¢ HC Vanlalruata
Nimin lawk, June ni 28 (Pathianni) kha kan thianpa, Divisional Forest Officer, Aizawl Division hna a chelh laia min kalsan ta, Hmingdailova Colney IFS thih champha vawi 4-na a lo ni leh ta reng mai a. Lung a len rualin khatiang Mizo officer hnathawk nasa leh hnaa inpumpek kha ka ui a zual hle mai.
Ani kha khawvel nunah a fel famkim ka ti hauh lova, a hnathawhna kawngah pawh mihring ve tho a nih avangin mam lo chin chu awmlo theilo a ni ang tih ka ring. Thlarau lam nunah phei chuan kan Mizo inti Kristian tehnaah chuan ‘Bawih thahnemlo tak’ tih tur zing ami a ni ve a, keini’n kan kawm ngeih chin hi chu thlarau lama thuk tak nih a harsa ve reng reng awm e. A hringnun tak phei kha chu tluk leh thawh fawm ve fo thin, chaklohna pawh nei ve tak a ni tih zep thu a awm lo. Mahse, a hnaa a inpekna, amah chhawra ruaitu sorkar leh mipui tana a inpek zawhna erawh kha chu midang entawn tlak, kan Mizo officer zinga arsi eng berte zing ami a ni ka ti lo thei lo.
Keiin ‘Pu Hming’ tiin ka ko laklawh a, ani kha chuan ‘Paula pa’ a tih loh leh ‘Thiana’ tiin min ko thung a. Pa tawng tlem, hnathawk tam, mahni hnaa inpe mi a nihna leh a ruaitu sorkar leh mipui tana rinawm a nihna kha ka chhuang ber fo. Pa hmanhmawh a ni lova, mahse, a hna chu a hunah a zo hman thin. Vawikhat a sawi ka hriat reng chu: “Sorkar hian keini sorkar hnathawkte hi hlawh tha tak min pe a. Kan damloh nikhuaah kan chhungte nen kan inenkawlna a tum vek a. Officer chinte phei chu office kalna tur leh hnathawhna turin motor min pe a, chhungte’n min chhawrpui ve thei bawk a. Chuvangin eiru-a sorkar hi rawk chiam chiam tur kan ni lo,” a ti a ni. Vawikhat leh pawh, “Sorkar hi chu a tha mang e. Tuna ka thawh ang thawka ka hlawh ang hlawh tur hi chuan tumah ka chhawr duh lovang, a chhawrtu tan a hlawklo em mai,” a ti bawk.
Khawi hmunah pawh sorkarin sawnin dah sela lungawi takin a kal a, a thawk mai a. A awmna apiangah langsar tham thil a hnutchhiah zel. Kum 2003 November ni 19, Mizoram assembly inthlanpui vote thlak hma ni chiah khan khatihlaia a din leh enkawl chhoh Tuirial kama thing tih tiahna leh thingtiak enkawlna hmunah phailam chanchinbumi (inthlan ngaihvena lokal) te nen kan kal a. Guwahati ami chanchinbumi-in a ‘comment’-ah chuan India hmarchhaka ‘Nursery’ tha ber a ni a ti a. India ram hmun dangah pawh a aia tha a awm chuan a rin loh thu-in a khah chhilh zui nghe nghe a ni.
Tuirial Nursery tlawhtu dang, India ram puma Environment & Forest Ministry hotupa Director General-in comment ziahna bu-a a ziah phei kha chu photocopy siamin Vanram kawtchhuah kawngkhar mawi-a lo duty Peter-a pawh entir tlak hial niin ka hria. Hemi Nursery chauh hi a ni lova a bial chhunga Forest Development Agency (FDA) kalpui dan sorkar laipui aiawhte’n an rawn en pawhin lungawithlak an ti a, Nodal FDA-ah an puang nghe nghe ni ta-in ka hria.
Mizote hi dam laia infak chinglo, hmaichhana infak phei chu fello riauva hria kan ni a. Chumi vang chu ni maw Pu Hminga pawh kha a hnathawh that fakna thawm lian tak a tamlo hle a. Governor hlui Pu A.R. Kohli, mi tam takin tlang zet zeta mi sawisel a chin avanga an ngaihtheih vakloh, khan chawimawina certificate ropui deuh mai a hlan ve hlauh thung a. Khami tum pawh khan, “Thiana, en teh kan Pu hi mi sawisel ta reng renga Mizoram dung leh vang fang thin a ni a. Chutiang miin chawimawina min han hlan hi chu a hlu ve viau lo maw?” tiin min hrilh ru a ni.
Sorkar hna maiah a inhmang zo bik lova. A kalna apiangah thalaite infiamnaa an tuihalna hria-in tennis court te a siam thuai zel a. Chubakah SENHRI chanchinbu kan enkawl ve lai khan khel lova infiamna lam huang ngaihnawm tak tak rawn thawh thintu, hetiang lam ngainate’n an lawm em em thu rawn ziak thin a ni a. Internet awm hma pawh khan thil kilkhawr ber thleng hre tura inchhiar peih a ni. Sikul naupang ipte rit lutuk chungchang a ziahnaa mithiamte’n an pawl san leh kum tam dana sikul ipte rih zawng tur an bithliah dan fel tak a rawn tarlan te kha a hlu teh a sin. A hna piahlamah a hna a tuipui em em environment tichhelo tura mipui zirtirna leh sa kap thei nih aia a humhalhtu nih ropui tawh dan a chhep chhuahte kha hriat reng tlak a ni.
YMA-in Nungcha Humhalh Kum an puan lai pawha officer thawhpui nuam taka an ngaih thu khatihlaia Central YMA hruaitu lawk Pu P.L. Liandinga’n min hrilh ka la hre reng bawk. Nungcha humhalhna kawnga ‘awareness’ siamna atana mi langsar atanga langsarlo thlenga silai a tun tir zo zaite kha theih nghilh chi a ni lovang.
Chuvangin kan thianpa hi kan hnenah a awm tawhlo naa kan thinlungah a hnathawh that leh a thil tha min hnutchhiahte a nung reng a. Entawn tlak a nihna entawna a hnungzuitu sorkar officer kan ngah poh leh kan ramin kan chhawrin kan tangkaipui nasa dawn a ni.
No comments:
Post a Comment