College-ah Hringnun

Jeans kekawr kap tawi chi a ha a, bag nalh tak ak chungin an college a pan a, a pheikhai a zang hle. A inchei nalh a, tin, a hmelchhe lo bawk. Ramtiam pana thawkchhuak ang maiin a pheikhai a zang a ni.


"College kal te chu naupan lai atanga kan chak tawh kha a ni a, hetia kan han kal ve ta pawh hi nuam ka ti khawp mai. Lehkha zir chu thuhran ni se, thian inkawmkhawmna hmun remchang a ni a, uniform hak a ngai si lo, zirtirtute'n min hrem ngai bawk si lo, a nuam em alawm," tiin chu nula chuan a sawi.

A tirah a sawi tha duh vak lo na a, han kawm han kawm takah chuan incheina chungchang chu college nuam a tih chhan pakhat a nih thu pawh a sawi ta nge nge e.

"College kal nuam ka tih chhan pakhat chu incheina hi a ni a, ka zep lo mai ang, ka thiante pawh chutiang chu an ni ve tho ang," a ti.

An class-ah scooty nei an awm a, mahse, he nula hi chuan a awt ve lo. "Class banah thiante nena hmanhmawh vak lova kan han inzui haw dem dem hi nuam ka ti. Scooty hi class kal nan a remchang lutuk a, mahse, scooty neiho hian class ban hnua thian inkawmkhawmna hun an chan thung," tiin a sawi.

College zirlaite hi an naupang sawt hle a, nula leh tlangval han tih ai chuan tleirawl rual tia sawi awm tak an ni zawkin a lang. Mahse, tun hma ang bawkin college zirlaite hi a 'hot' rual an ni tho a, hun hlimawm tak hmanga inhria, mahni hmakhua ngaihtuah lutuk lo, mahse, hmabak beiseiawm tak neia inhre lawi ang chi kha chu an la ni thovin a hriat. An titi a zangkhai a, a tlangpuia lakin damchhung khawsak buainaina a chim phak loh an ni hlawm. Chu chu college boruak tinuamtu tak pawh a ni.

Tun hnaia college boruaka thil thar chu khawl thil an hmang nasa ta hi a ni awm e. Lirthei hawlchhuak thei an pung hle a, Aizawla college lian deuh hi chu a bul velah two wheeler a ding khup thin. Tin, car lekchhuak thei pawh an pung. Tin, mobile phone an hmang nasa hle a, class neih lo lai pawhin college chhehvelah handset kheuh neuh neuh lai hmuh tur an tam hle. Computer an hmang nasa a, zirlai leh a sawizauna vel pawh a rilru nei deuhte chuan intenet atangin an la zung zung thei. Tin, college lamin computer an lo nei fur tawh bawk. Tlema piang hma deuh tan chuan college building-ah hian mikhual chan a chan thei viau awm e.

Engpawhnise, college zirlaite chu tun hma ang bawkin vanglai hun hmang mekte an la ni reng.
Thangtharte nunphung chu

Govt Aizawl College-a III BA zirlai, an college assistant editor ni mek C Zonunmawia chuan college zirlaite'n a tih thu sawiin, "Class room-ah te hian Mizo zirlaite chu kan ngawi thuap thin a, mahse, tunlaiah hi chuan khatiang kha a ni tawh lovin ka hria. Ka tawn ve chinah chuan zirtirtute nen pawh class room-ah kan sawiho nasa a, zirlaite hian kan khel ve bap bap thin," a ti.

Hetiang hi an ni vek kher lo mai thei a, mahse, tun hma deuh ang kha chu an ni tawh lovin a rinawm. Puitling zingah pawh seminar leh workshop han neih nikhuaah hian sawihona hunah chuan thusawi hi a chuha inchuh a ngai ta deuh zel mai. Chuvangin, zirlaite pawh tun hma angin class room-ah an ngawi thuap char char tawh bik lo ang.

C Zonunmawia chuan a lehkha zirpuite chu thahnemngai tak tak an ni hlawm niin a sawi a, a ngaihsak lo deuh te chu awm mah se a ngaihsaka te vek vek chuan thahnem an ngai hle niin a sawi. "Tunlaiah chuan competion hi a sang tawh a, chuvangin, zirlaite hian a tlangpuia lakin thahnem chu kan ngai ve sawt hle niin ka hria," tiin Zozam Weekly a hrilh.

He college SU general secretary H Lalhriatpuia pawhin, "Class kal pawh hi kan taima sawt khawpin ka hria. Class kal loh mai mai ching hi chu an la awm reng a, a tam pawh an tam mai thei a, mahse, a taimate hi chu thahnemngai taka lehkha zir an ni," tiin a lo sawi ve bawk.

"Lehkhazir ngaihsak lo, college nuam ti em em si, class-a awm ngai lo te hi chu an la awm reng. SU leader te hnena 'attendance-ah ka tla a, min sawipui rawh u' ti thin hi chu an awm reng. Mahse, a taimate hi chu an taima," a ti bawk.

Zozam Weekly-in college zirlai a kawmte'na an sawi tlangpui chu an college hmunhmain a zawh loh thu a ni.

Pachhunga University College hian hmunhma an nei tha a, Aizawla college dangte hi chu kawngsira inhung ve nawk nawk a ni deuh ber. Khaw dangah pawh college, building leh campus tha tak nei an awm meuh lo. Govt Zirtiri Residential Science College meuh pawh zirlai leh zirltirtute'n an riahchilh lo!

College hmunhma an nei tha lo a, bungraw lamah an changtluk tawk lo niin an sawi hlawm. Aizawl College leh Hrangbana College zirlaite chuan hmun lun laiah class an kal tih sawiin, han hawi thawvenna tur an nei lo chu hrehawm an tih thu an sawi tlangpui a, class nei loh lai pawhin bathlar vel bak awmna tur an nei lo tih an sawi hlawm.

Traffic jam vangin harsatna an tawk thin tih an sawi bawk. "Traffic jam vang hian class ka nang hman lo ngun khawp mai, first period phei chu awm ka tum lo law law tawh ni berin ka hria," tiin Aizawl chhim lam atanga Hrangbana College-a kal zirlai pakhat chuan a sawi.

Zirlaite chuan an zirtirtute pawh traffic jam vangin an tlai ve thin tih an sawi a, class neih loh phah chang te pawh an nei niin a then chuan an sawi nghe nghe.

"Lecturer te hi kan nghak fo mai. Traffic jam-ah an tang a, CR te hi phone-in an rawn hrilh a, chutiang chuan kan lo nghak thin. Last period-ah te lecturer te an rawn tlai hi chuan, lo nghak tang tangtu tan chuan a tuiawm loh duh khawp mai," zirlai pakhat chuan a ti.

Class kalna hun a tlem thu sawi an awm bawk; hetiang thu sawitute hi zirna lama thahnemngaite niin an lang.

Mizoramah hian college zirlaite hian class kalna hun an nei tlem khawp mai. Kum laihawlah class an kal tan a, SU hruaitu tur an han thlang a, chutah College Week te an han nei zui a, University Sports-in a zui leh a, a karah college programme pawimawh a lo tla bawk nen, rei lo teah kum a lo tawp mai thin.

November/December velah exam form an fill-up a, form fill-up hnuah chuan class an kal vak tawh lo. Form ber an fill-up tawh chuan 'attendance'-ah an tla tawh dawn lo tih an hria a, zirlaite an inthlahdah deuh tawh thin. Krismas a lo hnai a, lecturer te pawh an tha a za tawh bik lo mai thei bawk.

Kum a lo thar a, class a awm tawh lo a, February velah exam an hmachhawn leh a, exam zawhah chuan chawlh vang vang a ni tawh mai.

Hetiang hian sawi ta ila - May thlaah khan I Yr zirlaite an kal tan a, June thla laihawlah II Yr zirlaite an kal leh a, June thla chawhnu lamah III Yr zirlaite an tan leh a. Tichuan, College Week leh University Sports te, SU inthlan te, Week Closing Function leh Freshers' Social te an han nei a, chu chu Krismas boruakin a zui mai thin. November vel thleng hi chutiang karah chuan class an kal a, class kal hun chhung hi a rei lo hle a ni. Chu chu zirlai thiamthei deuhte chuan an tawngkhawp lo; college zirlaite hian course zo hman lovin exam an hmachhawn nawk nawk thin a ni ber.

Zirlaite zingah mahni lecturer sit tawk te pawh an awm; "Kan lecturer pakhat chuan tar pension hi a hre hlui khawp a, a zat a hriat ve chu an tlangval laia mi a ni hial ang. Kan hnial a, a thinrim lehnghal," tiin zirlai pakhat chuan a sawi.

A tlangpuia lakin zirlaite bula tal peih lecturer an ngaina niin a lang a, University Sports nikhuaa zirlaite ho peih deuhte an ngaisang niin a lang. Tin, lecturer taima leh mahni subject hre tak, knowledge zau takte an ngaisang bawk.

Lecturer pakhat, a hming tarlan duh lo chuan tunlai zirlai zingah thiam tak tak an tam tawh nia sawiin, "Naupang hi an bright hlawm khawp mai. Zirlai an ngaihsak a, Mizo zirlaite hian hma an sawn khawpin ka hria. Amaherawhchu, zirna ngaihsak miah lo, heheu tak tak hi chu an awm reng tho. A thiamate hian an thiam sawt ti ila kan sawi sual lo ang," tiin a hmuh dan a sawi.

Aizawl college lecturer Dr Lalthansangi chuan: "Tunlaiah hna te a vang a, competition hi a sang tawh em a, chumi hrethiam phate hi chuan thahnem an ngai khawp mai. Mahse, lehkhazir ngaihsak miah lo, college hi nawmchenna hmun emaw ti tlat ang chi hi chu an awm reng," a ti.

A tlangpuia lakin college zirlaite chu incheina lamah an sang a ti a, an khawsak hrim hrim pawh a sang a ti. "Zirlai tam tak hi chuan college hi nalh taka incheina hmun tur niin an hria a, incheina uar tak tak hi chu tun hma atangin an awm reng. Tunah mobile phone a lo chhuak a, chawmhlawm ni si, handset man to tak tak nei an tam mai. Thenkhat chu mobile phone hian an zirlaiah pawh a pui ang tih a rinawm a, amaherawhchu, chutiangah pawh chuan a man to ber ber chi a ngai chuang lo. Mobile phone hi an thatpui nge an chhiatpui tih hi zirchian a tul khawpin ka hria," tiin hemi chungchang hi a sawi.

College zirlai zingah lirthei nei an pung tih sawiin, "An chhiatpui nge an thatpui ka hre lo. Mahse, hei hian college kal man a tisang tih chu a chiang a, chu chu a tha ber em tih chu chhut tham tak a ni ang. Kei chuan value system dik hi ka ngai pawimawh a, zirlaite hian eng nge an ngaihhlut tih hi hriat a pawimawh. Chu chu kan khawtlang nun nen pawh a inzawm a, ngaihsan tur dik ngaisang tura kan inzirtir hi a tul khawp a ni," Dr Lalthansangi chuan a ti.

Zirlai fel leh rilru nei chu an awm ngei a, amaherawhchu, a rilru nei lo chi an awm reng tho tih chu a hmuh dan a ni a, manner leh awm dan mawi hre lo fe fe pawh zirlai zingah an tam a ti. Tin, zirlai tam tak chu, college kal tura mahni in an chhuahsan hian an nu leh pate duh lo danin an khawsa thin tih chu a ngaihdan a ni a, "Hetiang hi a tam pawh an tam ang," a ti nghe nghe.

"Chhungkua hi a inang lo a, nu leh pa thenkhat chuan an fate hi pawn lamah engtin nge an awm tih lam an ngaihtuah lo a, thenkhat chuan pawn lama awm dan tur te an zirtir thin thung a. Nu leh pa thenkhat chuan an fate hian pawn lamah an duh loh zawng an ti tih an hre lo mai ni lovin chutiang an ngaihtuah lo hrim hrim ang. College-ah pawh hian zirlai tam tak hi chu an nu leh pa te duh loh danin an awm thin niin a lang," tiin a sawi zawm a ni.

Pachhunga University College lecturer Dr LH Chhuanawma pawhin college zirlai zingah zirna ngaihsak lo tak tak an tam hle niin a hre ve bawk.

"A zir peih leh rilru nei hi chu an awm a, mahse, a nawlpui hi chuan zirna an ngaihsak tak tak lo, a hmingin college hi an kal ve mai mai a ni," tiin a ngaihdan Zozam Weekly a hrilh.

"Zirlai tam zawk hi chuan an zirlai an ngaihsak lo a, college kal awmzia pawh an hre lo niin ka hria," a ti bawk.

"Kan society hian higher education hi kan la pawh tak tak lo a, chu chu college zirlaite zingah pawh a lang niin ka hria," tia sawiin Dr LH Chhuanawma chuan, "A khawi lai tak hi nge dik lo tih hi chu sawi a har a, mahse, khawtlangin zirlaite kan beisei dan hi ngaihtuah tham chu a awm," a ti.

"Zirlaite hi eng ti turin nge kan beisei? Kohhran-a a kul a taia inhmang turin em ni? Thlan laih nikhuaa a taima ber ni turin em ni? Zirlaite hi mahni zirlai taima taka zir turin kan beisei em? He thil hi ngaihtuah tham niin ka hria. College-ah zirlai an lo kal a, mahse, a tam zawk hi chuan an zirlai aiin thil dang an ngaihsak zawk. Hei hi a pawi ka ti a, nakin lawkah an lo puitling ang a, khawtlang leh Kohhranah te, ram thlengin kan hruaitu tur an ni a, mahse, mahni zirlaia thil dang ngai pawimawh zawk an nih chuan an thiam tak tak lo ang tih a chiang a, chu lai chu ngaihtuah ngun a ngai khawpin ka hria," a ti bawk.

Lecturer pakhat, a hming tarlan duh lo chuan college zirlaite tam zawk hi chu hlawhtling lo turah a ngai a, degree an hlawhchhuak ve a nih pawhin thiamna erawh an hlawhchhuah a ring lo.

"Zirlai tam zawk hi chu an zauthau ni berin ka hria. College-ah hian lehkha zir tur ni lovin nuam chen tur zawkin an rawn kal ti te pawhin sawi ila kan sawi sual lo ang," a ti.

"Sum leh paiah tunlai zirlaite hi an hautak a, an sum hrawm natzia ka ngaihtuah hi chuan an nu leh pa te'n hetianga an chawm zo hi mak ka ti thin. Zirlai tam tak hi chuan college hi thawmhnaw thar show-na hmun emaw an ti a, zirlai tam takin handset inneih thatsiakna hmun emaw an ti a, zirlai thenkhatin bike leh lirthei inneih nalhsiakna hmun emaw an ti ni berin ka hria. Taima taka lehkha zir hi chu an awm ngei a, naupang hi an bright sawt khawp mai ti pawhin a sawi theih. Mahse, zirlai tam zawk hi chuan college hi nawmchenna hmun ang thawthangah an ngai a ni. Hei hi pawi ka ti khawp mai," tiin chu lecturer chuan a ngaihdan a sawi.

"Taima taka zir lo tan pawh eng tin tin emaw chuan a pass ve theih mai a, result a lo chhuak a, 'lehkhathiam kan pung, lehkhathiam ka ngah ta mange,' kan ti leh ringawt a. Mahse, taima taka zir lo chuan a thiam theih lo. Education thil tum thleng pha tur chuan taimak a ngai a, pass ve ringawt kha a ni lo. College-a heheu takte hian an pass ve tho ang, mahse, an thiam lo a, an buaithlak. Chutiang chu zirlai zingah hian an tamin ka hria," a ti bawk.

"Tunlai zirlaite hian zirtirtute zahna te hi an tlachham ta hlein ka hria. Zirtirtute chu sawi loh, aia upa zahna te, tin, mihring awm dan mawi leh hawihawmna hrim hrim hi ka tawn ve chinah chuan college-ah hian tunlai hian a tlahniam. Heti lama inzirtir hi kan mamawh a ni," a ti.

College zirlai zinga a rethei deuhte chuan college-ah hian rethei leh hausa an inluhpawlh avanga hrehawm tih chang an neih thu an sawi hlawm. "Khawsa sang tak tak an awm a, mahni inrintawkna pawh a hloh hial theihin ka hria," tiin zirlai pakhat chuan a sawi.

Zirlai retheite hian retheihna avangin college nuam an tih loh phah fo niin an sawi hlawm a, hrehawm tih phah ngawih ngawih nia insawi erawh an tam lo. Chutih rual chuan thenkhat chuan retheihna hian anmahni-ah tumruhna a thlen thung niin an sawi.

Related Posts :