Taxi intlanchhawk hian traffic tawt a sukiang dawn em?

¢ Vanlalremruata Tonson

Traffic tawt lutuk sutkian nan dan tur kan hriat chhun chu taxi intlanchhawk ni mai awm a ni. Sorkar hmasa pawh khan tih a lo tum tawh a, tihtlang chi niin an hre leh lo a ni chek ang chu an ti ta lo a nih kha.


Sorkar thar hian chak leh dan leh thil awmphung tur (law and order) kengkawh ngam anga inlantir a tum a ni mai thei, khati khawpa taxi-puten an do hnuah pawh tih a la tum leh tho chu a ni.

Mipui nawlpui pawh hian taxi intlanchhawk chu an thlawp emaw tih tur a ni. Driver chuan a ruaitute thu an zawm tur a ni, tih thawmte pawh hriat tur a awm.

Aizawl khawpui kawngpui tawt zia chu tlang hriat a ni a, ruahmanna tha a awm loh a, transport system thar a awm loh chuan kum 10 a liam leh hnuah phei chuan Aizawl khawpui hi chenna tlak a ni lo mai ang tih pawh a hlauhawm hlel lo ve.

Public transport system hi sorkar tan chuan luhaina tham a tling ve hrim hrim. India ram khawpui Delhi-ah pawh 1999 kha ni tain kha ka hria, inthlanpui an neih khan tuna an chief minister la ni zui zel Sheila Dixit inzawrhna ber chu public transport system tha zawk a ni. Metro railways system leh city bus tha zawkte a tichhuak a, fak pawh a hlawh hle nghe nghe. Sheila kha chu kei tak ngial pawhin, a chanchin hriat ka nei lo nain, ka lo ral ngaihsan ru ve fo mai. Delhi-a metro railway an tih dawn khan ka hriat dan a dik a nih chuan a senso tur kha cheng vaibelchhe 80,000 tling tura tih a ni. Mi thenkhat chuan metro railway neih ai chuan khawpui thar siam a hlawk zawka an rin thute national newspaper-ah te khan chhiar tur a awm hial a ni. A thu hrimah Delhi-ah te khu chuan slumber-te chauh emaw an hnawhchhuah thin kan ti a, a lo ni teuh lo. Kawngpui zauh nana in tha tak tak JCB-in a hai chhiat thlalak chanchinbuah hian hmuh tur a awm thin. Keini ai chuan an ngam huai deuh em ni chu ka hre lo.

Keiniah pawh inthlan laia inzawrhna tling em lo mah se public transport system hi sorkar luhaina khawp chu a tling ve ta a ni ang. Sorkar thar kan neih atanga transport department-in a buaipui ber chu public transport system hi a ni.

Taxi intlanchhawk hi sorkar hian kaltlangpui lui ta se tuna public transport-a harsatna kan tawh mek hi a sukiang takzet ang em, tih erawh chu ngaihtuah chian ngai tak a ni.

Traffic-a harsatna kan tawh mek hi taxi vang a ni chiah em? Lirthei, a rawng leh hmel inang tam ber chu a ni chiang mai. Mahse, traffic tawtna hmuna ding khawm tam ber chu an ni lo. Kawngpuia tlan an tam vang hrim hrima kawngpui an tihtawt chuan titlem mah ila mipui chuan kawngpuia kalna tur kan la mamawh tho dawn a nih hmel. A nih loh chuan chhuak tlem turin inzirtir ila.

Taxi a tlem avang hian khawlai chhuak kan tlem loh chuan public transport system thar kan mamawh dawn tihna a ni. Chhuak kan tlem a nih chuan human resource chhawr tangkai loh tam tak a awm dawn tihna a nih mai hmel bawk…!

Tuna kan kalphungah chuan kawng lun deuhah chuan Rs 10 te tein taxi chuan man hi kan inchawi tawm thin a; taxi hi intlanchhawk ni ta se hetiang tur hi a la awm tho ang em? A awm tho mai thei a, tlem erawh chu a tlem zawk fe ang a, taxi chuan man tihpun pawh a awl mai thei. Taxi-a kal thin mi tam tak tan chuan city bus chan a ngai ang. Tunah pawh tlai office ban leh sikul ban hun vel lai chuan city bus chuan hi naupang chumchiap deuh tan chuan a him lo emaw tih mai tur khawpin a tawt thin a nih hi. Chumi ai chuan a la tawt dawn a ni. City bus tam zawk mamawh belh turah a inngaih theih ang.

Taxi intlanchhawktir duhna a lo chhuah chhan ber chu a tam lutuk ni a kan hriat vang leh kan kawngpui hian a zo lo ni a kan hriat vang a ni. A dik viau mai. Mihring kan pung a, inkalpawh zung zungna tur pawh kan mamawh belh reng a ni. Taxi stand zawng zawngah hian a ding thei tura chhut zat let fe an ding ziah maithei. Sorkar hotuten taxi kan mamawh zat leh kan khawpui leh a kawngin a zawh tawk an chhut ngai lo chauh a ni lo, an ngaihtuahnaah hian a awm chhin ngai lo reng reng a nih duh hmel zawk.

Kan sorkar hotute hian taxi intlanchhawktir an sawi tak nain intlanchhawk a nih chuan permit thar pekchhuah a ni tawh lo ang tih tawngkam kan la hre miah lo nia maw le! Intlanchhawkin han thawl deuh se permit thar pekchhuah a nih reng tho chuan tun anga tawt tur hian kum nga kan mamawh miah lo ang. Dik tak chuan taxi hi Rs 2,50,000 bawr emaw a aia tlem emaw neiha sumdawnna bul tan ang chauh a ni. Bank-a Rs 2,50,000 deposit ai chuan taxi neih chu investment opportunity kan neih that pawl chu a ni mai. Mihring kan awm chuan sum chu a lo inkhawl thin chu a ni mai a, chuvangin eizawn nan ni lo sum peipun nana taxi neih hi kan la intihhmuh lohna tur chhan sawi mai theih a awm chiah lo. Chu chu kan khawpui hian a zo leh chuang kher lo ang.

Taxi kan indaih tawk kan neih loh chuan bus indaih tawk kan neih a ngai a, chumi kan nei lo lehzel a nih chuan private lirthei kan indaih tawk kan neih a ngai ang. Chu pawh kan ti thei lo fo a nih chuan awm mai mai ni mai. A enga pawh chu lo ti thei ta pawh ni ila chutiang transport system chu kan kawngpui hian a zawh a ngai. A nih loh chuan kan khawsaknaah hian mechanised transport system kan mamawh lo a ni tal ang. Kan hniam hle tihna pawh a ni bawk ang.

Kan mamawh ang transport system nei tur hian kan kawngpuiin a tlin lo tiin a sawi mai theih ka ring. A kawng hrim hrima chu a sirah tawn ve ve atanga tehin mi ram kawngpui aiin a te chhe lo a ni mai thei. A construction erawh chu a dik lo chiang hle thung. Kawngpui inpawhna laite (junction) hi lirthei kal a awm reng dawn a nih chuan midang tibuai loa tlan tlang theihna pakhat mah awm lo vek hi a ni a, a kual laite kual dan pawh lirthei tlan tam deuhna atan chuan a chhuanawm thlawt loh. Chuvangin traffic jam chungchangah emaw taxi intlanchhawk chungchang emaw permit pe chhuaktu transport department ringawt hi kan dem thei lo ang.

Kan kawngpui chanve dawn chu tute emaw a darkar bi te tea kan lei chhawntir a ngai a, a hmingah parking fee kan ti. Tlema kawngpui zau deuh lai pawh kan hnawh chep lo thei lo a ni. Hei hi pumpelh ngaihna a awm lo a ni ber. Kawngpui nen insi rengin in kan sa a, chutiang hmun thenkhat chu sumdawnna hmunah kan siam zui ta bawk. Hei hi mawhpuh tur kan zawng a nih chuan kawngpui siamtuteah hian kan traffic problem chu a la tawp chuang lo. Administration a kai leh tho. Mahse, kan khawpui a than thut a, mi changkang tlem azawngin RCC inte an sak tan theih lai hun ngaihtuah chuan kawngpui leh in inkar ram zuah a tul zia hi ram hruaitute tan pawh lo ngaihtuah phak a har khawp ang.

Tih theih pakhat awm chhun nia ka rin chu sorkar fawng vuantute hian taxi intlanchhawk tir tum chungchangah hian mawh kan phur vek a, kan thiam lo tlang a ni tih an pawm ngam hi a ni ang. Chumi hnuah chuan tuna Aizawl khawpui hi zauh emaw sawn chhuah emaw an duh a nih loha, dan leh order kengkawh ngam anga lan an duh bawk si chuan khawpui chhungah kan mamawh ang ram an acquire tur a nih hmel. Builum khua mah hmasawnna turin sawn chhuah an ni a, engah nge kan khawsakna awlsam zawkna tura Aizawl pa ram chu kan acquire ngam loh bik ang ni? Comfort leh luxury te chu economics-a a hlawkna tur chhut tel theih a ni ngai lo a, leitu turin a lei ngam leh ngam loh mai a ni. Mahse, felfai taka kal thei public transport system chu kan khawsak awlsam zawk nan chauh ni lovin kan economic activity atan pawh kan mamawh hle lo maw?

Keiin ka lo ngaihdan chuan taxi driver-te hian 'a hlawk lo em mai, intlanchhawk ang u', ti pawh ni se sorkar zawk hian 'intlanchhawk lul suh u, ti hram hram rawh u' ti zawk tur hi a ni. Chu chu law and order kenkawhna kawnga a inhmakhua theih dan hnaivai tak a nih ka ring. Aizawlah hian taxi eng zah chiah hi nge awm ka hre ve lo a, a tlem berah 3000 pawh lo awm se, intlanchhawk a nih chuan mipa thaza rual, zu in ve thei za tel fe nitin thawh tur nei lo an rawn awm belh dawn tihna a ni a, thil huphurh awm tak niin ka hria.

Taxi nei thei emaw permit dil thei chinte emaw khap ngam si lo hian a driver thaza rualte chu an han cho ta ngawt mai chu a ni ber mai em…? Mi retheite hmangaihtu sorkar tia sawi hian mi retheite a nek ngam ber dawn te hi a ang ka ti!

Mi thenkhat chuan nitina an side income ve kha a tlahniam ang tih an hlau niin an sawi a. A tlangpuiin taxi driver hian ni khatah Rs 200 vel bak an 'phawi' meuh lo tih hi ka hriat ve thin dan a ni a. Intlanchhawk hi a tha zawk tak tak dawn a nih chuan Rs 500 phawi hi a har kher lo ang. An tlanchhuah hi a tam zawk fe dawn a nia.

Related Posts :