Lirthei chetsual vanga tawrhna

2006-07 chhung khan Mizoramah vawi 125 lirthei a chesual a, 2007-08 chhungin vawi 94 lirthei a chesual.

'Statistical Hand Book Mizoram 2008'-a a lan dan chuan 2006-07 chhungin lirthei chesual vanga nunna chan mi 46 an aw, 2007-08 chhungin nunna chan mi 54 an awm.

Nunna chan zingah hian hmeichhia aiin mipa an tam zawk hle; 2006-07 chhungin lirthei chesualah mipa 36 an thih laiin hmeichhia chu 10 an thi. 2007-08 chhung pawhin lirthei chesualah mipa 43 an thi a, hmeichhia chu 11 an thi.

Hliam tuar zingah pawh mipa an tam zawk hle; 2006-07 chhungin lirthei chetsual vanga hliam tuar zingah mipa 103 an awm a, hmeichhia chu 36 an ni. 2007-08 chhungin hliam tuar mipa 123 leh hmeichhia 30 an awm. Lirthei chesualah a vanduai zawkah mipa an tang tlat mai hi eng vang nge ni ang? Mipa an zinchhuak nasa a ni ang han ti ngawt ila, hmeichhia an zinchhuak nasa ve tho a, sumdawnga zinchhuak zingah phei chuan an tam zawk daih emaw a ni ang a! Bus leh sumo service te en ila, hmeichhia an tam viau zel a nih hi; mipa aiin an zinchhuak tlem tia sawi ngawt theih bik loh khawp an ni ve tho!

Lirthei chesual zingah truck a tam ber a, truck chu mipain an khalh thin. Mahse, truck-ah hian Mizo hmeichhia an chuang nasa hle. Truck dawttu chu light vehicles a ni a, hei pawh hmeichhe chuanna ve tho. Two Wheeler chesual a awm nual a, two wheeler erawh mipa pual deuhah ngaih a ni; scooty chhuah hma phei chuan hmeichhiain an khalh nasa lo.

Mizorama kan kalkawngte hi a tha tawk lo a, hetiang kawngpuiah hian lirthei a chesual duh ni-a sawi a ni. Chutih rual chuan khawl lam thil chiangkuan loh vang leh a khalhtute tihsual vang pawhin vanduaina a thleng fo bawk. Mizoram leilung hi a nghet lo a, ruah tla hlekah a nem thin a, heihi lirthei chetsual chhan lian tak nia ngaih ni bawk.

Mizorama lirthei chetsual a thlen thin chhan hi zirchian a ni lem lo a, amaherawhchu, debate leh sawihona zawng te chuan hemi chungchang thlirhona hun chu a awm fo. Engpawhnise, Mizoramah hian lirthei chetsual vanga vanduaina hi a thleng fo a, tun hnaiah lian tak tak a'n thleng leh mawlh mawlh mai hian mipui thin a thawng hle a nih hi.

Thenzawl atanga Aizawl pana tlan bus chu October 5 zing dar 8 vel khan Changte bulah a chesual a, pakhat a thi a, 28-in hliam an tuar a nih kha.

Bus-a chuangte hi Luangmual Vengthlang Branch K|P member-te an ni a, Thenzawl Field Veng Branch K|P an tlawh a, chuta tanga an haw lam an chesual ta a ni.

Luangmual Vengthlang Branch K|P hian bus pahnih an hmang a, an vaiin member 64 niin bus chesual ta MZ01B-5737-ah (a neitu Pu Vuka, Durtlang) hian mi 35 an chuang a, chetsualna hmuna thi hi Daniel Lalruatfela (18) s/o Lalremliana, Luangmual Vengthlang niin bus hian a delh nia sawi a ni.

Bus hian kawngsir lei nem chin a zawh a, an tlan liam ta mai niin thudawn chuan a sawi a; thudawn pakhat chuan bus driver hi a muthlu nia a hriat thu a sawi ve thung. Bus hi kawng ngil tha lai taka chesual niin chetsualna hmuna kal pakhat chuan a sawi a, bus hi kawngthlang metre 120 vel a lum.

Bus a chesual tih hriat a nih veleh Luangmual Vengthlang mipui thahnem tak chuan chetsualna hmun hi an pan nghal a, hliam tuar mi 28 chu Aizawl Civil Hospital-a hruai an ni a, an zinga mi pahnih chuan Greenwood Hospital an pan niin Casualty-a duty te'n an sawi.

Hemi hma lawk hian lirthei chetsual vanga vanduaina thuin mipui a lo deng lawih tawh. September ni 28 zing dar 8:30 vel khan Rihdil ena kal Tuichangral Salvation Army Youth khawmpui palaite chu an chuanna bus a chesual a, mi pathum an thi a nih kha.

Bus chesual (city ride) MZ04-1200-ah hian mi 32 an chuang a, mi 24-in hliam an tuar a ni.

Rihdil ena kalte hi September 25-27 chhunga Melbuk khuaa Tuichangral SAY khawmpuia tel, Sialhawk atanga palaite an ni a, motor khalhtu hi motor neitu TBC Lalmawia (Biate) fapa Lalthuampuia a ni.

Chetsualna hmuna thite hi Lalzarzova (32) s/o Lalhmuaka (L); Zonunmawii (22) d/o Ngurthuamluaia leh Chanchinmawii (24) d/o Lalhmachhuana te an ni a, an vai hian Sialhawk khua an ni.

Chetsual laia bus-a chuang ve pakhat J Lalremruata sawi dan chuan, Rihdil atanga an let leh lam, sakawr pakhat nen an inpel tur chu bus ke hian kawngsir lei nem lai a rap palh a, kawngthlangah an liam ta a ni.

"Bus kawngkhar bulah kan awm a, mi panga chu kan zuangchhuak hman," J.Lalremruata chuan a ti. "Bus lumna hi a awih hle a, metre 200 vel chu a lum a, bus pawh a chhe hneh hle," a ti bawk.

"Kan chetsual hnu hian ka zuanchhuahpui mi palite chu a hmuna lo awm turin ka hrilh a. Helai ram chin hre ber ka nih avangin kei chu zualko turin ka tlan nghal a. Kawnglakah Burma sipai pakhat bike-a chuang ka tawk a, thil awmzia ka hrilh veleh bike chuan min phur a, Zokhawthar lamah kan pute ka hrilh a, chuta tang chuan kan chetsual dan chu kan inhrilh kual ta a ni," Remruata chuan a ti.

"Burma sipaite leh Rihkhawdar leh a chhehvel khuaa mipuiten theihtawpin min pui nghal a, an fakawm takzet a ni," a ti bawk.

Chumi hma lawk - September 25 zan dar 6:10 velah Tuirial fintu Muthi luiah motor a chesual a, mi 6 an lo thi tawh bawk.

Mizorama lirthei chesualte
Motor 2006-07 2007-08
Truck 43 37
Bus 4 8
Light Vehicles 37 34
Two Wheeler 31 2
Others 10 13

Motor chesual Pik up MZ-01B- 6677 hi Tuirial Airfield chhaka Muthi lui kam lehlama Bamboo Link Road-a hnathawk hruai a ni a, motor neitu hi Pu Lalruata, Chhinga Veng-a mi a ni.

Tlai lama ruah a sur tlawrh tlawrh lai khan Aizawl lam pana an tlan laiin Muthi luiah hian an chesual a. Muthi lui hi tunhma pawhin an lo kan fo tawh a, hemi ni hian lui hi a lo lian deuh a, kan mai theih ringa an tlan laiin motor hi a inpaih avangin a chesual a, motor-a chuang mi 10 zinga pali chu an insaseng hman a, mi paruk chu tui hian motor nen a len ta a ni.

Tuia tla ruangte hi khawtlangin an zawng nghal a, motor hi an chetsualna atanga metre 150 vela hlaah zan dar 10 velah hmuh a ni a, a chhungah hian Rualkhuma Royte (65) s/o Lalsiamliana (L) Chhinga Veng-a mi chu hmuh a ni. A tuk dar 8 velah Ratmeshwar Borali (45) s/o J.Borali, Guwahati-a mi ruang chu motor chetsualna atanga km 3 vela hlaah hmuh leh a ni. R Borali hi bulldozer operator a ni.

Ruang zawn hna hi khawpui chhung YMA branch 16 bakah mimal thahnemngai te'n an thawk a, Saipum atanga chhak lam zawng Tuirial lui area china khua zawng zawngin ruang zawn hna hi an thawk vek bawk.

Health Deptt chuan damdawi lam thiam leh ambulance-in an vil reng a. Aizawl SP chuan a mi leh sate bakah lirthei a thawhchhuahpui a, ruang zawnna hmun li-ah MPRO an inbun a, chanchin an inhrilh zung zung thei a ni. Ram hruaitu lute pawhin a hmunah an tlawh reng a, minister leh MLA thahnem takin ruang zawngtute hi tawiawmin a tul ang ang an thawk reng bawk.

Swine Flu vangin mipui an ralkhel a, chumi hnu lawkah mahni intihlum an tam thu hriat tur a lo awm a, lirthei chetsual thu a lo awm leh a, chhiatna lam news hriat tur a indawt zut mai. In chim vanga nunna chan an lo awm bawk a. Hetianga vanduaina a thlen chan hian Mizoramah chuan pi leh pu te hun lai atanga tih danin, khawtlangin tlawmngaiin chhanchhuah hna leh tanpui hna an thawk thin. Roreltute chu a hmunah an kal ve a, hnatlangte thingpui in man tur an pe thin. Silpauline an pe thin bawk!


Motor neitute leh a khalhtute ngenna
"Tun hnaiah hian Mizoram chhunga motor accident rapthlak tak tak lo thleng leh thin hi Mizoram sorkar chuan pawi a ti tak zet a," tiin Mizoram sorkar chuan October ni 5-ah thuchhuah a siam a, motor neitu leh a khalhtute chu tiang hian a ngen:

1. Motor hi englai pawh a check leh vawnthat reng a nih a ngai a. Fitness Certificate tel lovin Motor hi lekchhuah loh tur a ni.

2. Motor neitu reng reng te'n chhiah chi hrang hrang Insurance te thlengin dan ang thlap-a pein kawl reng tur a ni. Hei hian vanduai tawpah pawh awlsamna a siam bik.

3. Motor khalhthiam inti zawng zawng te'n heng Motor a bik in public transport te hi khawih ve loh tur a ni. A khalhtu tur a authorize chauhin khalh hi a him ber.

4. Motor-in a phurh theih tur zat Insurance leh permit-a in ziak bak phurh loh hram tur a ni. Hetiang dan bawhchhia te tan hian vanduai thilthu-ah harsatna a zualkai bik thin.

5. Tunlai khua angah hian kawngsir a nem tawh avangin, kawngsir nel loh a him ber.

6. Mipui tam tak nunna chelhtu an nih hre rengin Driver zawng zawng te ruihtheih thil a fihlim turin kan in ngen nawn leh a. Motor khalh lai a zial zuk leh a chuangte zuk pawh hi dan kalh a ni tih i hre nawn leh ang u.

Related Posts :