Michael a kal ta!

¢ Bcha

June ni 25, Ningani kal ta (kan ramah chuan Zirtawpni a ni hman tawh) khan Holmby Hills, Los Angeles-a a in luahah Michael Jackson chu thichhawngin a let reng a, mahse a fate chuan fiamthu a thawh emaw tiin a thi derah an ngai. An pa chuan anmahni fiam nan chutiang chuan a ti fo si a!


Nauawmtu chuan naupang pathumte chu room dangah a hruai nghal a, mahse naupangte chuan an pa chu a tih fo thin angin anmahni barakhaih tura a rawn zuan thawh leh mai an ring a, tichuan an chhungkuain hlim takin an infiam chhunzawm leh ngei dawn alawm!

Mahse, emergency truck a rawn thleng a, mak an ti kher mai. Rikrum thila damdawi thiam koh mai chi (paramedics) te chu hmanhmawh takin an in chhungah an rawn tlanlut a, ambulance sirens a ri ruai ruai bawk. Tah chuan an pa chu a thi der mai mai lo tih an hrethiam tawh a, mangang leh hlau thlabar takin an pa chu auin an tap ta chul mai. He hi Maichael Jackson-a fate awmtu sawi dan chu a ni.

Michael Jackson-a enkawltu cardiologist Conrad Murray, Jackson-a thih laia a bula awm ve reng pawhin a tirah chuan thi derah riak a ni a ngaih ve tho ni. Chutiang chuan tunhma pawhin a fate chhaih fiamnan a lo ti fo tawh thin si a. Mahse, vanduaithlak takin tun tum chu Michael Jackson hi a thi der tlat si lo. A thi tak tak!

Murray chuan Michael chu a bia a, mahse chhang tur a awm ta lo. Tah chuan chu cardiologist chu a harhchhuak ta, a dam lo enkawl chuan a ti der lo! Tah chiah chuan buaina lipui thuk takah a inhnimlut tih a hrethiam ta. Thaw tir leh tumin theih tawpin a bei a, a ka-ah te pawh a ham, a awmah a nem bawk. Hmanhmawh takin rikrum thila phone tur 911 an ko ta nghal.

Paramedics te chuan Michael-a chenna chu minute 4 chhung lekin an thleng nghal a, tah chuan Michael Jackson chu a thaw tawh lo! Oxygen mask vuah chunga an in atanga an zawn chhuah laiin a fate chuan an pa chu tukverh atangin an mangang takin an lo thlir thap a, Jackson-a farnu La Toya leh an pi (Michael Jackson-a nu) Kathrine te chuan an pa an hruaina damdawi in UCLA Medical Centre-ah hmanhmawh takin an hruai ve nghal.

Damdawi in-ah chuan Michael Jackson-a fate - Michael Joseph Jackson Jr (12), Paris Michael Katherine Jackson (11) leh Prince “Blanket” Michael Jackson II (6) te chu an ngaihtuahna la peng turin milem cheina hmanrua te pek an ni a, an pa tan 'get well soon' lem ziaksak tura tih an ni. Mahse, chutih lai pawh chuan an pa chuan thlarau ram lamah a kalsan tawh reng si a. Naupang pathumte chuan an pi chu an kuah a, an tap a, an pa thlarau tan an tawngtai a.



Adieu, King of Pop, Michael Jackson!
Bruce Springsteen leh Bryan Adams te chu Michael Jackson-a hmain India-ah an rawn kal tawh. King of Pop lo kal hnu Bon Jovi, Elton John leh Enrique Iglesias te pawh an rawn kal leh tawh.

Mahse, Mumbai khawpuiah chuan Andheri Sports Complex-a November 1996-a Michael Jackson concert aia sawi hlawh a la awm ngai lo. Khatih lai khan Sena-BJP te'n Maharastra-a ro an rel lai a ni a, sakhaw la lungrun pawl rorel lai ber khera King of Pop rawn kal tlat mai kha a mak danglam ve tawh hrim hrim, saffron brigade (BJP) chak chhanah an la puh ta deuh deuh; a bikin khatih laia la thalai ve zek zawk Raj Thackeray, Sahar International Airport-a Michael Jackson lo dawngsawnga Matoshree a a patea, Balasaheb Thackeray hnen hruai thlengtu khan a lar phah tak zet.

Airport-ah mipui a tama tam mangkheng an pungkhawm a, mumal nei lo takin an ri hut hut. Mi zawng zawngin King of Pop chu a hmu hnai ber nih an tum theuh emaw tih mai tur a ni a, police-te hlei hlei khan nuam an ti, Michael Jackson kha lo khawih ve hrim hrim an tum a, an ven ber mipui lam pawh an veng hneh lo lam chu a ni.

Raj Thackeray chuan a lo dawngsawng a, a bulah Maharastrian traditional dress-a incheiin Bollywood star Sonali Bandre pawh a lo ding ve bawk. Michael Jackson chuan a dan ngai tein lukhumparh te chi a rawn khum leh a, a trademark an tih hial tarmit dum lian tha tak a vuah bawk. Jacket sen brass buttons leh eupaulets in bel chhuai mai a ha a, kekawr dum piping awm a ha bawk. Michael Jackson a ni tih hre sa tan lo chuan London leh New York hotel changkang deuha kawngkhar hawngtu ni mai awm tak a ni.

Motor tam takin an zui a, VVIP anga dawnsawn a ni. Siren ri chuah chuah chungin airport an chhuahsan a, mahse, kawng lakah din a rawt ta tlat. Kawng kama vai lama lo lamte bulah chuan chhukin a kawng (hip), dar (shoulder) leh ke te a han sawi ve nghawng nghawng a. Chuvang tak chuan alawm India mipuite thinlunga a tlak nat tak em em!

Chu mai pawh a la ni lo, thil dang pawh a la awm. Kha concert kha sawifiah thiam rual lohin a hlawhtling. Michael Jackson showmanship ropuizia chu sawiin a siak lo. Chu thlasik zan vawt vur mai hnuaiah chuan light a de zawr zawr a, music ring tak chuan mipui au thawm chu a khuh zo lo lam mah a ni awm e. Mumbai chu a nghing a, Michael Jackson-a hla lar tak tak hla 20 vel hmangin Mumbai chu a lâm a ni ber. Amitabh Bachchan meuh pawhin he concert hi a hmunah a chhim ve ran a nia!

Mumbai-ah chuan concert tura kal a ni a, press interviews leh Bollywood star te nena intihhlim lam a ngaihtuah lo. 'First family of Politics in Maharastra' an tih hial Thackeray chhungkua nen an inkawm a, an titi a, thla an la ho a, an hnen atangin India a hriatrengna tur thilpek te a dawng tih loh chu midang han titi pui a nei lem lo.

A haw hnuah, Oberoi hotel-in VVIP mikhual dang thlen leh theihna tura an pindan an singsak laiin Michael Jackson-a thilpek an hmuchhuak ta. Khawvela zaithiam ropui ber pawl chuan a lukhamah ti hian a lo ziak a:

"India, ka hmuh chak em em chu ka hmu ta. A chhunga chengte, ka vawi khat hmuhnaah ka ngaina nghal em em che u a ni. Tunah hian ka haw a tul leh tak si avangin ka rilru a hrehawm a, ka lung a leng lawk hle, mahse, hei hi ka intiam a, hmangaih taka i chhunga cheng turin ka rawn kir leh ngei ang. In thatnate hian min ti lawm tak zet a, in thlarauminate hian min va hneh tak em, in fate aw pawh a mawi e, ka thinlung an khawih. Pathian hmel hmu ang mai ka ni. India, ka ngainain ka zah tak zet che. Kumkhuain hmangaihna chhawm nung zel ila, naupangte ti damin lehkha thiam tir ang aw- kan hmalam hun an ni si a. India, ka hmangaihna a bik takin ka hlan a che. Kumkhuain, Pathianin malsawm che rawh se. - Michael Jackson"

He lukham hi charity atan lilam a ni a, rangkachaka sumdawng hausa, film-financier ni bawk Bharat Shah chuan cheng tam takin a lei. He pa hian a lukham lei hi engtin nge a tih tak zel le, a la kawl tha a nih chuan a hlu tawh ngawt ang le. Mahse, Michael Jackson-a'n India-a rawn let leh ngei tura a intiamna chu engtikah mah a tipuitling dawn ta lo. Adieu, King of Pop, Michael Jackson!


Michael a kal ta!
"Michael, i kal ta mai hi hun lo kan va ti tak em," tiin amah ngaisangtute an rum vawng vawng. Mahse ani chauh hi pop icon a 'hun hmaa' mual liam ta a ni hlei nem- Elivs Presley, John Lenon, Tupac Shakur, Notorious B.I.G, Kurt Cobain, Selena leh midangte pawh. Hengho zawng zawng hian khawvelin a la thlakhlelh em em laiin drugs leh silai vangin mual an liam ta si.

June ni 25, 12.21 pm (Los Angeles time)-ah emergency call "Mipa kum 50 mi, a thaw lo" tih an dawn vangin paramedics te chu hmanhmawh baklengin Los Angeles-a Michael Jackson-a chenna lam panin an tlan chhuak a, a hmun a thlen chuan kum 50-a upa, Michael jackson chu a thaw tawh lo. A lungphu a chawl!

Paramedics te chuan ambulance hmangin hmanhmawh takin damdawi in lam an panpui nghal a, kawnglakah oxygen te pein thawk tir leh tumin nasa takin an bei a, UCLA Medical Centre an thlen hnuah pawh Michael Jackson thawk tir leh tuma beihna chu an hlawhchham.

Jackson-a chhungte chu a khum bulah an pungkhawm a, an tap, chutihlai chuan UCLA Medical Centre pawn lamah pawh Michael Jackson ngaisangtute an lo pungkhawm tawh a, thenkhat chu "Ti dam leh rawh u, chhan him hram rawh u" tiin an au chul a.

A fate leh a nu, a farnu leh a thian hnai tak Elizabeth Taylor te pawh hmanhmawh takin damdawi in an thleng nghal thuai a, Los Angeles County Coroner Fred Corell chuan, Jackson chu lungphu chawlin dar 2.26pm (Los Angeles time) ah lungphu chawla a thih thu a puang ta.

HIStory: Past, Present and Future
August ni 29, 1958-ah Joe Jackson leh Katharine te a fa pasarih zinga a pangna niin a lo piang a. Chhungkaw khawsak nuam tak an ni hran lo. A pa chu thir chher thiam a ni nain music lamah talent a nei viau a, an chhungkua hian zai lam an ti thei riau. Michael pawh a tet lai atang rengin music lamah a tui hle a, lâm te pawh a tuipui chho ta zel a ni.

A pa hi a strict hle a, a fate chu hlawhtling ngei turin a nawr nasa a, fate enkawl nan tiang pawh a lek fo. A nu ve thung hi nu zaidam tak a ni thung a, a sakhaw mi viau bawk. Jehovah Witness rinna nghet taka vuantu a ni.

Joe Jackson chuan kum 1962 khan a fate zinga a upa lam pathumte nen musical group an din a, a kum lehah Michael pawh an group-ah hian an lalut ve nghal. Tichuan Jackson 5 kan tih fo hi an lo din chhuak ta. Chutih laia mihang music lama chawilartu leh thil ti thei ber pawl Motown nen 1968-ah contract an ziak a, a kum leh 1969 October-ah an single hmasa ber an tichhuak. Chutih lai chuan Michael Jackson pawh kum 11 mi chauh a la ni.

1970-ah chuan Jackson 5 hla pali - "I Want You Back", "ABC", "The Love You Save" leh "I'll Be There" te chu hit No. 1 anni a, heng hlate avang hian Jackson 5 te chu pop history-a singles pali lai chart No 1 nei thei hmasa ber an ni ta.

1971-ah Michael Jackson chuan a single hmasa ber "Got To Be There" a ti chhuak ve a, top 5-ah a lang nghal! A kum leh '72-ah chuan a solo single "Ben" chu No 1-ah a invawrh kai nghal a, "Ben" hian oscar nomination a hmu bawk. A chawl deuh vang vang a, Motown nen a tawp nan 1975 khan Jackson 5 te chuan album an tichhuak leh a, hemi hnu hian Michael Jackson leh a unaupa Jermaine te chuan 'The Jacksons' dinin Epic nen contract an ziak ve leh a ni.

Kum 1977 khan Michael Jackson chu mihang film 'The Wiz'-ah Diana Ross nen an chang dun a, he film a channa lamah hian producer/composer Quincy Jones nen an inhmelhriat tan a, Quincy Jones nen hian thawk dunin Michael Jackson chuan a puitlin hnua a album hmasa ber "Off The Wall" an tichhuak a. He album hian Michael Jackson chu a rawn tilar thar leh ta a ni.

He album-a hla 4 lai hi chart top 10-ah an lang nghal thawt a, copy maktaduai 7 lai an hralh nghe nghe. Quincy Jones nen chuan thawkdun zelin 1982 khan album, khawvel music history-a dai tawh ngai lo tur "Thiller" an tlangzarh ta. 'The Girl IS Mine' tih hla Paul McCartney nena an sak dun chuan No. 2 a hauh nghal a, 'Billie Jean' leh 'Beat It' te chuan No.1 a kai ve ve bawk. 'Beat It'-a guitar hi Eddie Van Helen kuthnu a ni nghe nghe.

'Thiller' kha a lar tak zet, lar tak a ni, a hla 9 top 10-ah an lang a, kum 2 chhung zet chu chart-ah a lang a, kar 32 chhung No.1 nihna a hauh bawk. US-ah ringawt pawh he album hi copy maktaduai 25 zet an hralh. 1983 a lo tawp dawn meuh chuan Paul McCartney nena an duet-na "Say say say" chu single chart-ah No.1 a ni leh vang tawh. He album hi khawvela music album awm tawh zawng zawng zingah ropui ber atan thlan a ni.

1985-ah khawvela hla dai ngai tawh lo tur 'We Are The World' chu Lionel Richie nen an phuahchhuak ta hlawl mai. Africa khawmualpuia tam tuarte tanpui nan he hla hi zaithiam rualin an sa a nih nghe nghe kha. 'We Are The World' hi khawvela single hralh chhuah chak ber a ni ta bawk.

A lar ta bawk a, chanchin maksak tak tak a ngah tan ta hle. Mithenkhat chuan a aw ki tihsan nan a hormone a khawihdanglam tir an ti. |henkhatin lan naupan reng a duh vangin Hyperbaric Chamber-ah a mu thin te an ti. Titi maksak tak tak a tam khawp mai. California-ah ranch lian zet mai a lei a "Neverland" tiin a hming a phuah. He ranch chhungah hian intihhlimna chi hrang hrang a dah nasa hle a, sahuan tenau te pawh a siam. Cosmetic surgery vawi engemaw zat a ti a, hei vang hian mihangho chuan a vun tihvar a tum a ni tiin an sawisel tan. Mahse, a vun var chhan chu cosmetic surgery vang ni lovin vun natna chi khat Vitiligo vang a ni, a ti thung.

Recording a chawlhsan chhung hian film lam a han luhchilh ve leh zawk a, Goerge Lucas leh Francis Ford Coppola te nen 3D film "Eo" an siam nghe nghe. 1986-ah studio a luhchilh leh tan a, Quincy Jones nen thawkdun lehin 1987-ah 'Bad' album a tlangzarh leh ta. He album-a hla 'Bad', 'The Way You Make Me Feel', 'Man In The Mirror' leh 'Dirty Diana' te chuan No.1 an hauh theuh a, album pakhata hla 5 No.1 nei thei hmasa ber a ni! Amaherawhchu, Bad album hi copy maktaduai 8 chiah an hralh thung.

Chutah thawm nei lovin a han bibo deuh vang vang a, chu chu media lamin remchangah lain MJ hming lem atan "Wacko Jacko" tiin hming lem an vuahsak.

1991-a a rawn kir leh meuh chu a music style a dang ta zar mai. 'Dangerous' a rawn tichhuak a, Quincy Jones nena an thawhdunna a titawp ta bawk. 'Dangerous' a hit viau a, he album a hla 'Black or White' phei chu chungnung tak a ni.

1992-ah chuan alternative rock a rawn lar tan. Nirvana chuan Dangerous chu No.1 atangin an rawn nawrthla a. Heta tang hian Michael Jackson chuan ngai a awh leh ta mang lo. Hla hit tam tak chu a nei leh ngei tak na a, tunhma a pha ta lo. 'Remember The Time' leh 'In The Closet' te pawh a hit viau a, mahse 'Jam' leh 'Heal The World' te chuan beisei a pha ta lo.

Michael Jackson hian puitling aiin naupang bula awm nuam a ti zawk thin a, a Neverland ranch-ah te chuan leng turin a sawm fo thin. 1993-ah chuan mipa naupang kum 13 mi khawih chingpena puh a ni a, he chanchin hian titi a titam hle. Chumi hnu lawkah ngawlveite enkawlna hmunah rei lo te a awm ve zawk. A case a kal zel a, mipa naupang dangte pawhin an rawn puh thar ve leh zel bawk. Mahse heng puhnaah te hian thiam loh chantir a ni ngai lo. 1995 khan amah puhtu mipa naupang nu leh pate nen chuan dollar maktaduai 20 velin an inrem leh ta.

1994-ah Elvis Presley fanu Lisa Marie Presley nen an innei a, nupa hlim tak tia sawi an ni ngai lo, thla 19 chiah an innei!

1995-ah a music career te chu siamthat leh tumin HIStory: Past,Present and Future Book-1 CD pahnihin a tichhuak a. Disc khatah hla thar, a dangah hla hluite a dahkhawm a. No.1 te chu a han kai leh nghal a, mahse, a hma a tluk thei tak tak tawh lo. Amaherawhchu, he album-a a farnu Janet Jackson nena an sak dun 'Scream' chu single chart No.5 a ni pha a, 'You Are Not Alone' chuan record thar siamin Billboard hot 100 a single No.1 nihna hauh thei hmasa ber a ni. 1997-a remix album a tihchhuah 'Blood on The Dance Floor' erawhin platinum takngial pawh a kai pha ta lo.

1996 kum tawp lamah amah enkawl tura a rawih nurse Debbie Rowe chu nupuiah a nei leh a, fa pahnih Prince Michael Jackson Jr leh Paris Michael Katherine Jackson te an neih hnu lawk 1999 chuan Rowe nen hian an inthen leh a, chumi hnuah fapa Prince “Blanket” Michael Jackson II a nei leh a, a fa hrin saktu hi puanzar a ni lo.

2001- ah Rock and Roll Hall Of Fame-ah lakluh a ni a. 2001 kum tawpah album thar "Invincible" a tichhuak ve leh a, No.1 a kai nghal vat a, double platinum a kai nghe nghe.

Hemi hnulam atang hian a chanchin hi a mak sawt hle a, mi chi hrang hrangin court-ah an khing sup sup a, chanchintha a nei ta mangl o. A hnar (nose) chuan sawi a hlawh hle. 2003-ah a Neverland ranch chu police ten an dap a, naupang khuaikhem thubuai bawk a awrh leh. Rei ngial he thubuai hi an chai hnuah 2005 September khan thiam a chang hlauh. Thiam changa a chhuah veleh Bahrain lamah a pem ta daih a, 2006-ah Los Angeles-ah a kir leh a, a leiba dollar maktaduai 100 chuang zet rulh dan tur ngaihtuahin a buai hle a, London-ah vawi 50 concert-a dollar maktaduai 50 hlawh tura a inbuatsaih mek laiin tun hi a thleng ta a ni.

This Is It: The final curtain call
London-a a conert neih tur hi MJ chuan a concert tawpna ni tawh turin a sawi a, concert pawh hi 'final curtain call' tiin an sawi a, a hmingah pawh 'This Is It' an ti nghe nghe. He concert hi a tan a pawimawh hle a, a leiba tam tak a rulh theih phah dawn a ni.

Mahse, concert promoter te chuan MJ-a rin leh beisei aia tam concert dates an lo ruahman tlat. June thla tir khan MJ chuan Los Angeles Burbank studio-a he concert atana inbuatsaihna a neihnaah, "Engtin nge show 50 chu ka puitlin theih ang? Chaw ka ei tam si lo a, ka intih rih deuh chu a ngai dawn a ni! Organiser te'n show 50 nei tura ruahmanna an lo siam pawh hi ka lawm lo khawp mai, kei chuan show vawi 10 chiah neih ka duh a, chumi hnuah khawvel hmun dangah tour neih ka duh. Ram pakhata show 50 ni loin. Show 10 hralh angin ka mu a, a tuk zingah chuan show 50 atan booked ka nih thu ka hre leh ta mai a," a lo ti tawh.

'This Is It' promoter AEG Live pawh an buai hle a, he concert atan hian dollar maktaduai 20 an invest a, concert 50 atan hian ticket 7,50,000 aia tam an hralh hman tawh a, chu chu dollar maktaduai 85 chuang man a ni tawh. Chung zawng zawng chu an refund leh vek a ngai dawn.

Hetia concert tura a inpuahchah lai hian May thla khan vun cancer a nei tih hriatchhuah a ni a, a concert hun tur pawh sawn hla lehin July ni 13 atanga tan tur a ni a, kum 2010-a zo hman tura tih a ni.

He concert tur hi fans lamin an nghakhlel tak zet a, November, 2006-a World Music Awards, London-a an sem tuma 'We Are The World' hla tawi te live-a a sak bak chu kum 12 chhung zet chu mipui hmaah a zai tawh lo.

Michael Jackson-a concert tawpna tur 'This Is it' chu kaltlangpui tho an tum a, Michael Jackson-a aiawh turin a nau Janet Jackson an be mek niin an sawi.

Concert promoter-te AEG Live te chuan he concert vawi 50 neih turah hian cheng tam tam an lo seng tawh a, mi 7,50,000 aia tamin ticket an lo lei tawh bawk. Concert hi thulh leh a nih si chuan AEG hian sum tam tak a paih dawn a, hei vang hian concert hi kaltlangpui dan tur an ngaihtuah mek.

Jackson 5 pawh biak an ni tawh a, AEG thupuangtu chuan, "Jackie, Tito, Jermaine leh Marlon te pawh kan be tawh a, Jackson 5 leh Janet Jackson te'n heng concert hi ti puitling thei hram se, kan ti khawp mai," a ti.

July ni 13 atanga tan tur a ni a, musicians, dancers leh thil tul dang zawng zawng pawh an inpeih vek tawh. AEG Live thupuangtu chuan, "Khawvel thiamna sang ber hmanga Michael Jackson pawh digital taka stage-a in nu anga an inngaih hial theih tur khawpin tih kan tum ang," a ti bawk.

A tour hnuhnung ber chu, kum 12 khal ta khan khawpui 58-ah vawi 82 a concert a ni, chu chu HIStory tour a ti. Thang khat lian aia rei mah fans te'n an nghah hnuah a hun thleng dawn tep tawh a, 'This Is It' tiin the final curtain call atan a inbuatsaih a, mahse, chu final curtain call chu hetiang hi a lo ni ta zawk si!

Engtia thi nge?
Khawvelin Michael Jackson a sun mek laiin, an chhungkaw ukil, Michael Jackson-a thupuangtu ni bawk Brian Oxman chuan Michael Jackson thihna lo thleng tur hi a hma atanga a lo hmuh lawk tawh sa niin a sawi.

"Rin loh taka thil lo thleng thut a ni lo...a damdawi ei dan te ngaihtuahin," a ti. MJ hian a puitlin hnua a hun tam zawk chu nachhawkna buaipuinan a hmang a ni ber a, ruihhlo ngaite enkawlna hmunah te pawh a lut zak zak tawh.

Oxman chuan tun hnaiah MJ hian London-a vawi 50 zet concert a neih tur chuan a rilru a kap hle niin a sawi a, hei vang hian nachhawkna pawh tunhma zawng aiin a ti nasa niin a sawi. "Reharsal a neih naah a inhliam a, stage atangin a tla a, a ke a ti na a, a vertebra a ti na bawk. hengte avang pawh hian ni dang zawng aiin nachhawkna a mamawhna nasa ta reng reng a ni," a ti.

May thla khan Maichael Jackson hian vun cancer a nei tih hriatchhuah a ni a, cancer treatment a lak laia doctor te zawhna a chhan dan chuan doctor-te a lo ti mangang hle tawh- ni khatah chaw vawi khat chauh, chu pawh tlem te chauh a ei thin tih an hrechhuak a, kum 1985 atangin cosmetic surgery a tih nasat lutuk vangin nachhawkna regular takin a lo ei tan tawh tihte an hrechhuak bawk.

A pop career a tlachhe zel bawk si nen, a leiba a pung thur thur a, court-ah thubuai a nei thei ta riau bawk si, chuvang chuan a kum telin a dosage pawh a sang chak hle.

MJ hi doctor hrang hrangin an lo enkawl tawh thin a, chung zingah chuan dermatologist Dr Arnold Klein, 1990 vel thlenga a vun natna Vitiligo enkawltu leh cosmetic surgeoon Dr Ralph Massey te chu a lar deuh an ni. Mahse, tun hnaia damdawi lama a rawn nasat tak ber Dr Tohme R Tohme chu Lebonon lam chhuak a ni a, he pa nen 2005 khan Bahrain-ah an intawng a ni.

Tohme hi US pawn lama zirchhuak a nih bakah US-ah practise phalna 'licence' a nei lo a, damdawi chawh phalna pawh a nei lo. Mahse, MJ chu he pa kutah hian a innghat lawi si. Thian inkawmngeih tak an ni zui ta. Tohme hian MJ hi UCLA Medical Centre thlengin a zui ve nghe nghe.

Michael Jackson kha ni khatah nachhawkna chak chiin vawi thum chiu thin a nih thu an sawi a, The Sun chuan Jackson-a thuihhruai pakhat hnen atanga an thudawn chhuahchhawngin Michael kha nachhawkna chak chi Demerol hmanga nitin vawi thum chiu a nih thin thu an sawi a, kum 50 mi nia, Ningani-a (keini ramah Zirtawpni) lungphu chawla a thih hma lawk pawh khan demerol hian a inchiu ngei niin an tarlang.

Demerol hi damdawi chak tak a nih vangin damdawi dang nen chawhpawlh loh tur a ni a, chutih laiin Michael Jackson hian damdawi chak tak tak chi hrang hrang a chawhpawlh (cocktail) nasa hle niin The Sun chuan a tarlang bawk.

The Sun-in a tarlan dan chuan Demerol bakah hian nachhawkna chak tak Dilaudid 3mg mum thum a ei tel a, chuti chung chuan nachhawkna chak chi bawk Vicodin chawh a ni bawk. he damdawi hi opiate drug niin codeine pai a ni.

Heng damdawi cocktail ringawt pawh hi hlauhawm tham a nih tawh laiin Jackson hian tihrawl ti hahdam thei damdawi Soma 2mg, nitin vawi hnih a ei a, sedative Xanax 0.5mg nitin vawi hnih, anti-depressant Zoloft 100mg, anti-depressant bawk Paxil 20mg, lung (heart) lam damdawi Prilosec te a ei bawk.

Heng damdawi bakah hian tunhnai lawk khan a vun cancer an zainaa infection awm vangin anti-biotics chawh a ni bawk. Heng damawi zawng zawng hi thihna khawp niin an sawi a, heng nachhawkna zozai te hi vawikhatah chikhat bak ei loh tur a nih thu an tarlang bawk.

Heng damdawi zozai hi mi hrisel pangngai tan pawh a hlauhawm tawh laiin Michael Jackson, pa hrisel lo tak, 5ft 10in a sang a ni chung pawha 57kgs vel chauha rit tan chuan hlauhawm tak a ni.

Michael-a ro sem dan tur
Michael Jackson chuan kum 2002 khan thurochhiah a lo siam tawh a, chutah chuan a rote chu a nu Kathrine Jackson leh a fate pathum leh charity atana semral tur a ti niin Wall Street Journal chuan a tarlang. Michael-a thurochhiahah hian a pa Joseph Jackson hming erawh a lang ve lo a ni awm e.

Kum 2002 hnuah hian Michael-a hian thurochhiah a siam thar leh tawh lo nia hriat a ni a, a ukil pawhin Michaela thurochhiah hi Ningani vel hian Los Angeles Supreme Court-ah a thehlut dawn niin wall Street Journal chuan a tarlang.

Michael Jackson-a ukil John Branca leh Michael-a thianpa, music executive John Mclain te chu Michael-a ro sem dan turah thupui vaitu tur an ni dawn a, Branca hi 1980 leh 2006 chhung Michael Jackson tan hian a thawk thin a, a thih hma lawk kar khan an in ruai nawn leh a ni awm e.

Michael Jackson leh a pa Joe Jackson te hi an inngeih tehchiam lo a, a pa hian chanpual a nei dawn lo niin a lang. Hetih lai hian Los Angeles Supreme Court chuan Michael-a nu Kathrine Jackson chu thutlukna fel tak siam a nih hmaa Michael-a fate pathum enkawltu atan a ruat bawk.

Michael Jackson hian leiba a ngah hle a, a leiba thihsan zawng zawng hi dollar maktaduai 500 vela chhut a ni a, chutih rualin a bungraw neih leh Sony/ATV Music Publishing a a chanpual zawng zawng te chhut telin a hausakna hi dollar maktaduai 200 vela chhut a ni bawk.

Related Posts :