Open Your Mouth - Ha Ha Ha!!!-II

Hmanah chuan, hmanah chuan... 'kan thiam loh a ni' tiin mipui hnenah ngaihdam an dil a...


Tunah chuan, tunah chuan... 'mipui thiam loh a ni' an ti leh daih tawh!

July ni 28-ah khan Chief Minister's Office Conference Room-ah NLUP Apex Board meeting neih a ni a, he board chairman, chief minister Lal Thanhawla chuan NLUP an lo kalpui tawhnaa an hlawhchhamna chu mipui vang niin a sawi.

Chief minister chuan tun hmaa NLUP an kalpui thin, hlawhtling lo anga sawi awm thin kha a dawngtute an hlawhchham vang a ni, tiin a sawi a, tunah chuan NLUP hlawhchham an phal loh tur thu sawiin, "Hetah hian a dawngtu turte an pawimawh dawn a, taimakna, rinawmna, dikna leh thianghlimna a pawimawh hle dawn a ni," a ti.

April ni 30, 2009-ah, chief minister chuan Chief Minister Office-a Conference Room-ah vek hian thuthar lakhawmtute kawmin, NLUP-ah an sorkar hmasak lai khan an hlawhchham tia puhna chu a pawm loh thu a sawi tawh bawk.

"Sorkar chu a thutiamah a ding a, chhungkaw sing tel hnenah rahbi tuksakin NLUP pawisa a sem a, nasa takin a hlawhtling a. A dawngtu mipuite an rinawm loh vangin an hlawhchham mai a ni," tiin chumi tum chuan a sawi a nih kha.

Eptu pawl an nih laia a sawi thin dan nen chuan he'ng hi a dang hle. Eptu pawl an nih lai chuan ngaihdam a dil a, NULP hlawhchhamnaah pawh mipui a puh ngai lo. July ni 20, 2007-ah, MPCC te'n kuthnathawktute chawikanna leh retheite chhanchhuahna tur tia 2008 inthlanpui huna mipui hnena an zawrh tur NLUP chu an tlangzarh tum pawhin MPCC president Lal Thanhawla chuan thu sawiin, NLUP chu tunhmain an lo kalpui tawh tih a sawi a, "Khatih lai khan bul tan tir kan nih avangin sorkar lam leh mipui lam pawhin tih dik tawk loh leh felhlel a awm ang tih kan ring," a ti tlat!

Tuna health minister ni ta Lalrinliana Sailo pawhin eptu pawl MLA a nih laiin NLUP a hlawhchham tih a pawm thu a lo sawi tawh.

December ni 19, 2006-ah khan Zawlbuk Group te'n "Mizoram Perspective 2026" tih thupuia hmangin seminar an huaihawt a, sawihonaah Congress MLA Lalrinliana Sailo chuan an party sorkar laia an policy pui ber New Land Use Policy (NLUP) chu a hlawhchham tih a pawm thu a sawi a ni.

Economic Development chungchanga sawiho tura chhawpchhuah pakhat MIP leh NLUP te sawiin Lalrinliana Sailo chuan, NLUP hi mi thenkhat lo hlawhtlinpui awm mah se a pumpui thuah chuan a hlawhchham tih a pawm thu a sawi a, a kalpui dan pawh dik a tih chiah loh thu a sawi nghe nghe. Sorkar hmalakna hlawhchham thinah hian politician-te chu mawhphurtu ni ngeia a pawm thu a sawi a, mawhphurtu nih ngam tura a inngaih thu leh thil dik loah hian mipuiin lo kawk pawh ni se awm a intih thu te pawh a sawi.

March ni 20, 2009, Mizoram Assembly Session-ah pawh khan chief minister hian eptu pawl an nih laia an sawi dan nena inkalhin NLUP chungchang hi a lo sawi tawh bawk.

"NLUP hi kum 5 chhungin kan zo vek ang tih hi policy siamtute hian kan sawi lo, a zawh theih loh tih kan hria. Policy siamtute hian cheng nuai khat theuhin kan sem ang kan ti ngai lo..." tiin chumi tum chuan a sawi.

"Kan uluk dawn avangin NLUP kalpui chhung hian kum 10 atanga 15 a duh ang," chief minister chuan a ti bawk.

August ni 30, 2007-ah khan Diakkawn Community Hall-ah Special District Conference-cum-Political Training, Kolasib Block Congress Committee huaihawta neih a ni a, chumi tuma MPCC president Lal Thanhawla thusawi chu Mizoram Pradesh Youth Congress Committee (MPYCC) chuan thuchhuah siamin tiang hian an tarlang:

"Pathian leh mipuite khawngaihna zara kan kuta sorkarna a awm tuk atangin NLUP changtlung zawk hi tan nghal a ni ang a, mirethei leh pachhia te'n lei rem kan lo rah leh theihna turin chhungkaw tinah an trade thlan ang zelin cheng nuai khat chuang kan pe tawh dawn a ni," tiin.

"Hetianga huaisen tak leh rin ngama Pu Hawla'n Congress party-in sorkarna a chan veleha a tih tur a tarlang hi Congress Thalai chuan kan chhuang em em a ni," tiin MPYCC chuan thuchhuahah hian an thailang nghe nghe. March ni 20, 2009-a Assembly House-a chief minister a nih hnua a sawi dan nen chuan a dang ta hle si. Eptu pawl an nih lai kha chuan sorkarna an kuta a awm tukah tanin, chhung tin hnenah cheng nuai 1 an sem dawn niin an sawi thin reng sia!!

Engpawhnise, NLUP chungchanga kan pute thu hi a inkalh deuh nawk nawk fo mai tih zawng a chiang ta a, chief minister-in NLUP an kalpui hmasak tuma a hlawhchham chhana mipui a puh pawh hi mipui lam hian mak an ti lem lo niin a lang.

NLUP hlawhchham chhan chungchanga chief minister ngaihdan hi NLUP Apex Board vice chairman, NLUP Implementation Board chairman ni bawk R Selthuama ngaihdan nen chuan a inang lo hle.

Ani (R Selthuama) ngaih dan chuan sorkarin NULP a kalpui hmasakah khan a sorkar-a ber kha a 'zan kal' a, inkaihhruaina mumal pawh nei lovin an kal ve nawk nawk mai a ni.

May ni 6-ah khan Zoram Research Foundation te'n agriculture department committee room-ah NLUP chungchang sawihona hun an huaihawt a, chumi tum chuan NLUP hotupa, R Selthuama, MLA chuan thu sawiin, Congress sorkar hmasaka NLUP hlawhchham chhan chu "sorkar a zan kal" tiin a sawi.

"Guideline a awm lo a, thawktuteah training leh thiamna pawh a awm lo," a ti a, "Trial and Error Method-in kan kal," a ti bawk. A hlawhchham chhan hrang hrang hi point 10 chuang a sawi nghe nghe. R Selthuama hi NLUP kalpui a nih lai khan RD director a ni thin.

Mahse, NLUP hlawhchham chhan chu a dawngtute hlawhchham vang a ni tih chu hotupa ngaihdan a ni. A ngaihdan tihah - chief minister a nih hnua a ngaihdan.

Related Posts :