¢ HC Vanlalruata
Tunhnai-ah zaithiam ve ve inneihna inkhawm zawh hnu-a Kohhran pakhat Hall-a reception inkhawmnaah an thian zaithiamte’n lengzem leh hla lenglawng an sa tih chanchinbu-ah ka lo chhiar ve a; kohhran hruaitu thenkhat an lawmlo hle tih te pawh an ziak tel a. An ngawih zui mai ka rin laiin rin aiin a thawm a lian ta viau a. Ngaihdan rawlh ve a ti chakawm riau mai.
Mizo (han ti kher i la) kohhran hruaitute hi chuan kohhran rimnam hmun reng rengah lengzem hla emaw hla lenglawng emaw hi chu sak ni lo se tih an duh tih hi a lang reng a. A chhan pawh kan Biak In leh a kaihhnawih kohhran hall ang chi thianghlimna vawn tak tak ai mahin a langa mawi kan zawn luat vang a nih hmelin ka hre leh tlat thin. Kan Biak In sakna thawhlawm a thianghlim leh hlim loh lamah hi chuan chuti takin kan thikthu a chhe hranpa lo niin a lang a. Eiruk sum nia hriat theihte pawh dawngin kan hlan thianghlim mai a, ram dan hmanga sorkar khap zu leh ruih theih thil dang hralhna atanga thawhlawm thawh pawh kan thliarin thikthu kan tichhe vak lo. A sa tur pawhin ringlomi kan tihte ngat kan ruai thin.
Kan zaithiamte pawh khan, a tha berah chuan lengzem hla sak sak lo sela chu a pawi tehchiam lo. Biak In phei hi chu eng sakhaw ta pawh nise zah a tha a, incheina lam pawh uluk a tha. Kohhran Hall pawh kan hotute thikthu chhiatna langsar thei a ni tih an ngaihtuah kimlo kha zaithiam naupang tih a ni e kan tih mai a tul ang.
Chutih rualin thil hi kim taka chhut a tul a. Thikthu kan tih chhiat duh dante pawh hi inenchian ve chu a tha. Kan Krstianna hi kum 100 a chuang tawh a, puitling tak leh rilru zau taka ngaihtuahna siam pawh a hun ve tawh e, ka ti fo thin. Prebyterian leh Baptist kohhran tiamin khawvela Kohhran lian ber berte’n Pathian Lehkhabu Thianghlim tia an pawm chin. Kohhran Hall mai pawh nilo, Biak In thianghlim chhungah pawh chhiar tura dah, Solomona Hla Thlankhawm hi han chhiar chiang teh u. Hetianga lengzem ngialngan, mihring leh mihring inhmangaihna hla thu, kan lengzem hla tam tak aia ngan zawk hi kan pawm theih chuan engah nge kan thikthu kan tihchhiat bik viau? A then phei chu a zahmawh rawngkai lek lek a nih hi tih tur a ni.
Bible-a awm a nih avanga Biak In chhunga chhiar atana iai si lova, Mizo pa phuah lengzem ngaih huata thikthu tih chhiat bik viau hi a thu a lai lo viau in ka hria. A phuahtu kha nupui ngah, hmei nen phei chuan khawvela ngah ber a ni hial emaw a ni ang a. Inngaihna suala vawi khat tluk pawh ngaimawh em em kohhran hian nupui leh hmei sang tel nei Solomon-a lengzem hla hi Biak In chhungah chhiar a remti thlap a. Mizoram mi tute’nemaw mipa leh hmeichhe inhmangaihna hla, nupa tuaktharte tana tha leh an nupa nun chawm thei tur nia an hriat hla an sak kha thikthu tih chhiat lutukna atan chuan a dik bik chiahin ka hre lo.
Mizo kohhran hruaitu hmasa-te’n Kristian awm dan tur kher khiap lutuka an duang a, sapho tihdan a kha Pathian biak dan dik ber emaw an ti leh kan Mizo hnam nuna bet thil tam tak kan Kristianna-a an senglut theilo lutuk khan harsatna a siam ve viau a sin. ‘Khuang lova chai ang’ kan lo tih kumkhua, kalkhawmna tawhah chuan a tellova thil tih theih lohva ngaih khuang pawh kha Biak Ina lakluh an harsat hle a. Musical instrument dang duh ang kan neih mai siloh avangin loh theih lohvin kan khuang pawh kan ‘pianthar tir’ ta hram kha a ni a. Mizo hnamin tunhmaa kan rimawi chhepchher dang seki leh a dangte chu lakluh an phallo hlen ta a. Khatih hunah khan piano leh music hmanraw tha dang hi vawiin ang hian duh thalin nei ngat ila chuan kan khuang pawh hi Biak In chhunga kan lakluh ka ring lo.
Khawvel hnam dang tam tak chuan an hnam hla thlukin Pathian an fak mai a. Keini erawh chu tunhma, Kristian nih hma, kha kan ngai leh ang tih hlauh vang ni maw, Tlanglam zai, Puma Zai leh Chheih kan tih ang chi zawng zawng pawh Kohhranin a malmak ta vek a. Mizo zingah hla phuah thiam an lo tam hlauhva, lengkhawm zai leh Pathian hla pangngai bakah khawhar hla tha tak tak kan nei ta hlauh a nih hi. Dik tak chuan Mizo nuna bet hlim lamna lam chi pawh Kohhran hruaitu hmasate’n an ngaih theih loh avangin helama tui si kohhran peng an tam phah niin chhuttu tam tak chuan an ngai a. Kohhran hi a serh leh sang phatsan duai tur a ni e tih lam a ni lova, a huang zauh tur chuan a inphahhniama a zau a tul chang a awm ve a. Pawngpaw khawng lutuk hi a tha ber lo, a khawng a tul pawhin kan Bible ngeia inziakte pawh en let thin ila a tha ngawt ang.
Monday, October 12, 2009
LENGZEM!
Subscribe to:
Post Comments (Atom)
Thawhlawm chungchang chu a petu a zir a nimaiin ka hria a, kohhran in a lo hnial ngawt thei si lo va. Nia, kristian kan nih hnua a kan pawm tawh loh hi chu tih loh mai a tha awm e, Biak In leh a vel lo hmun dang tam tak pawh a awm alawm. A hmun leh a hun hria hi mi changkang tih tur a ni dawn lawm mi.
ReplyDeleteKei zong lengzem leh leng ah Solomona thufing emo, hla thlan khom lam ah ka buai ve lo, ka boruak ton la hniam vang te poh ni fa hmiang, kei zong he lam tlang lian lam hian ani ka buai na zok chu, Vai ram a kan Mizo thalai om lehkhazir an ni emo hna thok an ni emo kanom dan kan hoiher khosazia han hmuh hian lung a dam thei lo... a bikin kan Mizo Hmeichhiate nun dan leh khosak dan hi ron hriain ron hmuve ta ula lenglong leh lengzem, Solomona hla tih vel ah in buai hmasa in ka ring bik lo, he lam a kan Mizo Hmeichhiate nun dan hian i thinlung MIZO rilru a ti na ve tho in ka rig thin, Vai ram ah Lehkhazir a thiamna sang zok umin leh Hnathok tur te'n an lo kal a a tha e... Mahse thil pakhat mistake an nei chu chu an nundan phung an hloh tlangpui hi a ngaihna ka hrethiam thei toh lo, Movies leh Film TV vela kan hmuh ho angte hian a tak a engmah poisalo a nun an ron tum tlangpui, Phai a om Mizo nula rual 20 zing a 2 hi mitha pangngai an om a ngem le?? choh rualin Phai a mizo hmeiche om ho hi 90% vel hi an om dan a boro hle mai, a chang chuan Mizoram mi ka ni e han tih te poh hi kan tim lek lek ta mai....Nepali leh Manipur ho an look down na ang hi kan hlat vak toh lo ve kan ban phak mai ah a om ta, changkanna tiin kan vuah lui tlat donn em?? Nu leh pa te hi eng tin nge lungdam tak a zanmu an la chhin theih chu le an fanu te omdan hi ron hmuin ron hre ve tehse anla chhuang tlat reng angem?? kan North East hmun hrang hrang atangin zir lai leh hnathok enge mozat an om, kan North East puite oh kholo fe fe tam tak an om, mahse a fel leh mipangngai chin hi an tam zok tlat zel a, Mizo ram a tang a rom kal ho ve hi tha leh mipangngai chu Pahmei Buhfairelbel a buhfai om ai pohin an tlem zok a ni, Hmeichhia ngot soi ka tum love... Mipa poh kholo tak tak an tam chohrualin Hmeichhia aiin an tha zok, tim mipa aiin Hmeichhiain Ram leh hnam an ti hmingchhe thuk zok bok, tin tun lai ah buai na leh hmingchhiatna neuh neuh a thleng fo maia a bikin SPA leh a kaih hnoih ah, chu tih lai in kan Ram Khopui ngei maia SPA Zirna om tlat hi ka ngaithiamlo a ka duh lo let top, a bik tak in he ta tang hian nun boro poisak neilo enge mozat a Batalion in an ron thon thla thin, a chhor tu tan leh a ruai tu tan chuan sum an hmuhna a nih phot chuan tu Private Life ah mah an in rolh lo ang, mahse hei hi i tan leh ka tam a poi a ka RAM tan a va poi em.. Hohteh u Ka Ram mipuite u harh in in ti chak ula mintanpui turin lo chhuak ta che u, in tanpuina tel lo vin keimah chauh chuan he kan MIZORAM hi a zah omna ka humhim zo don lo, chhantlk kan la om e......
ReplyDeleteKan ziak mite hi... kohhran beitu langsar tak an ni zota... Kan ram kalsiamah hian mawh in phur nasa a nia... Mi in hneh thei em em si a leh... Kohhran hi he khawvel a nih avangin a perfect lo.... nangni pawh in perfect bik in ka ring lo... Kohhran tana thahnemngaihna atanga chhuak sawiselna hi chu a dang daih a nia.. Kristianna..leh a traditionte, kum 100 chuang kan ramin kan lo kalpui tawhte hi kan tradition chu an ni ve tawh mai lo maw ? Kohhranin kan ram tana a thawh zozaite hi kan hai der lui mai mai thin a ni... Kohhran hi awm lose keini mizo tlemte te hian assimilation kan tawk tawh mai lo ang maw ?
ReplyDelete