¢ Lalthlamuana Ralte
Kum sangbi thar kan chuankai hnua zirlaite sukthlek lo danglam takzia hi thil chhinchhiah tlak tak a tling awm e. A nawlpuia lakin Mizo zingah kum zabi 20-naa zirlaite ai khan kum zabi 21-naa zirlai zingah tum nei saa lehkha zir an tam daih tawh zawk a, a bikin phai lama zirte leh Aizawl khawpuia zirlai vengva deuhte chuan an 'career' an ngaihven hle tawh a ni.
India ramah hian eizawnna/hnathawh tur chi hrang hrang sing 2 leh sang 4 vel zet a awm nia chhut a ni. Chumi awmzia chu hna hnuaihnung ber ber leh hnemhnanpui tak tak tlak lohva ngaih atanga hna sang ber ber (Prime minister, president, civil/central services,company executives, computer/IT professionals,etc.,) inkarah hian hna sing hnih chuang a awm tihna a ni chu.
Kum 2000 chawhnu lam atang khan midangte tanpuitu pawl Mizoram Coaching Academy (MCA)-ah thianzahoin nasa takin kan inhmang ve a. Mizoram chhungah eizawnna tling tur hna a vang tial tial a, sorkar hna lah chu a thei fal deuh tan lo chuan vana rah ang mai a ni tawh bawk si. Chutiang dinhmuna kan din tak avang chuan hmabak ngaihtuah miah lova lehkha zir mawl tawp mai hian harsatna a thlen nasa zel dawn tih a lang chiang reng mai. Chu chu kan hun tawn mek a nih tak avang chuan MCA hmangin kum 2000 tawp lam khan career awareness campaign bul kan tan ta tawp mai a ni.
A tir lamah chuan kan bangbo viau a, Mizo zirlaite sukthlek zawng kan hre lo a, kawng kawhhmuh turin hmanrua leh lehkhabu (resources) kan nei lo a, zirlai la bangbo ve tak takte an eizawnna/zirna kawng kawhhmuh turin kan hriatna a beitham hle bawk. Chuti chung chuan career guidance an mamawhzia kan hriat belh zel avangin kan phur tial tial thung. Zirlaite hnena career awareness campaign buatsaiha hma kan lo lak tawhna atang leh a hnua hnathawhna hmun college-a zirlaite atanga mimal hmuh dan leh ngaihdan han tarlang zawm ta ila.
Kum zabi liam ta chawhnu lam leh a tawp dawn lama piang, tuna thalaite leh tleirawl ni mekte hi 'Lehkha thiam generation' tia chhal ngam an ni hial awm e. Khawvel changkanna leh India ram hmasawnna zar kawng tam takin an zo pha ve tawh a, zirna lam pawhin hma a sawn nasa khawp mai. Kkan ram chhunga zirna kan neih ve chhunte duhkhawp lova ram pawn hmun hrang hranga lehkha zirte zingah zirna tluang pangngai (general line) ni lo thil dang eng eng emaw zir an awm fur bawk. Chutih rualin Mizo ram chhunga zirte pawh an hawi zau tial tial a, zirna peng thar a lo chhuak ve zel bawk a, sorkar hnaa luhna tur ngawr ngawra zir kha a ni thin a, mahse tunah chuan sum hailuhna ngaihtuah ran chunga zir an tam tawh hle a ni.
Kum 2001 leh 2002 inkara career awareness campaign kan neihna hmun hrang hranga high school leh higher secondary school zirlai tam berten nih an chak chu sipai officer, doctor, engineer tih vel kha a ni nawk a. Tunlai hi chuan heng bakah hian biotechnology. computer & IT, management, etc., kan hriat belh nual tawh. Ka la hriat reng chu Govt. Higher Secondary School zirlai hmeichhe naupang pakhat lawyer nih tum tlat mai kha a ni. A rualpui dangte kha chuan doctor nih te, nurse nih te, engineer nih te kha an tum a, beautician nih tum te kha an awm nawk bawk. Mahse, ani kha chuan pawl 12 zawh veleha law zirna tur a ngaihven tlat thung. A tumna hmun National Law School, Bangalore-a luh dan tlangpui kan han hrilh lai khan lehkhabuah a ziak malh malh a, a tumruh hmel kha ka la hre reng.
Khawthlang lama kan kal tum kha chuan zirlai mipa tam ber chuan sipaia tan an chak a, zirtirtu thenkhatte nen kan titihonaah chuan uniform ha sipai leh police hmel an hmuh fo vang niin an ring deuh ber. An hmuh than deuh apiang khan an rilru a kaihruai tih a chiang khawp mai. A tlangpuiin khang hunlai kum 5/6 liam ta kha chuan khawpui hlat deuh apiangah zirlai leh zirtirtute career chungchangah an bangbo deuh ni khan a lang.
High school leh higher secondary school chin hi zirna lama a kailawn a nih avangin hun pawimawh lai tak a ni. Hetih hunlai hian career tur thlan fel a pawimawh khawp mai. Nu leh pate pawhin mahni fate hmalam hun thlir chung leh an thiamna leh talent mil tur zawnga an zir leh zel tur pawh ngaihtuahpui a tul khawp mai. Tun hnai mai atang khan nu leh pate pawh an harhchhuak thar hlein a lang a, an fate zirna leh an career ngaihtuahpui nachang hria an pung ta khawp mai. Kum 2001 August thla tawp lama MCA-in Vanapa Hall-a Career Meet a buatsaih tum khan session khat chu nu leh pate puala dah a ni a, publicity pawh tha thawkhat viau mah se lo kal kha an awm ta meuh lo niin ka hria.
Mizo naupang tam ber hi tum mumal neia lehkha zir lo kan ni thin a, matric-a a titha deuhten PU/Cl-XI & XII ah Science leh Commerce subject an la tlangpui a, a bak zawng Arts stream-ah an inbeng khawm nguk thin. Tunlai pawh hian zirlai tam berte lehkha zir chhoh dan chu a la ni mai thei. Mahse, hmalam hun tur ngaihtuahna chang hria an pung tial tial a, Class XII atangin tum nei rana zir zawm an tam viau tawh a ni.
Hmanah kha chuan PU(sc) zir zo te'n engineer nih an tum fur a, chumi hnuah medical line-a kal an intihhmuh leh a, Mizoram quota-a engineering zirna tur phei chu Mizo zirlaiten an hnawhkhat zo lo thin. Mahse, IT & Computer lama eizawnna hna hlawk tak tak a lo chhuak zel a, chu chu Mizo thalai vengva deuhten an hmu pha ve reng bawk si a. Tunlai takah phei chuan HSSLC (Sc) a top 10 a tling pha leh titha tak takte zingah medical line thlang lo a engineering line a kal tum an awm leh nual tawh a ni.
Eizawnna chungchanga nu leh pate leh zirlaite ngaihtuahna luah tlattu leh a sukthlek zawng thlenga thununtu chu 'Mizoram chhung khera hnathawh nge ram pawna hna thawh tur?' tih hi a ni. A bikin phai lama zir thinte chuan Mizoram pawna thawh an hreh lo tlangpui a, duh zawk pawh an tam. Mahse Mizoram atang zir chhuak zingah hmun danga pension thlenga thawh hreh an tam viauin a lang thung.
Mizoram chhungah lehkhathiamte tana thawh tur hna tha a vang tak zet tawh. Hetihlai hian college zirlai tam ber hi chuan an zir zawh huna thawh tur lam an la ngaihtuah mang reng reng lo hi an tan a pawi thin. An zinga ngaihtuah nachang hre deuhte chuan pawl 11 leh 12 vel atangin an duh leh an tum an thlang fel tlangpui tawh niin a hriat a. College zirlaite hi an zir zawh hnua an nih tum leh an thawh tum ka zawt fo thin a, a tam ber hi chu an la bangbo khawp mai. Gruaduate hnuah an tihthat dan azirin Post Graduate course an zir zawm leh a, chumi an zawh leh hnuah meuh chuan hna ngaihvenin an buai tak tak tawh a. A hma lama career an lo thlang fel lawk lo kha an tuar ta thin a ni.
Hetihlai hian college zirlai zingah tum mumal nei taka zir an awm fur tho tih erawh a chiang. Tun hnaia under graduate degree course pass thar zingah pawh khan mahni subject-a post graduate course zir zawm kher tum lova civil/central service atana inpuahchah tum te, nakina exam atana pawimawh tur subject (an honour subject ni lo) a MA zir zawm tum te, hmun danga Law (LLB) zir tum te pawh ka hria. Professor nih tum, chumi atana university tha zawk pan mekte pawh an awm bawk.
Hman atanga phak ang tawka zirlaite zinga ka sawi ve fo chu sorkar hnathawh tum lo leh lehkha thiam fal tak ni bawk si lo tan chuan mahni kutkawiha eizawnna (entrepreneurship) hi lehkhathiam pangngai tan chuan bawh a hun tawh tih hi a ni. Hetia a lan dan hi chuan UT hnu lam (Rambuai atang zawk pawh kha a ni mai thei)atang khan Mizo thalaite hi kan hriam tawk ta lo viau niin a lang a, mahnia insah kuak chawp tura eizawnna kawng zawh ngam leh midang bawh loh lama kal ngam hi an la tlem viau reng a ni.
Tunlai hunah hi chuan zirna hi suma lei theih a ni lehzual ta khawp mai, phaiah sum tam tak senga fate dah an tamzia chu thuhran ni se. Khawpuia chengte pawhin an fate sikul tha ber bera luhtirin nu leh pa tam tak chuan sum tam tak sengin tutor an la a, study material leina atan an inseng hreh lo. Mizoram quota-a medical & technical line a zir tumten coaching an kalna tur pawhin sum tam tak sen an inhuam khawp mai, a then phei chuan kum tluanin coaching an kaltir a nih hi.
Kum sangbi thar kan kai hnuah University kan nei a, zirlaite pawhin nasa takin hma an sawn a, zirna peng hrang hrang leh eizawnna kawng hrang hrang an hmelhriat tawh a. Mi thiam tak tak te, hna sang tak tak chelh te an awm tan mek bawk. Sorkarin thalaite hmakhua ngaihtuahtu tur Youth Commission hial a din tawh a, Central YMA pawhin Youth Centre hial an nei tawh bawk.
Hetianga khawpuia chengte zirlaiten hma an sawn mek lai hian thingtlang khuaa zirlaite erawh an la bangbo viau rih tih hriat a tha. Hetihlai hian zirlai nawlpuite chuan an hmabak leh eizawnna ngaihtuah lovin lehkha an la zir mek niin a lang. Engpawhnise, unemployment problem lo nasa tial tial te, thalai zinga sualna lo pung zel te ngaihtuah hian zirlaite leh thalaiten an phak ang tawk eizawnna an neih theih zel hi thil tul tak a ni.
(A ziaktu hi Pachhunga University College lecturer, Zozam Weekly contributor a ni.)
No comments:
Post a Comment