Vairengte-in kal zel tum "Kan thiam ang angin hma kan la ang"

October ni 10, 2009 khan Vairengte Co-ordination Committee chuan thuchhuah an siam a, Vairengte Police Station sakna tur sum sorkarin Saitual-a a 'divert' chu chang let leh ngei turin an dinna ngaiah an la ding reng tih an puang.

"Kan thiam ang angin hma kan la tawh a, kan la hlawhtling lo a. Kan thiam ang anga hma lak zel kan tum," tiin an hruaitu pakhat chuan Zozam Weekly a hrilh.

Police Station sakna tur divert dahkir leh tura sorkar kar nana inthlahrung tak chunga Total Bandh an neihah an hruaitu mi 12 chu man niin, jail-ah tantir ni mah se September ni 25-ah hruaitu an inthlang tha tih an sawi a, “Kan dinna ngaiah kan la ding reng a ni tih Zoram mipui hmaah kan puangzar e,” tiin thuchhuahah chuan an tarlang a ni.

"Zoram mipui tawrh tir kan duh lo a, a tir atangin chuti zawnga kal loh hram kan tum a. Mahse, tih ngaihna a awm tak ngang loh avangin Total Bandh kan huaihawt ta a, Zoram mipuiin an lo tuar a nih chuan pawi kan ti. Kan dinna ngaiah kan la ding a, kan thiam ang angin hma ka la zel ang," tiin an pawl hruaitu pakhat chuan a sawi.

Joint VC, Vairengte-in an hruaitu mi 12 jail-a tangte chhuah an nih theihna tura home minister hnena thupha an chawia dilna an thlen chu lawmawm an tih rualin, mi 12 chhuah tura sawi a nih laia mi 5 chu Court tura la tih an la ni tho chu hriatthiam harsa an tih thu thuchhuahah chuan an tarlang bawk.

"VC te hian ngaihdam chu an dil ngei a, mahse, Vairengte Police Station thuam thatna tur divert kan pawm loh vangin ngaihdam an dil lo, National Highway kan dan avang zawkin ngaihdam an dil," tiin an hruaitu pakhat chuan hemi chungchang hi a sawi a ni.

Vairengte Co-ordination Committee hian September ni 21-ah khan total bandh an huaihawt a, hetah hian police te nen pawh an inpawmchilh nghe nghe. Silai a puak a, tear gas te pawh hman a ni.

Total Bandh neihah police te'n mipui kut an thlak hmasa niin October ni 10-a an thuchhuahah chuan an tarlang a, hmeichhiate pawh kutthlak an ni leh mimal in chhung thlenga tear gas vawm lut luiah police te an puh.

Vairengte mipuite chunga sorkar chet dan chu democracy ram sorkar tih chi-a an ngaih loh thu te, democracy sorkar danin a phal ang chen chenah rorelna dik a awm theih nan Vairengte Police Station sakna tur sum divert chu changlet leh ngei turin a tawp thlenga kal zel an tum thu Vairengte Coordination Committee thuchhuah chuan a tarlang a ni.

"Kan inlungrual; mipui lam atang phei chuan Vairengte Chhantu pawl din tum a ni hial a, din lo turin kan inthlem zawk a ni," tiin an pawl hruaitu thar pakhat chuan Zozam Weekly a hrilh.

"Kan sorkar hotute'n political party thenkhat fuihpawrh anga min sawi chhen hi mak kan ti. Vairengte Chhantu din kan duh loh chhan pawh hi political party an tel thei ang tih kan hlauh vang zawk a ni," a ti bawk.

"Vairengte Police Station thuam thatna tur sum an divert a, chumi changlet tura beih chu kan tih tur ve rengah kan ngai. Chutianga kan beih avanga min dem an awm hi mak kan ti. Sum hi nikum October thlaa tihfel a ni daih tawh a, Saitual Police Station hi thuam that ngai tak tak se hna an thawk daih tawh ang. Tul miah lovah kan chanai pawhpen an tum a, chumi hnu-ah 'uihum zat lek' te min han ti hi na kan ti khawp mai," a ti bawk.

Related Posts :