True Colour Album Ka Hmuh Dan

¢ Mary Pa

Chanchinbu lama kan lo hmelhriat thawi tawh, uluk leh changkang taka buatsaih, Chris M.S.Dawngkima album, True Colour chu mitin ngaihthlak theihin release a lo ni ta a. Mizo ten kan la tih ngai zen zen loh, english album tlemte zingah, Chris M.S.Dawngkima album lo chhuak ta hian rimawi khawvelah rahbi thar a rap tiin sawi ila kan uar lutuk lovang. A chhan chu he album a english hla 11 leh mizo hla 5 te hi amah Chris-a phuah vek a nih avangin album danglam tak chu a ni hrim hrim mai.

Chris M.S.Dawngkima hi pa lungleng thei tak, hla phuah lama sulhnu hrawl tak nei a ni a. Mizo zingah mahni hla phuah Tonic solfa-a a bua chhuah thei kan neih awmchhun a ni ta ve ang (2007, FAK RAWH U- Lalpa min pek hlate). Pachhung University college kan kalho laite mitthlaah a cham reng thin. 1997-98 vel khan College Week leh John Lalruata music festival velah pawh he album-a a hla thenkhatte hi chu mite hriat leh nalh tih a lo hlawh tawh thin a. He album-a tel ‘All be one’ tih te hian lung a tileng thar vawng vawng mai.

Belhchian dawl “True colour” album chanchin hi thui tak ziah a va chakawm em! Hla 16 lai awmna a nih avangin hla mal tin kan thlur bing thei lo tur hi uiawm ka ti.

He album-a a hla hmasa ber, “The New beginning” tih hi a thluk a mawi a, orchestra leh background vocal atana effect an hman te, Mizo chhulchhuak a ni ang tih rin harsa khawp a mawi - tenor opera back-up te hi a inchawih a, a phuahtu hre sa lo ila chuan Western Musician-ho kutchhuak emaw tih mai tur a ni. A thu ril tak mai hi ka chhiar ning thei lo. Mihringin khawvel eng a rah tirh atanga, chu mihring tawpna ni thleng chu he hla tawi te mai hian a fun kim biai mai hi, hla thu thiltihtheihna tilang chiangtu a ni.

"Can’t remember how my eyes were opened,
Started to focus on things I’ve never dreamt of;
When the whispering wind blew my ears open,
Started to sing with the untoned voice;
And when the lungs learnt to breathe the fresh cool air,
The nimble hands and the shaky feet sprang from their ground.
Who am I? What is the magic word to reveal my true identity?
Where I lay naked in the sand
I’m learning to live, soaring o’er the cloud;
But with a change of season
Oh my vase of gold - they vanished in the dusk;
Now I keep on playing... playing my mournful song,
Keep on fighting for peace and serenity;
I believe there will be a new beginning
In heaven’s true colour, every little story worth to be told."

Minute hnih awrh chauh a ni a, beng a tivir tawk chauh ti ila a fiah ber awm e. Hei aia thui deuh hi nise a duhawm thlawt mai. Album hla hmatawnga a dah hi a tifuh a, a thupui nen pawh a inhmu rem thlap mai! He hla i ngaithlak chuan he album awm dan tur i suangtuah thiam ruak mai thei e.

“Eternal Father” tih hi zaithiam lar, Pensy nen an duet a ni a, Pensy hi mizo hmeichhia a zaithiam ka tih ber a ni bawk a, he hlaah hian an aw a inchawih a, a chorus-ah Chris a’n “You are eternal Father, your everlasting arms they surround me; when I gaze upon your love my soul satisfies, Lord I find myself in you” tia a sak hnuah Pensy’n a aw special zet maia *Save and strong I will soar, where there’s no more fear; hear the Angels sing, O my soul rejoice” tia a rawn sak zawm laite hi a mawi danglam a, a mood ah min hruai veng veng thei mai.

“True colour” tih hi chu demand channel lamah kan lo hmu tawh thin a. A video hmuhnawmna hian a music leh a hla atangin mit a la peng a, video tel miah lova a hla ngaihthlak hian a mawina a langsar lehzual a. He hla thu hi a ril ngawt mai! Beiseina sang tak nen mihringin a mihringpui chungah beiseina leh rinna nghat thin mah se, harsatna leh buaina a lo thlen hunah erawh rin ngam leh innghahna tak tak an tling zo thin lo. Hringnun a vul lai chuan chatuan daih leh hlimna tluantling min petu tur nia ngaih mai pawh a awl khawp mai; mahse, harsatna chu khawdur ang maiin a rawn inlar a, beiseina chu a thlawn zo ta mai thin a ni. Chutih huna a ‘nihna’ tak tak danglam ve ngai lo, innghahna tluantling leh hlimna famkim min petu Isua chuan harsat ber laiin mamawh chhanna min pe thin a ni.

“Close to you” tih hi hla muang fan raih, a thu leh a thluk inchawih tak a ni; “This couldn’t be happening to me, I feel helpless when I feel this pain; I wish that you were here to comfort me, take away all the pain, but I can see a mere reflection, vision of storm before the calm”. Mahni tawkah harsatna kan tawrh ang te hi kiang thei lo ni mai awma lan chang a awm thin, Pathian rinna leh tanpui tura beiseina tak tak erawh tunlai mite hian kan tlachham ta em ni ang? Chris-a hian Pathian a dah chungnunzia puang chhuakin amah, mihring chak lo tak mai nen chuan inanna reng nei lo, mihring a nihna atang phei chuan Pathian chu a ban phak hauh loh tur a ni tih a hria a; mahse, Amah a hmangaihna chauh chu Pathian laka a chhuan tur neih chhun a ni. “You are part of the stars, I couldn’t have reached that high; I know we have nothing in common, but the love I gave you, was the only reason I’m worth to be loved, draw me close to you, give me rest from sin.” Amah hmangaihtu chu Pathian tan pawh a hlu ngei ang! Beidawng lova Pathian autute lakah a ni lo’m ni Pathian chu a inpuan chhuah thin? A hla thu hi a ril a, a mawi a, mihring nihna a va phawk chhuak chiang kher em.

Tunge hausakna leh ropuina hi he khawvela kan cham chhung hian hnar thei awm ang? Mahni phak tawkah mawi leh mawi lo pawh thlu lovin kan tlan a, a hausate an hausa thur thur a, a retheite erawh rahbehin an awm a; a neinungte hausakna chu mi retheite duhaisam tiseitu mai an ni thin. Chu chu kan ram dinhmun diktak pawh hi a ni. Miretheite leh mi hausate inkar hlatziate hi kan sawi thin a, hla thu mawi tak hmangin Chris-a chuan a hla ‘My Hiding Place’ -ah hetiang hian a rawn phuah chhuak a -

“Here I am, with a heart
Longing for riches and glory;
The day’s gone, I wait for tomorrow,
But they still don’t come my way.
Man walked away with my dreams,
And I thought that could have been me;
I could make a wish and dream of a fancy car,
But here I stare at my empty hands.”

Pathiana hahchawlhna zawn nachang hre lotute chu kawng dik lo zawhin khawvelah an tlan mai thin reng a ni. “Lord you are my hiding place, a shelter from the rain...” chu zawk chu a ni hahchawlhna dik tak zawk chu.

Hla lungkuai leh jazz fusion rawngkai “I am with you” tih te, tlangval that leh min chaktir thintu classical rock leh rock ballad zinga chhiar tel theih tur “Jeremaid”, “Beyond the dark horizon”, “Right Change” leh “Hidden treasure” te bakah mizo hla, “Nun kawng”, “I nunah Isua a lal em?”, “Thilpek ropui”, tih te leh “Pathiante Pathian” tihte hi a mal te te a thlur chakawm tak a ni. A phuahtu phuahchhante hi lehkhabu chhah fe a ziah tham a tling ngeiin a rinawm. Hla phuahtute hi suangtuahna kawm mi leh miril kan tih ang hi an ni tlangpui thin. Chris M.S.Dawngkima album hi a danglam a, ama hringnun atanga a phuahchhuah, a nunkawnga a thil tawnte a tarlanna bakah mihring nun a hmuh dante chiang takin, hla thu mawi tak hmangin a tarlang a ni.

He audio album tihlu zualtu chu bonus DVD, music video panga (5) awmna a chhawm tel hi a ni. Heng video-te hi sapho tih dan angin DVD-ah quality tha thei ang bera dah a ni a. Hetianga bonus DVD chhawm tel nghal hi Mizote zinga album release kan neih chhun a la ni rih dawn a ni. Recording buaipuitu Musicplus Audiocraft an fakawm a, sapho kutchhuak ang thawthang a tha min hlui avang hian khua reiah fak an hlawh phah ngei ang. Music video pawh tunlaia video editing lama kan hriat lar SVP (Siama, Ramhlun N) production a ni a. Video inang lo tak tak, hmuhnawm leh belhchian dawn tak ni si, a hla thu leh mood nena inmil em em a siam thei hi Mizo-te hmasawnzia tilangtu a ni.

“Nang chauh ka himna,” tih hi Mizorama kan zaithiam lar tak tak, Pensy, Zoramchhani, Maggie, TBC-a, Steward, Sangtea, Abe-a leh amah Chris-a ten thiam tak maia an sak a ni a. A music composition a changkang a, a zaiate hi an aw a inchawih bakah a hla hi a mawi danglam hrim hrim a, he hla chauh pawh hi he album lei chhan tlak a ni awm e. Ka thianpa pakhat chuan “He hla hi kalhmang - composition leh lyrics hi mihring kutchhuak a mawi lo zawk khawp a tha a ni e!” tiin ha hipin ropui a tihzia min hrilh.
Pathianin a pek hlate hi chu a danglam thin. “Nang chauh ka himna” tih hla thu hian hnu i’n khar teh ang.

"Nang chauh hi ka inhumhimna,
Chhun leh zana min thlamuantu;
Ka kawng kham leh suar nasa kar a,
Min muantu, ka thian i ni.

Thlaler ram ro, ka kal tlang chhung hian,
I hmangaihna chuan min thlahthlam ngai love;
Vantirhkohte min veng turin an hnai thin,
Faka inthawina chu ka tan damna.

Lei ro hlu, finna zawngte hi,
Ka kawng entu an tling zo lo;
Hneha ka lak khawvel thil tinreng,
Min muantu reng an awm lo.

Lalpa chu ka eng leh min chhandamtu a ni,
Lalpa chu ka nunna kulhbing a ni;
Tunge ka hlauh ang?."

Related Posts :