Burma rama pianga seilian Pan-i chu Mizoramah a cham mek a, a thla a ngam hle.
"Nuam ka ti a, nuam ka ti tak zet, Mizoram chu nuam tak a ni," a ti.
"Chhaktiang kawlrawna leng" Pan-i hi Mizoramah mipui hmaah a zai ve ta a, a beisei phak bakin mipuiin an lo lawm a ni.
Zaithiam Lalpanliani leh T Melody te hian Mizoram khaw hrang hrang tlawhkual an tum a, May ni 8&9 zanah khan Kolasib-ah chuan concert an nei tawh nghe nghe.
Kolasib-ah hian Hmar Veng Field-ah concert hi an nei a, mipui an thahnem hle. Kolasib tlangval pakhat phei chuan: "Kolasib-ah hian concert hrang hrangah ka kal ve thin a, T Melody concert tluka mipui an tam kha ka la hre lo," a ti hial.
T Melody leh Pan-i te hian an hla larte an sa a, mipuiin an lo zawm dual dual mai. Mipuiin nuam an ti a, a concert neia te'n nuam an ti bawk.
"Mipui an tam sia, kan hla te kha an lo thiam ve zel a, a nuam lutuk," Pan-i chuan a ti a, "Engkim kha ka beisei phak bak a ni. Khatiang khan mipuiin min lo lawm ang tih ka ring pha lo a, khatiang khan kan hla te an lo sa ve thei ang tih pawh ka ring pha lo. A nuam a ni tawp mai," a ti bawk.
Kolasib-ah hian Pan-i te hian 'Duhaisam' tih hla an sa a, "Chhaktiang kawlrawnah hian leng mah ila..." tih kha. Pan-i bakah Lalnunsanga leh Zaithanmawia te pawh an mittui a tla a ni awm e!
Lelte Award sem zanah khan Pan-i hi a zai a, chu chu Mizoramah mipui hmaa a zai vawi khatna a ni. Kolasib-a an concert hi a dawttu chu a ni a, a tawn tawh chinah Pan-i chuan a beisei phak bakin Mizoram mipuiin an lawm tih a sawi.
"Mizoram mipui hi kan chungah an tha em em a, kan kalna velah pawh rin loh deuh deuhin min lo hre ve zel a, hetiang hian min en ang tih ka ring pha lo. Mizoram chu a nuam kan ti tak zet a ni
"Min lo ngaina vetu, kan zai te lo ngaina vetu Mizoramah an lo tam a, kan lawm em em a. Sawi tawh angin, hetiang hi kan beisei pha lo reng reng a. Mahni fans te nen hetia kan inhmu thei hi nuam kan ti a, kan vannei kan ti khawp mai. Mizo mipui chungah hian lawmthu ka sawi a, lawmthu bak sawi tur ka hre lo," a ti bawk.
Pan-i chuahian Mizoram chu nuam a ti tak zet a, awmhlen hial mai te pawh a chak! "Awmhlen mai pawh a chakawm alawm, hawina lam apiangah mahni unaute kan hmu bawk si a," a ti.
Mahse, "Chakawm viau mah se awmhlen ngawt chu a buaithlak alawm, rawn pen ringawt te chu a harsa ve a," a ti thung.
Pan-i hi Champhai chhak lawka khaw pakhat, Thinglei khawchhuak a ni a, Thinglei atang chuan Tahan-ah pemin, chuta tang chuan Rangoon-ah an pem leh a, Rangoon-ah hian chhungkuain an khawsa a ni.
A nuta pakhat nen TEBS-ah (Theocentric Evangilical Bible Seminary) lecturer hna an thawk a, tunlai hi an chawlh lai a ni.
Chawlh hun remchang chuhin a nuta nen hian an pianna khua Thinglei-ah rawngbawlin an zin a, chuta an cham lai chuan Aizawl-a cham mek T Melody te nen inbiain, Aizawl an rawn pan ve ta a ni.
Mizoramah hian khawpui thenkhat tlawhkual an tum a, May ni 15 & 16-ah Lunglei-ah concert neih an tum. Aizawlah chuan May ni 22 & 23-ah neih an tum a, hmun hrang hrang atangin sawmna an dawng nasa hle.
No comments:
Post a Comment