blazynski (POL) def. Chander Narayanan (IND), 3:2
You Man-Chong (KOR) def. Saidi Tambwe (TNZ), 5:0
Niamdash Batsuren (MGL) def. Antonio García (ESP), 4:1
Calixto Perez (COL) def. Martin Vargas (CHL), 5:0
Tim Dement (USA) def. Ali Gharbi (TUN), 5:0
Georgi Kostadinov (BUL) def. Jan Balouch (PAK), TKO-2
Chris Ius (CAN) def. Ali Ouabbou (MAR), 3:2
Boris Zoriktuyev (URS) def. Dawla Vanlal (BUR), TKO-3
Franco Udella (ITA) def. Felix Maina (KEN), 5:0
Constantin Gruescu (ROU) def. Kemal Sonunur (TUR), 5:0
Douglas Rodríguez (CUB) def. Fujio Nagai (JPN), 5:0
Leo Rwabwogo (UGA) def. Maurice O'Sullivan (GBR), TKO-1
Orn-Chim Chawalit (THA) def. Gerd Schubert (FRG), 4:1
Mohamed Selim (EGY) def. Wilfredo Gomez (PUR), 4:1
Neil McLaughlin (IRL) def. Abaker Saed Mohamed (SUD), 5:0

(Vanlaldawla chanchin hi a chhungte puihnaa kan ziah a ni. An chungah kan lawm hle. Editor)

Related Posts :