Made in Japan - Kansai International Airport

¢ C Lalawmpuia

Kan ram retheih dàn leh kan thawh nêp sizia ngaihtuah h chuan, rethei thawveng kan ang ber a. Kan kamchhuak lenzia ngaihtuah phei chuan, kutdawh chapo kan ang zual a. Tanpui theitu tán pawh tanpui châkawm kan ni lo. Hmabâk sâwn leh changkan duhtu, mahni dinhmuna lungawi zo lo, sâwn belh tùra pên peih si loh nun hi sakhaw lama kan thlarau nun thleng hian kan chhawm lût a ang thìn. Mi taima leh thawkrimte chanchin kan sawi khu chuk a. Thu hriam leh dengkhawng kan insawihuaisiak a. Zawh zâwk tùr kawng sawi si lovin pensan tùr kawng kan inhrilh a. A thlâkna tha zâwk hre chuang si lovin kalphung pangngai sawisel kan insawisiak a ni ta ber. Chutih laiin a sawi huai leh a sawi náte lah hmahruaitu atána pên chhuak hmasa an ni leh meuh si lo. Dam chhûng rei lo tëah hian mi chunga lèn kan duh thìn a. Dinhmun tha leh hmasâwnna kawng kan ûm theuh a. Chutih rualin dam chhûng rei lo tëah bawk hian hah fál tùra han ä fál ngam kan awm leh chuang si lo.

Heti ang hi kan dinhmun nia a lan miau avàng hian ram hmasâwn leh changkang, thawkrimte thawh chhuah chhuanawm tak tak hi ngaihnawm ti takin chhiar chhiar ila. A chuan hnuai atanga chung lam thlir hi leilung kan chàm chhûng hian kan dinhmun tùra ruat seat-ah ngai mai ila. A hahdamthlâk phian ang.

Kan rama sorkar hna, sumdawn hna leh kut hna thawktute hian ni khatah hian darkar eng zât fakau nge kan thawh ang le? Sorkar hnaah ngat phei chuan a thawk sáng leh a chelh lian apiang an äwl emaw tih mai tùr a ni thìn. Engpawhnise, he’ng kan dinhmun mékte hi engti kawng maha kan thlawh khûm ngawt loh tùr ni rih mah se, eng tikah emaw zawng hawi kir hauh lova kan pelh hun a her chhuak ve mahna! Thawhrimna hi chawlhna nuam a nih thü kan hre ta fo bawk a, thangchhuah lëm lova pialral luh theihna rilru hi zawng engtikah emaw chuan kan la bàn ve ngei ang.

Keini’n kan lo ral ngamtlâk ve deuh ngawt thin, Japan-hote nen khi chuan hmél hmai leh pianphunga kan inanna mai lo hi chu kan danglam nasa ngawt mai. An ram hrim hrim khi kan ram ai chuan a lian hlë a. Mizoram lêt 13 chuang mah a ni. Kham khawp kan ngah hleih theih loh, buhfai, alu, thingpui leh thlai rah chi hrang hrang an thar chhuak tam hlë a. Thliarkar ang maia tuipui hual vêl a nih avàng khian sangha chi tin an ngah hlë bawk. An ram hualtu tuipui tui atang khian sangha chauh an chaw lût lo va. Tui tha chakna hmanga an power siam chhuah khi an ram industry mei nuntu pawimawh ber pakhat a ni. An thil siam chhuahna hmun ropui tak tak atang khian lirthei chi hrang hrang, kháwl lian chi tinréng atanga të nawi ber thlengin ram danga thawn chhuah tham tehmeuh an siam chhuak a. Lawng lian sak leh car siam chhuahah phei chuan a ber nihna an hauh reng mai. Khawvêl sumdawnna bazar hi an ta neih a ni deuh ber tawh a. Technology tih hlek lahin rilruin Japan a tin nghâl lo thei lo. Khawvêla TV set awm zawng zawng hmun thuma thena hmun khat hi Japan siam a ni, an ti hial thìn. An thil siam chhuahte lah a tha tih piah lama ro tling an ni zël a. Keini ngei pawhin kan hmuh phâk chin eng emawa Made in Japan tih a chuan tawh hi chuan kan roh êm êm zël mai. Keh thei dawm tak hian kan dawm zui a. A chhe zâwk tùr leh tlo lo zâwk tùra kan ngaih sa ran, Made in India tih angreng chu dimdawi kan tum leh lawi si lo. Made in Japan kan ngaihsanzia hi zawng Burma sumdawngho hi a hre chiang páwl tak an ni ngei ang. Nuai reh mai theih Made in Japan thlengin min leitir min leitir thei tlat thìn.

An khawpui, Tokyo khi khawvêl khawpui liante zínga pakhat a ni ve a. La kal lo tán pawh engkim a felfai thü leh a kawp a thuaha thil tinréng a awm thü hi chu hmuhna tùr a tam khawp mai. He khawpuia telephone awm zawng zawng hi Africa khawmualpuia telephone awm zawng zawng aiin a tam zâwk a ni, an ti hial thìn.

Khi ramah khian pianphunga kan anpui, san záwngah lah keini aia päwng chuang lote’n taima leh rim takin hna an thawk a. Kum tam hrehawm tuarin an tha leh tui an lo séng a. Tunah zet chuan kan ban phâk aia sáng daih an ban pha ta bîk tlat a ni. Japan rama zirlai pakhat, kum 16 chauha upa, Shingo Horie-a, High School kai mék chuan ‘tiang hian a ni tin hun hman dàn a sawi a. Zíng dár 7:00-ah an sikul pan tùrin rel a man ziah a. Darkar khat vêl hnûah an sikul a va thleng a. Nileng thaka sikul kaiin tläi bànah rei lo të a thiante nen an han infiam zawk a. Relah bawk haw lehin zàn dár 8:00 vêlah an in a thleng leh thìn. In a thlen hnû darkar 2/3 vêl chu homework tih nán a’n hmang zui leh a. Han intawllenna hun dang a nei ngai lo. High School tha taka zawh a, eizawnna tùra hna tha tak a hmuh theih nán University tha bera kal chhunzawm chu a suangtuahna lian ber a ni.

Zirlai an nih atang rënga an hun hman dàn chuti ang chu a nih miau avàngin hmasâwnna kawng an tán zawn hranpa a ngai lo va. Hlawhtlinna kawng inhrilh a ngai hek lo. Hmasâwn lo thei lovin hun an hmang a ni zâwk a. Vawiin thlenga khawvêl pum huap zirlai, Science leh Mathematics thiam filawr zíngah pawh Japan zirlaite chu tel ta fo mah se, a mawh lëm lo. Khawvêl ram changkang 12 zíngah pawh ram ropui bera kan ngaih, USA khûmin pakhatna an ni leh thìn.

Páwl hniam zâwk atanga an sikul invawn dàn an uluk êm êm a. Sipai invawn ang hial a ni thìn. Uniform mai bâkah zirlaite inchei dàn chenin an duh fir thei hlë bawk. Thununna hnuaia enkawl mah ni se, naupangte leh zirtirtute kár a tha êm êm tho va. Nu leh pa ang hialin naupangte pawhin an zirtirtute chu an en thìn. America mi, Japan rama zirtirtu pakhat, Matthew Low-a pawhin, “Heti ang taka zirtirtu leh zirlai, chhûngkaw inpawh ang chiaha an inpawhna hi ka la hmu ngai lo,” a ti hial a ni.

A náwlpui anga an thawhrimna hmun, Japan ramah khian an rim luat avànga an tawrhna sawi tùr a váng khawp mai. Thatchhiatna leh dawngdahna hi thawhrimna ai chuan kan chhiatpui nasa hlë zâwk thìn a lo ni. Chanchin ngaihnawm lo tak tak leh tualthih thu bengverh tak tak a awm ngai lo a ni bîk hauh lo va. Mahni lo intihlum tâwk pawh an awm fo thìn. Chu’ng mite zíngah chuan mahni nih tum ang thleng pha ta lo, an tum ang tak dinhmun luah zo leh lo, rilru hrehawm leh mahni inzahpui avànga intihlum an tam ber a. |hangtharho zíngah a hluar zual nghe nghe. An intihhlum duh chhan pawh hi a nêp lo angreng hlë a ni. Hnathawh kawngah pawh mihring taksa chaknain a phâk bâk thleng an thawk ta mai em ni, tih mai tùra sawi tùr ting chu an awm ngei mai.

Company lian angreng taka thawk, Mitsuru Hosobe-a, kum 24 chauha upa pawh a hna thawhna hmunah tûk chhuah hun pangngai atanga zàn dár 10:00 thleng rimtawng takin a thawk thìn a. Tûk khat chu hnungzang ná leh pum náin a harh hlawl mai. A nawmsam loh êm avàng chuan chumi ní chu chawlh a la ta nghe nghe a. Mahse, an hotupa ber chuan zawmthaw satliahah ngaiin a hnathawh pangngai aia rim zâwk a thawhtir ta hlauh thung a. Chawlhkar khat a thawk zui leh hman chauh tihin hriatna thazam tha lova taksa zeng titihin a awm der mai. Loh theih lohin a hna pawh a bansan ta nghe nghe a. Eng emaw chen hnûah Tele computing educational company lamah a thawk ve leh ta thung a. Chutah erawh chuan a thawhna hmasa ang êma rim a ngaih tâk loh avàngin a taksa tha lo lai pawh a rawn tha chho leh thei ta a ni.

Kum 50 zeta upa, Company pakhata an President pawh kum 15 a thawh chhûng zawngin kum tin hlâwkna an hmuh belh zël a. Mahse, a kum leh a lo inher chhuah chuan rin loh takin an hloh ta tlat. A rilru hrehawm lutuk chu rilru lam doctor rawn ngai hialin a awm a. A hna bansan a, Tokyo vêla Taxi Driver tan mai a duh thü a sawi hial a ni.

February ni 9, 1982 khán Japan thlawhna, DC-8 an tih chu Tokyo khawpuia Haneda thlawhna tumhmunah a tum dáwn mék a. Mahse, mak tak maiin vawilehkhatah a inher thut a. Khaw chhak lam Tokyo Bay-ah a han inkhawh lût bawrh mai. Hemi tum hian a chuang mi 174 zínga 24-in nunna an hloh phah ta nghe nghe. A hnu lama an han zawh chuan chu thlawhna khalhtu, Seiji Katagiri-a chuan a tum dáwn lai tak khán, ‘Thi rawh, thi rawh,’ tih hi a thinglungah a rawn ri tlut tlut mai niin a sawi a. Chuvànga chesual ta chu an lo ni. Hei pawh hi a hna thawhnaa a taksa rim lutuk vàngin a rilru a buai ta thut niin an sawi.

Company pakhat Manager hna chelh mék pawh an hotupain Branch tenáu leh chengker zâwka awm tùrin a ti thut mai a. Chutia an chhûngkaw khawsak han danglam dâwrh tùr chuan an fanu pasal neihna tùr tibuai dáwna hriain nu ber chu a mangang nasa hlë. A pu thü leh a nupui thü avànga rilru hah tawngkawng, chu Manager chu a inawkhlum ta ngawt mai bawk a ni.

He’ngte erawh hi chu an thawhrim avànga an hmasâwnna hmuh ngaihtuah chuan a ve lekfang a ni chauh zâwk.

Tun dinhmunah phei chuan khawvêl thiamna leh finna thang zëlah engkim mai hi kháwl hmangin an thawk zo a ni ber tawh a. Thlan chhuaka thawh chi phei chu a awm ta meuh lo, tih theih hial a ni ta. Tun lai hunah chuan thangthar naupang zâwkte pawh rual ute ang êm kha chuan an rim ta lo niin a lang a. Chutih laiin hranghlui upa zâwkte chuan thangtharte chu thatchhe zo tâah an ngai ve mék bawk. Toshiba Corporation-a an executive pakhat pawhin, “Zirtirna mumal tak an dawn chuan thangtharte pawh hian tun hmá ang tho khán an la thawk rim thei tho tùr a ni,” tiin thangtharte thawhrim loh mawlh a hlauh thü a sawi a. Sony Corporation-a an executive pakhat pawhin, |hangthar thil hrilh chu hnam dang biak ang hlauh a ni tawh,” tiin taimâkna kawngah thangtharte chu tlahniam hlëin a hmu ve bawk. Hmasâwnna avàngin rual ute leh naupang zâwkte ngaihdan a inpawt tan ta hial a ni.

Kum 1960 bawr chho vêlah kha chuan Japan rama an international airport lian ber chu Tokyo khawpuia mi kha a ni deuh mai a. Sumdawnna leh thil siam chhuahna lama hmá an han lâk tak tak pawh khán, an ram chhûng hmun hla tak tak atang pawhin an thil siamte thawn chhuak tùra Tokyo international airport an rawn pan kha a ngai reng mai. Tokyo thlen nán ngawt pawh tha leh tui an séng hnemin hun tam tak an khawhral lo thei lo va. Chutih lai chuan chhim lam Kansai Region an tih huam chhûnga awm, Osaka leh Kobe khawpuite phei chu thil siam chhuahna hmunpui tak tak an lo chang ta thuai bawk si. Km.500 chuang féa hlá, Tokyo khawpui han pan chu a sensothlâkin an hun khawhral ngawt pawh sum tam tak hu a ni ta zël mai a ni.

Chu’ng thilte avàng chuan Kansai Region huam chhûnga international airport siam theih dàn tùr hi kum 1968 chawhma lam atang daih khán an lo dap tan tawh a. Amaherawhchu, sawi rîk a nih atang phatin chu’ng lai lo neitute chuan ram a tihchhiat tùr ngaihtuahin an do nghâl bur si. A hmunhmá tùr an hmu mai hleithei lo.

Hun a liam zël a, an mamawhna lah a sáng telh telh bawk. Mamawh si, siamna hmun tùr nei lovin an awm reng mai a. A tàwpa tàwpah zawng an mamawhna chuan a nawr na bawk a, ram tichhe si lova Kansai International Airport siamna hmun tùr an hre chhuak ta. A harsa emaw, harsa lo emaw, a bâk a awm thei chuang lo. Tuifinriatah, a dawl tâwk tùr chhun khah a, a chunga airport sak a ni mai. Ram äwl remchang nei miau hek lo!

Chu hna danglam tak thawk tùr chuan ruahmanna an siam tan ta a. A hmun tùr thlang felin, Shenshu khawpui sir, Osaka Bay tuipui kam atanga Km. 5 vêl chu an tinzawn ta a ni.

Hmunhma remcháng tha pangngaia international airport din tum pawh thil namén a nih loh tehlul nen, a dawl tâwk tùr tuifinriat chhun khah ngai hmasa chu a hna hautak lai ber a ni a. Mahse, anni zawngin tithei tùrah an inngai miau mai. Puitlin zo tak ang maw?

Khawvêl hmun danga la tihchhin ngai loh, anmahni ngei pawhin an la hmelhriat loh hna thar a nih miau avàngin mi thiam chi hrang hrang, architect, engineer, scientist thiam filawr ber ber mai bâkah pianpui B.A. ka tih ang chenin tha leh remruatna an thawh khâwm ta a. A sak lai atanga an sak zawh hnu thlengin beisei ang lo thil chi hrang hrang leh buaina neuh neuh an tâwk tam hlë.

Hna hmasa ber atán tuipui chhûng leilung zir chian chu an han tan ta a. Kan chënna leilung hi che vêl thìn, thliarkar pil tih angreng pawh thleng fo a nih avàngin zir tùr a tam hlë. Lawng, tui chhûng lût mi, lei verhna leh kháwl chi hrang hrang hmangin an han zir a. An rin lâwk ang ngeiin tuipui chhûng leilung chu a lo sakhat lo nasa mai. Ft.60 vêl zeta thûk chu balu chhun vum ang chauh a lo ni a. Mahse, chu zawng an tán thil thar a ni lëm lo. Chuti ang hmunah chuan lei lian tak tak, rit tham tak tak an lo dawh kai fo tawh a, an beisei lâwk ang chiah zâwk a ni. A tihdan tùr pawh tu hrilh ngai lova an hriat sa bawk.

Chumi hnûah chuan hnuai lehzual lam an han chian chhunzawm leh ta a. Chutah zet zawng beisei phâk bâk an hmu ta tlat thung. A hnuai lam ft. 1,000 zet tùr pawh tiau lung tla khâwm mai a lo la ni. Engtin nge international airport, rit tham lutuk dawl zo tùra an tih tâk ang le? Chuti ang lei chungah chuan leivung tharlam han chhung khat ngawt pawh ni se, tiau lung inchhêk bit tak kára tui awmte chuan chhuahna an hre mai dáwn si lo va. Kum tam a vei pawhin a tla muk thei dáwn hauh lo.

An mi thiamho an buai leh ta map map a. A tihdan tùr ngaihtuahin enchhinna hrang hrang an bei leh ta. Rei vak lovah erawh chuan eng emaw tak an ngaituah chhuak leh ta mai. Tuipui chhuatah chuan awmze nei takin tui kawng an han siam thlur leh ta sung mai a. Awmze neia a han luan tâkah chuan hnuai lam tui awmte pawh zawi zawiin a inhawrh chhuak zël a. Chutih rual chuan lei thil nghet lo zual chu a inpaih chhuak zël bawk.

An duh ang tâwka a chhuat an sawngbawl hnû chuan a kuang khuah kual hna an tan ta a. Tui chhûng lûthote chuan cubic lung siam sa, ton 2 vêla rit chu tuipui chhûngah insi lo deuh chauhin an rem kual tan ta a. Hmabâk an sâwn zël a. Tha leh tui tam tak séngin tuipui zawl atanga ft.40 zet an rem ta der mai.

Chumi hnu lam chu a hna a ziaawm ta deuh chungin tha erawh an thawh tan tak tak dáwn chauh a la ni. A kuang chhuh khah hna hautak ngiang mai chu an tan leh ta a. Khawimaw lai in sakna vüng chhuah satliaha han chhun khah rual lah a ni si lo. Tuipui kam hnaih remchánga tláng bawk pathum chu Bulldozer, JCB chi hrang hrangin chhum lo chat lovin an ker leh ta mup mup a. A vüng thiarin motor lian chi tinréng an insul zut zut bawk. Tuipui kama motor lian leivung chheh khâwm chu lawng lianin an thliarkar siamchawp lamah a phur ve leh thung a. An tui kuang khuah kualah chuan a va chhüng ta zung zung mai a ni. Ni tin darkar 24, chawlhkár khata ni 7, chawlh lailâwk awm hauh lova thawkin leivung ringawt an buaipui mup mup a. Chuti chungin kum hnih thawh daih zet a lo ni. Cubic feet maktaduai 750 zet an chhun hnû chuan an duh angin a khat zo ta chauh a. Tuipui kam hnäia tlang pathum erawh hmuh tùr awm lovin a pil bo ve ta thung!

A hmunhmá an peih ta bawk a, tunah zawng an mamawh êm êm, Kansai International airport sak hna tak tak chu an tan thei ta. A chhuat an rem dàn thleng hian sawi tùr tam tak a awm a. An engineer-te hnathawh ropui tak hi kan engineer-te tán pawh hahípa sawi tham tling tùr a ni. Thlawhna tum kawng, khualzin luh khâwmna inpui, bungraw lian tinréng chhawp luhna in chi hrang hrang an han sa ta a. Kan hriat fo thin, Mitsubishi, Hitachi, Otis, Toshiba, Fujitec leh Schindler Company-te pawhin tha an thawh nasa hlë.

Thlawhna tum kawng hi hmun renchem avàngin pakhat chauh an siam a, metre 3,500-a sei a ni. A inpui ber erawh khawvêla thlawhtheihna tumhmun inpui lian ber a ni ta thung. Chhawng 20 zeta sáng, Km. 1.7-a sei a ni hem mai. A hmáwr tàwp atanga a lehlam tàwp thleng tùrin darkar 2 vêl kal a ngai dáwn a nih chu!

Chhawng tinah hian khualchhawn office a awm thleh thluah a. Chhawng hnihnaah Bank a awm bawk a. Chhawng tinah card hmanga pawisa lâk chhuahna kháwl, ATM an tih mai leh pawisa thlengna hmun a awm fer fur bawk.

ATM (automated teller machine) hi bum theih loh leh dik lo thei lo hiala ngaih a ni a. Mahse, kháwl chhûnga pawisa rem dàn an tihsual hlauh chuan a dik lo nasa thei hlë tho a lo ni.

Hman deuh maiah pawh khán Mumbai-a civil contractor pakhat, Mohammad Jamshed Khan-a chuan ATM atanga a pawisa lâk chhuah chu a’n chhiar a. Rs.6,000 zet a lo ni reng mai! Mak ti zetin a’n chhiar nawn leh a, Rs.6,000 chu a ni ngei si. A bul lawka a thianpa, Faisal Mukhi-a hnênah chuan, “|hianpa, lo kal thuai teh. Rs.1,200 chauh lâk chhuah ka tum a, Rs.6,000 zet a rawn chhuak a nia!,” a han ti hlut a. Mukhi-a chuan a lo awi lo nasa. “A number i hmet sual a ni ngei ngei ang. Chuti ang a awm thei lo vang,” a lo ti a. Khan-a lah chuan, “Teuh lo, ka hmet sual lo tawp,” tih pahin a ATM Card chu an thun leh a. Rs.1,000 lâk chhuahna tùr number an hmet zawm leh zat a. Chutah, kháwl chu a chïk tät tät a, Rs.5,000 zet a rawn chhuak leh ta hlawl mai. Lehkha themah lah chuan, ‘Rs.1,000 i la chhuak,’ tih a rawn inziak ang lawi bawk si.

“A va mak ve maw le. Khaw’nge, ka’n ti leh ngat teh ang,” tih pahin Rs.2,000 lâk chhuahna tùr an hmet leh a. Rs.10,000 zet a rawn chhuak leh ta. Chu kháwl chu a lo dik awzawng lo. Rs.500 note chu Rs.100 chhiarin a chhiar a lo ni.

Mukhi-a erawh chuan a la ringhlel ta fo va. “I ATM Card kha a dik lo a ni ang. Khawi maw, ka Card hian kan ti ve chhin,” tih pahin Rs.1,000 lâk chhuahna tùr an hmet ve leh a. A ngai të bawkin Rs.5,000 a rawn chhuak leh ta.

Mi dang awm hnaih loh lai tak a ni a. Duh ni se chu mite thian dùn chuan an la chhuak teuh thei ngei ang. Mahse, chu lai hnaia police duty pakhat chu an ko ta thuai a. Thil awmdàn hrilhin a hmuh lai ngei chuan Rs.500 lâk chhuahna tùr an han hmet leh a. Rs.2,500 a lo chhuak leh ta a ni.

“He kháwl hi lo veng reng la, tumah lo hmantir suh,” tih pahin autorickshaw an phar ding a. Chu lai ATM kháwl neitu bank hnäi ber, Km.2 vêla hlá chu an pan ta vang vang a. Bank Manager hnêna an pawisa lâk chhuah zawng zawng hlan pahin thil awmdàn an va hrilh ta a ni.

Khan-a leh Mukhi-a te thian dùn hi Thanga leh Liana te ang maia rinawm an lo ni ve tlat mai!

Kansai international airport hi khawpui tenau a ni hawt a. Dak In a awm a, han chawlh hahdamna tùr thingpui dawr chi hrang hrang a awm teuh bawk. Bazar duh tán lah lei sen loh thil chi hrang hrang, chanchinbu thar ber ber thlengin a awm a. He’ng lai bazara an thil zawrhte hi duty free an tih, chhiah lâk loh chi an ni nghe nghe. Eng emaw thulha pan mai tùr Damdawi In tenau a la awm cheu bawk a. Pianphunga rualbanlote tán pawh inthiarna chenin a awm hrang thlap bawk. Car hman hawh tùr duh tán pawh harsatna a awm chuang lo. Japaren, Matsuda, Nippon, Nissan, Toyota leh Orix car nalh chi hrang hrang a man pêka khalh chhuah mai tur a inhung tlar thut bawk.

Kansai international airport hi an sak tan atanga kum riat, September ni 4, 1994 khán an hawng ta a. A siamna hmunhmá rem lo êm êm, a han din tâka remcháng ta êm êm si a nih avàng hian khar lailâwk hleih theih loh, chhum lo chat lova hawn a ni ta reng a ni.

Sawi tawh angin Kansai international airport siam hna hi an la tihchhin ngai loh, an tána thil thar ve tho a ni a. Chutih laiin an ram lah khawvêla lirnghing tuar nasa ber páwl a ni bawk si. An engineer-te pawh an ngaih a ngam zân thei lawk lo va. An leivung chhun khah kha a muk tha tâwk lovang tih an hlauthawng a ni ber.

Hlauhthawn rûk ang ngeiin kum khat leh thla thum chauh an hawng hman tihah, 1995 khán tûk khat chu lir a rawn nghing ta mai rëng a. Lir nghing tanna lah airport atanga mél 18 chauh a ni lehnghâl. Thuneitute’n endik tùra Kansai international airport an va thlen chuan vanneihthlâk takin eng pawi tehchiam mah a lo thleng lo va. Khualzin hlauthawng leh kawng dung lo khi rih riah chauh lo chu an inpui ber pawh hmelhem a lo awm lo. Hnuai lam an chhun khahnaah khán lirnghing thawk na lutuk tùr dang zo khawpin lung lian an lo dah tam khat niin an ngai a ni.

Kum thum a vei leh tihin Osaka Bay chu thlipui rapthlâk takin a rawn nuai lehpek a. Chutih lai chuan Kansai international airport chhuat chu tuilian dawng pha lo chauh, tuipui zawl atanga ft.17 vêla sáng a ni nghe nghe a. Mahse, chu pawh chu chhiatna engmah thleng lovin a lo pal dai leh thei a. Fimkhur thüah thlipui thawh chhûng an khar tih mai loh, tläi lamah phei chuan dàn pangngaiin an hawng chhunzawm leh nghâl a ni.

Made in Japan nge nge, a chhuanawmin a roh tlâk a, a tlo deuh thin zawng a ni!

Related Posts :