¢ Vanlalremruata Tonson
Sorkarin sum tam tak sengin mau hmanga thil thawnchhuah tur a buaipui a, chief minister chhuak ta Zoramthanga phei chu mau hi Mizoram mipuite'n an hriatrengna tur pakhat a ni ang. Sum tam tak sengin sorkar chuan mau chin a buaipui a, mahse, mipui bengverh tur thil thleng a awm lem lo. Sum tam tak sengin mipui inhlawhna tur siamna tur a ni, tia insawi thiamin Venus Bamboo Pvt Ltd te pawh din a ni. Mau ni lovin thing an khawih a, sorkar nena joint venture a nih avangin clearance-ah te harsatna an tawk lo a ni ang, mi 100 chuang chuangin an thawk mup mup a, mipui a nghawng dan erawh chu eirukna bupuia puh a nih thu kha a ni. Tunah chuan an khar tawh a, electric pawh an nei tawh lo.
Chutiang chu Mizoramin mau chungchanga a thil lo tawn ve (experience) a ni a, hun engemaw chen chu thangtharte ngaihtuahnaah hian a cham ngei ang. Mahse, mau chungchanga hmalakna zawng zawng hi a hlawhchham fai thak lo tih erawh chu LZ Bamboo Industry hian a tichiang.
Lallura Pachuau chu a hlawhtling thawkhat tawh, mahse, vawi engemaw zat hlawhchhama a vahvaih hnuah a ni a hlawhtlin ni. Tunah chuan kum za tel vaihoin an lo siamchhuah tawh agarbati chu vaiho siam aia tha leh man tlawm zawkin a siamchhuak thei ta niin a insawi.
Inrinni kal ta khan Ramhlun North-a LZ Bamboo Industry office-ah an agarbati siamchhuah 'first lighting' programme hman a ni. Mizorama industry lam tihhmasawnna phurpuitu KM Deka, Small Industries Development Bank of India-a (SIDBI) an assistant general manager-in thuthar lakhawmtute leh Mizoram Chamber of Industry hruaitute hmaah a hal rim nam chek a ni.
Lallura chuan agarbati kuang hi, 2003-a hma a lak tan hnuah 2005 khan truck trip khat a thawnchhuak ve tawk a, chu pawh chu vaiho chuan lei tlak tak takah an lo ngai lo niin a sawi. Mahse, tha zawka siam dan a hmuchhuak a, mautam avanga mau hmanga thil siamchhuak tura hmalak hleih theih loh ni awma mi thenkhatin an sawi laiin ani chuan chawlhkar khatah truck trip thumte a lo thawn chhuak thung. Mautam chuan a nghawng thu-ah chuan a nghawng ve ngei a, mahse, thawnchhuah tur tawk chu a nei thei tho.
Agarbati kuang a thawnchhuak ta a, mahse, amah thahnemngaih puitu thenkhatin a kuang chauh ni lo agarbati ngei siam law law turin an rawn thin a, chu chuan ngaihtuahna thar pein, February 2009-a a siam dan mi pakhat atanga a hriat hnuah 'raw agarbati' a siamchhuak ta a ni.
Mau a tam a, a man a tlawm avangin vaiho aia tlawmin agarbati a pe thei a, a hrual a zir a, a thiam hnuah chuan vaiho aiin a hrual nalh zawk a, a agarbati an lei hian vaiho tan a hlawk zawk tlat. Tichuan, agarbati siam dan chu mite a zirtir zel a.
Mahse, ani siamchhuah chu a rimtui ve lo. Raw-bati an ti a, vaiho a zuk pe a, anni'n a tihrimtuinaah an lo chiah a, a man to zawkin an lo hralh chhawng ve leh thin a ni.
Kal zel a duh a, a tihrimtui dan chu a hrechhuak ta. Chu chu a business secret a ni ve tawh. Hmabak a neih chu thawnchhuah tham agarbati hrual thei tura mi zirtir a ni a, chungho chu a ruai ang a, an hrual zawh chu tui rimtui, a pawlh dan tur a hmuhchhuahah hian a chiah ang a, a thawnchhuak tawh dawn a ni.
Ani chuan cheng tluklehdingawn 100 chuang man order a hmu nghal pang mai niin a sawi a. A tam hmel em a, tak tak ni maw.
A lan dan maiah chuan Lallura hian billionaire nih hi a hma bak a ni ber. Mahse, chutiang dinhmun a thlenna kawng chu thui ve tak a ni. 1997 vel khan industry lama a thiante nen bamboo base industry hi an lo tuipui tan tawh a, an kal a, hlawkna an hmuh hmasak chang leh harsatna paltlang turin an inthendarh a. Lallura chuan 2003 khan Sihhmui, Sairangah bul a tan a ni.
MJ Industry, Bangalore atangin kawlphetha chakna hmang (electric operated) khawl 25 ngawt a lei a, pakhat Rs 25000 zelin a lei. Chu chu thingtlangah a semchhuak a, anni'n agarbati kuang siam nan an lo hmang. An agarbati kuang siam chu a lo leikhawm leh a, chu chu 2005-a truck trip khat, Kolkata-a a thawn thlaka kha a ni. Mahse, a sir te kha a lo mam tha tawk lo, "A quality a lo tha tawk lo a," a ti. Khawl thar a dap leh ta a ni.
A hmu zo lo a, Tripura lamah chuan KVI siam man tlawm te tein a awm tih mi sawi a hre thung. A buaipui leh ta. Mahse, Vijaya Bank-a loan laa hma lo la a nih avangin ba thinna chuan a ti buai hle. "Loan rulh ngai rilru hah vangin i nupui hi beng tawh reng reng suh ka ti," tiin a rilru hah leh buai dan hretu a thian pakhat chuan a sawi nghe nghe.
Khatih laia Mizoram chief minister, mau hman tangkai dan a awm tih hretu Zoramthanga chuan a hmalakna chu a lo tuipui a, Mizoramin mautam a doletna tur atana ruahman - Baffacos sum chu ZIDCO kaltlangin a puktir ta a ni.
Chu sum hmang chuan a lo chetsual tawhna atang chuan a chhuak ta a ni, Vijaya Bank-a a leiba a rul. Khawl man tlawm zawk, Tripura lam siam a hmuh atanga a ngaihtuah chhuah chu a buaipui chhunzawm ta. Burma lam atangin horse blade a chah thla teuh a, chumi hmang chuan khawl mawl te siamin thingtlangah chuan a sem leh. Chu khawl mawl te hmanga hlawhtlin takna chu amah pawhin mawlmang a ti ve tho.
A thenin ramhnuaiah an keng a, a thenin khawhar inah titi paha hman turin an keng a, agarbati kuang an siam sup sup mai niin Lallura chuan a sawi.
A tirah chuan a Kg-ah Rs 8-in thingtlanga an siam agarbati kuang chu a lo leikhawm a, a quality tha zawka siam dan a zirtir zel a, a quality that dan azirin Rs 9-12 tein Kg 1 chu a lei ta a ni.
Tunah phei chuan Kg-ah Rs 15-in a lei thei tawh a, kumtin truck trip 150 vel a thawnchhuak thei tawh a ni.
Khawl mawlmang tak hmanga a hlawhtlin hnu-ah a thudawn chu sikul naupang pawhin an sikul banah homework an ti sawk sawk a, an zawh veleh agarbati kuang siamna khawlah an bur lehchat thin tihte a ni. Tar tak tak pawhin an chu khawl mawl te chu an hum a, a kudam chu hmawlhte sin tak tak hian a khat a, a ruak a, a khat leh thin. Thingtlang atangin bus-ah te an rawn thawn a, Aizawlah an lo buk a, an rawn thunna ip chu a man nen an thawn let mai thin.
"Inring tawn ngam takin thil kan ti," Lallura chuan a ti.
Thingtlang hmun hrang hrang atanga an thawnkhawm, a office leh kudam-a a dah chu a hman tak loh khawl pakhat siamtute chuan an khawl fak nan a rukin an lo hmang a, a office leh kudam-ah thlalak phal a nih loh thu a tar phah ta nghe nghe niin Lallura chuan a office thlalak pawng lak mai mai phal a nih loh chhan a sawifiah.
Lallura ngaihdanah chuan India chu khawvela mihring tamna ber dawttu a ni a, chu chuan 80% chuang chu nitina agarbati hal thin, sakhuana avanga hal thin an ni. India ram chauh a ni lo, ram pawnah thleng hian agarbati hal thin sakhua an tam hle. Chuvangin chhiarkawp zawnga chhut pawhin agarbati emaw a kuang emaw siam chu a hlawk lo thei lo a, chutiang hmathlir nei chung chuan theihtawp chhuahin huaisen takin hma a la a, tun hi a thleng ta a ni.
No comments:
Post a Comment