Chhungkaw budget khawih buai pha ningzu

Rangvamual nu pakhat chuan zu a tem ngai lo a, a hna ber erawh zu thuhruk leh a thuhruk sa a customer-te hnena hralhchhawn a ni. Nitin khel lovin zing atangin chu hna chu a thawk a, a agent hnen atangin a burin rakzu chu a la chhawng thin.

Chung a zu lakte chu rang takin chow funna sarangah a thun vek a ngai. Rang takin a pek (pack) zung zung a, bur khat, litre 10 lai chu tui nena pawlhin fun thahnem tawk takah a chhuah thin. Bur khat Rs 500-a a lak chu Rs 1300 lai tein a hralh a, cheng 500-800-te bur khat atangin a hlep thei.

Rangvamual chhungkaw tam zawk eizawnna bel ber chu sawrkar phal loh chawltui ning zu a ni. Veng tawntirh atangin zu lei tur a awm a, zalen taka lei theih a ni a, "A thlang tual tuala a tak tual tual an ti," tiin helai hmuna kal thin chuan a sawi a, Phunchawng lamah chuan funte-a zawrh ai chuan a thlawr lam chu an hna pui ber a ni thung.

"Keini aiin zuar chhawng hi an hlawk zawk, zu litre sawm siam nan keini chuan tha leh sum kan seng hnem em em a, litre 10 hi cheng 500-in an la chhawng a, anni'n tui litre thumte an pawlh a, funte hmangin an hralh chhawng a, an hlawk fe zawk," tiin Phunchawnga zu thlawr thin chuan a sawi.

Zu thlawr thinte chuan alkatra barel khat chhuan nan hian cheng 4000-te an chawi thin niin an sawi, a chhuang thinte chu an ruai a, factory neitute hnuaiah hian hnathawk an awm ve leh nual zel a ni.

Thawkkhat lai khan media lama thawkte chuan Rangvamual vela sum leng vel hi chhutin survey ang reng an nei a, chuta an hmuhchhuahah chuan Rangvamualah ringawt hian pawisa hi kar khat chhungin cheng 16,80,000 vel a luanglut anga chhut a ni. Hei hi a tlem lama chhut a ni, a figure hi awih har khawpin a tam.

"Keini chuan ni khatah bur 10 zawh chang kan nei," ti te an awm a, 'bur' an tih hi litre 10 tihna a ni. He mite chhungkua ang hian hralh tha vek lo pawh ni se, chawhrualin bur thum theuh chu hralh tura chhutin kar khatah chuan chhungkaw za vel chuan cheng maktaduai an lo rut hman daih thei dawn niin a lang.

Tun dinhmunah hian rakzu hi a to lem lo a, Rangvamuala kal chilhte chuan funte pali (tikte khat) tia an sawi hi cheng 150-in an lei thei. Hei hi mi pahnih tan chuan khamkhawp a tling phak ang. Mahse a kalna lirthei nei lo tan chuan taxi hmanna mante nen chuan senso a sang hle a, tlai tina zu in thinte chuan chhungkaw budget an khawih buai phak chawk.

"A senchi ngawr ngawr in dawn chuan tu chhungkua mah hian an tuar lo ang, um khat cheng 600-800 te a ni a," tiin sapzu la thinte chuan a sawi a, Aizawl khaw chhungah hian zan rei a nih loh chuan duh hun hunah sapzu hi lak tur a awm, amaherawhchu Lailapur vela cheng 200 man bawr vel kha cheng 600 vela lei a ngai a, a quarter hi cheng 150 man hu vel a ni.

Sapzu zuartu hmeichhe pakhat chuan case hnihte hi chu zan khatah a hralh zawh hman thu a sawi. Case khatah hian um 12 a awm a, zan khatah um 24-te an hralh tihna a ni. Chumi man zat chu cheng 14,400 a ni, he hmeichhe sapzu zuartu hian kar khat chhungin zu manah cheng 1,00,800 ngawt a huilut dawn tihna a ni. Ani hian a hlawma petu a nei a, a hlawma petute hian cheng 400 velin an pe chhawng a, um khatah cheng 200-te a lo hlep ve leh chhawng thin.

"Lirthei, a bik taka siam hmangin an phur thin a, a hlawmin min pe a, keiin a hlawmin pawisa ka pe ve leh mai thin," tiin an sumdawnna chu mumal taka kalpui a nih thu a sawi.

He hmeichhia anga sapzu zuar hi Aizawl khaw chhungah hian hmun tam takah an awm. A thenin zu quality hrang hrangte an zuar a, an ti to deuh a, a then chuan duhthlan tur awm lem lovin Rum chauhte an zuar thung. Whisky chauh zuar an awm a, zuar kawp hi sawi tur an awm zeuh zeuh.

Sorkar phal loh ni mah se hmun tinah zu chu hmuh tur a awm a, local zu an tih mai, rakzu te chu a quality a tha lo em em a, taksa tan pawha thalo a ni. Mahse a in turin Rangvamual lamah mi tam tak an inzui duah duah tho a, in tinah mi thahnem tawk tak an thukhawm dur dur thei reng a ni.

Sapzu kalkawng hi a thui a, sum vir vel pawh a sang hle. Sapzu in pha chinte chu Aizawlah pawh milian tak tak an ni, sum chevel hi chhutchhuah theih chiah pawh a ni lo. Lirthei siam danglama a zuartute pek hna thawktu an awm nual a, chungte chu man hleih theih an ni lo. Demand a san miau avangin supply chu loh theih lovin a awm tiin a sawi theih ang.

Related Posts :