Comeback nei thut thei Tribal Power

¢ Fela Fanai

An band hming atangin an sukthlek chu a hriat nghal a, an music duhzawng pawh a chiang. Mizo music chawisanga Zofate rimawi khawvela min chawisangtu tiin an sawi ngam. Tribal Power chuan lam ang let leh turin hma lak zai an rel a, Zo rimawi chhulchhuak ngat min hlui thintute kha Zofate tan rawn kir leh an tum.

Thang khat lian zet an rimawi hi live-in a nawlpui chuan kan ngaithla mumal tawh lo a, ngaihthlak tur pawh a vang tawh. Tunhnai mai hian Jojo-i leh zaithiam dangte music-a lo chawmtute chuan insuihkhawm leh zai an rel niin sawi a ni a, thangthar tam takin an hming leh an chanchin an hriat, a taka an hmuh ngai tawh loh Tribal Power te chuan 'a nungchungin' Zofate awih leh ngai an duh. Mihring duhthusam hlawhtlinna erawh chunglam remruatna a ni.

Tribal Power te hi group danglam tak an ni tih chu sawinawn a ngai lo a, a tul anga rimawi lama tui te chhawmnung thin an ni. Kum a zirin Tribal Power kan hriat dan pawh a inang lo hu thei. Chu tak chu zo rimawi khawvela Pioneer an nihna pawh a ni reng a ni.

Tribal Power Original tia a sawi tur an awm a, a thachhangdawltu pawh an awm. Tribal Power poster hi siam dawn ila chi hnih a awm thei ngei ang. Mahse, hengho innghahna chu eng dang a ni lo a - Mizote music lama ke kan penna tura theihtawp chhuah a ni.

Music lama ngaihdan sawhsawn ngai miah lo, Zofate rimawi lam kan hmasawnna tur a theitawp a tan la reng Lalawmpuia, OP-a tih zofa te'n kan hriat lar chuan zofate live music lama kan hnufual a hlau a, chutiang music chhawmnung zel tur chuan tunah hian theihtawp a chhuah a, Mizo mipuite'n an music tun thlenga kan la ngaihthlak Tribal Power music chu tihnun tumin a thiante nen hma an la mek.

Tribal Power kan hriat ang kha chu an ni dawn tawh lo tih a chiang. Maitawka chu kohkir theih a ni tawh lo a, Truman-a lah ram dangah hnathawkin a awm tawh. Chutiang teh nuaih chu an ni ve tawh. Mahse, Zofate hmasawnna atan dinchhuah leh ngei an tum.

Tun hma ang erawh kha chuan an ri bung bung thei tawh lo a ni mai thei, tuna an kalphung turah hi chuan 'Unplugged' kan tih ang khan kal an tum tawh niin OP-a chuan a sawi a, theihtawp erawh chhuah an tum thung. Studio kutchhuak music leh track a zai lam ni lo, Live music ngata zaofate leh thang leh thar te chawmnun chu an duhthusam a ni.

Tun hnai mai khan Tribal Power hla hriat hlawh thin tak 'I Belh Pawn' tih chu Mizo zaithiam tharlam zinga mi Josephine Lalramengi chuan a rawn sa thar leh a, thangthar lehzual te karah a tla na hle, hei hian intuaithar leh chakna pawh a pe thui hle.

Jojo-i album tlangzarhnaah pawh amah OP-a ngei pawh hi a huhova zainaah a tel a, hei hian rimawi khawvel lamah a rawn kir leh tura ngaihna pawh a lian hle. Lianchiari, Dolma, Politician, I belh pawn, etc. ngaithla chat tana rawn kir hi an duh...

Related Posts :