Sikul Naupang Beng Tha Lote Dinhmun

¢ Lalhmangaihi

Mizoramah hian beng ri hriatna that loh avangin naupang tam tak te'n luhlul leh biaka mi chhang tha duh lo nih an hlawh fo a, hauh emaw, hrem emaw an tawk fo mai. A bikin, nu leh pa leh sikul zirtirtute lakah hetiang hi an tawk tam a tih theih awm e.

Ri hriatna tha lo hian tawng lama harsatna leh zirna lama hnufualnate leh nungchang leh zia thlengin a tha lo lamin nghawng a nei thin. Vanduai thlak takin, India ramah hian naupang kum 14 hnuai lamah zaa sawm vel lai hi harsatna bik nei an ni a, beng ri hriatna tha lo hi a tam ber an ni. Sikul naupang, chutiang harsatna neite enkawl kawngah, nu leh pa leh zirtirtute hi an pawimawh ber mai.

Beng hriatna tha lo hi a chhan hrang hrang a awm thei a, chu'ng zingah chuan nuin a pai laia fel lohna awm emaw, nau pian dan fel lo emaw, pian hnua hrisel lohna hrang hrang vangte a ni thei. Naupang sikul kal rualah hian ri hriatna tlahniam (mild hearing loss) leh beng khing lehlam ngawng (unilateral hearing loss) hi a tam hle. He'ng naupangte hi han en mai chuan hriat chhuah an har thin. Hei vang hian, “Lehkha thiam thei lo, luhlul, awm tha duh lo”, tih an hlawh fo a ni.

Anmahni ngei pawhin hetiang harsatna an neih hi an inhre lo thei a, thiante aia hnuaihnung, tumah tluk lo, nu leh pa leh zirtirtute huat hlawh hrim hrimah inngaiin, an nun a beidawng thei a ni. Heng naupangte zirna lama an hnufual bik fona chhan te chu:

1. Class room tlar hnung lama an thut in zirtirtu aw an hre tha thei lo.

2. Zirtirtuin blackboard-a ziak paha thu a sawiin a hmui phun an hmuh theih loh avangin an hre thei lo thin.

3. Class room-ah thawm bengchheng dang a lo awmin a ri hriatna a tibuai thei.

4. Beng lehlam tha lo a nihin, chu lam hawi zawnga zirtirtu thusawi a hre tha thei lo.

5. Class room chhung a khawk nasat avangin, a ri hriatna a buai thei.

6. In lamah pawh Tv leh ri beng chheng dangte, midang tawng ri avangtein biak an hre tha thei lo thin.

7. An hnena thusawite an hre vek emaw kan tih kha an lo hre hauh lo thei a, home work te an lo ti lo a, exam leh test-ah te pawh an tih that loh pah thin.

Heng te avang hian sikul kal te an hreh phahin, zirnaah an tui lo a, midang zinga awm hrim hrim pawh an hrehin an inthlahrung thin.

Beng ri hriatna tha lo hian naupang mizia (behaviour) leh ngaihtuahna (psychology) a tikhawlo chauh ni lovin, kut tuar avanga chhiatna nasa zawk an nei thei. Beng leh lu-a inben avanga harsatna namen lo tawk hi India ramah sawi tur an tam hle.

Beng chhunga kan bengdar hi, rang (membrane) pan te, benga inbena pawp mai thei leh ri ring takin a nghawr chhiat mai theih a ni. Lu-a inben pawh hian hriatna thazam (auditory nerve), thluaka inzam chho chu a ti chhe thei. Ri engmah hre thei lova bengngawnna a thleng thei a ni.

Beng ri hriatna tha tawk lo hi ngaihsak vat loh chuan a chhe tial tial a, siamthat hleih theih loh hun a thleng thei thin. Nu leh pa leh chhungte leh sikul-a zirtirtute'n naupangte ri hriatna that leh that loh hi chik ngun tur a ni, hetiangin:

1. “Engtin a/ enga?” tih a ching em?
2. Midang aiin Tv/radio/tape an play ring thin em?
3. Telephone-ah biak an har em?
4. Ri bengchheng awmna hmunah an awm tam em?
5. Thawm dang awmna leh ri nuai nuai hmunah biak an harsa viau em?
6. Hmei chhe aw ri emaw mipa aw ri emaw hriat theih bik riau/hriat theih loh bik riau an nei em?
7. Midang lakah an inla hrang deuh thin em?
8. Midang biak tlem an duh fo thin em?
9. Chhungte leh thiante an tlawh hreh thin em?
10. Beng kiu emaw, beng ri chuah chuah emaw an nei thin em?

A chunga zawhna khi pakhat tal a dik chuan helama mithiam (Audiologist) pan thuai a tha ang.
Hautak taka inenkawl a ngaih loh nan, inchik nguna ri hriatna a chhiat zual hmaa inenkawl thuai hi a fin thlak ber a ni.

(He thu ziaktu Lalhmangaihi hi Master of Audiology (All India Institute of Speech & Hearing), Millenium Hearing & Speech Clinic, D-4, Millenium Centre, Aizawl a ni. Phone no: M: 9612171346/ R: 2328114.)

Related Posts :