MICHAEL JACKSON-A ZAN HNUHNUNG

¢ C Vanlalhlua

Michael Jackson (50) kha eng vang chiaha thi nge a nih tih chu chhui chian zel tura ruahmanna siam a ni a; tun dinhmuna a thih dan tawi fel taka sawi theih awmchhun chu June 25, 2009 chawhnu her vel (India sana-a June 26 zing/zanlai dar 12:30 vel) khan Los Angeles-a a chenna In-ah lungphuchawlin a tlu a, khaihthawh rual lovin a awm zui ta, tih a ni.


Hetia hun lo tak maia a chungkhat laina te leh khawvela amah ngaisangtu tam takte a kalsan hma zan khan Michael Jackson chuan rim takin hna a thawk thung a, hetiangin a awm ta mai ang tih hi a bulhnaia awmte tan pawh rin ngaihna a awm lo.

Kumin chhunga Michael Jackson-a lungkham lian tak chu July 13, 2009 atanga London khawpui O2 Arena-a a concert neih tur hi a ni tih chu a thih dawn zana a awmdan atang hian a hriat a. Ama sawi danin he concert hi a career-a a tawpna ber tur a ni a; July ni 13 atanga tanin, March 6, 2010-a tawp tura ruahmanna siam a ni. Hemi chhung hian a hmun ngaiah vawi 50 a inlan ang tih a ni a, ticket pawh a thih hma hian hralh zawh vek a ni tawh a ni.

A thih hma zan khan he concert chhawng 50 atana inbuatsaihna hi Los Angeles-a Staples Center-ah neih a ni a. A rawn thlen hian rehearsal neihna hmun chu a tak tak ang tura peih a lo nih tawh avangin a phur hle tih a hmel atang pawhin a lang thei a. A hma thla tam tak an lo inpuahchahna zawng zawngte chu hemi zan hian a taka hmuh theihin a awm a, hei hian a rilru pawh a tihlim a ni tih a lang a ni.

Kum 1987 atanga Michael Jackson Vocal Director lo ni tawh Dorian Holley sawi danin kum dang zawng aiin tun tum concert an inpuahchahnaah te hian Michael Jackson hi a mizia a danglam a, hriat theihin a thutak bakah, a rilru pawh a sawrbing nasa niin a lang. A hmate kha chuan a backup singer turte leh concert-a tel tur dangte an thlanna audition-ah a takin a tel ngai lova, videotape hmanga a thlan mai thin bakah, hmaichhanah vawi hnih, vawi li bak a be ngai lo. Tun tum inbuatsaihnaah erawh hi chuan audition zawng zawngah a takin Michael Jackson a tel vek a; a thih dawn zan phei hi chuan amah puitute pawh hi a titipui bawrh bawrh nghe nghe a ni.

A thih dawn zana rehearsal an neih hian concert-a an sak tur hla engemawzat a sa a. A aw a la that bakah, a che vel pawh kum 50 mi che vel atan chuan zia tak a la ni. Mi duhtui leh taima a nihna chu a thih hma zan pawh hian chiang takin a la lang a; an hla sak chhina fel lo lai leh midangin an hmaih palhte chu tih dan tur tha zawk leh dik hrilhin, rang tak takin a sa zawt zawt a, a fel lo laite a kawhhmuh zung zung bawk niin Dorian Holley chuan a sawi.

Dorian Holley chuan, “British chanchinbu Daily Mail-in, ‘Michael Jackson hi a hma anga zai leh lam turin a tlak tawh lo, a kulcho tawh,’ tia an sawi thin kha pawm tlakah kei chuan ka ngai lo; a thih dawn thlenga a taka a che vel hmutu kan ni a, a nihna takah chuan a ruala lam tur kum 20 mi velte ai pawhin Michael Jackson hian mit a la zawk a, thathona pawh a nei tha zawk tih ka hria a ni,” tiin a sawi. A insawiselna ber chu a lam nasat deuh hian a rawl ve deuh thin tih chauh a ni.

Hetiang hi Michael Jackson-a’n khawvela a zan hnuhnung ber a hman dan tlangpui a ni a. Zanlai pelh hnuah eng meeting emawa tel turin Michael Jackson hian rehearsal neihna hmun hi a chhuahsan a; hemi hmuna awmte’n a chinchang an hriat leh hmasak ber chu darkar 12 hnuah a thi tih thu a ni. Khawvel zau zawka mite a barakhaih ai pawhin hemi zana hun a hmanpuite hi a barakhaih zawk awm e.

A tir lama kan sawi tawh ang khan Michael Jackson hi eng vang chiaha thi nge a nih tih chu chhui chian tur a la ni a. Tun dinhmuna kan hriat theih chin chu July 25 chhun khan Los Angeles-a a chenna In-ah a tlu a, kaihthawh zawh a ni ta lo tih a ni. Sawi dan pakhat chuan chhun dar 11:30 velah nachhawkna damdawi Demerol-in a inchiu tih a ni. Engpawhnise, a thih dan chungchanga thu chiang zawk hriat tur a la awm thuai ang chu.

Related Posts :