Vaivakawn Police ten Tualthahna Dangdai Chhui Chhuak

Thang khat lian vel zet Tanhril bul hnaiah a awm tawh a, Bihari a ni a, PHE hnuaia hnathawk a ni.

A in luah laiah thia chhar a ni a. Chhun dar 12 velah Vaivakawn Police te hriattir an ni.

A thian te’n an va hmuh lai hian a bed room leh choka indaidanna bulah tlu renga a lo awm chu an hmu a ni.

A tirah chuan IC Mishra hi zunthlum vei leh taksa hrisel vak lo a nih vangin lungphu chawl emaw an ti mai a. Mahse, police te’n an enchian hnuah a tukhumah hliam a tuar tih an hre ta a ni.

A thattu hnuhma a lang lo a, mahse, Mishra hi a chaw ei lai vela thah niin a lang.

Vaivakawn police atanga thudawn chuan, “Kan va thlen hnua kan enfiah chuan, hetiang thil a thlen lai hian Mishra hian chaw a ei mek niin a lang,” a ti.

“Chawei dawhkanah eitur a lo inchhawp sa a, a hmuiah pawh atta tlema lo la awm.” a ti bawk.

Vaivakawn Police te chuan he tualthahna hi ngawrh takin an chhui zui nghal a.

Forensic thiamte an chah thleng nghal a, chumi hnuah hnuchhui an tan ta. Mishra in an dapnaah hian khuma tuboh let reng chu an hmuchhuak a, heta tang hian tualthi a nih an ring nghet zual ta a ni.

“A tirah chuan a natna chi hrang hrang an sawi dan nen kan han chhui zawm a. Thisen sang leh zunthlum a lo ni bawk nen, tlusualah pawh a ngaih theih a. Mahse, fimkhur taka kan han enchian hnuah tualthi ngei a nih kan ringta a ni,” tiin thudawnna chuan Zozam Weekly a hrilh.

“Zanriah a ei lai takin a luhchilh niin a lang a. Atta nawi te a ngai ngaiin a la awm bawk nen kan ngaihtha ta lo a ni,” a ti bawk.

Mishra hi PHE Pump House-a thawk a ni. Helai velah hian kum 18 vel a awm tawh nia sawi a ni. A hriselna a that vak loh avangin hmun dang danga an sawn hnuah pawh helaiah hian an dah leh thin nia sawi a ni bawk.

Police officer pakhat chuan, “A tukhumah hian chhutna hmun hnihah a awm a, chu chu a thihpui a ni,” a ti.

“Mishra tualthih chungchang hi ni 28 chhun dar 12 rik hma deuh khan kan dawng a,” tia sawiin, “Kan buaipui nghal char char a. Pathianni khan a thattu hi kan man theita a ni,” a ti bawk.

Mishra thattu hi Saiha lam chhuak a ni. Police te’n an man hnuah inpuang zuiin Court-in a chungthu a rel ang.

Police officer pakhat chuan, “Kan buaipui rei ang reng a. A tirah chuan Tanhril leh a chhehvela awm te pawh thu zawh fiah turin kan ko khawm lo thei lo a,” tia sawiin, “Lung la an tam a, chung te chu kan ko khawm bawk a. A thattu tak hi a thah tuk hian a kal bo ta nghal a, kan chhui zui hnuah Pathianni khan kan man thei ta a ni,” a ti.

“Joseph Thanga hian Mobile Phone hlui tawh Rs 400/- a a lei chu Rs 700/- in hralh a tum a. Mahse, battery charge loh a nih vangin chulai vela charge theihna Power nei awm chhun Mishra inah hian kalin charge a dil niin a in sawi,” tiin police officer pakhat chuan an chhuichhuah dan a sawi..

“Mishra hian Charge a lo phal lo a, ani thinrim chuan hmun danga toboh chu lain Mishra hi a va luhchilh leh a, a chhu hlum ta a ni,” a ti.

Joseph hi lung laa inhlawh a ni a. Mishra a chhut hlum zan hian zu a rui nghe nghe.

Mishra a chhut hlum hnu hian Joseph hian a kalsan mai lo a, Mishra sum neih ang ang chu a la zui nghal a ni.

“Mishra in hi a dap viau a, pawisa fai Rs 600/- a laksak bawk. Chu bakah a mobile phone leh charger pawh a laksak bawk,” tiin police officer chuan a sawi.

“A tirah chuan rinhlelh mai tur pawh an awm lo. Mishra hian thisen leh zunthlum a lo vei bawk nen mahnia tlusualah pawh a ngaih theih a. Mahse, a in kan dap hnuah khuma tuboh lo awm ringawtte kan han hmuchhuak a, kan ngaih a tha ta lo a ni,” a ti bawk.

Jospeh Thanga hian ama thah a nih thu a puang vek tawh a, tunah hian Court-a inlan hun a nghak mek.

Related Posts :