INTLAN CHHAWK

¢ HC Vanlalruata

Hman deuh lawk khan thim thet thetah naupang damlo na ang reng tak phurin Mission Veng Kawltheihuan bula Aizawl Hospital and Research Centre-ah hian ka inkhalh phei a. Hospital luh pheina tur kawng sira Taxi Stand-ah chuan taxi pahnih chauh an din avangin ka hmanhmawh tawh chuan taxi stand awllai-ah chuan ka car chu ka din tir a. Damlo chu kan han hruai chhuak a, heta thawk doctor-te hi ka nel tak takte an nih hlawm avangin va kalpui lawka ka mi hruai dangte leh doctor-te inhmelhriattir zuaia ka car chu taxi stand nilo laia dah leh mai ka tum rilru a. Mahse, chutiang chu kan taxi pu lo ding chhun pakhat chuan a lo remti ikhaw lo mai.

Reilote tak tak ding zawk mai tur ka nih thu leh damlo chu an casualty-a va hruailuh lawka car chu dahthat leh mai tum ka ni tih leh taxi dang pawh lokal thut se dinna hmun awl a tam tho tih ka sawifiah dawn ngial pawhin kan tlangvala chuan chaw ei tuina khawp zan a lo lem tawh bawk si a, a hrethiam duh ta hlek lo mai a. A chet duh danah chuan kei pawh chu Damdawiina ka luh ve mai a hlauhawm tak avangin a dawih zawk na na na chu ka ding sawn ta poh a. Ka damlo phurh kha pawna dintir reng tlak a nilo chungin a phurtu leh zelin hliam ka tawrh ve ai chuan tiin baklengin ka insawn ta a ni.

Hemi lo pawh hi taxi driver laka tawn hriat sawi chhuah nuamlo deuh deuh chu ka tawng nual tawh a. Mahse, chumi vanga taxi driver-te pawngpaw hmumawha an intlanchhawk tura sorkar rawtna hi thlawp ka ni hranpa lo. Car pangngai khalha inhlawha thla khata Rs 2,000 atanga Rs 2,500 hlawh aia Rs 1,000 emaw Rs 1,500 vel hlawha taxi khalh duh zawk pawh ka hre nual a, keimah ngei pawhin ka tawng tawh. Taxi neitute hian sawi duh sela chu an hre teuh anga anmahni’n an khalha nitina a sum thawh chhuah leh driver an chhawra an chhun luh zat pawh sawi tur ngaihnawm tak an nei hlawm ang.

Engpawhnise, taxi driver-te sum chungchanga an rinawm leh rinawm loh lam sawi ka tum lova. Mi rinawm tak tak an kuh tul thovin ka ring zawk. Chulam ai chuan kan Mizoram kalphunga fello lian, intlanchhawk chungchang dodalna-in ka thinlung a rawn khawih zawka hi a ni sawiho ka chak chu ni.

Taxi neitute hian intlan chhawk a nih hian thla khata an driver-te hlawh hi an tihhniam phah dawn chuan driver tan chuan hniak pherh vunga tan tlat chi a ni ang. Chumi a nih loh erawh chuan tanhmun an nei vak lo. Hemi piahah hian pawl kan in din a, kan pawl chu dan palzut thei, thuneitu (authority) pawh haw haw a au zama kan duh anga keuhthluk luih tir thei zela inngaihna lian ta lutuk hi a pawi ber chu a ni.

Taxi permit pek tam lutuk kawngah hian sorkar hi a thiamlo hulhual a. Kan kawngpui thui zawng leh zau zawng pawh hisap lova an pawngpaw thei sem chungchangah hi chuan sorkar hian thiamthu sawi tur a nei lovin ka hria. Chuti chung chuan permit petu sorkar thu awih loh tum ngawr ngawr hi a dik chuang lo. Driving licence i neih rual rual hian lirthei i khalhin mawhphurhna i nei nghal a. Traffic rules zawm te, sorkar dan dang zawmte, hawihhawmna te hi i mawh a ni. Driving Licence i neih kha tute emaw suta chil theihna licence a ni lo. Chutiang chiah chuan Taxi permit emaw Bus permit emaw i neih chuan a petu, thuneitu thu i zawm kha i mawhphurhna pawimawh tak a ni.

I zalenna rapbeta diklo taka sorkarin i chunga a ti nia i hriat chuan lungawilohna lan tir chu i chanvo a ni ngei mai. Mahse enge a man (price) chu tih i chhut fo a tul bawk. Pawl dang pawhin sorkar an kar vaka an hlawhtling tho tih rilru-a sorkar pawng nek chiam hi thil dik a ni chuang lo. Kan lungawilohna kan lantir thiang a, mipui harsatna nasa taka siam zawnga kan chet erawh chuan a vawtu-in ek a cheh fo tihte pawh hi hriat tel a tul.

Dan rorelna kan zawm thiam a, thuneitute thu kan awih hi a tlangpuiin kan zalenna leh kan thawven tlanna a ni tihte pawh hi inhrilh hriat thar fo a tul ta a nih hi maw le... Permit petu thu awih thiam zir a tul a, a pe theitu pawhin awmze nei leh hun lokal zel tur thlir thiam chunga kal a zir tel a tul a. Aizawl khawpui heti khawpa traffic a tawt ta mai tiziaawm tura tan latute pawh hi hriatthiam ve an tul a. Nuara kan inhmachhawn zel chuan kal theih loh khawpin kan khawpui-ah hian motor hi a ding thuap ang a, a tuartu chu keimahni tho hi kan ni dawn a ni. Sorkar hnathawkte hian an hlawh hi a sang thei ang ber an duh theuhva, chumi tur chuan sorkar an nawr hlawm a. An duh ang vek hi tihhlawhtlin ni ta se sorkar hian hlawh a pek theihloh hun (a sum neihin a tlin loh hun) a lo thlen chuan a buai tur chu sorkar hnathawk tho an ni. Chutiang deuh chu a ni a. “In duh zat zat arsi inbel ula, mahse, kei ka lal ber ang” tia sawitu thusawite pawh min hriat chhuah tir rum rum mai a lawm le.

Related Posts :