Mi Mai Mai Nih Hi A Va Nuam Em !

¢ Robert Thangmawia

Kum nga vel kal taah khan Congress Bhavan chungah hian Krismas carnival-ah tombola khel turin ka lawn kai a; huau huau boruakin min nangching vei nen, keini ang pa inhmuamup thiam miah lo tan chuan nuam hilh helh tak a ni. Chumi tum chuan Zozam Weekly editor-in-chief nen hian kan thu dun a, ani pek chuan, “Mi mai mai nih hi a nuam tiraw ?” ka beng bulah hian a rawn ti su su a. “Engvangin maw ?” ka lo ti he haw a. Ani chuan, “E khai, tunah te hian Kohhran Upa emaw, ram hruaitu emaw chu ni ila, hetianga kan tombola khel ringawt pawh hi miin an sawi peih dawn asin!” a ti a. Tun thleng hian ka han ngaihtuah zui a; dik ka ti tulh tulh mai. Nia, mi mai mai nih hi a nuam phian reng a ni; mitmei ven tur a awm lemlo a, kan hawina lam apiangah kan ngaihdan hi kan pik liam ve puat puat mai a. Kan thil tih leh kan thu te a lo fing vak lo a nih pawhin mite'n, “Ani ve mai mai te chu, a tih awm tawk vel alawm” min ti liam mai a. Tu’n huat thu-ah an la lem lo. Thu belhchiandawl awm deuh chhak chhuah fuh tum a awm mial chang lahin, “Ve roh chuan, amaha phu lovin!” min ti duh lek fang a. Tumahin kan thu chu pawmin, zawm tang e an tichuang hlei lo a. Nuam vin ven deuh asin!

Kan Bible hian ‘Rilrua retheite chu an eng a thawl e’ a ti a, dik hlein ka hria, kan thian thenkhatte ka han ngaihtuah chhuah chang hian! Mahse, tisaa retheihna zet erawh hi zawngin kan eng engmah a tithawl thlawt lo ve! Remhriatna tal pianpui neih si loh phei chuan chuti hlauh chu kan ni mai. Hman ni chu Dawrpui Biak In kawmchhaka ka kal laiin kutdawh pakhat bawm dawha kawng sira lo thu hi ka hmu a. Tin, ngaiteh, chutia ka en reng lai chuan nu pakhat hian a bawmah chuan pawisa thir hi a thlak ri ta kauh a. Chu kutdawh chu a hawi zak zak a, pawisa thir chu a ipah a khung zauh a; a ip atang vek chuan cheng sawm thar deuh hi a rawn phawrh a, a bawmah chuan a dah ta hleuh a. Kutdawhah rau rau chuan a hisap kha tha ka va ti tehlul em! A kutdawh dawnthlengah khan pawisa thir a awm chuan kawng kal dangte pawh khan pawisa thir hlir an thlak a hlauhawm tih a dawn pha tlat. Cheng sawm thar virver a lo awm erawh chuan cheng khat thir thlak bik nih kha keini ang ringtu tha tan chuan a inthlahrunawm riau thei dawn a. Cheng khat thir hlir mi sawmin an thlak ai chuan miten kha kutdawhpa rate kha cheng sawm emaw tia an zinga pahnih chauh tal pawhin an thlak zeuh khan a hlep a pung dawn miau a ni. A thlaktu tam lam aiin an thlak zat khan kawngro a su dawn tih a hria a; economics-a law of marginal utility tih vel kha a man pha tlat a ni! Kha kutdawh kha chu keini ang patung ve satliah, mahni thawhchhuah ang ang tlakral mai thin ai chuan a la ding chhuak hma zawk ta ve ang !

Kutdawh kha ka va hmusit a ni hauh lo; a profession-ah khan a hlawk theih ber dan tur a ngaihtuah ve a ni mai. Tih tak emah chuan kan zavai mai hian kutdawh chu kan ni deuh ber alawm mawle! Nimahsela, kan kutdawh dan standard te, kan rate te, kan kutdawh thawmhnaw inbel te, kan lungawina zat te a inang lo a ni lek fangin ka hre thin. Chuvang chuan chawkhawn leh chawkhawn innuihzat tur bik kan awm awm lo e a tih theih ang. Mi thenkhatten ar an ru a, mi puanphote nen lam, talhfiak bak an hlawh lo. Mi thenkhatte erawh chuan an ru hraw deuh a, khawvel mit atanga teh chuan mi hlawhtling nih an hlawh ve thung a; parawn leh zahkai an la ni zui a!

Kan thianpa Mamuana (L) sawi ka la hrereng thin. Ani chuan, “Thil hi ka ru chikim viau tawh a, thil ruka hlawk lo ber chu 'tespatta' ruk hi a ni. Mahni lang lo leka phurh pawhin cheng sawmpanga man bak a ni lo!” zu ti a. A dik leh hmel viau. Chuvang chuan kutdawh kan ni emaw, rukru kan ni emaw, eng hna pawh thawk ila a hlawk theih dan tur ngaihtuah thiam hi a va pawimawh em ve aw! Aizawl veng pakhata gas bur ruk ching an man pawh kha VDP te'n an han dawp a, gas bur ru thin association em chu din lo mah se, tunlaia LPG distributor-ten area an insem ang hian an lo insem fel ve ni awm tak a ni! Police-te tan man chhuah an awlsam deuh ang tih thuah chauh lo chuan member-ten ramri an kham fel mai chu a ziazang viau mai thei; a remhriatthlak hle ka ti bawk. Gas bur ru ve mai mai!

Thianpa Muanpuia Punte te ZOFEST-ah an han lam chiam mai te kha mi mai mai nih nawmna tilangtu pakhat hi a ni ve hrim hrim a. Khatianga lam chiam avanga Zofate kan insuihkhawm thei dawn a nih phei chuan keini ang pa-pawl member phei hi chuan kan thawhhlawk zawk ngei ang le! ZOFEST 2009 sawi takah chuan mi mai mai nih nawmna nemnghettu Mafaa Hauhnar nen kan han intawng leh pek a nih kha. Amah aia mi mai mai nih nuam ti lehzual ka sirah Thazuala (Beimatuala) a la awm bawk. Mahni lo maha inlak thupuifun ve tehlul nen, mi mai mai pahnihin min han karcheh meuh chuan keitein zia ka thup zo bik ta lo a nih kha! Pu L. Keivom-a'n thu a sawi dawn avangin chawhnu lam pawh Vanapa hall-ah ka la taptal hram hram a. Thu chu a sawi ta ngei a; rin lawk ang ngeiin a sawi tha ngiang mai, ngaihtuah zui tham leh khel zui tham pawh a ni. Nimahsela, ka kianga thu Thazuala’n mihlim ni awm taka 'amen' pe inti fahrana “Dik chiah” a lo ti ve tei vet te; sawihona huna mi zawng laia rin tlem ber maiin rinnaa dinngheh a tul thu a han sawi chiam te kha thisen sang natna chi khat chu a ni hrim hrim mai! Mafaa lahin thlarau pawlna dawng hauh si lovin ‘zahna kawn’ an tih ang chi hi a rawn kal pel tawh bawk a. Pu L. Keivom kha a va thutchilh sauh sauh a, ‘Bro..’ chu a va ti em lovang chu maw! Thlalakpui ve ka duh si a, a thutna atangin ka kai tho ta mai a. Lal Isuan “Tho la, i awngphah la la, kein kal rawh” a tih kha chu a hnai lo mai; a tho lo a, a tawlh hrut ringawt. China rama single-a thlalak tum ang a ni. Pu L Keivom nen chauha thla lak tum kan ni nain, hei, a tak a lo chhuak a, sir kil khata hi paratha chu ni se cheng nga man lai tura hlaiin Mafaa hmel pangkhing chu a lo la lan hram hi. Mahse huat thu-ah ka la lo. Heng zawng zawngte hian mi mai mai nih nawmzia min hriatchhuah nawntir thin a ni zawk!

Kum sawmhnih dawn liam ta khan kohhran thalai pawl pakhat hi Australia-ah khawmpui chhimin an zuk kal a; an kal hmain thianpa Robina (thawk khat laia zaipawl lar deuh conductor a ni kher lo mai thei!) pek chuan a kalpui turte hnenah, “Tumahin second-hand thawmhnaw hak loh tur. Sap ram kan thlen hunah ‘hei chu ka hak hnu, hei pawh’ an lo ti palh ang” a tifiam a. A nih duh hmel viau leh pek. Amah vek hian British Airways-a ear-phone hi a rawn paipawn ru haw a, a thiante'n, “Engati nge i lak ngawt? Min man phah ang e?” an ti a. Ani chuan, “Man lo ang, ka kalpuite hmel hi an han en ang che u ang a, in mawl hmel ema min ngaithiam mai ang,” a ti then a. Aizawl an rawn thlen hnu chuan hawhah an dil an dil leh mai mawle! Ani mi mai mai kha!

|um khat chu Sikkim tlawh turin chanchinbumi sawmthum rual zet hi kan zin chhuak a; a hmingin team leader ka ni ve a. Kolasib-a editor pakhat (tunlai tih danin hming-thups) pek khu a thiante'n a kam nam titi kha an lo zahpui deuh thin a; keini'n kan hlimpui tehreng nen. Bus hlira Gangtok thleng thaka kal kha kan ni a, kan rimtawng tlang a ni ang; kohhran thalai hruaitu pakhatin zing dar 2 vela a thianpa bula, “Khawi maw peg khat chu,” a tih ri hi a lo hria a; ani pek chuan ring deuhin a lo sawi chhawnsak a, kan thiana chu a kimki duk mai mawle. Mi mai mai ni ve hek lo, zu in kha atan sual a ni tlat si a. Mi mai mai han ni ve teh se aw, tu mitmei mah veng lovin a tlak ve piap mai tur lah ni! Siliguri khaw daiah khawfing chah hma deuhin kan ding a; editor phawk deuh pakhat chu kawngsirah hian a lo inthiar ngawt pek a. |hiante'n, “Kha eng nge i tih ?” an han ti a. Ani chuan, “Ka e fiam!” zu ti sam et a. MJA president Pu K Sapdanga pawh a awm ve a; mahse ani chu a ni lo. Chu editor chu MJA OB zinga mi pawh a ni lo a; member ve mai mai a ni tlat. President chu ni se a ‘e fiam’ ngam hauh lo ang. Chu, mi mai mai nih chu nuam deuh asin; thianten ek in awm lo pui zawnga an ip tang tang laiin a tlingtla fel der mawle.

Khawthlang pa pakhat (hming thups) pawhin a ti alawm, “ Kan hun lai khan lawmnu te nen kan feh haw hi lui teah kan han insil a, an mal no deuh te kha kan it lo pawh a ni bik lo. Nimahsela, khatih hun lai kha chuan nula ngai nih chu vanram kai lohna an ti miau a, kan chetsualpui ngam ngai lo. Tunah ve lem ‘rinna lo chuan…’ te an ti leh ta mai mai si a, ka haw ngawt mai” a ti a. Ka khawngaih roh ngawt mai!

Khaih, mi pawi ka sawi leh tan dawn tlat mai, duh tawk teh ang. Chhiartute'n a va ho mai mai in ti dawn tih ka hre reng; mahse keini ang mi mai mai ina kan ziah mai maite chu thil ho mai mai bak a nih loh nakah! “Ve mai mai a” lo ti mai teh unnnn…… Ka lawm e. Deuh thlap chuanin leeeee!

Related Posts :