MAWNGKAWHUR!

¢ HC Vanlalruata

Kohhranin mawngkawhur kan tihte mahni hmeichhiatpui ngaizawngtu patil leh anmahni lo kawp duhte chungchanga Union Home Minister hnena lehkha an thehluh thu kha chanchinbu-ah ka lo chhiar ve a. An tih awm tak an ti-a ngaih mai theih a ni a. Kei ngei pawhin tunlaia ‘Pherh’ tia invuah ta ‘Tuai’ ho lo huangtau ta lua hi veiawm ka ti ve chungin an chungchang hi ngaihtuah chian a tul khawpin ka hria.

‘Tuai’ kan tih hi sapho chuan ‘transvestite’ an vuah a. Oxford Dictionary-in a hrilhfiah danah chuan mipa ni si hmeichhe inchei-a inchei nuam ti zawk tih ang deuh a ni a. Tuai zawng zawng hi mawngkawhur (homosexual/gay) an ni vek lova, an mipat pui leh hmeichhia mutpui thei ve ve (hermaphrodite/bisexual) an ni kher chuang hek lo. Naupan lai leh tlangval thlenga tuai thenkhat chu nupui neia nunphung pangngai taka awm zui an awm tho tih kei ngei pawhin ka hre nual.

Tunlaia kan buaipui tak hi chu ‘unnatural sex’ kan tih mai, Siamtu siam dan ang lova neih inangin ‘sex’ an hman dun chungchang a ni a. Kohhran tan chuan phalrai mai chi a ni lova, khawtlangah pawh pangngai taka en chu a harsa khawp ang. Keini India ram leh a kilkhawra Mizote’n kan buaipui hma daih khan ram changkang hmasa-te chuan an lo buaipui tawh a. Tunah pawh hian US-ah chuan neih inang-te dan anga an inneih (solemnisation of gay marriage) hi state thenkhatin an phal tawh laiin state tam takin an phal lova, an President kal chhuak ta George Bush pawh khan hetianga neih inangte inneih phalrai a duhloh thu kha a tlangaupui nasa hle thin a, tun thlengin ram changkang bera kan ngaih-ah pawh ‘politics thupui’ a la tling reng a nih khu.

Ama’rawhchu, kan kohhran hruaitute hian Indian Penal Code section 377-na-in a ziah dan hi an ngaihtuah chiang chiah em tih erawh hi chu an inzawh chian a tul mai thei. Mawngkawhur kan tihte, mahni neih ang nei ngaizawng tlat chite hi piansualna (abnormality) a ni thei a, thenkhat erawh chu an duhthlan atanga lo insiam chho (choice) pawh a ni thei mahna. Mihring chi (hormones) a bilha tho lo, Kohhran tawngkam han hawh ta ila, ‘Pathianin a siam dan’ pawh a tih theih mai theih a ni te hi na takin hrem kan duh tak tak ang em? Ka thianpa Dr Mawitea of RIPANS pawhin pian tirh atanga felhlelh vanga hetianga awm zui an tam thu min hrilh tlat mai.

IPC section 377-ah chuan khawvel kalphung pangngai anga mipa leh hmeichhia nilo neih inang ‘sex’ hmangte chu na taka hrem theih a nih thu a inziak a. Dam chhung tanina tan theih a ni hial awm e. Chu chu Delhi High Court chuan a dik tawk love, hrem kher loh ni se, pawikhawihnaah ngaih loh ni se tih ang deuhvin thutlukna a siam a. Chumi rual chuan India Constitution thuthlung a kalh a ni a ti a. Sakhaw hruaitu tam tak, Muslim sakhaw hruaitute leh kan kohhran hruaitute ngei pawhin he court thutlukna hi an duh loh thu an auchhuahpui a, kan kohhran puipate chuan Union Home Minister hnenah IPC section 377 hi paih nilo se tiin an ngen ta a ni.

Heta sawi tul ta chu neih inangin ‘sex’ an hman hi a tha em tha lovem tih lam a ni lova. ‘Morality’ tlawhchhan chuan thil tha a ni lo tih chu kan pawm tlan vek a ni ang. Mahse, ‘morally’-a thalo zawng zawng hi khap vek a, dan hmanga hremna lek vek tur chi a ni em tih erawh chu ngaihtuah tlan ngai a ni. Sakhaw thila thianghlimna ‘moral’ ngaihtuaha thalo leh tha lova ngaih zawng zawng hi khap vek chi a ni kher lova, hremna lek chi pawh a ni vek kher lo. Zu pawh hi ‘morality’ ngaihtuahna tam berah chuan ruih theih a nih avangin a tha lova, mahse, khap hian thil tha zawk a chhuak em tih leh khap avanga mirethei tawrhna nasa lutuk hian a man em tih pawh hi chhut tel ngai a ni.

Meizuk hi engkawng maha thatna awmlo niin mithiamte chuan an sawi a. Pawisa a heh baka a zutu-in natna khirh ber cancer a vei theihna sanzia leh chumi piahlamah meizutu bula lo awm ve-in meizuk khu (second-hand smoke) a lo hip luh ve avanga cancer a vei theihna ‘chance’ sanzia thlengin kan sawi tam khawp mai. Chumi rual chuan khawvel leh India ram ngei-ah pawh kohhrana ruh deuh chuan meizu mi chu Kristian nilo ang hiala an ngaih dante pawh kan hria. Mahse, meizuk ngai tlat tawh dan hmanga khap ai chuan puipunna hmuna zu lova a zukna hmun (smoking zone) siam tha zawka ngaia sorkarin dan hmanga ruahmanna a siamte hi a rilru fim thlakin ngaihdan dik zawk a ni em tihte pawh hi ngaihtuah tel a tul.

Khap leh chu khapna bawhchhia hremna chu a awm ngei ngei a tulna a awm. Tualthah leh rukruk ang chi, mihring puite laka pawikhawihna ang chi chu khapa hremna na tak siam a tul rualin thil zawng zawng khap hi chu a tha ber chuanglo thei. “Meizuk hi chu kan ngeihlo em mai” tia dan khauh tak siama khap ngawt kha a tha kherlo niin khawvelin a la hria a, meizu bula mite’n cancer an vei phah thei tih thleng hre chungin ‘Prohibition’ chu an la puan khum rihlo chu a nih hi.

A nih leh, piantirh atanga felhlel, pian fuhloh (Kohhran sawi dan ang hawh ila Pathianin a din ve dan) vanga hetianga an nihna hai leh Siamtu min siam dan ni lo anga ‘sex’ hmangte hi damchhung emaw rei tak emaw tanina tan tir hi a ‘fair’ chiah em tih hi ngaihtuah chian a tul ta a ni. Tih tak emah chuan Mizoramah hian hmeichhia leh hmeichhia (patil leh hmeichhia kan ti dawn emni?) rei tak tak khawsa duna in khata cheng dun an awm nual a. Kohhranin a hrem kan hrelo.A hmeichhia zawka tang kha an rai ve miau lova a lang chhuak si lova, chuvang chuan an hremlo a ni thei em? Police pawhin IPC section 377 hmanga thubuai an siam sak leh court-a kalpui-a thiamloh chang an awm tak ka la hre lo. Delhi High Court thutlukna siam hma hian kan lo ngaihhnathiam tawh a ni mahna.

Dan thenkhat hi a hunlaia tul, a hnu kum 100 vel vei hnu-a siam that ngai a awm thin a, chutiangah chuan ngai ta i la. Neih inangte’n ‘sex’ an hman hi thil thalo a ni tih kohhran leh NGO te pawhin sawi tam i la, mahse na taka hrem theiha pawikhawihna lian anga ngaih kher chu a tulna ka hre hranpa hauh lo nia...

Related Posts :