Thalaite hmakhua a eng lo

Hnathawktu tam ber chu mahni hna bak ngaihtuah pha lo leh tuamhlawmtu sorkar mamawh ngawih ngawih an ni. A then phei chu an thawh tur thlenga ngaihtuahsak ngai an ni hial ang. Mi ramah pawh chutiang chu an dinhmun a nih ve tho a rinawm. Chutiang chu a nih avangin khawvel hian employment leh labour welfare hi a ngai pawimawh a, department/ministry lian pawh a ni thin reng a ni.

Mizoram sorkar pawhin heti lam buaipui tura ngaih, labour and employment department a nei ve a, mahse, he department hi a hmingin a ding ve ngawr ngawr a ni ber. A thawktute chuan tih tur leh thawh tur a tam thu an sawi a, mahse, department ngaihsak hlawh lo tak a ni thung. Labour welfare a ni emaw, employment thil a ni emaw, he department kuta tla chuan ngaihsak a hlawh lo a, thawh tur tam tak awm mah se a thawktu tur an awm mumal lo zawk.

"He department hian hna a ngah a, a mawhphurhna hi sang tak a ni. Mahse, a mawhphurhna hi a hlen lo deuh vek ti hialin a sawi theih ang. A pawimawhna kan la hre lo a, thalaite enkawltu tur, hna zawnpuitu tur a nihna leh hnathawktute humtu tur a nihna kan hre miau lo a, chumi kawngah ber kan hlawhtlin loh chuan ram tan pawh hmasawn a har khawpin ka ring," tiin official pakhat chuan a sawi.

Sorkar hnathawkte hlawha ram economy innghat a nih avangin thalai eizawnna mamawh tan, khawsaknaa standard living nei pha bawk tur chuan sorkar hna bak beisei tur a awm lo tiin a sawi theih ang. Hetih lai hian sorkar chuan hemi kawnga pui thei ber tur employment exchange chu a theih chen chenah pumpelh a chak emaw a tih theih thung. Hna lak dawnin sorkarin hnaruak a nei tih thalai hna zawng mekte hnena hriattirtu tur ber employment exchange hriattir a ni lo fo. Indaih takin an awm ang a, danin thuneihna a pek angin sorkarin hnathawktu a neih dan te an chhui chiang lutuk ang tih hlauin indaih lo deuh hian a awm tir a ni mai awm mang e, tih theih turin thawktu an indaih lo a, an dil belh pawhin pek an ni ngai lo.

"Tunhma chuan tun ai hian kan indaih zawk thin a. Hna pawh kan thawk thei zawk deuh. Mahse, officer thenkhat an pension a, a then vanduai an lo awm bawk a. Kan dil belh pawhin min dang zel bawk si...," tiin labour and employment officer pakhat chuan beidawn hmel takin a sawi. "Kan frustrate a ni," officer pakhat phei chuan a ti tawl mai!

Officer pakhat chuan an department-a thawktu pakhat chu hnaa a luhnaah chiah pension-in a chhuak leh niin a sawi nghe nghe. Hnathawktute dinhmun enzuitu tur department berah hnathawhnaa tiphur theitu tur a awm lo a, hnathawktute'n boruak nuam takah hna an thawh theih nana thawktu tur department-a thawkte chu an hnual (frustrate) fo a nih chu!

Thalaite ngaihthah an nihna chu
Labour and employment deptt. hian Mizoramah chuan employment lamah hriat a hlawh ber niin a lang. Hna zawng laite inziahluhna hmun tiin mi tam tak chuan kan hre awm e. Hetia hna (employment) lama hriat a hlawh hi tunhma chuan thil vanneih thlak tak pawh a ni mai thei, tunah erawh state-ah pawh puitling rual kan nih tawh avangin hei hi lungchhiat thlak lamah a kal tawh thung. Sorkar laipuiah chuan ministry of labour a awm a, state puitlingte chuan labour department an nei thin. Mizoramah erawh hna zawn kawnga thalaite kaihruaitu tur, employment nena kai kawpin labour & employment deptt tiin kan vuah a, department te tak te, department mawm lo berte zinga mi a ni.

Ram hi eng nge a niha, hnam pawh eng nge a nih chiah tih ngaihtuaha, mipui te'n eizawnna an neih hi a pawimawh a, chumi atan chuan sorkar hian a theih chin chinah a tanpui tur a ni, tih hi mitthiamte ngaihdan a ni. India sorkar chuan The Employment Exchanges (Compulsory Notification of Vacancies) Act a siam a, private pawh ni se mi 25 aia tam ruai chuan an hnaruakte hi employment exchange an hriattir tur a ni, a ti hial. Chutiang khatiang mite chu an la tur a ni, a ti lo. Khua leh tuiin employment opportunity tha ber a nei tur a ni, a ti a ni zawk. Privatisation hi khua leh tui laka sorkar inthiarfihlimna tur a ni lo, private-a thawkte hi puiin a enkawl tlat tur a ni. Mizoramah erawh chutiang kan ngaihtuah lo; private-a thawkte chu duh duha ban theih an ni a, an hlawh pawh a ruaitute thu thu a ni mai! The Employment Exchanges (Compulsory Notification of Vacancies) Act hman ve chu a la hla hle.

Department hrang hrangin hnathawktu neia an insawi zat leh a tak taka hlawh a pek zatte hi a inmil em tih thlengin labour and employment deptt. hian a enfiah thin tur a ni, dan chuan a ti bawk.

Private hnuaia ni emaw, sorkar hnuai a ni emaw, an hnathawhna hmun chu mihring khawsakna awm a ni em? Eng dinhmunah nge an din? Mihring awm dan tur pangngaia hnathawktute an awm theihna tura hma la turin a ti bawk. Ran leh khawl ang maia mihring inchhawr a remti lo. Khua leh tui, mihring tlawm ber atanga a sang ber thlengin sorkar chuan a hmangaih tur a ni. Chutiang chu The Employment Exchanges (Compulsory Notification of Vacancies) Act chuan a phut a, labour & employment deptt.-in an lekkawh tur a ni.

Mahse, Mizoramah chuan labour & employment deptt. chu hnathawk thei dinhmunah a ding lo; a mawhphurhna sang hle mah se sakei ha nei lo ang chauh a ni!

He department hi Aizawl, Lunglei, Saiha leh Champhai District-ah te an inzarpharh a, district hrang hrang enkawltu tur DEO (District Employment Officer) erawh pathum chauh an awm. Employment Officer-in Lunglei-ah 'charge' a la a, DEO enkawl chu district 3 chauh a awm tihna tluk a ni.

Employment Officer 1 a awm a, chu chuan, tarlan tawh angin, Lunglei-ah DEO charge a la. Employment Officer hi The Employment Exchanges (Compulsory Notification of Vacancies) Act lekkawhtu tur a ni a, chuti a nih chuan Mizoramah hnathawktute enkawltu tur Employment Officer an awm lo tihna tluk a ni thei ang.

Labour & Employment Deptt. hi thalai - hna zawng laite enkawla tanpuitu tur an ni. Thalaite chu career counselling an pe ang a, an tui zawng leh chumi hna an thawh theih nan an pui ang. Chumi atan chuan guidance room te, library changtluk tawk tak te leh thil hrang hrang an mamawh ang. Mahse, a mihring zawngin a ni emaw, a bungrua leh hmanrua zawngin a ni emaw, Mizorama labour & employment deptt. chuan chutiang atana thil pawimawh chu an nei lo fai vek a ni ber! An tih theih tawk chu employment exchange-a registration ti duhte lo buaipui a ni mai! Registration tite chuan hna an hmu em tih chu ngaihtuah fe tham a la ni leh ta nghal a!

Thalaite tana he department mawh lian tak chu Mizoram sorkar hnuaiah employment exchange kaltlang lova hna a awm leh awm loh enfiah hi a ni. The Employment Exchanges (Compulsory Notification of Vacancies) Act-in employment exchange kaltlang lova hna lak a khap a, mahse, tarlan tawh angin Mizoramah chuan chumi thlithlaitu tur Employment Officer an awm lo!

Department hrang hranga thawktu awm zat an hre kar tur a ni a, thawktute hna leh thiamna lama an dinhmun, an zir san zawng te an chhinchhiah thlap reng tur a ni. A ngheta thawk zat leh MR-a thawk zat te, mihring mamawh belh zat te leh post thar siam ngai zat thlengin an chhinchhiah tur a ni a, department hrang hrangte hian chutiang zawng zawngah chuan monthly report leh quarterly report an siam ziah tur a ni bawk. Mahse, department hrang hrangte hian hei hi an ngai pawimawh lo em em a, zawm an awm meuh lo. A lekkawhtu tur ber labour & employment deptt lah an indaih lo lutuk a, an tan hna tlin ngaihna a awm lo.

Tichuan, department hrang hrangte'n report rawn pe hlawm lo mah se an theih ang angin labour & employment deptt. chuan chutiang thil vel chu an la khawm ve a, danin a phut angin India sorkar hnenah an thawn thla ta thin a ni. New Delhi-a DGET (Directorate General of Employment and Training) hnenah an thawn thin. Mahse, an thil thawn thlak hi dik ngaihna a awm lo, an tlin tawk an thawn ve a ni ber a, a dik lo ang tih hi hemi chungchanga biakpawh department official-te pawhin an pha lo. District tinah DEO awpna hnuaiah Employment Officer te'n chu'ng chu an thawk tur a ni a, mahse, Mizoram pumah DEO 3 leh EO 1 chauh an awm. Aizawlah hian EO post 3 a awm a, a mihring erawh an awm lo. Chutiang chu a nih avangin hna thawk tak tak thei dinhmunah an ding lo.

Pawi ta chu - chu an thil thawn thlak chu India sorkarin plan siam nan bera a lo hmang si hi a ni! Mizoram tan chuan statistic dik lo hmangin India sorkar hian plan a siam thin tihna a ni ber. Chu chuan employment bawk a nghawng a, hna zawng laite'n chhanna an hmuh chu 'sorkar hna chauh beisei suh u' tih a ni ni tin ta mai! "Mizoram sorkar hi hnathawktu la lo turin a intiam a, chumi atan chuan India sorkar nen MoU an sign a, chu chu politics-a inbeihna ber pawh a ni. Mahse, DGET-a kan report thawn hi a pawimawh zawk chu ni hialin ka hria. MoU hi sign eng ang mah ila hetah hnathawk tur kan mamawh phawt chuan tuman min dal thei lo. Employment thilah report dik lo kan thehlut a, chu chu hna lak tihartu zawk chu ni berin ka hria," tiin official pakhat chuan hemi chungchang hi a sawi.

Labour & employment deptt. hi thuang thumin an inthen a - Employment Service, Labour Welfare leh Craftman's Training tein. Craftman's Training hian ITI an enkawl a, Labour Welfare-ah phei chuan tunah hian Mizoramin labour officer pakhat mah a nei lo. Thawktute hi empoyment service mi leh sa an ni deuh ber a, employment bik enkawl tur pawha an indaih loh em em lai hian labour lam te chu an han hmui leh ta nghal! A ngaihna a awm lo a ni ber.

'Labour' han tih hian a huam zau hle a, Mizorama sorkar hnathawk ni lo, eizawnna peng hrang hranga thawkte hi kawng engemaw talin a huam deuh vek ang. Tunlaiah hna a vang tawh hle a, thalai tam tak hi hna remchang apiang thawkin an inhlawh thin. Chu'ng mite chuan thlavang hauhtu an nei lo a, an inhlawhna hmunah an thi a nih pawhin zangnadawmna an dawng ngai lo.

Dan-ah chuan, miin mi 20 chin a chhawr dawn a nih chuan labour & employment deptt-ah registration a ti phawt tur a ni. Department lamin an hnathawhna hmun chu a him leh him loh te, anmahni ruaitute'n an tihduhdah leh tihduhdah loh te an enfiah reng ang. Chutiang ti tur chu Mizoramah an awm lo a, mahni hna pawh tlin lo chung chunga thawk employment officer-te kutah chu'ng chu a awm mek!

Labour & Employment Deptt. hian labour rules 7 an approve ve tawh a, chu chu hnathawktute himna tura tih a ni. Mahse, bawhzuia lekkawhtu tur an awm lo. |halai engemaw zatin ni tinin hlim lo takin mahni hnathawhna hmun an pan thin tih hria ram hruaitu an awm ang em? A nih loh leh thalaite mamawh employment ngai pawimawh tak taktu ram hruaitu Mizoram hian a nei em? Tun dinhmunah chuan thalaite hmakhua hi a thim hle a ni.

Related Posts :