Mizoramin thawnchhuah tur eng nge a neih?

¢ Vanlalremruata Tonson

India ram chuan nasa takin hma a sawn a, khawvel sumdawnnaah zau zawka tel thei tur pawhin a inpeih ve ta. Khawchhak lam nena insumdawn tawnna lamah kawng zau takin a inhawng tih a hria a, chutiang zawnga a hmalakna chu Look East Policy tia sawi thin a ni nghe nghe. Look East Policy chu a hlawkpui a, hmalak belh zel dan tur pawh a ngaihtuah chhuak bawk. Chu hmalak belhna tur chu tun hmaa a hriatpawh lutuk lem loh hmarchhak lam kaltlanga khawchhak nena insumdawn tawnna hi a ni.

Hmarchhak chu ram dang nena insumdawn tawnnaa hman tangkai theih tura chei pawh a tum, India Vision 2020 a siam rualin hmarchhak tan bik NER Vision 2020 pawh a siam nghe nghe. Chu chu loh theih lohva tih ngai a ni ve bawk. Hmarchhak state tam zawk chu civilisation pawn lama awm, tribal society atanga civilisation khawvela zuang lut thut hi an ni ber a, khawvel insumdawn tawnnaah hian ruahmanna tha tak nena tanpui phawt loh chuan an tan hian tel ve ngaihna a awm lo bakah sumdawnna hi a kaltluan theih mai pawh rin harsa a ni. Tin, hmarchhak hi hman tangkai thiam chuan khawvel mamawh thil tam tak tharchhuah theihna leh awmna a ni.

Look East Policy hi India chhim lam leh hmun danga chengte'n an hlawkpui viau laiin a khawchhak hnaih ber hmarchhak chuan a la hlawkpui lo tiin an sawi thin hial. Sumdawnna atan chuan bungraw thiarna tha a pawimawh a, Burma ram lawngchawlhna chei that a, Mizoram pawh lawnga luh theih tura chei a tum hial a ni. Bungrua han thiar vel awlsamna turin Mizoram khawpuiah rel luh tir a tum bawk. A rilruk dan tak phei chuan Mizoram lama lawnga bungraw thiar luh chu rela phurh nghal zung zung theih a ni.

Hmarchhak kaltlanga insumdawn tawnna kalpui a nih dawn chuan Mizoram kaltlang baka insumdawnna kawngtha a la awm thei rih lo. State dang chu an politics a chiang nial tlat lo. Chuvangin India sorkarin khawchhak nena insumdawn tawnna kawnga hmarchhak hman tangkai a tum thawm a rawn awm atangin financial institution-te chuan Mizoram chu an melh nghal a nih hi. Bun pawh an inbun sup sup a, rei lo teah foreign financial institution te pawh Mizoramah hian rawn inbun tura beisei reng a ni. Look East Policy avangin India ram financial institution-te chu insingsain a thei chu Mizoramah hian an inbun tan ti pawhin a sawi theih awm e.

Khawchhak nena insumdawn tawn tura insingsak a nih mek laiin India leh ram dang insumdawn tawnna kawnga nasa taka hma lo latu leh dinhmun pawimawh tak luah Exim Bank chuan an tih tur an hai hauh lo. Mizoramah eng thila sumdawng duhte nge sum puk tir chi dawn tih an zir nghal vat a ni. Chumi atan chu Mizo tlangval pahnih David Sinate, general manager leh Vanlalruata Fanai, chief manager chu Mizoramah an rawn tir nghe nghe.

Mizo tlangval, mithiam pahnihte chuan chipchiar leh chiang tawk takin Mizoram thil ram danga thawnchhuah theih turte chu an zir a; heng sapthei, sawhthing, serthlum, grape, balhla, iskut, vai hmarchate, pa, anthurium, ramhmul damdawi leh handicraft-te Mizoram atanga thawnchhuah theih thil awm niin an hria. Hetiang lama hmalatute chu bank lam atang pawhin tanpui tlakah ngaih an ni.

Sapthei: Sapthei hi Mizoramah a tha duh tih hriat a ni tawh a, 2000-01 vela Mizoram puma sapthei chin nana hman ram hectare 350 let 20 zeta zau hectare 8,894-ah 2007-08 chin a ni tawh tih an zirchianna chungchang an ziahna - "Mizoram: Export Potential and Prospects"-ah chuan an tarlang. Kum sarih chhung khan sapthei tharchhuah chu Mizoram pumah a let 60 zetin a pung hman a, 2000-01-a tharchhuah 735MT chu 2007-08-ah chuan 44,720 MT a ni tawh. A thar hlawk telh telh bawk. 2000-01 khan hectare khata Mizoram tharchhuah chu 2.1 MT a ni a, 2007-08 erawh chu 5 MT a ni daih. Hetiang taka Mizorama tha duh sapthei hi khawvel ram hrang hrangah an duh hle a; France, UK, Australia, South Africa, US leh Canada te chu a duh zual an ni.

Sawhthing: Sawhthing hi Mizoramah a tha duh hle a, India ram puma hectare khata tharchhuah theih zat chawhrual aiin Mizoramah hian hectare khata tharchhuah theih chawhrual hi a sang zawk a ni. Mizoram sawhthingah rau rau pawh hian 'thingpui dum' leh 'thinglai dum' te chu a dang aiin a tha lehzual niin mithiamte report chuan a tarlang. Kum tin thawnchhuah tham sawhthing Mizoram hian a tharchhuak ziah nghe nghe.

US, Bangladesh, Spain leh Saudi Arabia te chu sawhthing lei duh ram langsar an ni a; Germany, UK leh Morocco te pawh sawhthing hralh nana beiseiawm a ni bawk.

Serthlum: Report-ah chuan mandarin orange tiin an sawi kher. 2003-04 atanga chhutin kum li chhung, 2007-08 thlengin serthlum chin nana ram hman chu a danglam nasa lo. Hectare 5400 vela chin thin chu 6400 chauhin a thang a, a hlawk thu-ah erawh chuan a hlawk zawk. Kum tin 22.4% velin hectare khatah hian a thar hlawk zawk zel ang a ni a, 2003-04-a MT 3.5 vel thar chhuak anga chawhrual theih thin chu 2007-08-ah chuan MT 6.5 a ni tawh. A let aia tam mahin kum nga chhung hian tharchhuah hi a pung a ni.

Grape: Grape hi a chin nana ram hman zau zawng chu tun hnai khan a tlahniam hret niin report chuan a tarlang a, mahse, a tharchhuah chu a lei ai mahin a tam zawk thung. Hectare khata tharchhuah theih zat chawhrual chu 2005-06-a MT 2.1 ni thin kha 2007-08-ah chuan a let nga Mt 11.9-ah a thang a ni. Mizoram thenawm mai Bangladesh hi grape chawlut nasa an ni a; UK, Netherlands leh UAE te hi chawlut nasa zual dangte an ni.

Balhla: Balhla hi thlasik laia tawi te a khaihlak deuh zauh bak chu kumtluanin a awm a, Mizoram chuan kumtin a thar tam telh telh bawk. 2001-02-a MT 35,500 thar thin khan 2007-2008-ah chuan MT 1,51,000 lai a thar a, India-in ram danga balhla a thawnchhuah zawng zawnga 0.7% chu Mizoram tharchhuah tiin report chuan a tarlang.

UAE hi balhla chawlut nasa deuh ber a ni a, Saudi Arabia, Bahrein, Nepal, Maldives, UK leh Bangladesh pawhin an chawlut nasa hle.

Iskut: Chayote Squash tiin Sap tawng chuan an sawi thin. A seng danah hian Mizoramin tih dana a neih chu duhthu a sam tawk lo a, hei aia tha zawk leh awmze nei zawk fein a seng/lawh theih dawn niin report chuan a sawi.

Mizoram thlai thar hriat hlawh ve ber a ni a, report-a a lan dan chuan 2001-02 hectare 535-ah chin a ni a, 2007-2008-a chuan 714-a chin a ni. Kum ruk chhung hian a chinna hmun hi a zau belh vak lo ti pawhin a sawi theih ang.

Tharchhuah lamah 2001-02 atang khan 16,130 MT tharchhuah niin a pung chho zel a, 2006-07 khan 24,455 MT a thleng a, mahse, mautam avangin a tlahniam leh a 2007-08-ah chuan 20,418 MT a ni. Iskut thaah hi chuan kung khatah ringawt pawh hian 300 vel kum khat chhungin a rah thei a, hectare khatah hian 22-28 MT vel a tharchhuah theih bawk a ni.

Vai hmarchate: Bird's eye chili tiin an sawi thin. Mizoramah hian a tha duh hle a, 2002-03 khan 545 MT tharchhuah niin 2006-07-ah chuan 1077 tharchhuah a ni thung. Hectare khata tharchhuah pawh 2002-03-a 0.83 MT ni thin kha 2006-07-ah chuan 1.36 MT a ni.

Pa: Wild mushroom hi India chuan a thawnchhuak nasa a, Israel hi a leitu ber a ni. Russia, UK, Saudi Arabia leh US te hian an lei nasa bawk. Mizoram chu a boruak, sik leh sa avangin pa chin nan hian a tha hle niin report chuan a sawi. Sorkar lamin pa chi hrang hrangte hi an zirchiang mek a, chumi zawh hunah chuan tam tham taka tharchhuak turin hmalaka remchang hle dawn a ni.

Pangpar khawi chi: Anthurium hi pangpar khawi turah chuan Mizoram sorkarin hmalakna turin a thlang tawh a, a ram leilung leh boruakin a zir nia ngaih a ni. Anthurium chu mi awm theite'n an tuipui hle . Thil ngaihven zui tlak tak a nih thu report chuan a tarlang. Pangpar khawi chi-ah rau rau pawh Mizorama mite chu hmun dang aiin a tha zawk a ni. India hian 2007-08 chhung khan dollar maktaduai 29.6 hu vel pangpar khawi chi hi a thawnchhuak a ni.

Ramhmul damdawi: Ramhmul damdawi sumdawnna hi India rama sumdawnnaah chuan a thang duang ber a ni a, kumtin 7-15% velin a thang a ni. He ramhmul damdawi tihmasawn tur hian India sorkar chuan Ministry of Health and Family Welfare hnuaiah National Medicinal Plant Board a siam nghe nghe.

Mizoram hi hetiang lamah chuan a hausa hle a, chi hrang hrang 400 chuanga awm niin report chuan a tarlang. Hetih lai hian India rama ramhmul damdawi hriat chhuah tawh zawng zawng chu 1500 niin report chuan tarlang a ni. Mizorama ramhmul damdawi hriatchhuah tawh zingah hian 62 chu thil thar/midang la hriat ve loh niin 64 chu ral mai hlauhawm an ni.

Handloom leh handicraft: Mau, hrui leh puan lam chi atanga thil siam chhuahte hi Mizoram atanga thil thawnchhuah theih chu an ni reng. Mahse, thawnchhuah tak tak tur chuan tam tham deuha siamchhuah a, a quality pawh tih that zawk deuh a ngai dawn niin report chuan a tarlang.

Tih tur dang eng nge awm?
Mizoramah hian pickle siam nana an hman lar em em fanghmate (gherkin) an tih hi chin theih a ni tih a zirchiangtu Mizo tlangval pahnihte ngaihdan a ni. A ram leilung leh sik leh sa atangte pawhin Mizoram chu gherkin chinna awm tak nia an hriat thu report-ah chuan an tarlang a, ram zimte teah pawh chin theih a nih avangin Mizoramah a tih chi viau dawn niin an sawi. Ni 90 chhung vel leka seng theih a nih avangin Mizo zia nen pawh a inmil viau awm e.

Heng thil chi hrang tihlawhtling tur hian report chuan sorkar lam tih tur chi hrang hrang a tarlang bawk. Chung zinga pakhat chu Mizo puan – puanropui, puanchei leh pawndum hi Geographical Indication hmanga humhalh tur tih hi a ni. Report chuan rel kawng hmanga India ram hmun dang nena inkalpawhna neih, Burma leh Bangladesh nena insumdawn tawnna tha neih, ramdanga thil thawnchhuah chungchanga seminar leh workshop tam zawk neih, local entrepreneurship leh public privte partnership lama hmalak, etc a tul tih a tarlang bawk.

Heng bakah hian organic farming lama hmalak chu Mizoram tan thil harsa a ni lo, thlai chinnaah hian damdawi lam chi hman a nih vak loh avangin, report chuan a ti. Tin, organic farming hmang hian sum tam zawk a hui luh theih dawn a ni, a ti.

Thei tui sawr chhuahna lam hi hmalakna tur niin report chuan a sawi a; food processing lamah hian corporate liante pawh an rawn lut thei a, thil tha tak a nih theih thu pawh report chuan a tarlang. Hetih rual hian a ram awm dan ngaihtuah chuan processing unit lian lutuk lo awm tam hi a tha zawk dawn niin a sawi thung. Report chuan thlai chin tur lamah pawh a chi hrisel leh tha chauh chin a nih theih nana hmalak a tul thu a tarlang bawk.

Report siamtu Exim Bank pawh hian financial institution dangte ang bawkin Mizoram chu hmalakna tur hmun thaah a ngai a, August ni 3 khan Mizoram Entrepreneurship Network (MEN) nen tangkawpin I&PR Conference Hall-ah "Seminar on Export Potential of Mizoram" an huaihawt nghe nghe.

Exim Bank hotu pawimawh tak takte leh mi pawimawh leh langsar tak takte an tel a ni. He seminar-ah hian report pawh Mizoram trade and commerce minister Lalrinliana Sailo-in a tlangzarh a ni. MEN hruaitu pakhat phei chuan Exim hi Mizorama cheng vaibelchhe thum vel invest tur hian an inpeih at reng tawh niin a sawi nghe nghe.

Related Posts :