Thenzawl kawngin Hnahthial sumdawnna tichhia

¢ K Lalrochana

Lunglei leh Aizawl inkara Maxi Cab service leh khualzinte chu Thenzawl kawng lama an tlan tak deuh vek avangin tunhmaa Hnahthial mipui tam tak sumdawnna chu a a tawp ti tih der tawh.

Thenzawl kawng siamthat a nih hma zawng khan Aizawl leh Lunglei inkara khualzin veivakte hi Hnahthial lamah an tlan vek thin a, hetih hunlaia Hnahthial mipui tam tak sumdawnna hlawk tak chu hotel siam a ni. Zing dar 9 leh dar 10 inkar velah hi chuan Hnahthial Electric Veng pheiah Maxi Cab, Bus leh lirthei chi hrang hrang a ding tlar tuar thin a, hotel siamtute pawh khualzin veivakte ei tur siamin mawngvawmba ang maiin an buai vat vat thin.

Tunah erawh Hnahthiala hotel nghaktute chuan dawrtu a lawi an nei tawh lo a, an neih chhun chu MST Bus-a chuangte leh Night Bus-a chuang te deuh chiah an ni tawh.

Hnahthial-a hotel lar tak, Cabin Hotel neitunu chuan, "Tunah chuan hotel siam hian awmzia a nei tawh lo, eizawnna dang kan ngaihtuah mai a ngai tawh a ni," tiin dawrtu an neih tawh mang loh thu a sawi.

"Tuna kan innghahna awmchhun chu MST Bus leh Night Bus hi a ni mai tawh a, MST Bus lah hian pasenger an nei tlem thei em em bawk si a, Night Bus lah hi inkal chhawk ang deuh roh hian an tlan a, Thingsai lam atanga lo kal lah hi an tlem thei bawk si a, kan sumdawnna hian awmzia a nei tawh lo khawp mai," a ti bawk.

Cabin Hotel neitunu hian tunhma chuan an hotel-a chawlte ei atan ni khat danah, sa Kg 20 vel an siam thin niin a sawi a, tunah chuan sa hi kar khatah Kg 15 pawh an siam tling tawh mang lo niin a sawi.

"Dawrtu kan nei tawh lo, hotel pawh hi tihtawp mai kan duh. Kan thian thenkhat te phei chuan an titawp tawh. Tlemte hian kan la ti hram hram mai a ni," a ti.

Hetianga khualzin veivak an tlem tak avang hian Kohhrana thawhlawm an thawh thin pawh a tlem phah hle niin Cabin Hotel neitu hian a sawi a, "Tunhma chuan Pathian Ram zauna (PRZ) te hi Rs 2500 atanga Rs 3000 inkar te kan thawh ve thei a, tunah chuan Rs 500 kan tlin lui hram hram a ni ber tawh. A hahthlak khawp mai," a ti.

Mi tam takin Thenzawl kawng siam hna hi a muang lutuk nia an sawi laiin, Cabin Hotel neitunu hi chuan chak a ti ve thung a, "Thenzawl road lama hma an la chak lutuk hi kan tuar a ni ber, a ti.

"District te pawh min pe ve a, heng te hi a takin tipuitling se chuan tlem chuan awmzia kan nei leh deuh mahna. Kan sorkar hian district min pek hi a takin kalpui tawh se kan duh khawp ma," tiin hotel neitunu hian a sawi.

Hetihrual hian Haulawng to Hnahthial road siam hna chu chak taka kalpui theih ni se a duh thu sawiin, "Helai kawng hi a tlang hunah chuan Saiha lama kal tur te hi helamah an lo chawl thei ang a, kan tan chuan a tha hle dawn a ni" a ti.

Thenzawl lama khualzin kal ta hi hotel neitute chauhin an tuar lo a, kawngsira theiden zuartute thlengin an tuar vek. Kawngsira thu thin nu pakhat chuan, "Tunah chuan dawrtu kan nei tawh mang lo, a hausaho Thenzawl lamah an kal vek tawh si a, helama khualzin lo kal chhun hi chu rethei te te chauh an si a, dawrtu kan nei tawh lo," a ti.

Hnahthial atanga chanchinbu chhuak lar tak, Hnahthial Today editor Lalbuatsaiha pawhin lirthei veivak a tlem tawh thu tiang hian Zozam Weekly a hrilh: "Kawngkama awm kan ni a, tunhma kha chuan ninawm khawpin lirthei tlan vel kha a tam a, tunah chuan a awm zeuh zeuh chauh a ni tawh. Motor lianho hi an tlan a, a bak chu hmuh tur a vang tawh khawp mai," tiin.

Cabin Hotel neitunu ang bawkin Hnahthial District chu a nih tur ang takin kalpui thuai ni se a duh thu sawiin, Haulawng to Hnahthial road pawh siam zo thuai se a duh thu a sawi bawk.

Thenzawl road hi tunah hian siam zawh a la nih loh avangin helai kawng hi hawn a la ni lo a, hetihlai hian kawng a intawi hleih em avangin Lunglei leh Aizawl inkara lirthei tlan te chu Thenzawl lamah hian an kal deuh vek tawh a, tunhmaa Hnahthial Hotel a lun ang chiah khan Thenzawl Hotel te chu a lun thei hle a, hotel siam an la tam loh avangin an zo meuh lo zawk niin Maxi Cab Driver pakhat chuan a sawi.

Thenzawl lama lirthei tlan hi Hnahthial chauhin an tuar lo a, Aizawl leh Hnahthial inkara khaw awm zawng zawng deuhthaw hian an tuar a ni ber. Kawngsira thlai leh thei chi hrang hrang zuar thin te pawhin dawrtu an nei tlem tawh a, Bazar shed pawh a ruak a ni deuh ber tawh.

Hetihlai hian Thenzawl road-a khaw hrang hrangte chuan hlawkna an tel mek thung a, minister-in helai phei khua an tlawh reng reng pawhin VC lamin minister-te hnena an dil zin ber chu Bazar Shed niin Congress worker pakhat chuan a sawi.

Thenzawl lama khualzin veivakho an tlan deuh vek tawh lai hian he kawng hi motor lian tlanna atan chuan hman theih a la ni lo a, motor lianho chu Hnahthial lamah an la tlan ve reng tho a ni.

Related Posts :