A LEM RAM!

¢ HC Vanlalruata

Chhut mite chuan Mizoramah hian a mi cheng aia tam daih, a let li (4) aia tlemlo hi piangthar an awm ngei tawh an ring a. Vawi 12 piangthar-te leh a aia tam daihte pawh an awm nawk tawh miau avangin ‘Piangthar population’ chu a mihring tak awm zat ai hian a awm tam ngei tur a ni. Vawi khat mah Camping/Campaign/Crusade leh Bethel tih vela la kal miahlo hi chu kut zungtanga chhiar tham lek an nih ka ring. Khua han hawi mai hian Biak In kan ngah em em a, khawhawi zau theihna deuh atanga en phei chuan Medieval Period an tih hunlaia Europe-a Biak In sak an uar em em lai ang mai kha niawm tak a ni. A sakna atana kan sum sen zat hi belhkhawm ta ila, kan ram tihhmasawnna fe tham a ni ngei ang.

Chutiang bawk chuan Mizorama chhungkaw awm zat aiin ration card a tam zawk a, ration card-a mihring awm zat belhkhawm chu Mizoram mipui let engemawzat fe a nih thu an sawi thin. Chu chu a dik zia tunhnai khan sorkar meuhvin a puang ta a nih kha. Khawsak kawnga rethei zual, rethei teh fung aia khawsa hniam, saptawnga Below Poverty Line an tih mai, a lam tawi BPL tih phei chu nal tak taka kan lam theih tawh hi kan ngah ngang mai bawk. He’ng zingah hian Television, telephone (Landline) leh Refrigerator neite pawh an awm an ti a. Aizawl veng pakhat khawtlang hruaitu hlunin min hrilh dan phei chuan BPL inhlawhfaknaa tel zinga tam zawk chu mobile nei an ni a. Hnathawh lai laiin thlan lung phenah an in sms zek zek mai a ni, a ti.

Sorkar laipuiin thingtlanga chengte kum khata ni 100 aia tlemlo an inhlawh theihna tur ruahmanna tha zet mai a duan, NREGS hnuaia inhlawhfa thei turte chhinchhiahna Job Card chu a khaw mihring aia tam fe siam a ni tih tunhnaiah hmuhchhuah leh a ni ta a. A zahthlak leh zel ta ngawt mai. Hnam depde, kuttling lova thiltih dawna phut zawk nei hauhlo hnam hlemhle tak kan nihna kan inmualpho ta zel chu a ni mai a. Amah Pu A. Thanglura’n, “Tawngkam thlum mang silo zun chang tithlum mai,” tia amah leh amah a inkah fiam ang deuh hi kan ni zo ta a. Buh leh bal leh thlai thar chhuahte, thil siam chhuahte ngah mang si lovin thil lem lam kan ngah a. Kristian kan tam em em a, mahse mi rinawm, a taka Krista zuitu (Kristian) kan tlem leh bawk si a nih hi.

Biak Ina kal kan la thahnem hle. A bik takin Pathianni Sande Sikul kai hunlai phei chuan mahni in rauhsan thak hi tam zawk kan la ni awm e. Chutih lai chuan kan thianpa pakhat huan neih kawnga hun tam tak lo hmanga tuna eizawnna dang khawih ta chuan, “Inkhawm taima leh piangthar ho hian ka huan ka thlawh laiin min pui lova, hnathawh hun zawngah ka mal tan a, mahse, thlai a thar hunah chuan min lo lak pui ve thin. Anmahni hi ka hria a, an kohhrana inhmang, inkhawm thin leh piangthar inti an ni,” a ti.

Hman deuh tawh khan Presbyterian Kohhran hnuaia Family Counselling lama mawhphurtu Reverend kha ka thiannu chanchinbumi nen a pisa-ah kan tlawh a. Kei pek chuan, “Camping, Campaign, Crusade leh Bethel tih ang vel hi chu khap tawh teh u. Kristian lem kan chher chhuak nasa tawh lutuk,” ka’n ti ve ngawt a. Kan Pastor chuan ama mimal chuan ka thil sawi chu a dik a tih tho thu sawi chungin, “A thlakna kan la nei rihlo a ni,” tiin min chhang beidawng nia!

Mizoramah chuan Kohhran hian kan nun a kaihruai nasa ber tih hi zep rual a ni lo. Mahse, kohhran hruaitu zingah ‘A dum chu a dum, a var chu a var’ tingam an tlem avangin kan heti zo ta. Kohhran hian kohhran mite thlarau nun lam kaihhruai hna mai thawk tawh lovin Social Front te a din a, MPF te dinin inthlan chungchang thlenga politics thila inrawlh hi hnaah a neih ta. Chutihlai chuan ama huangchhunga hnathawktu pawimawhte’n pension fund chiahpuamin an fate hmangin hlawkna an tel tia puhna thu lungrun tak erawh chu an ngawihpui veng veng thei thung. Mahni inchhung khur vawng fel theilo (Unable to set one’s house in order) te khan midang an vei em em a. Mahni fate ruihhlo bawiha tangte ngaihthah thaka thlarau bote veia hla tak taka feh chhuak ka hmuh nupa ang chi hi Kohhran hruaitu thenkhat awm dan phung chu a ni.

Hetia Kohhran ka bitum chhan hi eng dang vang mah a ni lo. Rev Zairema’n eirukna chungchanga court hiala a zualko tum a, “Ka pu, hetianga i thiltih hi kohhran hruaitu hlun tih atan chuan a mawilo tiin an beilet che a, enge i ngaihdan?” tia ka zawh tum a, “Sap missionary-te’n min chhuahsan dawn a kan ram chu Mizo kohhran hruaitute kuta him taka awm tura an beisei thu nena min thlah kha ka la hre reng a, tuna heti taka corruption lo hluar ta ka hmuh hian mawhphurtu ka nihna ka inhria a, a thenfai hna pawh ka mawhah ka la lo theilo a ni,” a tih kha a thih hnu hian ka hre reng thin. Khatiang mawh la ngam kan neih tak loh avang hian lem chang kan tam a, thil lem a tam a. Hmasawnna tak tak leh thil tha erawh chu a tlem si a. Kristian ram nia kan inchhalna hi engmah lo mai, darbenthek ri ang mai a lo ni ta em ni chu le?

Related Posts :