SWINE FLU

¢ HC Vanlalruata

Vawk hritlang natna kan tih mai tuipuiral tawnga ‘Swine Flu’ emaw ‘H1N1’ hri an tih emaw kha kan hriat loh hlanin Mizoram a lo lut ve reng mai kha a ni a. Mi pahnih chauhvin an vei hman niin a lang a, chu’ngmite pawh vanneih thlak takin dam viahin an chhuak leh tawh a. Mipui erawh chu kan mangang phili hman thelh chu a nih kha le!

Khatianga Mizorama swine flu vei kan lo neih theih mai dan kha han chhui kir chuan sorkar vuaicha vangah a ngaih theih a. Falkawn khaw tlangval kha chu Silchar lam atanga kawnga rawn haw chho a ni a; kan lo hre hmaih palh a nih pawhin a awm a, sorkar dem theih a ni lo. Mahse, Lengpui Airport-a CRPF duty-in a vei ngawt mai kha chu a hun takah phailam atanga zin hawte kan endik lo tih chu a chiang a ni.

Health Department hotute sawi danah chuan thlawhna hmanga rawn thlawk lutte kha an chenna leh phone number-te la-in an ngaihven zui niawm tak a ni a. Mahse, an khawsik leh sik loh leh swine flu vei palh thei dinhmunah an ding em tih lo endik kha chu a vei hmuhchhuah hnu-ah deuh chauh kan tan niin a lang a. Khami hma khan zin haw tute emaw lak atangin kan CRPF tlangval khan a lo kai hman niin a rin theih. A chhan chu hetiang hritlang hri hi mi chak tha pangngai chuan engahmah an ngai hranpa lova, mi bawrhsawm deuhvin an kai erawh chuan an nat phah vak thei lawi si a ni.

Mexico leh US velah nasa takin an buaipui tawh a. India ramah pawh Pune velah chuan sorkar office leh zirna in an khar a. Chutih lai chuan kan sorkar department lam kha an vuaicha hret tih hi chu zep rual a ni lo. Doctor indaihloh chhuanlamin kan vuaicha a ni pakhat a. Chutih rual chuan han darh tak tak palh ta sela kan indaih loh leh zual tur zia kan ngaihtuah kimlo niin a lang. Pa pakhat inren lutuk, a damsam loh pawha inentirna tur sum hmang phallo, a huna a inentir loh avanga natna khirh tak tlai khaw hnu-a an hmuhchhuah leh si avanga sum tam tak seng ta an sawi ang chauh kan ni ang.

Kan la inpeih tawklohna chu swine flu vei pahnih kan hmuhchhuah chiah khan a lo lang a. Inringhlel leh khak test duh tan a lakna hmanrua kan lo nei tlem a. Chubakah darkar 24 chhung inhawng tura ngaih khak lakna atana vauchher Aizawl Civil Hospital-a pindan pakhat chu miin an pan thlawn hnem hle bawk. Kha khan rikrum thila kan inpeih lohzia a tilang chiang khawp mai. Hetih rual hian swine flu vei kan hmuh hnu kha chuan kan Health department pawh an harhin hma an la chak tha ta viau a. Mipui lamah ‘awareness’ a tha thawkhat bawk a, a darh tam hma-in kan thunun thei ta niin a lang a, a lawmawm khawp mai.

Mipui lama ‘awareness’ a tha kan tih rual khan tam tak chu tullovah kan chi-ai lua niin a lang thung. Kan Health Department hotute leh mithiamte’n boruaka leng a ni lova, a vei bula awmin a khuh/hahchhiau palhin metre khat dan velah a kai theih tih an sawi a. Tlang hrileng dang anga boruaka lenga khawlaia kai theih mai chi ang deuhvin hmaikawr kan vuah fur mai a. ‘Awareness’ lamah kan ‘over’ deuh mah mah a ni. Swine flu leh natna kaichhawn theih dang enkawltu doctor leh nurse te chuan an vuah tur a ni a. Hnathawhna hmunah te pawh a vei an awm hlauhthawn thu-ah vuah awm pawh a ni a, he natna vei chuan vuah ta sela midang kai chhawn theihna ‘chance’ a tlem sawt thei bawk. Two-wheeler khalh chunga vuahte, khawlai leng mai maiin kan vuah fur maite kha chu ralkhel hma tak hnam kan nih tilangtu pakhat a ni awm e.

Mizo thufingah ‘se bo hnu-a se kawngkhar ang’ tih a awm a. He thufing hi kan sorkar hotute hian an hriat reng fo a pawimawh khawp mai. Sap thufingin, “inven hi tihdam aiin a tha zawk” a tih ang chiah hi a ni. A hun taka kan chet chuan kan inveng thei a. A lo thlen pawha buai chiai lova awm theih dan chu lo inpeihlawkna (preparedness) hi a ni.

Swine flu kherlo pawh khawvel thila chhiat rupna (disaster) hmachhawn thut thei kan ni a. Chumi atan chuan kan inpeih em tih hi sorkar a inen fiah fo a tul. Silpouline sem piahlamah hian ‘Disaster Management’ chu a awm tih kan hriat a hun ta khawp mai. Mi tam tak hliam ta sela kan Hospital Emergency Department/Ward te hi a remchangin a tha tawk em? A zo ang em? tihte kan ngaihtuah a tul a. Khaw tinah mi chhanchhuah thiam (rescue worker) tur kan chher em tihte pawh kan inngaihtuah a tul. Lir na tak nghing chu sawiloh, bus accident-a mi 40 vel hliam buaipui tur ngawt pawh hian kan lo la inpeih tawk lovang tih a hlauhawm a ni.

Mipui lam pawh kan harh a hun. Swine Flu vanga kan chiai chiam ang deuh khan thiamna nei hran si lovin kan hawkdak hi chhanchhuah hna ti bahlah thei hian kan khawsa ang tih a hlauhawm a. Hemi kawngah hian nasa zawka inzirtirna pawh kan mamawh hle a ni. A thlen loh chuan a tha a, chhiatrupna thleng thei laka kan inbuatsaih that hi nunna tam tak chhan theihna a nih avangin a taka kan ngaih pawimawh hi a tul em em a ni.

Related Posts :