Bobby Robson nghilh loh nan

¢ Hmingsanga

Amah ngeiin a chanchin ziakna lehkhabu hmingah "Farewell but not Goodbye" tih a hmang a, football khawvel atanga inthiar fihlim tum mah se, 'mangtha aw' tia kut hmer meuha ban han vai san meuh tur leh 'Mangtha' han tih chuai raih atan chuan football khawvel kha a phal lo. Football khawvela sulhnu ngah leh hriat hlawh a ni a, mahse a lei thuam hlipa thuam thara thuam tur zawkin football khelhna mual leh a chhehvela thil awm te chu 'Mangtha' tiin mual a liam ta si.


A thih thu ka'n hriat ve chuan mithhlaah Italia 90 World Cup vel kha a lo lang nawn leh ut ut a. Paul Gascoigne-a tap lai hmel te, 'Mark Wright, thats right' tia commentator te tawngkam kha bengah a lo ri nawn leh a. Terry Butcher chu sa zuar/sat thin nia kan hriat te kha dik tak maw? Gary Lineker tlan chakzia leh ball thiamzia kha hahipin kan sawi a. Kan ngaihsan leh hmuhnawm ti em ema an chetla kan en thinte hokhawmtu chu an pu sam var, putara tia kan lo hriat ve mai Booby Robson ngei a lo ni.

England inkhelh changa a sir a lo thu thin, suit nalh tak nena zahawm taka inthuam thin kha, inkhelh a thiam ai mahin a thluak thatzia avanga manager atana an hman nia kan hriat ve tlat dan te kha, a hun lai chuan ngaihtuah chhuak tha ve riauin kan inhre thin. A player te kan ngaisan rualin a ho khawmtu an pu khan kan ngaisang lo thei lo.

England lalnu meuhin chawimawina sang, football vanga a pek atang ringawt pawh hian he pa hi chu a nep thei lo hrim hrim. He khawvelah hi chuan hlawhtlin leh hlawhchham a inzui zat a, chawimawina leh sawi chhiat pawh inhnai tein an awm reng. Damna kan tih rualin dam lo tih thumal hi a kiang maiah a awm reng bawk. Sir Bobby hringnunah pawh lawmna leh hlimna hlirin hmun a chang bik lo.Football khawvela a zin hun chhungin hrehawm tam tak a tuar ve thin. Chu'ng zingah chuan 1986-a Argentina nen an inkhelh tuma Maradona-in a kut hmanga an lama a ben luh, tun thlenga khawvelin a la sawi zui luih luih (Hand of god) meuh kha chu a tuar thiam lo khawp mai. A lak nat ber pawl a ni hial awm e.

Kha goal 'thianghlim lo' avang khan England chu nekchhuah an ni a, 90 World Cup-ah lah tling teuh apiang pawi tih a zual an tih ang deuhin, semi final-ah West Germany chu penalty hmanga a chak zawk zawnnaah an hneh lo leh bawk. A kaihhruaina hnuaia England-in beiseina sang tak nen an lo thlir, 1966 hnua World Cup-a an champion lehna hmasa ber ni tura an beisei chu boruakah a thamral ta ringawt mai a nih kha. Heng thil pahnihte hi a nuna thil hrehawm zinga a chhiar tel lo a nih hlauh pawhin, keini chuan kan chhiar tel sak. Engpawhnise, theihnghilh har chu a ti ve viau mai thei a ni.

July ni 26, 2009 te kha chuan a hmingchherna club St James park-ah England leh Germany te inkhel a en a, he khelmualah hian a tlangnel a, a lo tal hrep tawh. A mual chhung awm dan zawng zawng pawh a hrechiangtute zinga mi a ni.A vanglai hun a lo hmanna hmunah chuan, wheelchair hmanga nawr luh a ni a, hun dang ni se tlangnel leh zalen takin a suit nalh tak hain a lawi lut tur a ni a. Mahse July ni, 2009-ah chuan mahni pawha kal thei tawh lo, wheelchair-a thu chhungin nawr luh a ngai ta - cancer vangin.

Thi mai tura ngaih a ni a, Sir Bobby tan tih theih neih chakin, a hmelah hlim hmel te hmuh an beisei vang te pawh a ni mahna, football khawvela amah ngaisangtute'n nasa taka ui beh tumin 90 World Cup-a a naute leh khatih laia an hneh loh Germany team-a player te chu Sir Robson hmaah an innuai a nih kha. Mahse koh din theih a ni lo, pawn lamah chuan hlim hmel pu mah se a chhungril lamah natna chuan a pawm bet tlat tawh.

Sir Bobby Robson-a'n football tana a thiamna, finna te leh a theihna zawng zawng a hlan zozai hi khawvel tan chuan a tawk tawh pawh a ni mahna, July ni 26 hnu lawkah chuan lei khelmual chhuahsanin van lam khelmualah, hah leh rilru hrehawm reng reng awm tawh lohna hmunah chatuan atana 'inkhel' turin seng luh a ni ta a ni. Farewell but not Goodbye Sir Bobby ' tiin kan thlah ve ta a ni.

Sir Bobby Robson Hringnun:
1933: Ni 18 Febuary khan Langley Park, County Durham England-ah a piang.
1950: Fulham tan vawi 152 khelin goal 68 a thun. Hemi kum vek hian West Brom-ah insawnin game 239 khelin goal 56 a thun.
1958: England tan World Cup-ah a khelh kum a ni. England tan vawi 20 khelin U-23 ah vawi khat England tan a khel bawk.
1962: A tum hnihna atan Fulham a zawm leh. Game 193 zet a khelh chhungin goal 9 chiah a thun.
1967: Fulham chhuahsanin Football khelh pawh bansan in club tenau Vancouver Royals ah manager hna a zawm.
1968: Hemi kum january thlaah a khelhna club thin Fulham manager atan ruat a ni a, hotu te beisei angin Fulham a chet thatpui loh avangin hemi kum vek november thlaah manager a nihna atangin hnawl a ni.
1969: Ipswich Town in an manager atan an la lut.
1978: Mite beisei loh deuhin Ipswich ho chu FA Cup ah a chet thatpui hle a. FA Cup final ah Arsenal chu 1 - 0 a hnehin champion a nihpui.
1981: Ipswich chu England ah chauh nilo europe khawmualpui a club tha te inelna ah chet that pui chhunzawmin UEFA Cup ah champion a nihpui zui bawk.
1982: England national team manager atan ruat a ni. .
1986: England chu World Cup quater final a thlen puiin Argentina chu 2 - 1 in an hneh lo a, he inkhel hi vawiin thleng sawi la hlawh reng Argentina chakna goal Diego Maradona's 'Hand of God' awmna inkhel kha a ni.
1990: World Cup semi final-ah West Germany chu penalty-in an hneh lo. World Cup khelh zawhah England manager a nihna bansain Dutch club PSV Eindhoven, manager hna zawm.
1991: Dutch league ah season bul a tan kumah PSV Eindhoven chu Dutch League ah champion a nihpui nghal.
1992: Dutch league PSV Eindhoven bawk champion nihpui lehin hemi season tawp hnu lawk hian Portugal club Sporting Lisbon lam a zawm leh a.
1993: UEFA Cup ah Sporting Lisbon chu a chet thatpui loh avangin club thuneitu ten a hna atangin an ban tir.
1994: Portuguse club tho FC Porto chuan manager atan an hmang ve tan a, a kaihhruaina hnuaiah Portuguese Cup ah champion an ni nghal.
1995: FC Porto chu Portuguese league title a lakpui nghal.
1996: FC Porto chu a vawihnihna atan league ah champion anihpui leh a. hemi hnu lawk hian Spanish club Barcelona in manager atana an sawm chu pawmin FC Porto a a nihan chu a bansan.
1997: Barcelona chu Cup Winners' Cup ah champion anihpui hnu lawkin Barcelona manager hna chu dutch coach Louis van Gaal hnenah Manager nihna hna chu hlanin Barcelona general manager ah indah in Barca tan player tha zawngtu (scout) nihna chu a duh zawk.
1998: Nipui laiin Dutch club PSV bawk kir lehin a hun a hmang leh a.
1999: Hemi kum february thla hian England manager Glenn Hoddle a ban a avangin England team enkawl lailawk tu atan sawm a nihna chu pawmin England manager hna chu a thawk leh a. September ah chuan Newcastl United chuan manager thawk turin a zawm.
2000: February ni 18 a ni a, kum 67 a tlin rualin thla 12 chhung Newcastle United manager hna thawk turin rawih chhunzawm leh a ni.
2002: Newcastle United chua Premiership ah palina nihpuiin Champions League qualifying stage khel turin a a hlangkai thei.
June 15 - england lal Queen pian chham lawmna ah England atan a football lam a a thawhhlawk em vangin chawimawina sang Sir nihna chu pek a ni.
2003: May - Newcastle chu Epl ah pathumna nihpuiin Champions League qualifying round an khel a, Partizan Belgrade an hneh lo.
2004: August 1: Newcastle United chairman Freddy Shepherd chuan
Robson a contract chu 2004-2005 season ah a tawp ang tii a puang a. Freddy Shepherd thutlukna siam hi Newcastle United thunbeiotu te thutkulna siamah chuan a fuh ber niin sawi zui a ni.
2006: January - ah Republic of Ireland manager Stve Stauton chuan international football consultant atan a puang.
August 5 - Ipswich Twon leh Crystal Palace te an inkhelh laiin first half ah a taksa lam chak lohna avangin damdawi in pan pui ngai khawp in a awm a. Ipswich ah hetih lai hian honorary club president nihna a nei mek.
August 20 - Brain tumour a neih avangin zai a ngaih thu puan a ni.
2007: May 6 - Khelmual chhunga indona a bansan hnuah a taksa lam hriselna atana indona puan chhunzawm leh nghal a ngai a, a cancer avang hian chemotherapy pek a ngai zui ta zel a. .
November 15 - A taksa lam chak lohna avangin loh theih lohin a hmangai football chu a kiansan lo thei lo a.
2008: February 16 - Cancer research centre Newcastle's Freeman Hospital tan 1million sum a tuak ngah sak.
October 30 - Sir Alex Ferguson, Sir Bobby Robson te thahnemngaihna zarah Sir Bobby Robson Foundation tan sum tam tham tak hai chhuah sak a ni.
2009: February 20 - England boss Fabio Capello hnen atangin Football Association in a charity fund atan 75,000 a dawng.
July 26 - Sir Bobby Robson Trophy England leh Germany ten khel a, hemi tum hian St James' Park ah wheelchair atangin a thlir a, hemi tum hian Emerald UEFA Order of Merit award hlan a ni bawk.
July 31 - Cancer natna chuan Football khawvel a fa duhawm ber te zinga chhiar tel ngam Robson chu kum 76 mi a nihin hneh a chhuhin, a damlai ni a chhiar liam ta.

Related Posts :