Khau Phar Thawven!

"Hei khau a puang a, pawn chhuah ngam pawh a ni lo. Inchhungah pawh tukverh pawh kan hawng ngam lo. A buaithlak khawp mai," tiin Lunglei chanchinbumi pakhat chuan Aizawl atanga phone-a betu chu a chhang a, an office-ah pawh khau a tam avangin hna an thawk thei lo a, an tlan haw ringawt niin a sawi.


He thil hi thlen hun hi June 10 zan kha a ni a, zan dar 7:30 vel atangin khau hi a puang thut mai a ni.

Khau hi thawk leh khatah a puang thut a, Venglai chhuk-ah phei chuan lirthei pawh hun darkar 3/4 vel chhung a tlan thei lo.

Venglai chhuk, Art & Culture Auditorium bula street light pahnih chu khau hian an bawm nasa hle a, agriculture deptt. hnathawkte'n rannung thahnain an kap a, leiah an tla ta a ni. Kawngpuia an tla chu buhfai phur truck 3 velin an chil a, khau te chu hriak ngah chi an lo ni si a, kawngpui an tinal ta zuih mai. Hei vang hian lirthei pawh a tlan thei ta lo a, traffic pawh a jam nasa hle. Mipui an pungkhawm luih luih bawk.

"Zan dar 8:30 vel thleng khan, ka chhiar theih chinah bike 12 chuang a tlu tawh," tiin hemi zana a hmuna awm ve Lunglei tlangval pakhat chuan a sawi.

"Zanah hna kan thawk a, mahse, kawngka leh tukverh vel kan khar loh avangin khau hi vawi leh khatah a rawn thlawk lut vak a, awm ngaihna pawh a awm lo. Hna pawh kan thawk zui thei lo a, kan tlan haw ringawt. Kan haw kawngah pawh min tibuai nasa khawp mai," tiin Lunglei-a Zozam Weekly correspondent, Lunglei daily Lunglei Tribune joint editor ni bawk, K Lalrochana chuan a sawi.

Khawlaiah khau hi a tam a, inchhungah pawh tukverh hawng ngam lo khawpin hemi zanah hian Lunglei mipuite chu an awm a ni.

"Keini in hi chu a tam lohna pawl tak a ni ang, tukverh leh kawngka kan khar hma hlauh a, mahse, 500 vel chu a awm ang," tiin Lunglei chanchinbu Vulmawi editor Rinpuia chuan a sawi.

Lunglei-ah hian khau puan hma chawlhkarah khan rannung chi khat a puang tawh bawk a, sorkar lamin a hlauhawm leh hlauhawm loh emaw, thil awmzia engmah a puanzar loh avangin Lunglei chanchinbu thenkhat chuan editorial-ah te pawh an lo tarlang tawh nghe nghe.

June ni 10 zanah hian Lunglei bakah |awipui tlangdung velah pawh khau hi a puang ve bawk.

Tarlan tawh angin, zan dar 7:30 velah khau hi a puang thut a, chumi hnu zan dar 10/11 velah a rem leh mai niin Lunglei atanga thudawn chuan a sawi.

Zing an han thawh chuan, khawlaiah khau hi an lo tla nasa hle a, Lunglei mipuite chuan mahni kawt leh in bul vel an phiat suau suau mai.

A tuk chhunah hian khau hi an reh nileng a, mahse, a puan zanah khan zan dar 7:30 velah a puang tan a, hei vang hian chhun lamah rem mah se zanah a puang leh mai awm mange tih rilru puin pa thenkhat chuan JUne ni 11 zanah an ngaichang hlawm. Mahse, khau hi a puang ta lo a ni.

Lungleia district agriculture office lam chuan khau hi khawkhen vanga puang nia an hriat thu an sawi.

Hun engemaw chen khua a khen hnuah tun hnaiah a sur zauh a, a reh leh si a, chutiang vel vang chuan khau hi a puang ta nia an hriat thuin thuthar lakhawmtu thenkhat zawhna an chhang a ni. Amaherawhchu, an zirchian mek avangin thu chiang an la hre lo tih an sawi thung.

Aizawlah pawh June ni 10 zanah hian hmun thenkhatah chuan khau a tam hle a, street light te pawh an bawm nasa ve hle. Lunglei ang em ni lo mah se hemi zanah hian Aizawl khawlaiah khau a tam hle a ni. Hmun thenkhatah chuan ninawm tham an awm.

Bawngkawna State Guest House-ah chuan mikhualte tan pawh hrehawm khawpin khau hi a tam a, a zan a zanin khualzin thenkhat chu an insawnchhuak nghe nghe.

Guest House-a thleng Advocate General pawh a thlen zan la lain, a thlen atanga darkar li hnuah a chhuak a, Governor chenna in lam a pan a ni.

Khau hi Guest House chhungah chuan an lut chiah lo a, mahse tukverh leh kawngka te chu hawn ngam a ni lo.

Guest House-a thawkte chuan June ni 10-ah khan hoticulture deptt. an hriattir a, HDO C Lalkima hovin khau hi a thahna hlo Carbaryl hmangin an kap a ni.

Heng khau hi Migranting Locust (pem chi) a ni a, a rualin nuai khat chuang te an pem thin tiin mithiamte chuan a sawi. An chaw duhzawng awmna hmuna kal mai tthin niin an sawi bawk. Thlai an tihchhiat dan chiah erawh an la hriat chian loh thu leh an pem duh dan pawh an hriat chian loh thu an sawi.

A hnu-ah pawh Aizawlah chuan zan lamah khau hmuh tur a tam thin hle a, street light an bawm nasa hle. Tin, khawlaiah pawh an ruang hmuh tur a tam thin viau. Lunglei lamah pawh khau hi 'a puang' tia sawi tham ni tawh lo mah se a la tlem chuang lo.

Tun hnaiah Lunglei Luangmuala chhungkaw pakhat chu khauin an vaimim a eisak a, Lunglei-a Zozam Weekly correspondent K Lalrochana chuan vaimim eitu khau hi an ha a hriam hle niin a sawi.

"Luangmual-ah hian ka kal a, an in bul huana an vaimim chu khau hian an lo eisak nual mai a. Hetia khauin vaimim an ei lai hi ka en reng a, an ha a hriam khawp mai. Vaimim par te, a chhawn te an seh chhum hmawk hmawk thei a, a vui pawh an seh chhum hmawk hmawk thei," Rochana chuan a ti.

"An ha a hriam bakah an chak bawkin ka hria, vaimim hnah te pawh an seh a, sak an ti lo," a ti bawk.

Vaimim hi a par leh a chhawn a chhiat chuan a rah a tha thei lo a, 'a pi ha beuh'-ah a chhuak thin.

Related Posts :