Eirute Tan Manganna Dar, Eiruk Dona Hmathar

¢ Lalremruata Renthlei

Pawl pathum inzawmkhawmin tlang khatah lungrual takin thu khat an vua a, Mizoram atanga eirukna hnawhbo an tum a, eirute chu phawrh mualpho an tum.

Hetiang hmalakna hi hmun dangah pawh hriat tur a vang viau awm e. Pawl-in hma an la a, mipui thlawpna an beisei a, mipui chanai sum eirutute chu tihmualphoin eirukna chu hmehmih theih niah an ngai niin a lang.

Heng pawl pathumte hi Mizo zingah an mikhual lo hle a, eirukna an duh lohzia pawh tlangaupui fo tawhtute an ni.

Thuchhuah intawm an siamah chuan, “Mizoramah corruption a nasa kan ti a, a zual zel niin kan sawi reng bawk a. Hetih lai hian eiruk avanga dan hmanga hrem leh khawtlang endawng hlawh erawh an tam lo hle,” an ti.

“Hetianga corruption nasat leh zual zel chhan hi tam tak a awm rualin a chhan bulpui ber berah ‘Dan hremna an tawh loh leh kan endawng loh vang’ te ni berin a lang a. Dan hremna an tawh loh leh kan endawng loh chhan hi ‘tute nge ram hmasawnna tur leh mipui chanai eiru thin tih mipuiin kan hriat loh vang’ niin a lang leh a. Hei vang hian ‘tu te nge eiru’ tih hriatchian nana hmalak tul ti leh mipuiin eiru te chungthu an rel tul ti a, chumi kawnga hma la tura min nawrtu an tam hle,” an ti bawk.

Mipui nawrna vang a nih rualin hmalak tak tak chu an hreh viau niin anmahni chuan an sawi a, “Mipui nawrna hi nasa hle mah se kalpui kan hreh em avangin hma kan la mai bik lo a. Amaherawhchu, nawrna a nasat tak em avang te, kan sorkarin mipui chanai leh hmasawnna hnathawhna tur eiru te dim a tum lo nia a lan avang te in huphurh chung chungin ke kan pen dawn ta a. Keini Society for Social Action (SOSA) te, Federation of Mizoram Trade Union (FOMTU) te leh Peoples Right to Information and Development Implementing Society of Mizoram (PRISM) te chuan kan hmalakna min thlawp turin mi tin kan sawm a ni,” tiin an sawi.

Eirute chu tu te nge an nih mipuiin an hriat a tula an hriat thu sawiin, “Mipui chanai eiruk hmanga in leh lo ropui tak tak din a; tu leh fa te zirna tha ber bera kal tir a; khawtlang, pawl leh Kohhranah te a kul a taia inhmang a; mi tha ber lena leng te hi tu te nge an nih mipuiin hriain endawng ila. Chu bakah heng mite chungah hian dan chhungah engtin nge kan tih dawn tih an tihretheih mipuiin ro kan rel a hun ta niin kan hria a,” an ti.

“Hetianga hma kan lak chhan hi kan ram tichhetu eirukna nawrchep kan duh vang a ni a. Mipui chanai eiruk avanga hma pawh sawn thei lova kan awm hi mi tinin kan ning tawh a, hemi tireh tur hian awmze neia hmalak kan duh tawh niin kan hria a. Chumi atana kawng tha ber tur chu nia ngaiin ‘EIRU NIA RIN THLANNA’ hi kan buatsaih ta a ni,” tiin eiru te tihmualpho an tum dan an sawi a ni.

“Eirukna tihtlem dan tur ngaihdan tam tak zingah ‘THIH HUAMIN AW’ tih lehkhabu, kan ram rorelnaa hmun pawimawh bera awma MLA hial ni tawh te intelkhawmna pawl Former Legislators Association of Mizoram (FLAM) in an chhuahah khan ‘khawtlanga zaka siam’ te, ‘Kohhran leh tlawmngai pawl hmanga nawr’ leh man chhuaha dan hmanga hrem lam hawi te kha hmalakna tha ber ber tur niin an lo sawi tawh. He ngaihdan hi mipui pawhin kan tawmpui thlap niin kan hria a. Kan bawhzui dawn ta a ni,” tiin hmalak an tum dan an sawi.

PRISM president Vanlalruata chuan, “Kan kalpui tum dan chuan chanchinbu hrang hranga chhuak ang hian eiru nia kan rin te – politician pawh, sorkar hnathawk pawh, Kohhran hruaitu pawh, pawl hruaitu pawh, contractor leh supplier pawh, mi tu pawh – sorkar emaw mahni awmna pawl pawisa emaw hmasawnna hnathawhna tur chi apiang - an hming, address, nihna leh eiru nia rin chhan/eirukna lai nia rin hi a duh apiangin ziakin thehluhna tur hmunah hian thehluh tur a ni. A ziaktu in a hming a ziah kher a ngai lo a, hming ziak an awm pawhin thup tlat tur a ni dawn a.” tiin Zozam Weekly a hrilh.

“A ziaktu apiangin lehkhaip (envelope)-ah khungin lehkhaip kawm-ah ‘EIRU NIA RIN THLANNA’ tih ziah a, ip chu char thlap zel tur a ni a. A dawngtuin tu hming leh chanchin nge inziak hre thei lo se kan duh a. Lehkha pakhatah mi pakhat chanchin chauh ziah tur a ni a. Tin, mahni ngeiin lehkha thlakna tur bawmah khung chat ni thei se duhthusam a ni,” a ti bawk.

Kalpui an tum danah chuan dak-a thawn tan chuan lehkha ip thuah tur a ni a, thuziak lehkha ip-a dah a, a kawma ‘EIRU NIA RIN THLANNA’ tih ziah a, ip danga khung lehin chumi ip pawn zawkah chuan thehluhna tur address chauh ziahtur a ni a, a pawn zawkah chuan ‘EIRU NIA RIN THLANNA’ tih ziak a ngai tawh lo ang.

Ziaktu te’n a chiang thei ang berin an ziak tur a ni a. ‘Hming’ chu a putu in official-a a ziah ang thlapin ziah ni se. ‘Address’ chu chiang tak, zawn hmuh nghal zung zung theih turin an House Number emaw an in bulhnaia hmun pawimawh deuh nen lama ziahlan ni se. ‘Nihna’ pawh hi, sorkar hnathawk an nih phei chuan, tuna an nihna leh an thawhna office nen lam ziahlan ni se kan duh a., an ti. Hei hi an tihna chhan chu anmahniin chhui chian an tum zel vang niin PRISM President Vanlalruata chuan a sawi.

‘Eiru nia rin chhan’ phei hi chu a chiang fak tur a ni – Entirnan, in emaw huan ram ang chi a nih chuan, a awmna hmun chiang tak leh a chhawng san zawng/len (zau) zawng/hmanna etc nen lam ziakin, zawn hmuh nghal theih turin, a bulhnaia in, huan etc. nen lam ziah nise; an fate sikul kalna anih pawhin a sikul hming leh address ziah chian fak ni se kan duh a. Eiru nia rin chhan hi ziah chian fak anih loh chuan, a ziaktuin a hming leh address a ziak chianga kan be zui thei anih si loh chuan, thutlingah kan ngai dawn lo a ni, tiin pawl pathum te thuchhuah chuan a sawi bawk.

Eiru nia rinte hrilhna lehkha hi September ni 15, 2009 thleng thehluh theih a ni ang. September ni 16, 2009 atangin pawl hrang hrang hruaitute leh mi rintlakte enpuiin enfel a ni dawn. Daka thawn pawm a ni dawn a, lehkha thehluttu hming chu thup a ni thung ang.

PRISM president Vanlalruata chuan, “Nikum khan October ni 3-ah ‘Anti Corruption Convention’ kan buatsaih a. Kuminah pawh October ni 3, 2009-ah ‘Anti Corruption Convention’ kan huaihawt dawn a. Hetah hian a duh apiang tel theih a ni ang a, ‘Eiru Nia Rin’ thlanchhuah te chungah, dan chhungah, engtia tih tur nge rel a ni ang a. He Convention rorel ang ang hian hmalak zui a ni dawn a ni. Hemi ni hian eiru nia rinhlelhte thehluhna bawk hi kan hawng dawn a ni,” tiin Zozam Weekly a hrilh.

PRISM president Vanlalruata chuan, “Mi zawng zawng tan hun kan hawng a. Eiru nia an rinhlelhte chu he thil hmang hian an puangzar thei dawn a ni,” a ti.

Mahse, an fimkhur thu sawiin eiru nia an thehluhte hming chu an tarlang mai dawn lo niin a sawi thung.

“Eiru nia an rin an rawn thehluh te chu an hming kan tarlang mai lo ang. An eiru ngei em tih chu finfiah kan tum leh thung dawn a ni. An hming kan thup rih ang a, a chhui hna kan tan ve leh thung dawn a ni. Chumi hnuah an eiru ngei nia kan hriatchian te chu kan tarlang tawh ang,” a ti.

Bawm an hun an hawn hunah pawh anmahni chu a hawngtu tur an nih loh thu sawiin, “Midang mi rintlak te bawm hi kan hawn tir ang. Chuti a nih loh chuan tu emaw in ka rawn thehlut ngeia an hming a lan ve siloh tia min chhuahchhal te pawh an awm thei,” tiin a sawi bawk.

Eirute chu tihmualpho an nih loh chuan eirukna a rem tak tak thei dawn lo nia an hriat thu sawiin, “Kan sawi kan sawi a, tu te pawhin kan sawi fo thin. Kan society atanga eirukna hnawhbo hi kan duh vek. Mahse, tihngaihna tak tak hi a awm lo a ni,” tia sawiin, “Sorkar angin hma a lak theih a, mahse, duhthu a sam lo. Eiru ngei nia kan rinhlelhte pawh se zawl chhuah an awm leh zel. Chutiang bawkin hmalak theihna tur nia kan ngaihah hma kan la deuh vek tawh. Tuna kan hmalak hona hi a tha ber nia kan rin a ni a, keimahni maiin hma kan la dawn bik lova, pawl pathum chauh kan la ni rih a, pawl dang min zawm theitu tur te pawh hi an awm niin kan hria a, hei ai hian kan la tam thei ang,” tiin Zozam Weekly a hrih.

SOSA member Lalhmingliana Saiawi chuan theihtawpa hmalak an tum thu a sawi.

“PRISM-ho hmalakna a ni a, tih theih dang kan nei ve si lo a, theihtawpa puih hi kan tih tur a ni kan tia a ni,” tiin Zozam Weekly a hrilh.

Lalhmingliana Saiawi chuan, “PRISM-ho hi ka khawngaih a ni. An la tlangval a, an viak a la tha a, keini SOSA te chu putar awmkhawm kan ni mai a. Thil han tih tak tak hi a harsa tawh em em a, tunah pawh PMGSY chungchangah PIL kan thehlut a, mahse, duh ang thala han chhunzawm hi a harsa kan ti thin a ni,” a ti.

Eirukna tihbo leh sorkar tha neih chu thil pawimawh a nih thu leh mi tin te’n chuti lam hawia ke kan pen a tul thu a tih thu a sawi a, chutih rual chuan Kohhran pawhin a tih tur a ti tawk lo nia ngaih thu pawh a sawi.

“Kan Kohhran te pawh hi an dawih lutuk a, rorelna dik te kan ti a. Kan Kohhran ber hi a in-compromise thui lutuk tawh a ni,” tia sawiin, “Hmanniah pawh biak in-ah ka sawi a ni,” a ti nghe nghe.

PRISM leh SOSA bakah FOMTU tena press conference an kohnaah Journalist pakhat chuan tu emawin Kohhran pawh khin a tum thu a sawi a, hemi chungchang hi sawiin Lalhmingliana Saiawi chuan, “Khatiang te kha thu dik tak a nih chuan Kohhran pawhin an khing ve ngam zawk tur a ni. Thil tidik lotu chu kan khing ngam tur a ni,” a ti.

Eirute tihmualpho chungchangah, “Theih tawpin kan tang ve ang a. Dan hnuaiah chuan an che tha bikin ka ring lo, an rin ang ngawt chu a ni lo ang, a ngam chuan min khing ang a, keini pawh kan tang ve ang chu,” a ti bawk.

Chutihrual erawh chuan eirute chu a pawngapuia puan an tum loh thu a sawi a, “Thlirfim loh chuan kan puang ngawt nang. PRISM-ho hmalak a ni ber a, an viak a tha a, eiru ngei nia kan hriatte erawh kan puang ngam ang. Miin corrupt nia an rin huai huai te chu thlitfim an har lo tawp ang,” a ti.

Related Posts :