Thing Thleng

Putar pakhat hi a fapate nupa bulah a cheng a. A upat tawh avangin a taksa a chak tawh lo hle a, a kut te chu a khur hlawk hlawk thin a, a khaw hmuh a fiah tawh lo a, kal pawh a kal tha hlei thei tawh meuh lo.

A fate nupa chuan fapa kum 4 mi an nei a, an chhungkua chuan dawhkanah chaw an kilho thin a. Mahse, putar chu a kut a khurh nasat avang leh a khawhmuh a fiah tawh loh vangin an chaw ei lai chuan a che buai fo mai. A changin a khuh vak a, fian te chu a hum nghet thei tawh lo a, chawhmeh a thlauh thul, a bawnghnute in lai te a tibua a, dawhkan khuhna puan te chu a tibal ngun hle a ni.

A fapate nupa chuan an pa chu an ning thin hle a, a chawei dan chu an ngai thei ta lo tial tial a. Tih dan tha ber tur an ngaihtuah a, tichuan a hranga chaw a eina tur dawhkan te tak te an siamsak ta a ni.

An nupa leh an fapa nen chawei dawhkan kila chaw an ei lai chuan putar chu choka kilah chuan a hrangin an eitir thin a. Chuti chung pawh chuan putar lah chu a la chesual chhunzawm ta zel a, thleng leh no a la tihkeh fo avangin thinga siam thleng, keh thei lo an hmantir leh ta a.

A hranga amah chauha chaw a ei lai chuan a fapa leh a mo leh a tupa te chaw eina lam chu a hawi phei a, a rilru na chu a mittui a tla fo thin a, mahse, a phunnawi ngai miah lo thung. A fapa leh a mo te lah chuan a chetsual palh a, fian a tihtlak chang leh chawhmeh a thlauh chang te chuan an hau khur khur thin a. A tupa kum 4 mi erawh chuan ngawi rengin a pu che vel chu a lo thlir reng thin a, a nu leh paten an hauh vak vak lai te chuan lainat hmel takin a pu chu a en vawng vawng thin a ni.

Tlai khat chu chaw an ei dawn lai chuan naupang te chuan chhuatah chuan thingphek pahnih hi a lo khal a, chem lemin a lo suih chhin vel a. A pa chuan hlim taka a fapa chu chhaih pahin, "Mama, eng nge i siam a?" tiin a zawt a. Chu naupang te chuan, "Ka puitlin huna ka nu nena in chaw eina tur thleng ka siam a nih hi," tiin a hlim takin a chhang a. Nui ver ver chungin thingphek chu a khal zui leh nghal a.

Mahse, chu mipa naupang thusawi chuan a nu leh pate chu a deng na hle a. Ngawi rengin an inen a, an biangah chuan mittui a luang ta zawih zawih mai a. An tih leh tur chu sawi chhuah kher a ngai loin an hre nghal.

Chumi tlaiah chuan an pa ber, putar chu an nupa chuan duat takin an kai a, an kiangah chawei dawhkan chu an kiltir ta a. Chuta tang chuan putar chuan a fapa te chhungkaw bulah chuan chaw a kil chhunzawm leh ta a, a chetsual chang pawhin tumahin an sawisel tawh lo a, an ngaihsakin an duat em em zawk a ni.

Naupangte hian mita an hmuh leh benga an hriatte hi an thiam danin an puangchhuak thin a ni tih kan hre ngai em?

('The Wooden Bowl' tih lehlin a ni a, a ziaktu hriat a ni lo.
- Lalthlamuana Ralte)

Related Posts :