Nalhna Thuruk - Cosmetic Surgery

Sap thufingah chuan, “Hmelthatna leh mawina chu a entu mit a zir a ni”, tih a ni a. Chutih rual chuan hmeltha leh nalh kan tih hi hun inher zelah hian a danglam chho zel a. Nalh leh hmelthatna atana inhnawih ilo, sam sawngbawl leh tlereuh inbeh thleng hian kan khawvel hian a pawm vek tawh a. Mahse, mawl lai huna taksa nghaisak chiam ang chi erawh kha chu kan than san tawh niin a lang.

'Cosmetic surgery' kan ti emaw 'Aesthetic surgery' kan tih emaw hi tunlaia damdawi thiamna lamah chuan a lar chak ber a ni mai awm e. A bikin mahni lan dan ngai pawimawh thalai-ho zingah a tlangtla zual a. Thiamna sang leh tunlai zawk hmanga thiltih theih a lo nih tawh bakah hetiang ngai pawimawhtu thalaite hian an sum sen ngai lova anmahni ruaitute’n an ruahman sak mai thin tawh avangin a lo lar zual ta a ni..

Hetiang khawpa thangthar-te nuna bet tawh ‘Cosmetic surgery’ leh ‘plastic surgery’ bel chiang tur hian Assam-a hetiang lam thiam hmingthang Dr. M.L. Pathak chu kan kawm fuh thei hlauh mai a. Thangtharte beng tih var bakah hmang tangkai duh tana a chhenfakawm dawn a kan hriat avangin Dr. Pathak kan biangbiakna hi kan rawn ti chhuak ta a ni. Dr. Pathak hian MBBS leh MS (General Surgery) a zir zawh hnu-ah Mumbai-a J.J. Hospital of Grant Medical College atangin plastic surgery hi a hranpa ngatin a zir chhuak leh a. Kum 1989-a M.Ch. a zawh leh hnu hian Guwahati-a Nursing Home leh Hospital hrang hrangah a thawk kual a. Chutih rual chuan khawvel huapa kut zai mawi thiam hmingthang Dr B.B. Joshi bakah Chicago khawpui (US)-a cosmetic surgeon hmingthang Dr S.P. Arumugam te kephah bulah a seilian chho bawk a. A hnen atang hian Cosmetic Surgery leh Plastic Surgery hi engemaw chen hriat ve i han tum teh ang u:

Plastic Surgery leh Cosmetic Surgery te hi mi naran hriat thiam theih turin min hrilhfiah thei em?
‘Plastic tih thumal hi Latin tawnga ‘Plastique’ atanga lokal a ni a, a awmzia chu ‘hmelhmang nei-a hmet hlawm’ tihna a ni a. Mihring taksa peng pakhat kha chhiat tawhna vang emaw natna vang emaw-a a chhiat emaw chuan taksa hrisel lai la chhuakin siam that leh kan tum thin. Entirna’n, mi pakhatin a kutzungtang hloh ta sela, plastic surgeon chuan a kutzungtang thlakna turin a dang kan siam ang a, a hmaa a hnathawh theih ang thova thawk thei tura siam kan tum thin a ni. Cosmetic surgery erawh chuan chumi piah lamah nalh leh mawi taka siam chu a hna a ni.

Mihring tungchhova kal tawh phawt chuan nalh leh hmelthat hi kan ngai pawimawh theuh mai a, nalh leh hmeltha nia kan hriat dan erawh chu a inanglo vek niin a lang a. Chu chu dik i ti em?
Dik teh lul mai. Nalh leh mawi kan tihte hi mi hrang hrangah a danglam mai a ni lova, a hun leh hmun a zirin a danglam thei hle. Mihring taksa ser siam leh rawng inhnawihte hi hmakhawsang atanga lo chin than tawh a ni a, min thlahtute khan an taksa, chirh leh thildang hmanga an chei atangin hetiang thil hi a lo intan a ni mahna. Tunlaiin nula hnute lian leh kawh deuh a mawiin a itawm kan ti a, kum 1970 bawr chhovah erawh kha chuan hnute te leh khal deuh kha mawi an ti daih zawk tlat a ni.

Hmeichhe tam tak hian an hnute te lutuk hi tih lan len tumin hnute hrenna (bra) dup leh chhah an hreng thin a. Hei hi Cosmetic surgery hmangin an duh angin a siam theih em? A him tawk em?
Hnute hi hmeichhiate ti-hmeichhiatu pawimawh tak a ni a, hnute nei te deuh chuan midang hnute lian deuh aia indah hniamna leh itawmlo deuhva inhriatna a nei chawk thin. Hetiang hnute nei te deuhte hi ‘augmentation mammoplasty’ an tih mai hmangin a tihlen theih a. Operation awlsam te-a tih theih, hnute chhunga silicon prosthesis thun-a tih theih mai a ni. Hei hian hnute-in thil a hriat theihna a tidanglam lova, nu-in nausen hnute a pek a khawih buai hek lo. A zai dan a awlsam avang leh a him avangin miin an uar tawh khawp mai.


Hemi rual hian hnute lian lutuk hi a hahthlakin a hnawk thei riau thung a. A tih tet duh awm ta sela i tanpui thei em?
Nula tan hnute lian lutuk hi a nalh lo thei a, mahni inrin tawkna pawh a tihkiam theih bakah infiamna lam tih dawnin harsatna a thlen thei. Chubakah incheina tunlai deuh pawh mi angin an ha thei lova, an hnute lian thupna’n kawr thawl deuh ha-in nu hnuanga inchei a tul fo thin. Hetiang a nih hian nghawng leh hnungzang a uai khawlo thei bawk. Duhdan angin hnute hi a siam theih a, a fual lutuk pawh a tih chhin theih bawk.

Hnar, hmui leh khabe inhmeh tlang hian mihring a ti hmeltha a. Hnar a len lutuk emaw a perh lutuk emaw, hmui a chhah lutuk emaw a pan lutuk emaw, khabe lian lutuk emaw, te lutuk emaw hian hmelhmang inchawih lo a siam thei a, hmel a ti nalh lo thei. Hetiang siam dik tur hian Cosmetic surgery hi a hman tlak em?
Hmel that leh that loh a kori tu ber pakhat chu hnar hi a ni a, chutih rual chuan a dang, hmui leh khabe te pawh hian hnar nalh tak rem turin an insiam rem ve a tul thin. Hnar len zawng hian mihring zia a pho niin an sawi thin a, hnar lian lutuk chu an sual hmel a, hnar te lutuk chu an nun a chaklo duh tite-in an sawi thin. India ramah hian Isua pian hma kum 600 vel daih tawhah khan hnar hi an lo zai thiam tawh a. Hnar hleh thlak hi hmakhawsanga India rama inhremna chi khat an hman rim pawl tak a lo ni tawh thin bawk. Taksa peng hloh a tak anga din thar lehna dan hi Sussutu Samhita chuan a lehkhabu-ah a lo ziak daih tawh a ni.


Mi hnar kan en rual hian a chal leh a mitko kan en tel thin a, chuvangin hnar kan siamthat rualin hengte hi en tel a tul thin. Mihring hi a hnam leh a chi a zirin a hnar a danglam thei hle a. Asia khawmualpui-a chengte hi chuan an hnar siamthat an duh lai ber chu hnar ngul tihsan leh a invuahna tih tet a ni chawk. Hnar ngul tihsanna tur hian hmanraw chi tam tak a hman theih a. Hnar ruh pawh hi mahni ruh khawi ami emaw thunin lang miah lovin a siam that theih a. Anmahni ruh tereuhte kan lak chhuah hian engmah ‘side effect’ a nei lo. Kan zai lai erawh chuan hnimhlum pangngai erawh chu kan hmang. Ruh aiah a hnar kan thlak tur taksa hlawm (cartilage) kan hmang thei a, siam chawp, entirna’n silastic implant te kan hmang thei bawk. Hnar lian lutuk chu an hnar ruh thel tet theih a ni a. Hnar hmawr zum a nalh loh chuan tip plasty hmangin a siam dik theih bawk. Mi thenkhat hnar ngul kawi leh herh deuh te’n min rawn pan thin bawk a. Pawn lam lang theia kawi a nih rualin a chhunglama a insikna lai fuhlo a ni duh hle a, hnar kuaa hnawhtu awm a ni thei thin. Chutiang a nih chuan a lang thei siam nalh rualin a chhung lam diklo pawh siam that nghal a tul a. Chutiang chu ‘septo-rhinoplasty’ kan vuah. Hnar ngul a sei lutukin a tihtawi theih a, chu chu hnar chhung lam atanga khawih a ngai thin. Rhinoplasty in a tum ber chu a hmel nena inhmeh tawka a hnar siam dik a ni.

Hnar ang bawk hian khabe hi hmel lan dana awmze nei tak a ni a. Khabe hi a te lutuk thei a, a vawng lutuk thei bawk a. Khabe te lutuk tilian tur hian ‘aesthetic rhinoplasty’ hmanga zai mai a tawk lova, ‘Silastic implant’ a tul thin a, siam chawp phumna turin tereuhte a zaikuak a tul thin. Khabe lian erawh chu a khabe ruh tlem lak chhuahin a tih theih mai. Hmui pawh hi hmai nen inhmeh tawk a awm a, chuti a nih loh chuan a nalh thei lo. Hmui lian leh chhah lutuk chu hmui chhunga tisa tlemte lak chhuahin a siam theih mai a, hmui pan lutuk pawh ama taksa a thau emaw thil dang emaw kaplutin chhah mawi tawkin a siam leh theih mai a ni.

Submental Lipectomy: Hmai thau lutuk hian hmel a ti nalh lo thei hle a, thalai hmel tha tak pawh inbuk tawk lova a siam bakah upa lam deuh pawh chuti tho a ni. Pa valai leh nu valai pawh hetianga an awm chuan an tar hma bikin a lang thei a ni. Chuvangin hetiang hi zai dik thuai a tul a, hetianga hmaia thau tam lutuk hi harsa lo taka zai dik theih a ni.

Thau lutuk tihreh dan hi tam tak a awm a, thil ei tlemte, insawizawite, damdawi hmanga inenkawlte leh zai te a ni a, mahse awmzia a nei thuk ngai vak lova, harsatna namenlo a siam thei zawk fo thin. Plastic emaw Cosmetic surgery emaw hian tih theih a nei em?
A pawn lam lan dan mawiloh piahah hian thau lutuk hi tihbo a tul hle a. Tun kum-zabi chhung hian rih lutuk leh thau lutuk vanga harsatna thlengin thihna a thlen hi a tam ta hle mai. Thau leh taksa rit lutuk hian thin natna a thlen theih bakah zun thlum vei pawh a awlsam em em a ni.



Hemi ti tur chuan ‘liposuction’ kan tih hi a pawimawh hle. Thau lutuk-te thau hip chhuah hian zun thlum la veilo leh vei mekte pawh a ti hriselin a an natna a ti ziaawm thei. Tunhmaa zai dan ‘dry technique’ an tih kha tunah chuan an ching tawh lova, ‘loposuction’ an tih hi khawvelah a lar ta hle mai. ‘Wet technique’ an tih mai leh ‘supra wet technique’ te hi medical science-ah telh a ni ta. Liposuction hmanga mi zai hian a zai tawktu a hlima a lungawi tluk zetin a zaitu pawh a hlim thin a, zai hi a hlawhtling em em zel bawk a ni. Liposuction hmanga zai hian hnimhlum pangngai a hman theih a, ‘regional anaesthesia’ leh ‘supplemental local anaesthesia’ in a tih theih bawk. Vun tlemte zai hawngin chutah chuan dawt an thun a, chu dawt chu silicon pipe nena zawmin hip chhuahna khawlah an zawm leh thin. Hetianga zai hian harsatna nei zui an tlem hle a ni.

Nausen an hrin hlim hian nu tam tak chu an dulah vun fual leh puar hnek hnuk a awm thei thin a. He harsatna hi engtia tihkian theih nge?
Hmeichhe taksa hi an kawngah a zim a, mawngbawrah a lian thin a, dul hnuailam, mawngbawr leh mal velah hian thau a tla khawm thin. Mipa erawh chu darpharh lam a hlai a, a te thla zel thina, ‘V’ shape ang deuh a ni. Nau neih hlima an rihna an hloh bawk si hnu khan an vun kha a lo dul a, a mar hlei thei ta lova. Hemi avang hian dul thuara tihrawl chu a lo chak ta lova. Hetiangah hi chuan ‘abdomino-plasty’ hman a ni thin a. Tihrawl chaklo kha ti chakin vun dul kha tihbo a ni a, lai (umbilicus) kha an dah dik leh ta thin a. Mi thenkhatah chuan ‘liposuction’ an hman rualin ‘abdominoplasty’ pawh an hmang tel nghal thin.

Mi an kum a lo tam chhoh deuhvin an chal, hmai leh nghawngah te vun a lo chuar thin a. Hmai vun chuar hi mi tam tak tan chuan a vanduai thlak a. Kan tunlai khawvela hna kan thawh dan leh kan nun chan hian naupang te te atangin vun chuar hi a siam leh ta nghal thin a. A tih that dan a awm em?


Chal chuar te, hmai leh nghawng chuarte chu awm teh meuh mai e. Tihdan hrang hrang an hman hnu-in SMAS an tih mai hi an hmu chhuak thar a. Hemi hmang hian lang mang miah lovin hmel chuar hi a siam that theih a. Tunah phei chuan SMAS aia tha ‘Round Block Technique’ (RBT) hmangin tereuhte zai kuakin a siam dik theih tawh a ni.
(awm zel tur)

Related Posts :