J Lalsangzuala a chawl ta

Tunlai huna Mizopa hriathlawh ber pakhat, politician a nihna bakah valupa ena en hlawh J Lalsangzuala chuan June ni 9 khan khawvel a chhuahsan ta.


John Lalsangzuala hi VZ Biaka leh Sangluaii te fapa a ni a, September ni 24, 1924-ah Kulikawnah a piang a, an unau hi paruk an ni. A pa hi Mizo dawrkai hmasa a ni a, mi neinung hmasa chhungkua an ni.

Kum 1962 October thlaah Silchar-ah Rev. Zairema kutah Indian Christian Marriage Act hmangin Zokhumi, Tirhkoh Muka fanu nen an innei a, fa panga leh tu 11 an nei.

Sikul sen-ah (Govt. LP School) zirna bul a tan a, Govt. Boys' Middle School-ah zir chhunzawmin 1938-ah Middle a zo. St. Anthony's College, Shillong-ah a zir chhunzawm a, Don Bosco Hostel-ah a awm thin.

Indopui pahnihna lai, kum 1941 November khan, pawl kua a zir laiin 1st Bn. Assam Regiment a zawm a, Havildar Clerk hna thawkin Indopui vanglai khan Japan ral kapin Jessami Battle-ah te pawh a hmatawng pawlah a tang chhuak zak a ni. Sipaiah hian a kaisang chak pawl tak a ni. Indopui a zawh hnuah pawh sipaiah awm chhunzawm zelin kum 1958 khan pension-in a chhuak ta a ni.

Assam Regiment-a a tan lai hian Mizo sipaite'n an tangkaipui thin hle. An pension vek hnuah pawh Mizo sipaite chu an hming leh number nen a la hre deuh vek. Sipaia a tan chhung hian Assam, Nagaland, Manipur, Burma, Jammu & Kashmir velah a thawk kual thin.

Sipai atanga a ban hnuah bawrhsap pisa-ah transport department-ah a thawk thin a, kum 1959-70 chhung khan District Soldiers, Sailors and Airmen Board-ah Secretary hna a chelh bawk. Indian National Trust for Art and Cultural Heritage (INTACH) Mizoram Chapter-ah a din tirh (1983) atanga inhmangin a thih thlengin convener a ni.

Mawhphurhna dang a chelh tawh te chu - President, Lions Club, Aizawl, 1978-80; Member, National Confederation of Agriculture & Agricultural Co-operatives, 1980; Chairman, Mizo Ex-Services Multipurpose Co-op. Society, 1972-91; Chairman, Mizoram Apex Marketing Co-op Society, 1973-81; President, Pradesh Consumer Council, 1976-77; Member Director, State Bank of India, NE Circle, 1986-89; President, World War-II Veteran Association leh pawl dang thahnem tham takah taima takin a inhmang chho reng a ni.

Politics lamah sulhnu a ngah hle. MLA-ah 1972-77 (Aizawl South), 1989-93 (Aizawl East-I), 1983-98 (Aizawl East-I) ah te thlantlin a ni. Cabinet minister a ni thin a, finance, home, supply leh department dang dang a enkawl thin. Chief minister tha chhang dawltu te pawh a ni thin nghe nghe.

Rambuai vanglaiin Congress party a zawm a, District leh Pradesh Congress Committee-ah joint secretary, general secretary leh treasurer nihnate a chelh thin. 2005-ah Mizoram Congress Party din a nih khan president a ni a, 2008-a Congress-a an inchhunluh lehin Mizoram Pradesh Congress Committee-ah working president a ni. He chanvo hi a thih thlengin a chelh a ni.

Khawtlanga mi tangkai a ni a, Kulikawna a awm lai leh Mission Veng-a a awm hnuah khawtlang leh YMA hruaitu a ni reng reng thin. Central YMA-ah pawh assistant secretary leh chanvo pawimawh tak takte a chelh tawh. YMCA-ah pawh national president a ni a, amah chauh hi Mizo zingah national president an la awm.

Catholic Kohhran tana mi tangkai tak a ni a, chanvo chi hrang hrang chelhin a thih thlengin Kohhrana mi rinawm a ni. Kraws kawng zawh te hi a ngai pawimawh em em a, a dam phawt chuan a tel ziah thin. Kohhran tana sum thawh kawngah pawh a thawh hlawk thin hle.

Mi tlawmngai, zaidam leh nun nem, sipai bang, social worker hmingtha, politician hlawhtling, tih tak zeta thil ti mi, a telna apianga mite zah leh ngaihsan thin J Lalsangzuala hi lung lam that lohna avangin June ni 9 zan dar 11:10 khan Aizawl Civil hospital-ah a boral a, a tukah Mission Venga a chenna inah ropui taka vui a ni.

Cabinet-a a telpui thin Rokamlova chuan J Lalsangzuala hi hlemhletna rilru pu lo, corruption laka fihlim a nih avangin "Mr Clean" an ti fiam thin a, MICLUN pawhin politician corrupt lo ber award "Josefa Award" chu an pahnih hian an lo hlan tawh nghe nghe. MZP Chanchinbu-in mipui ngaihdan laa politician leh officer zinga corrupt lo ber an thlan tum, 2001-ah khan J Lalsangzuala hi politician zinga corrupt lo berah pahnihna a lo ni tawh bawk.

Related Posts :