Tunlai Tlangval Lar Ronaldo

¢ Hmingsanga

Footballer chawimawina sang zawng zawng dawng kim vek a nih vang ngawt pawhin 'Laldawngkima' tih ve mai tur a ni a. Ronaldo chuan heng chawimawina zawng zawng a dawn theihna turin tehfung hrang hrang hmanga teh a nih hnuah pawh a hlawhchhuak thei tlat. Tuilet hma leh tuilet hnua khawvela footballer man to ber ni tura Real Madrid-in United atanga Cristiano Ronaldo an leichhuak tih thawm hre phak ve zinga kan awm hi kawng danga sawi chuan kan vannei!


Ronaldo tih leh football tih chu tunlaia tawngkam lar leh hriat ngun ber pawl a ni ta ve ang. Keini ai mah hian khawthlang lama kan ngaisan em em sap kan tih te meuh pawhin Ronaldo insawn thu an ziahna ringawtah hian pa tam tak thluak chu a chawl hahdam thei meuh lo chu a ni e.

Spain-a mipui vantlangin kar khata an hlawh let 33-a tam, Ronaldo chuan kar khatah £557,000 a hlawh dawn. Spain-ah hian mihring 4 milion vel hna nei lo an awm laiin ani chuan kum khatah £ 29 million vel a hlawh dawn a ni.

£ 80 million man Cristiano Ronaldo chu engtiang chiaha hlu leh thil ti thei nge a nih zel dawn tih hi football khawvela thil hriat chakawm tawp a ni. Kum khata £ 9.5 million hlawh hi a te thei lo. Chu chauh a la ni lo, a kum khat hlawh hi kum ruk chungin kum tin 2.5%-in a pung bawk ang. Ream Madrid-a a contract a zawh hnuah chuan £107 million aia tam mah Ronaldo hian a fanghma no ei hmiah mai dawn tihna a nih deuh ber mai chu.

Real Madrid president atana an thlan thar leh tak Florentino Perez chuan thlan tlin a nih chuan khawvela footballer lar Ronaldo leh Kaka te chu lei an ni ang tiin campaing auhla atan a lo hmang thin a. Thlantlin a nih hnu lawka Heng player pahnih leh Kaka leh Ronaldo te hi a lei ta ngei a. Kaka chu world record fee-in a lei a, chumi hnu lawkah an record siam chu anmahni vekin an Ronaldo hmangin an khum zui leh ta bawk a.

Ronaldo man ringawt pawh hian Canada mipui zawng zawng chu Big Mac (chhang chi khat) hmangin a hrai theih hial niin sawi a ni. Ronaldo hian kum ruk chhung daih contract a ziak nia sawi a ni. A season khatnaah £9.5m a hlawh phawt ang. A season tawp ber, a kum rukna ah phei chuan a vaia a hlawhchhuah tur chu £ 107 million vel a ni dawn a nih chu.

Tuna Real Madrid president thlan thar Perez hi sumdawng hausa tawntaw billionaire a ni. Hun hmasa lama khawvela player tha zawng zawng fuankhawmna hmun atana Real Madrid lo siamtu kha a ni. 'Galacticos' tia sawi an ni thin reng a ni. Tunah hetia president atana thlan a nih leh takah chuan Galacticos II a siam leh dawn ta a ni. Hetianga Real Madird-in player tha an 'khawm' avang hian Real Madird inkhel entu an pung a, kawng tam takin Madrid hian hlawkna an tel a ni. Real Madrid hian kum khat chhungin €400 million vel inkhel ticket hralh chhuahna atang te, television right leh club bungraw hralhna atang tein an hailut a ni.

Hetiang a nih chuan tunlaia footballer lar pahnih Kaka leh Ronaldo te hming chuanna jersey ang an hralhna atang ringawt pawhin sum tam tak an hailut dawn tih an chiang. Chuvang chuan man to taka lei hi an ngam a ni. Ronaldo jersey ang ringawt hralhna atangin Real Madrid hian kumin Krismas hma hian £ 80mllion vel hlawh chhuah theih an inbeisei ngam a ni.

'Galacticos era' an tih hun lai khan Luis Figo chu £38.7million-in an lei a. Chumi hnuah Zinedine Zidane chu £46m-in kum 2001-ah an lei leh a, a hnuah Ronaldo chu £26m-in 2002-ah an lei leh a nih kha. Hetiang zat sum an sen lai hian lawmman lak lamah erawh an trophy cabinet-ah an beisei ang chuan an nei lem lo niin a lang. Madrid chuan League title pahnih leh European Cup pakhat an hlawh chhuak.

Real Madrid hian Kaka leh Ronaldo leina atan kar hnih emaw chhung lekin £135 million vel a hmang ngam hi ngaituah thui chuan a risk hi a sang viau. Season liam ta kha Champions League-ah kum 2005 hnu lama quater final an vawi khat thlen lehna a ni. League-ah pahnihna an ni a, chuti chung chuan football club zingah kum khata sum hailut hnem zingah an hming chu a la chuang phak reng tho. Madrid ho hian TV Right atanga sum an lakluh hi kum khatah £135 million vel a ni a, hei hi Ronaldo chuahsan tak Manchester United-in kum khat chhung a TV Right an lakluh let hnih chu a ni.

Spain-ah hian England aiin foreigner-te hian chhiah pek tur an nei tlem zawk a, kum nga an cham chhungin an sum lakluh atangin 23% vel chhiah pek a ngai. England-ah chuan 30% tling thelh chhiah an pek a ngai thung. Chhiah pek thu atanga chhut chuan footballer hlawh tam zawk, chhiah pek ngai tlem zawkna hmun Spain pan hi thil tihawm loh a ni lo tiin a sawi theih ang.

Kum 2003 khan Manchester United player chhuanvawr berte zinga mi David Bekcham chu Ream Madrid vek hian £25 million-in an lei tawh bawk. United player tha, an vanglai taka lei hi Real Madird hian khelmual chhung chu sawi loh khelmual pawn lamah pawh a hlawkna an tel nasa hle. David Beckham-a'n Real Madrid a zawm tirh khan Real Madrid jersey Beckham hming chuang ngat phei chu an hralh hnem ham ham hle a nih kha. Tunah Ronaldo an han neih leh tak avang hian Real hian an jersey hralhna kawngah nasa takin sum an lakluh belh dawn tih an chiang. Ronaldo hming chuanna jersey an hralhna atangin kumin Krismas hma hian £40 million vel an lei chhuak thei hialin an ring.

Hetih lai hian Asian khawmualpuia ram thenkhat Malaysia, Indonesia, South Korea leh China-a Ronaldo ngaisangtute tan chuan Real Madird a zawm hi chanchin tha a ni ve lo mai thei. United hian Far East Asian Tour july thla hian an nei dawn a, he hunah hian Ronaldo ngaisangtute chuan amah lo hmuh ngei an tum hlawm. Mahse, United team-ah hian Ronaldo chu a tel ve thei dawn ta lo! Khawchhak lama United ngaisangtute zingah Ronaldo chhuah vang hian United tantu pawh an kiam phah hle dawn nia sawi chu United fans thenkhat chuan United an ngaisanna a tlahniam dawn chuang loh thu leh khawchhak lam mi United a player pawimawh Park te an la awm chhung chuan United hian lawm an hlawh reng dawn tho niin an sawi ve mek bawk.

UNITED TAN CHANA NGE HLAWKNA?
Châna ni teh reng mai tih hi he zawhna chhanna chiang tak chu a ni ngei mai. Real Madrid-in an club bungraw hralhna atanga sum tam tak an hailuh thu kan sawi tawh. Chutiang bawk chuan United-in sum an lakluhna tam tak zinga pakhat chu Ronaldo thawmhnaw ang an hralhna atangin a ni. United player chhuanvawr berte zinga mi, a inkhel lai an hmuh chak vanga ticket pawh man to zawka lei ngam fans tam takte chuan season tharah chuan season hmasaa an sen ngam ang zat sum an seng ngam tawh lo tura ngaih a ni.

United hian a sum neih ngah lamah nasa takin hmasawn mah se a thiam ang thiam, a goal thun theih anga goal thun thei, a hmun ruak luahkhat zo thei tura an ngaih player pawh nei mah se season khatnaah chuan chuti mai chuan Ronaldo tih ang tam tak kha an ti thei dawn lo tih chu a chiang. Khelmual pawnah sum leh pai tam tak an hloh rualin a pawimawh zawk khelmual chhungah pawh engtiang takin nge an inremkhawm ang tih pawh ngaihtuah tham tak a ni. Ronaldo a tel loh chuan Rooney hi England tana a khelh ang deuh hian a lai lamah thuk zawkin a lut thei ang a. An player lei tum ho hi lei thei dawn ni ta pawh ni se a insiam rem chhung chu hun engnge maw chhen chu 'ngah' deuh rih a ngai dawn hrim hrim.

Premier League-ah chauh pawh han thlir bik ila Ronaldo hian kum 2004-a United a zawm hnu khan EPL-ah game 196 a khelin vawi 157 chu first XI-ah hmun a chang a. Goal 84 a thun a, vawi 34 a siam sak bawk. EPL bikah a pum puiah vawi 75 Ronaldo tela an chak laiin, a tel loin vawi 13 an chak lo. A telin vawi 13 an draw laiin, a tel lohin vawi hnih an draw a, Ronaldo telin goal 216 an thun laiin, a tel lo chuan goal 15 chiah an khung. Heng atang ringawt pawh hian Ronaldo tel leh tel loh, United chak leh chak loh, thui tak a hrilh tih chu a chiang mai awm e.

RONALDO LEH HMEICHHIA
Merche Romero, Andorran TV anchorwoman, Portugal-a hnathawk lai nen an inzui nia sawi a ni. He nu hi pasal then tawh, Ronaldo aia kum 9 zeta upa a ni. He nu nen hian an inngaizawng chiah em tia Portugal chanchinbumiten an zawh chuan an inngaihzawn leh zawn loh thu sawi lang chuang lovin, a mimal nun chu zawt lui lo turin a ngen a. Chumi hnuah Gemma Atkinson, Soapstar Superstar nen party-na atanga inchhar angin an sawi leh. Mahse, hei pawh hi Ronaldo chuan a pha nasa leh hle a ni.

Hemi hnu hian Nereida Gallardo Alvarez, Spanish model nen an inngaizawng niin sawi a ni. An pahnih hian dinner an ei lai te pawh hmuh an ni nghe nghe a. Ronaldo nen hian Spain khaw pakhat Mallorca nightclub a inchhar an ni awm e.

Heng zawng zawng aia chiang leh rintlak zawk chu tunhnai khan Cristiano Ronaldo leh socialite nula hausa Paris Hilton nen an inkawp tih chu chanchinbumite chaw tui ber pakhat a ni leh ta. Hei zet hi chu phat pawh an pha thei lo. An thlalak hmun tam takah hmuh a ni a, an video pawh hmuh tur a awm ta zel bawk nen, tlang kam titi mai a ni ta hauh lo mai.

Hetiang hi thil awman chu a ni. Cristiano Ronaldo hi chawlh hmangin US lamah a hawi thawveng a. Real Madrid te nen an inbiak fel hnu lawkah Paris Hilton tunhnai lawka a bialpa Doug Reinhardt nena inthen fel hlim hlawt nen an inkawp. Cristiaono Ronaldo leh Paris Hilton hi LA-a MyHouse club-ah an intawng a, hemi hnu hian Ronaldo hi Paris Hilton chuan Beverly Hills-a a ina party tenau deuh a siamah tel turin a sawm zui nghal zat mai.

Paris Hilton te thenawm hnaite sawi danin zan laiah Paris Hilton te inah Ronaldo hi a kal a, darkar engemaw zat hun an hman dun hnuin khawvarah a haw leh niin an sawi.


MyHouse club chhungah Paris Hilton leh Ronaldo hi an inhnim hnai thei hle niin a hmute chuan an sawi. Paris Hilton chuan: "Ronaldo chu a thothang a tha bon top, infiam mi dik tak a ni a, kan inkarah hian 'tek chuai' a awm a ni," a ti.

Paris Hilotn hian a bialpa hnuhnung ber Doug Reinhardt chu sawi chhe zawm nghalin, "Ani te chu eng vak a ni lo, minor league baseball player pakhat ve mai a ni a, Ronaldo nen khaikhin chuan eng tihna mah a ni lo," tiin a sawi.

MyHouse Club-ah Ronaldo leh Paris Hilton te hi an awm tih media lam te'n an hriat hnu phei chuan a chhunga luh tumin nasa takin an bei a. An luh mai theih loh avangin Club kawtah an chang thup mai. Paris Hilton leh Ronaldo te hi kawngka dangah a rukin an chhuah tir a, chuti chung chuan media mite hian an chang fuh ta tho tho a. Mahse an pahnih chungchang zawhna an zawh phei chu an chhang duh lo ve ve a. Eng pawh nise heng mite pahnih hian engkawng nge an zawh zel dawn tih chu hriat zui zel a chakawm.

THLIARKAR ATANGIN KHAWVEL FA CHUAM
Funchal chu Portugal ram chhunga thliarkar pakhat, Madeira khawpui a ni. A mi chengte chu sangha man leh loneia eizawng mai an ni. Portugal ram chhunga awm ni mah se, Portugese zingah rau rau pawh an awphawi a ze deuh lehnghal. Chu thliarkar atang chuan football khawvel fa ‘duhawm’ a lo chawrchhuak ang tih an ring phak hauh lo. Thlirkar rilru dahthain, khawvel mit fûkna tura nau lo piang chuan sangha aiah ball a man a, tui dung chhir leh liluh rei leh, tuipuia zei taka chêt lama a rualpui naupangte an inel laih laih laiin ani chuan, khawmuala pawnchhe tumtel han chhir len leh chawhkual vel chu a tuipui a, a zei pawh a zei fê zawk.

A piancham lawmna thilpek atan pawh thil dang zawng zawng thlang lovin, “Ball min pe rawh u,” tiin a nu leh pate bulah a tap ngang ngang thin.

Ni tin zirna sikul-a chhiarkawp chawh thiam nih aia khelmuala ball chawh thiam nih châk luat vanga sikul aia kawngpui dung leh kawthlera hun hmang tam zawk Cristiano Ronaldo chuan, “Ball han chhaih kual leh mi han bum vel hi nuam ka tih zawng tak a ni a. A chang phei chuan inkhelhnaah aia upa leh lian zawkte ka bum kual nasat thin avangin velh pawh ka tuar fo a, kan inkhelhna hmun atanga tah haw chang ka nei fo reng a ni,” a ti.

Zin Kawng Chhuk Chho
Diego Maradona leh a che-kawite chuan ‘86 World Cup-a champion tur an nih inhre hlek lovin, a khel phak ram nih ngei tumin thi leh thau pawlhin qualifying round an khel a; khatia ngawrh em ema an inbuatsaih lai vel khan Madeira khawpui, Portugal-ah chuan February ni 5, 1985 khan Maria Dolores dos Santos Aveiro leh José Dinis Aveiro te inkarah nausen pakhat a lo piang a. A pa José Dinis Aveiro chuan US President hlui leh film star ni bawk, film a chan thiam vanga a ngaihsan em em, Ronald Raegan hming chawiin, Cristiano Ronaldo dos Santos Aveiro tiin a hming a sa a ni.

Unau mipa, Hugo leh hmeichhe pahnih, Elma leh Kati neiin khawvel eng chu a rawn hmachhawn ve tan ta.

Ball pangngai pet tur nei lo mah se kum thum mi vel a nih atangin pawnchhe tumtel chu an inchhung dungah a pet ve tan. An thenawm naupangte chu kum li an nih chuan primary school an kal deuh vek tawh. Ronaldo erawh chuan kum ruk mi a nihin Primary School a kai ve tan chiah. A kum rualpuite pawl sang lamah an insawn sup sup laiin ani chuan 'A' pawlah ‘A for Apple’ tiin bul a la tan ve chauh pawh a ni mahna!

A pa hi tualchhung club pakhat, Andorinha football club-a player-te thawmhnaw sukfai leh enkawl hna thawk thin a ni. Kum riat mi a nih chuan a pa thawhna club, Andorinha chu zawmin bul a tan ve a. He club-a a khelh chhung hian a rualpuite zingah ball chawh thiam leh tlanchak tiin hriat lar a ni der tawh.

Kum 1995-ah chuan kum sawm mi a ni ve ta. Cristiano Ronaldo chu Madeira khaw club pahnih - CS Marítimo leh CD Nacional chuan lak tumin an hel ve ve. Club lian zawk, Marítimo chu an che muang zawk a, Nacional club thuneitute leh Andorinha thuneituten engkim an sawi fel vek tawh hnu chuan theihtawp chhuahin Ronaldo chan ngei tumin tha thawh mah se an tlai zo tawh.

Nacional-a a awm chhung hian Ronaldo thiamzia chu miten an hre zau tial tial a. Portugal-a club lian ber zinga chhal ngam, Sporting Lisbon chuan youth team-a khel turin an lo hmu tai hle. Trial turin an sawm ta hial a. Tichuan, ni thum chhung zet Sporting Lisbon club-a khel tura enchhin a nih hnu chuan Sporting thuneitute mit chu a tlung hle. Youth team-a khel turin contract an ziahpui ta hmak mai a ni.

Mittui Karah Football
Football a thiam avangin a awmna hmun a sawn a ngai ta si. Thliarkar atang chuan Lisbon khawpui, Sporting Lisbon youth team-in training an neihna hmun, Alcochete-ah chuan mutbu a kaih pharh a ngai ve ta.

Naupang kum 11 mi lek, khawpui nun hre phak hlek lova awm chu thliarkar atangin a chetchhuah a ngai ve ta. Inkhelh chu thiam hle mah se naupang thang duh tak a nih loh avangin mi thenkhat chuan professional huang chhungah pawh han zuang lut ve mah se a thlen thui tak tak an ring lo. Sporting Lisbon youth team a zawm chuan football khel thiam ni tura zirna tha a dawn mai bakah, ei leh in lam pawh a hnianghnar tha a, chaw tha tinreng dawngin, a taksa pawh chu hmuh theihin a thang. Naupang te tak tê ni thin kha a thang awk awk a. Patê ti-a sawi thin chu pa pangngai tak a ni chho ve ta. Inkhelh lamah pawh a thiamna chu nasa taka tuaihriam a ni.

Madeira atanga Lisbon a zawm khan kum 11 mi lek a ni. A unaute leh a nu leh pate a ngai thei lutuk a, “A tir lamah phei chuan ni tin deuh thaw ka tap ni berin ka hria,” a ti.

A lungleng lutuk hnem nan Sporting Lisbon thuneitute pawhin a nu chu thla ruk vel a fapa awmpui turin an youth team training-na hmunah hian an awmtir ve hial!

Chu mai a ni lo, thliarkar atanga kal a ni a, a tawngkauchheh pawh a danglam deuh avangin a awmpui naupang dangte pawhin an hmuhsit phah. Hei vang tak hian tawng pawh a tawng tlem phah reng a ni. Mahse, chung a tawrhna zawng zawngte chuan football khawvela dam khawchhuah theihna turin chhelna nasa tak a siamsak thung. Tun dinhmun a thlen theihna pawh hi a tawrhchhelna leh a tumruhna vang liau liau a ni a tih loh theih loh ang.

Rawlthar Tang Fan Fan
Sporting Lisbon hminga a vawi khat khelhnaah pawh goal hnih a khung nghal a. Portugal hmingin UEFA Under 17 Championship-ah a che tha hle. He championship atanga England U- 17 team hnawhchhuaktu chu Ronaldo telna, Portugal team hi an ni.

Liverpool FC manager ni thin Gérard Houllier chuan naupang kum 16 mi lek, Ronaldo thiamzia chu a lo hmu tawh. Mahse, Liverpool tana han lak tur meuh chuan a la naupang deuh avang leh, la inzir deuh se an tih avangin an hnawl leh.

Liverpool hian an zuah rei deuh pawh a ni ang. Kum 2003 khan Sporting Lisbon leh Manchester United chu Alvalade XXI stadium, Lisbon-a mi hawnnaah an inkhel a, Sir Alex Ferguson ngei mai chuan Ronaldo chu a hmu ve leh ta. Field chhung ding lam leh vei lam sira a chetla vel chu ramhuai mitthi dar ngaithla ang hau mai hian a lo thlir a. Inkhel a zawh meuh chuan United player-te leh Sir Alex ngei pawh chuan Ronaldo thiam an tihzia leh, an club-a khel atana an it thu an sawi ta noh noh mai.

Hetianga player leh coach-ten an khelhpui atana player pakhata an inlungrual thap hi a vang ngawt ang. United player chhuanvawr, David Beckham chuan Real Madrid lam a pan ta bawk si a, United chuan Beckham-a hmun ruak hnawhkhat tur hian Cristiano Ronaldo chu lungsi takin August ni 12, 2003 khan pound maktaduai 12.24 zetin an lei ta hmak mai a. Britain-a rawlthar man to ber a ni nghal.

Bolton Wanderers nen an inkhelh tumin minute 60-na velah an luhtir ve a, field chhungah rei pawh a awm hmain penalty a hlawh nghal. Ferguson-a pawhin a rawlthar lakah chuan rinna a nghat tial tial a, Ronaldo pawhin a khel ngun ve tan viau. October ni 29, 2005 a lo herchhuah meuh chuan Ronaldo chuan Manchester United tana premiership-a an goal 1000-na tur chu a thun ta.

FIFPro Special Young Player of the Year, 2005 atan an thlang a, hemi kum vek hian FIFA Player of the Year 2005-ah 20-na a ni bawk. Kum 2005 season chhung khan a pu Sir Alex-a nen season khat chhunga goal 10 a thun theih leh theih lohah pound 50 an inchawi a. Ronaldo hian goal 9 chiah a thun avangin pu lakah hian £50 chu a chawi ta a nih chu!

Rawlthar mai la ni mah se a lar tial tial a, Manchester United fans-te phei chuan 'khawvelah Ronaldo pakhat chiah a awm a, chu chu kan Ronaldo hi a ni,' tiin an chhuang em em tawh. Kum 2006-ah chuan United player pawimawh leh an innghahna ber tih theih a ni tawh. Hemi kum tawp lamah hian, United chhuahsanin Madrid lam a pan dawn tih thawm a ring hle. Mahse, United chhuahsan a hnekin contract a ziah belh ta zawk a. Barclays Player of the Month Award vawi hnih a zawna dawng thei mi pathum zinga pakhat a ni. Best Premiership Player of 2006 atan thlan a ni bawk.

Ram leh Hnam Tan
Kum 2003 August thla khan Portugal leh Kazakhstan an inkhel a, hemi tum hian Ronaldo chuan ram tana a vawi khat khelhna turin a khel ve a, hemi hnu hi chuan an ram tan mi pawimawh a ni chho deuh char char tawh.

Euro 2004-ah khan Greece nen opening match an khel a, 2-1 in an chak lo a, Portugal goal thun chhun hi Ronaldo pet goal a ni. Semi final-a Netherlands 2–1 an hneh pawh khan goal hmahruai thuntu chu Ronaldo bawk hi a ni.

Kum 2004 Summer Olympic-ah an ram aiawhin a khel leh a, FIFA World Cup qualifying round, European zone-ah goal 7 thunin pet goal tam pahnihna a ni a. June ni 17, 2005 phei kha chuan ram tan vawi 25 a khelhah goal 11 lai a thun ta hial. February ni 6, 2007-ah phei chuan Brazil nen friendly match an khelh tumin a vawi khatna atan Portugal national team captain a ni ta hial. Hemi tum hian Portugal tana goal thun hnem mi pariat zingah a tel phak ve ta a, kum 22 mi lek chuan ram tan thil ropui tak tiin, Portugal tana goal thun hnem ber record a siam theih hial ringtu an tam hle.

England nen World Cup-a an inkhelh tumin England chhuan tawlawl Wayne Rooney hnawhchhuah chungchangah a bultumtute zinga ngaih a nih avangin England fans-te chuan Ronaldo chu tawngkam chhe tinrengin an sawi chhia a, he boruak vang hian United chhuahsanin Madrid lam a pan dawn tih thawm pawh a ring hle a ni. United-ah kir leh pawh ni se England mipuite chuan an lawm vak tawh dawn lo ni-a sawi pawh a tam hle.

FIFA-in Best Young Player a thlannaah pawh internet-a vote thlak a nih avangin England fans tam takte chuan Ronaldo an vote loh phah a, German star Podolski pawh chumi vanga Best Young Player lawmman dawng ta a ni ti pawl te pawh an awm. Nia, Ronaldo hi a tha, World Cup-ah pawh khan a khel tha rêng bawk. He chawimawina dawng tur hian a phu viau a ni.

Mimal leh Kawm Kar Nun
Pa tawng tam zawk zawk a ni lo. Nui sâng reng a nih avangin pa kawm nuam tak nia sawi a ni. Hmui, hmai leh sam enkawl uluk em em, inkhelh dawn tawhah pawh darthlalang hmaah uluk em ema hair style la tuai hlarh hlarh peih niin an sawi. Amah aia rual u deuh zawk, footballer ve tho, Quaresma hi a best friend a ni.

A naupan lai chuan Patrick Kluivert a ngaihsan em avangin 'Kluivert' tiin an ko fiam thin. Tun hnaiah chuan Luis Figo leh Thierry Henry te a ngaisang hle. Mike Tyson hi a nungchung ngeia hmuh a chak em em a, film star zingah chuan Vandamme leh Angelina Jolie a ngaisang em em bawk.

Euro 2004 khan sexiest player atan thlan a ni a, World Cup 2006-ah pawh khan thlan a ni leh bawk. Tunah hian Nike, Pepe Jeans, Extra Joss leh Suzuki cars te faktu atan hman niin, sum thahnem tak a hai lut reng. Tunah hian pound mtd 2-a a lei, Woodford, Greater Manchester-ah a cheng mek a ni.

Vanduaithlak takin September ni 7, 2005 khan a pa, Dinis Aveiro chuan a boralsan. Kum 2005 October thla khan Ronaldo leh mi dang pakhat chu hmeichhe pakhat pawngsual thubuaiah inhnamhnawih vea puh an nih avangin thubuai a nei hman thelh. Mahse, he thilah hian a inhnamhnawih lo tih hriat a ni leh.

YMA Takin Aw!
Vantlang tana theihtawp chhuaha inhman hi Ronaldo duh dan pakhat a ni. Indonesia leh a chhehvela tsunami vanga mi tam takin nunna an chan hnu lawk khan Ronaldo pawhin tsunami tuarte tanpui theih dan kawng zawngin, Indonesia Banda Aceh velah a zin chho ve vat a. Hemi tum hian naupang kum 11 mi, tsunami tuar zinga dam khawchhuak, Martunis leh a pa chu World Cup 2006 qualifiers, June thlaa an khelh tum khan an inkhel en turin a sawm a. An kal man leh ei man zawng zawng a tum sak a. Portugal team-a a khelhpuite zingah thawhlawm khawnsakin, Indonesia-ah chenna In tur tha tak an leisak a ni. Indonesian Vice President leh East Timor President te hmuin, tsunami tuarte tanpui nan a sports gear neihte a lilam a, pound 120,000 a hmuhchhuah chu a hlan nghe nghe.

Tichuan Maw...
Ronaldo hian harsatna leh hrehawm tam tak a tawrhte chu chhel takin a tuarchhuak a, hlawhchhuah hlawhtlinna hlimawmzia hrechiangtu a ni. A thawhrimna leh a taimakna zawng zawngte avangin a hming chu khawvel hmun tinah chawimawiin a awm ta a nih hi.

Football khawvelah a hming a thang chho mek zel. A thang zual zel ang a, a thiam leh a finna te hi United leh Portugal tan malsawmna thlentu a ni chho zel dawn a ni. Mizo footballer-te hnenah hei hi kan sawi ve duh, 'thawhrimna leh beih hram hramna hian hlawhtlinna a hringchhuak 'hin,' tih tê mai hi.

Related Posts :