Thiltlangah gas a put

¢ K Lalrochana

Aizawl leh Lunglei inkar kawng, Aizawl atanga kala Hnahthial thlen hmaa khaw pakhat - Thiltlangah gas a put nia sawi a ni a, Oil India lamin an enfiah dawn.


Thiltlanga gas put chu August ni 29-ah khan Oil India Ltd. Dy. Director C Laldinkima chuan a hmun-ah a enfiah a, Laboratory lama test turin Gas sample hi a la nghal.

Gas putna hmun a enfiah hnu hian Laldinkima hian Hnahthial-ah thuthar lakhawmtute a kawm nghal a, Mizorama oil zawng tura an lo luhnaah an Company chu Mizo mipuite'n an lo lawm thiam hle niin a sawi.

Mipuiin an lo awm thiam em avangin an company pawh an lawm hle tih a sawi a, Mizoram anga a ram neitu mipuiten an tawiawm thatna hmun hi state dangah a awm lo niin a sawi bawk.

Laldinkima chuan Thiltlang bula Gas put hi hnimhnah tawihin a siam pawh a nih theih tho thu a sawi a, hetih rual hian helai lei hnuaiah hian Gas lipui pawh a awm theih tho thu a sawi.

Ama mimal ngaihdan chungchanga thuthar lakhawmtute zawhna chhangin Laldinkima chuan, "Kei chuan helai hmunah hian Gas hi a tam ka ring lem lo a, mahse Mizoram hi Oil tamna hmun tura ngaih a nih avangin Gas thahnem tak awm theihna chance pawh a awm tho," a ti.

Sample an lak te chu an test hnuah helai leihnuaia Gas leh Oil awm dan chu a chiang mai dawn niin a sawi bawk.

Laldinkima hian Gas awmna hnuaiah Oil a awm vek kher lo tih sawiin, Oil awmna chungah erawh Gas a awm deuh tlangpui tih a sawi a ni.

Thiltlangah pawh hian Oil a awm a nih chuan a laih hna an thawk dawn tih sawiin, "Hmanraw rit tak tak rawn phurh a ngaih avangin kawng siam te pawh a tul dawn a, chuvangin helai hmunah hian Oil a awm a nih pawhin lai tur chuan hun a la duh deuh ang," a ti.

Oil hi an laichhuak a nih chuan Mizoram sorkar nen inremna an siam angin Mizoram sorkar chuan Oil-ah 12% share a nei dawn tih sawiin, Gas-ah 10.5% a nei dawn tih a sawi bawk.

Oil laihchhuahte hi thlitfim turin phai lamah an phurh thlak zel phawt a ngai dawn tih sawiin, Gas erawh chu Mizoramah sawngbawl theih mai a nih thu a sawi.

Laldinkima hian Thiltlanga gas put ang hi Tlabung leh hmun dang atang pawhin report an dawng tih a sawi a, mahse report an dawnte hi an 'area' a nih loh avangin an enfiah lem lo tih a sawi a, Thiltlang erawh chu an 'area' a nih avanga rawn enfiah a nih thu a sawi.

Gas put lo hal hi a hlauhawm hran lo nia sawiin, "Hal loh pawhin a put reng dawn a, hmang tangkai thei an awm a nih chuan a pawina a awm hran lo," a ti.

Oil India Ltd. hotuten Thiltlang-a Gas put an en lai hian Lunglei District bawrhsap M Zohmingthangi pawhin a hmunah a kalchilh a ni.

Related Posts :