City Park-ah Hringnun

Gate bulah chuan mi an ding bial laih a, an thawm chu a ring mai a ni lo, a phawhraw!


Anmahni hmuh loh chuan, an thawm atang ringawt chuan, an zingah hmeichhia an tel ve ang tih rin pawh a har ta ve ang; "Min cho elo?" tih te, "Ka rui bawk lo e..." tih vel chu an tawngkam chhuak a ni.

September ni 4 a ni a, Aizawl City Park gate bula ding bial laihte chu insual tumin an intin uaih uaih mai. Mipa rual khat an ni a, hmeichhe pahnih an tel bawk.

"Min cho elo?" an ti a, a hmeichhe pahnih chu a pawr pawrah an tang emaw tih tur a ni. Pakhat chuan, "I ruih ruih nen khatiang tea min han tih chule!" a ti a, pakhat zawk chuan, "Zawngi, 'i rui' te min han tih chule! Ka ruih ngai lohna a rei tawh..." a ti a, an inpawmchilh dawn ta mai.

An han intin zuau zuau a, a ben te pawh an inbeng. Mahse, mipaho chuan an lo thelh ta a nih kha.

A mipate dang chuang lo, a hmeichhe pahnih lah chuti bawk, tute ber nge insual tum tih pawh hriat a har.

An sirah chuan sikul naupang, uniform ha, tleirawl rual khat hian hmuhnawm ti takin an lo thlir a, an han nui leh rih thin.

Gate bula ding bial laihte chu rei vak lovah chuan an kaldarh ve mai. An han kaldarh hnu pawh chuan tute ber kha nge insual tum tih chu hriat mai theih a ni ta chuang lo. An inzui a, park chhung lam panin an phei diah diah mai. Thil an tiho nasa tih a rin theih.

A thlang lamah chuan sikul naupang, hmeichhe rual khat hi hlim em emin an inkawm a, a then pipu-ah an uai, a then an inbuk, a then an inum. An nui ri rawih rawih mai.

Chu'ng hmeichheho bul velah chuan naupang an lo inum a, an indehchan niin a lang. Tin, a piah lawka tawlhpahritah chuan naupang pahnih/pathum an lo tawlh ve bawk.

Tawlhpahrit chung zawn deuhah chuan thingzarah hian han thut hahdamna tur a awm a, thawveng ang reng tak, khawthlirna remchang tak a ni. Chutah chuan tlangval rual khat hi an thu a, an tit tui hle niin a lang.

Nehru-a lim bul vel leh a piah deuhah chuan naupang an inum nak nak mai. Midangin an rawn hmu ang tih hlau lo zeta zung ta tur tur tawk te pawh an awm. Tin, mahni inchhung ang maia ngaia kawr phelha vei terh terhte pawh an awm.

Nehru-a lim zawn, a hnung lamah chuan hlaphuahthiam Rokunga lim a awm a, pa pahnihin thla an lo lakpui mawlh mawlh mai. Rokunga lim hual vel chuan thutna tur an dawh a, chutah chuan tleirawl leh sikul naupang an thu. An inchhaih a, an nui leh dar dar thin. A sir lamah chuan sikul uniform ha chunga meizial lo zu pawt pawt an awm.

A sir lamah chuan thut chawlhna hmun, a chung nei pahnih a awm a, chu'nga thute chu puitling an ni.

Chu hmuna thute chu an tha a za lo hle niin a lang, a then phei chu an muthlu lawp lawp mai. Chutia lungmuang taka an thut lai chuan puitling rual khat an rawn thleng a, a thleng tharte chuan eng engemaw an zawt a, an indintir thul, a then an kaihrang bawk.

A thlengtharte chu excise sipai an lo ni a, ruihhlo an dap a lo ni.

An dapa te chuan ruihhlo an lo kawl chiang mai. Proxyvon te, zu te, No 4 te. Excise lamin chutia an han man takah chuan thenkhat chuan an thiante an puh a, "Ka ta a ni lo, he mi ta hi..." tia thiante puh ta chawt chawt an awm.

A then chuan "ka mobile ka tibo" an ti a, mahse, excise lam chuan zawn an phalsak lo chiang hle. An vawi khat intawnna a ni lo a, mizia an inhriatsak chiang tih a lang reng mai.

Excise sipaite chu hmeichhia leh mipa, 10 vel an ni a, he hmunah hian ruihhlo an 'check' thin a ni.

"Awmchilh reng chu a theih loh a, a khat mawi tawkin kan 'check' thin, a khat mawi tawk tihah a zing thei ang ber a ni zawk ang chu," tiin chu hmuna excise sipai pakhat chuan Zozam Weekly a hrilh.

"Dap reng a ngai, addict bakah a zuar an awm thin a, park an tibawlhhlawh," a ti bawk.

"Tun hnaiah tak hi chuan a ziaawm deuh emaw'n aw ka tia, ruihhlo hi chu a tam khawp mai, an inpe a, an zuar a, rui tur hrim hrima kal an awm a..."

Excise sipai dang pakhat hian a lo sawi zawm a:

"Sikul naupang thenkhat pawh hian tlanbo nan he park hi an hmang a, an rawn rui ve thei nasa..."

A sawi zawm zel a: "Thil charna lo rui ta mai mai tawk an awm a, correcting fluid te pawh an rui. In atangin sikul kal turin an chhuak a, sikul kal lovin an tlanbo a, he'ng lai velah hian an tal mai mai ta thin a," tiin.

Chutiang naupang an hmuh fuh chuan office-ah hruai hawin, phone hmangin an chhungte emaw an zirtirtute emaw an hrilh a, an rawm lam ta thin niin a sawi. Chutiangah chuan hmeichhia pawh an tel fo niin a sawi nghe nghe.

"Naupang fel tak tak, rawn teilut ve hrim hrim pawh an tam a, a fel lem lo pawh an tam a ni ber. Naupang zawng zawng hi sikul tlanbo an ni tihna a ni lo a, an rui thin tihna pawh a ni chuang lo. Mahse, nu leh pa tam tak hi chuan an fate hi helai hmunah hian eng tin nge an khawsak tih an hre pha lo chiang khawp mai," chu excise sipai chuan a ti.

"Naupang tam tak hi chu an rawn khawthawng a, tha deuhvin an rawn intithawveng thin. Chutiang chu an hriat lutuk," a ti bawk.

Nula leh tlangval, he hmuna hlim taka inkawm thin pawh an awm, an hlim dan a that leh that loh chu thuhran ni se.

"Hmeichhia leh mipa, he hmuna infawp hi ka hmu zeuh zeuh," tiin chanchinbumi pakhat chuan a sawi.

Khawi khuaah pawh park hi chu nula leh tlangval inrimna hmun a ni deuh zel tiin a sawi theih ang. Khawvel ram hla zawk chu sawi loh, Shillong leh Guwahati thleng, park-ah nula leh tlangval thu dun rial hmuh tur an awm deuh reng a, lo inkuang ta ngawih ngawih te, lo infawp ta mawlh mawlh tawk pawh hmuh tur an awm fo. Aizawla park awmchhun, Aizawl City Park-ah pawh chutiang chu a thleng fo. Mizote chu in lama inrim thin ni mah ila, thangtharte hi pawn lama inrim ngai lo an ni lo. He park hi pawn lama inrimna hmun pakhat chu a ni.

Thianghlim taka he hmuna inrim an awm; thingbuk hnuai thlahlel chi te hi awm ngai a nia, chutiang mite tan chuan hmun dang pan tur a vang khawp. Mahse, mi kan lo inhriat deuh zel avang hian mi ram ang em em chuan he hmuna inrim hi Mizo nula leh tlangval tan a rem lo deuh ang.

A then erawh chu he hmunah hian an infawp ngawng ngawng ta thin a, pipu-a inpawm chunga uai then nelh nelh, thlang lam hawi daih te pawh an awm thin. Tin, thingzara thut hahdamnaah pawh khan nula leh tlangval an infawp zeuh zeuh niin a kal thangte chuan an sawi.

He park hi chuti teh luain lun lo mah se khawvel hmun dang park-a thil thleng thin ang chu a thleng ve fo a ni mai awm e!

Related Posts :