Princess Elizabeth-i leh Prince Philip-a te khan chanchin hlimawm tak tak an ngah ve khawp mai.
An inneih hlimah kha, vawi khat chu, Canada rama Vancouver thliarkar velah an zin a ni awm e. |um khat chu, lawnga an chuan laiin khua a dur a, ruah a sur ta mai. Thli a thaw vuk vuk bawk a, lawng pawh chu a insawi nasa hle. Chutih lai chuan petty officer pakhat hian thingpui leh cake a rawn pe a, mahse, lawng a insawi nasat avangin chhuatah a tla ta phung mai. Prince Philip-a chu a tho a, chhuata cake tla chu a chhar khawm ta nuap nuap a. A duhtawk a chhar zawh chuan a nupui Princess Elizabeth-i bulah chuan pheiin a va thu a, "Ka ta tur chu ka chhar e---i chanai erawh chhuatah a la thal phung mai," a ti sup a!
Prince Philip-a hi pa fiamthu duh ang reng tak a ni reng reng. Vawi khat pawh, Australian University a tlawh a, thawktute chuan an hming leh nihna an lo sawi diat diat hlawm. Nupaa thawk an lo awm a, "Mr & Dr. Robinson" tia sawi an ni. A pasal zawk chuan Prince Philip-a chu "Mr & Mrs Robinson" inti lova "Mr & Dr Robinson" an intih chhan a lo hrilh mawlh mawlh a, "Ka nupui hi PhD a nia, kei aiin a thleng sang zawk a," tiin. Prince Philip-a chuan a lo ngaithla kur a, a sawi zo ta tihah chuan, "A nih tak chu. Keini paw'n chutiang harsatna chu kan tawk ve alawm," a ti ta fuk a!
Princess Elizabeth-i zawk hi sap ram lal fanu a ni a, Prince Philip-a chu lal fanu a neih avanga Prince Philip tih hming pu ve mai a ni.
Tar har
Fiamthu thiam George Burns-a khan mi hming a hriat loh chang hian 'kid' tiin a ko mai thin a, a upat hnuah phei kha chuan mi han hai mai mai te a ching ve bawk nen, 'kid' tia koha pui kha a ngah viau reng a ni.
Vawi khat chu Hillcrest Country Club-ah a teilut a, fiml siamtu pawl hmingthang - Paramount Pictures dintu Adolph Zukor-a nena an intawk chu, Zukor-a hming chu a theihnghilh ta mauh pek. A tih ngaihna hre lo chuan, "I tha maw, kid?" a ti ta heu mai! Chu'ng lai chuan Zukor-a chu kum 103 mi zet a ni tawh!
No comments:
Post a Comment