Thisen Hlu, Thisen Hlu

YMA Day pualin mamawhte hman turin Branch thenkhat chuan thisen an pe. Tun hma zawng aiin thisen hlutna a pung.

Ramhlun North YMA chuan record siamin tum khatah thisen unit 159 lai an pe a, tum khata a YMA anga thisen pek tam ber tum a ni.

Thisen mamawhna hi a sang hle a, Hospital lian ber Civil hospital chuan thisen hi a tlachham fo thin. Civil hospital mai a ni lo, damdawi in dangte pawhin an mamawh thei hle a. Damloten an mamawh thin avangin an inpuksak thin.

“Thisen mamawhna hi a sang em a ni” tih chu damdawi in a thawkte thuchhuak a ni.

Aizawl khawpuiah damlo thisen pek ngai an awm chuan an chhungten thisen pe tur an zawng thin a. Mi tlawmngaiten an peksak thin.

Chutih rual chuan sawi mai theih loh emergency a zai ngai thut te, tawhsual tawk avanga hliam na tak tuar te an awm thin. Chu’ng mite tan chuan thisen awmsa chu hman a ni thin a.

Aizawl cilvil hospital leh Durtlang hospital chiah hi Mizoram hospital zinga blood bank awm theihna a ni a. Hospital dangte hi chuan chutianga blood bank neih theihnan phalna an la nei ve lo.

Aizawl civil hospital hi private damdawi in zawng zawngin an tawm a ni a. He hospital blood bank atang hian an mamawh an la chhawng ve thin.

Medical superintendent Dr. Lalbiakima chuan thisen mamawhna chu a san reng thu sawiin, “Indaih tih tak tak hi a awm thei lo” tia sawiin, “Dam lo an awm a, kan pek zel a ngai a. Private damdawi in te a lo pung bawk a, heta tangin an la ve leh bawk si a kan indaih tak tak thei lo” tiin Zozam Weekly a hrilh.

Dr. Biakkima chuan sawi belhin, “Vanneihthlak takin a pe hi an awm reng a. Pawl anga pe an awm reng hian nasa takin min chhawk a ni” a ti a, “Chuti chung chuan indaih ti a han sawi hi chu a har khawp mai” tiin a sawi bawk.

Tunlai hian voluntary blood donation drive an kalpui mek thu sawiin, “Tunlai hian voluntary blood donation kan kalpui mek a, hei hian nasa takin min chhawk dawn niin a lang. Thisen pek thatna te, mi nunna chhanna a nihzia te hi mipui kan zirtir a ngai a ni” a ti bawk.

Private hospital ten an rin vek thu sawiin, “Durtlang hospital tih loh hi chuan keini min ring vek a, hei vang hian indaih hi a harsa em em a ni” a ti a, “Hospital dang ten min ring vek a, private hospital anni si a, thisen pek lam uarna tura zirtirna an ti ve si lova” a ti bawk.

Dr. Lalbiakkima chuan, “Tunlaia thisen pek thatna leh hlauhawm lohzia zirtirna kan kalpui mek hian rah tha a chhuah kan beisei a. Mi tinin kan mamawh leh mi nunna chhan theihna a ni tih hi kan hriat a pawimawh a ni” a ti bawk.

Mizoram-ah pawisa a lei chi ni lova ngaih mahse inpek theih zinga hlu ber zingah thisen a tel ngat tawh ngei ang. Thisen hlutna chu a pung kan ti thei ang a, thisen pe thei erawh an tam lem lo hle thung. Thisen pek duh hrim hrim chu an awm a, mahse, an hriselnain a zir loh avangin an pe thei thin lo.

YMA hruaitu pakhat chuan, “Thisen pe duh kan han inko khawm a, an tam khawp mai. Mahse, thisen latute lamin an duhtui si a, a zahve aia tam hi chu an la ngai lo, an fit tlat lo” tiin a sawi bawk.

Zun thlum thisen duh a ni lova, chu ringawt pawh chu buaipui tham a ni. Aizawl khawpuiah hian zunthlum vei an tam em si a.Chumi piah lamah HB a dik tawk a ngai a, he tehna atang ringawta tla pawh hi an tam mai.

Thisen latuten an duh tuia an duhtui a ngai reng bawk. Pek dawn zana mengrei an duh lo, an hriselna an ngaihtuahsak vang a ni. Chuti khawp chuan thisen latute erawh an fimkhur em em thung.

YMA Day denchhenin Ramhlun North YMA chuan thisen pek runpui an nei a, unit 158 lai an pe. Hei hi YMA anga tum khata thisen pek hnem ber a ni.

Ramhlun North YMA president Tlangtimawia Zote chuan thisen an pek chhan sawiin, “YMA Day denchhenin tanpui ngaite tanpui duhna rilru avanga pe kan ni” a ti a, “Thisen hi a hlu a, a hlutna tak hi tanpui ngaite tanpuina atana kan hman tur niah kan ngai” a ti.

Tlangtimawia chuan sawibelhin, “Kan member-te a tam thei ang ber kan pek theihnan ngenna pawh kan siam hial a. Kan tum ang aiin kan pe tlem zawk a ni” a ti a.

“A tam thei ang ber pek kan tum a, kan member-te pawh an inhuam thui em em a. Mahse, hriselna a inchen lova, pe thei tura kan ngaih te pe thei lo tam tak an awm a. Kan beisei kan phak lo zawk niah kan ngai” tiin a sawi bawk.

Thingtlang lam unaute chu an pek chhan ber nia sawiin, “Aizawl khawpuia chengte hi chu thisen mamawh an awm pawhin then leh rualte in pawh mai tur a awm thin. Mahse, thingtlang lam unaute tan erawh thenrual thate an awm loh phei chuan thisen pek a ngaih changin a manganthlak em em thin. Chu’ng mite chu YMA takin kan hre reng a, chu’ng tanpui ngaite kan puih theihna ber nia kan ngaih vangin chu mi rilru pu a pe chu kan ni ber zawk” tiin Zozam Weekly a hrilh bawk.

Ramhlun North YMA chauh ni lo Branch dang leh Kohhran hnuaia thalai pawl ang tein thisen pek runpui buatsaih thin a ni. Hetia thisen pek a nih hian hriat miah lovin midang tana malsawmna nihna a ni a, mi nunna chhanna a ni bawk.

Aizawl civil hospital a thawkte chuan dam lo thisen mamawh an awmin blood bank a mi an lak mai thin thu leh a theih hram chuan dam lo chhung tena an thisen lak hnawhkhah lehnana thisen petu an zawn thin thu an sawi a. Mahse, hmu zo ngang lo leh mi baihvai deuh an awm a nih chuan an hriatthiam tho thu leh an nawr luih lem loh thu an sawi bawk a.

Civil hospital-a thawkte chuan, “Dam lo thisen pek ngai an awmin blood bank a mi kan pe mai a, mahse, a theih hram chuan dam lo chhung ten a dah khah lehna tur thisen rawn ngaihtuah leh theise a duhawm khawp mai. Damdawi in a nih angin emergency awm thut thei reng a ni a, chutiang atan chuan thisen hi a tam tawk tih reng a awm thei lo” tiin an sawi bawk.

Thisen a tam tawk a tih theih loh thu sawiin hospitala thawkte chuan, “Engmah a sawi lawk theih loh, a then chu emergency a zai ngaite an ni a, chutiangin thil sawi lawk theih a ni lo. Blood Bank-ah hian thisen tam tawk a awm reng a ngai a ni tawp mai” an ti.

Mi tam tak chuan thisen pek chu Mizo tlawmngaihna lanchhuahtirna tha berte zingah an ngai a. Hmanlai angin khaw kara zualko a kal a ngai tawh lo. Khawhar In riahpui leh thlan laih te pawh khawvel changkanna avangin her danglam a ni tawh. Tunah chuan thisen pek chu tlawmngaihna lanchhuah tirna tha berah an ngai hial tawh zawk a ni.

Phailamah leh Mizoram pawnah chuan thisen hi an inleisak thin. Mizoram-ah erawh thisen in leisak a la awm ve thung lo. Chutih a hnekin thisen tum 40 chuang pe tawh pawh an awm fur a, chu’ng mite chuan thisen pek hlauhawm loh zia an lantir.

Related Posts :